Tanobada ena Lauma
Anina: Ia be siahu ta; Iehova Dirava ena hesiai gaukarana idia karaia lasi taudia ia hasiahudia, Dirava ia ura lasi herevadia do idia gwauraia bona ia ura lasi karadia do idia karaia totona. Ena be taunimanima ta ta be mai edia kara ta ta, to tanobada ena lauma idia abia taudia edia lalohadai, edia kara, bona idia tahua gaudia be hari ia noho tanobada oromana ena hegeregerena. Satana be inai tanobada ena lohia bona ena dirava.
Dahaka dainai tanobada ena lauma ese ta ia hamiroa sisina be namo lasi?
1 Ioane 5:19: “Satani ese tanobada taudia ibounai ia gunalaia noho.” (Satana ena lauma, iena siahu unai, ese Iehova ena hesiai gaukarana idia karaia lasi taudia edia lalohadai bona edia kara ia biagudia. Unai siahu ese sibodia edia namo tahua karana bona hekokoroku ia havaraia, bona hodahoda bamona ia be gabu ibounai dekenai ia noho. Namona be ita naria namonamo, iseda mauri do ia biagua bena Satana ena siahu henunai do ita noho garina.)
Apok. 12:9: “Huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.” (Unai ia vara, lagani 1914 ai Basileia ia vara negana murinai, bona unai nega amo ema bona hari, Satana bona ena aneru dikadia edia siahu ia bada ia lao vadaeni taunimanima dekediai. Iena siahu ese taunimanima ia doridia, sibodia edia namo idia tahua totona bona dagedage karadia idia karaia totona. Satana ese Iehova ena hesiai gaukarana idia tahua taudia ia doridia toho, inai tanobada taudia ai do idia lao bona taunimanima oredia edia kara do idia tohotohoa bona tomadiho momokani do idia rakatania totona.)
Tanobada ena lauma ena kara haida be dahaka, idia dainai ita naria namonamo be gau badana?
1 Kor. 2:12: “Ita be inai tanobada ena lauma ita abia lasi. To Dirava dekena amo ia mai Lauma ita abia vadaeni, Dirava ese ita ia henia gaudia do ita diba namonamo totona.” (Bema tanobada ena lauma be taunimanima ta ena lalohadai bona ena ura dekenai ia tubu, nega sisina murinai ena huahua be unai tau ena kara dekenai do idia hedinarai. Unai dainai, inai tanobada ena lauma amo ita siri totona, namona be Keristen lasi karadia ita dadaraia sibona lasi, to Dirava ena lauma idia hahedinaraia lalohadaidia ita goadalaia bona mai eda momokani ida iena kara ita ura henidia be namo. Namona be unai oi laloa noho, henu herevadia, tanobada ena lauma ena kara herevadia, oi tahua neganai.)
Dirava ena ura idia laloa lasi, to sibodia edia ura idia tahua
Satana ese Eva ia ha-uraia, sibona ena lalona do ia hadaia dahaka be namo bona dahaka be dika. (Gen. 3:3-5; ma danu Hereva Lada-isidia 3:5, 6 itaia.) Eva ena kara idia tohotohoa taudia momo be Dirava ena ura taunimanima dekenai idia diba lasi, bona idia ura lasi do idia diba. Sibodia edia ura hegeregerena idia kara. Dirava ena taravatu idia diba bona idia badinaia toho taudia idia naria namonamo be namo, tanobada ena lauma ese do ia veridia garina, bena Dirava ena sisiba do idia dadaraia mai edia ura ida, badina be reana idia laloa unai be ‘gau maragidia’ sisibalaia herevadia mo.—Luka 16:10; inai sinado “Ura-Kwalimu” itaia danu.
Mai edia hekokoroku ida idia kara
Sibona ena hekokoroku ese ena lalona ia hakererea tauna ginigunana be Satana. (Esekiel 28:17; Hereva Lada-isidia 16:5 itaia.) Ia lohiaia tanobadana lalonai hekokoroku ese taunimanima ia hapararadia; edia hekokoroku dainai idia laloa edia bese, edia iduhu, edia gado, bona edia kohu ese taunimanima oredia edia idia hereaia. Reana Dirava ena hesiai taudia haida danu be unai bamona idia laloa sisina, unai dainai namona be unai lalohadai idia negea. Namona be idia naria namonamo, hekokoroku dainai gau maragidia be do idia gwauraidia gau badadia garina, eiava sibodia edia kerere do idia gwauraia hedinarai lasi bona sisiba do idia abia dae lasi, bena unai dainai Iehova ese ena orea amo ia henia heduruna do idia abia lasi garina.—Roma 12:3; 1 Pet. 5:5.
Siahu taudia idia gwau-edeede henidia
Satana ena ladana ena anina be “Inai Tauna,” Dirava ena inai tauna unai; ia ese gwau-edeede karana ia hamatamaia. Reana Nimrod ena ladana ena anina be “Do Ita Gwau-edeede”; ia ese Iehova ia gwau-edeede henia neganai, ia hahedinaraia ia be Satana ena natuna ta. Gwau-edeede dadaraia karana ese Dirava idia gari henia taudia do ia durudia, tanobada ena siahu taudia do idia gwau-edeede henidia lasi totona (Roma 13:1); memero kekeni do ia durudia, edia tamadia sinadia do idia kamonai henidia totona (Kol. 3:20); ita do ia naria, bena Dirava ena orea idia rakatania taudia, ena orea lalonai dagi ia henidia taudia idia matauraidia lasi taudia, do ita bogadia hisi lasi.—Iuda 11; Heb. 13:17.
Edia tauanina edia ura dikadia idia karaia badabada
Unai kara dainai idia vara gaudia be gabu ibounai dekenai ita itaia diba bona ita kamonai diba. Namona be nega ibounai ita naria namonamo ia dainai. (1 Ioane 2:16; Ef. 4:17, 19; Gal. 5:19-21) Taunimanima ta ena lalohadai bona ena ura be inai gau dekenai idia hedinarai: ena kiki herevadia; ena hevaseha herevadia; ia kamonai anedia edia hereva; iena mavaru dalana; TV o vidio dekenai ia raraia piksadia, lebulebu karadia idia hahedinaraia gaudia unai. Tanobada ena lauma ese ia biagudia dainai edia tauanina edia ura dikadia idia koua lasi taudia ese drag idia ania kava, idia inuinu kekero, idia heudahanai, idia sihari kava, bona tatau ese tatau idia sihari henidia. Bema ta ese ena adavana ia hadihoa Baibel ena taravatu hegeregerena lasi, bena ma ta ia adavaia, tanobada ena lauma ia hahedinaraia unai.—Mal. 2:16.
Idia itaia gaudia ura henidia bada urana ese edia mauri ia biagua
Satana ese unai bamona ura be Eva lalonai ia havaraia, unai amo ia ha-uraia kara ta do ia karaia bena Dirava ia tura henia karana do ia hadikaia totona. (Gen. 3:6; 1 Ioane 2:16) Iesu ese unai bamona hedibagani ia dadaraia mai ena goada ida. (Mat. 4:8-10) Idia ura Iehova do idia hamoalea taudia idia naria namonamo be namo, tanobada ena bisinesi taudia ese edia lalona do idia veria bena idia itaia kohudia iboudiai do idia ura abia garina. Unai ura ese ia veridia taudia ese lalohisihisi momo idia davaria bona lauma dalanai idia dika.—Mat. 13:22; 1 Tim. 6:7-10.
Edia kohu bona edia diba idia heagilaia
Unai kara danu be ‘ tanobada dekena amo ia mai,’ unai dainai namona be Dirava ena hesiai taudia ese idia negea. (1 Ioane 2:16) Ia be hekokoroku amo ia vara, bona taunimanima be lauma dalanai ia hagoadadia lasi, to ia ha-uradia idia danu be kohu bona tanobada ena diba do idia tahua totona.—Roma 15:2.
Idia badu neganai idia hereva dika bona idia dagedage
Unai be “tauanina ena kara”; taunimanima momo idia hekwarahi bada idia koua totona. Abidadama momokani amo bona Dirava ena lauma ena heduru amo tanobada idia hadarerea diba bena tanobada ena lauma ese do ia biagudia lasi.—Gal. 5:19, 20, 22, 23; Ef. 4:31; 1 Kor. 13:4-8; 1 Ioane 5:4.
Edia helaro bona edia gari edia badina be taunimanima ese idia karaia diba karadia mo
Tauanina abidadama henia tauna ia laloa, ia itaia diba gaudia bona ia daua toho diba gaudia be mai anina bada. Ena helaro bona ena gari edia badina be, taunimanima edia gwauhamata bona edia hagaria herevadia. Tanobada ena lohia taudia ia abidadama henidia dainai idia edia amo heduru ia tahua, bena ia abia lasi neganai ia laloa idia koia. (Sal. 146:3, 4; Isa. 8:12, 13) Ia laloa taunimanima edia mauri be hari inai mauri mo sibona. Mase garina ese ia guia haraga. (Mataio 10:28; Heberu 2:14, 15 itaia.) To Iehova idia diba taudia, edia darana bona edia lalona be ena gwauhamata amo idia hahonudia bona idia hegeregere lasi neganai iena heduru idia tahua taudia unai, be siahu matamatana ese edia darana ia hasiahudia.—Ef. 4:23, 24; Sal. 46:1; 68:19.
Ena be Dirava mo sibona idia tomadiho henia be maoro, to taunimanima bona gau haida idia tomadiho henidia
Matamana neganai Dirava ese ura taunimanima lalodiai ia atoa, ia do idia tomadiho henia urana unai, to “inai tanobada ena dirava,” Satana Diabolo, ese kara idauidau amo edia lalona ia hagoadaia, kara idauidau amo unai ura do idia gaukaralaia kerere totona. (2 Kor. 4:4) Taunimanima ese lohia taudia haida idia kara henidia dirava hegeregeredia. (Kara 12:21-23) Taunimanima milion momo be kaivakuku vairadiai idia goru diho. Taunimanima milion momo ese muvini piksa ai idia hedinarai taudia bona gadara ai idia kwalimu taudia idia tomadiho henidia. Aria idauidau amo taunimanima momo edia ladana idia abia isi. Taunimanima momo ese unai kara idauidau idia karaia, unai dainai Iehova idia lalokau henia momokani bona idia ura ia sibona do idia tomadiho henia taudia be dina dina iboudiai idia naria namonamo be namo, unai kara idia karaia taudia edia lalohadai ese idia danu do ia hakaudia kerere garina.