Karoa 3

Dahaka Do Lau Karaia Diba Lau Do Idia Koua Momo Lasi Totona?

OI GWAU oi bada vadaeni dainai, Saturday hanuaboi ai ruma dekenai do oi giroa lou haraga be anina lasi. Emu tamana sinana idia gwau namona be ruma dekenai do oi giroa lou haraga. Oi gwau oi ura taunimanima idia herevalaia momo muvini piksa matamatana do oi itaia. Idia gwau oi itaia be taravatu. Oi gwau oi ura oiemu turadia matamatadia ida gabu ta dekenai do umui lao. Idia gwau idia ura do idia hedavari henidia guna.

Oi be mero badana o kekeni badana neganai, nega haida oi laloa oiemu tamana sinana ese oi idia koua momo. Danu, oi laloa idia ese oiemu mauri ibounai idia biagua toho. Kekeni badana ta ladana Debbie ia gwau: “Nega ibounai lauegu tamana ia ura ia diba edeseniai do lau lao bona edena hora ai ruma dekenai do lau giroa lou. Tama sina momo be unai bamona idia karaia. Lauegu kara iboudiai idia diba be maoro, a? Namona be lau idia koua momo lasi.”

Memero kekeni momo idia maumau, idia gwau edia tamadia sinadia ese idia matauraidia lasi. Kerere ta ia vara neganai, edia tamadia sinadia ese idia abidadama henidia lasi, to idia samanidia kava. Edia tamadia sinadia edia taravatu dainai, idia sibodia idia ura henia gaudia idia abia hidi diba lasi.

“Lalo-Hekwarahi”

Nega haida emu tamana sinana ese oi idia kara henia, mero maragi idia kara henia bamona, a? Bema oibe, namona be inai oi laloatao, lagani haida sibona idia lao vadaeni oi be mero o kekeni maragina ta. Oiemu tamana sinana be unai idia laloatao bona idia laloaboio haraga diba lasi. Oi karaia vadaeni kereredia maragidia idia do laloatao bona idia ura oi do idia naria​—⁠herevana unai naria karana oi ura henia eiava lasi.

Oiemu tamana sinana idia ura bada oi idia naria. Idia gaukara goada, ruma ena davana karaia bona emu aniani bona dabua hoia totona. Danu, oi idia hadibaia bona naria karadia idia hekwarahilaia. Idia ese oi idia laloa bada. Oi idia hadibaia dalana dainai, Dirava ese do ia hahemaoro henidia. (Efeso 6⁠:4) Gau ta ese emu namo ia hadikaia gwauraia neganai, idia laloa momo.

Iesu Keriso ena tamana sinana mani oi lalodia. Ierusalem idia rakatania neganai, idia diba lasi Iesu danu idia rakatania. Unai idia diba neganai idia tahua goadagoada! “Dubu Helaga lalonai idia davaria” neganai, Iesu ena sinana ia gwau: “Natugu e, dahaka dainai inai bamona oi karaia ai dekenai? Lau bona emu tamana be mai emai lalo-hekwarahi ida oi ai tahua noho.” (Luka 2⁠:​41-48, NW) Ena be Iesu be mero goevadaena, to ena tamana sinana edia lalona ia hahekwarahia. Oi be goevadae lasi dainai oiemu tamana sinana edia lalona oi hahekwarahia bada, ani?

Umui hepapahuahulaia momo gauna do ita herevalaia; gauna be, edena hora ai ruma dekenai do oi giroa lou be namo. Reana oi laloa oiemu tamana sinana ese giroa lou horana ta idia gwauraia be badina lasi. To edia lalohadai unai kara dekenai oi laloa vadaeni, a? Sikuli memerodia haida ese idia torea bukana ta ladana The Kids’ Book About Parents lalonai lisi ta idia torea; unai lisi be “tama sina edia lalohadai kavakavadia, edia natudia be nega korikori ai ruma dekenai idia giroa lou lasi neganai idia lalohadailaia gaudia.” Unai lalohadai haida be inai: ‘drag idia ania kava, motuka ai bero idia davaria, pulisi ese idia dogodiatao, muvini piksa dikana dekenai idia lao, drag idia hoihoilaia, raskol ese idia reipidia o idia dadabadia, edia ruma bese ena ladana idia hadikaia.’

Tama sina haida mo sibodia ese unai bamona lalohadai idia abia. To, memero kekeni momo be unai bamona dika idia davaria, ani? Unai dainai, bema oiemu tamana sinana idia gwau oi be ruma dekenai bema oi giroa lou haraga lasi bona taunimanima dikadia bema oi bamodia reana dika do oi davaria, edia hereva do oi badulaia lasi be namo, ani? Iesu ena tamana sinana danu idia ura diba ia be edeseniai ia noho!

Oi Idia Dogoatao ena Badina

Memero kekeni haida idia gwau edia tamadia sinadia be idia dekenai idia vara diba gaudia dikadia idia garilaidia kava! To mani oi laloatao, emu tamana sinana be nega daudau lalonai oi idia lalo-hekwarahilaia vadaeni. Do oi bada oi lao bena gabeai edia ruma do oi rakatania, unai idia laloa neganai reana idia lalohisihisi. Hahine ta ia gwau: “Lauegu natuna tamona sibona, mero ta unai, ena mauri laganidia be 19 hari. Ia ese aiemai ruma do ia rakatania vaitani negana lau laloa neganai, lau lalohisihisi bada.”

Unai dainai tama sina haida ese edia natudia idia koudia o idia dogodiatao. To, bema emu tamana sinana be unai bamona idia karaia neganai oi badu henidia dikadika, unai be kerere. Hahine matamatana ta ia gwau: “Lau maragi negana amo ema bona egu mauri laganidia be 18, lau bona egu sinana ai hetura heheni namo herea. . . . [To] unai murinai kerere haida ai davaria. Nega haida lau ura sibogu egu ura do lau karaia, to unai neganai [Sinagu] ia laloa lau ese ena hetura karana lau ura lasi. Unai dainai lau ia dogoatao auka toho, bena ena kara dainai lau ese ena hetura karana lau dadaraia bada.”

Sibomu emu ura haida oi karaia be namo, to unai do oi karaia totona emu ruma bese oi dadaraia lasi. Dahaka oi karaia diba oi bona emu tamana sinana emui hetura karana oi hanamoa totona, bena do umui diba heheni, do umui haheauka heheni, bona do umui hemataurai heheni? Gau ta be inai: Hemataurai ese hemataurai ia havaraia. Aposetolo Paulo ia gwau: “Iseda tamana inai tanobada dekenai ese ita idia matakani henia, ani? To ita ese idia ita matauraia, ani?” (Heberu 12⁠:9) Unai Keristen taudia gunadia edia tamadia sinadia idia goevadae lasi. Paulo be ma ia gwau (Heb 12 siri 10): “Iseda tamana inai tanobada dekenai ese ita idia matakani henia, edia ura hegeregerena.”

Ena be unai tatau be nega haida idia laloa kerere, to edia natudia ese idia matauraidia be maoro. Unai hegeregerena, oiemu tamana sinana oi matauraidia be maoro. Ena be reana oi idia koua momo, to unai dainai oi gwau-edeede henidia be maoro lasi. Namona be oi matauraidia, oi ura idia ese oi do idia matauraia bamona.

Lalohadai Kereredia

Nega ta oi be nega korikori ai ruma dekenai oi giroa lou lasi, badina oi koua diba lasi gauna ta ia vara dainai, a? Unai neganai oiemu tamana sinana idia badu, a? Unai bamona ia vara neganai, oi durudia diba oi do idia matauraia totona. Iesu ena kara mani oi laloa. Ena tamana sinana be mai edia lalo-hekwarahi ida idia tahua bena dubu dekenai idia davaria, ia be hadibaia taudia ida Dirava ena Hereva idia herevalaia. To Iesu ena kara idia laloa kerere dainai, ia badu henidia, ia tai, eiava ia maumau, a? Lasi. Mai ena manau ida ia gwau: “Dahaka dainai lau umui tahua? Umui diba lasi egu Tamana ena ruma be lauegu noho ruma, a?” (Luka 2⁠:49) Iesu be tau badana bamona ia kara dainai, ena tamana sinana idia moale. “Haere manauna ese badu ia koua” sibona lasi, to unai bamona do oi hereva neganai emu tamana sinana ese oi do idia matauraia.​—⁠Hereva Lada-isidia 15⁠:1.

Taravatu bona Hahegani

Oiemu tamana sinana edia hahegani oi badinaia eiava oi badinaia lasi be mai anina, badina be emu kara hegeregerena oi do idia kara henia. Memero kekeni haida idia badu, o idia koikoi, o idia gwau-edeede, to namona be taunimanima badana ta bamona oi karaia. Bema oi ura emu tamana sinana ese maoro oi do idia henia hanuaboi ta ai ruma dekenai do oi giroa lou haraga lasi totona, namo lasi oi doridia toho o mai emu tai ida mero maragina ta bamona oi gwau, “Memero kekeni oredia iboudiai be ruma dekenai idia giroa lou haraga lasi.” Buka torea hahinena ladana Andrea Eagan ia gwau: “Oi ura do oi karaia gauna be oi gwauraia goevagoeva idia dekenai, do idia diba namonamo totona. . . . Bema oi hamaorodia oi be edeseniai do oi lao, daika do oi bamoa, bona dahaka dainai oi ura bada ruma dekenai do oi giroa lou haraga lasi . . . , reana maoro oi do idia henia.”

Bema oiemu tamana sinana idia ura oiemu turadia idia itadia edia kara tahua totona​—⁠kara maorona be unai​—⁠namona be oi maumau lasi. Magasin ta ladana Seventeen ia gwau: “Nega ta ta oiemu turadia be ruma dekenai oi hakaudia mai, bena gabeai, oi be Raho ida piksa rumana dekenai umui lao gwauraia be emu tamana oi hamaoroa neganai, mai ena badu ida do ia gwau lasi, ‘Raho be daika?’ ”

“Gau Momo Do Ia Abia”

Jim ia kiri ena tadina Ron ia herevalaia neganai. Ia gwau: “Lau vara guna bena hua 11 sibona murinai ia vara, to emai tamana sinana ese dala idauidau amo ai idia kara henia. Lau idia koua momo lasi. Emai tamana ena motuka lau taria. Nega ta maoro lau idia henia lau ese egu tadina ta do lau abia lao New York dekenai.”

Jim be ma ia gwau: “To emai tamana sinana ese Ron idia kara henia dalana be idau. Ia idia koua momo. Ia bada neganai, emai tamana ese motuka taria dalana ia hadibaia lasi. Ron ia laloa ia be hegeregere kekeni ta do ia bamoa neganai, emai tamana sinana ese idia koua.”

Edia natuna ta idia kara namo henia bona ta idia kara auka henia, a? Lasi. Jim ia gwau: “Ron ia kara kava bamona. Ia laloa namonamo lasi. Emai tamana sinana ese gaukara idia henia neganai, nega momo ia karaia lasi. Lau ese emai tamana sinana edia hereva lau utua lasi, to bema Ron ese edia hereva ia abia dae lasi, ia gwau-edeede henidia. Unai dainai idia koua momo.” Mataio 25:29 ai Iesu ia gwau: “Mai ena gau tauna be gau momo do ia abia. To gau lasi tauna be ia dekenai ia noho gauna be do idia kokia.”

Oi ura sibomu emu maduna do oi huaia mai emu ura-kwalimu ida, a? Vadaeni, namona be oi hahedinaraia oi be hegeregere unai bamona do oi karaia. Emu tamana sinana ese oi idia henia gaukaradia oi karaia namonamo. Iesu be ena parabole ta lalonai ia gwauraia merona ta bamona oi karaia lasi. Mero ena tamana ia gwau, “Egu natuna e, hari dina mani oi lao, lauegu vain uma gabu dekenai oi gaukara.” Mero ia gwau, “Lohia e, do lau lao,” to “ia lao lasi.” (Mataio 21⁠:​28, 30) Namona be oiemu kara dainai oiemu tamana sinana idia diba momokani, bema gaukara ta oi idia henia, herevana ia be bada o maragi, to do oi karaia.

Jim ia gwau: “Lauegu tamana sinana vairanai lau hahedinaraia egu maduna lau huaia namonamo diba. Banika dekenai lau idia siaia, opesi dekenai lau lao ruma ena paua bona ranu edia davana henia totona, bona sitoa dekenai lau lao emai aniani hoia totona. Egu sinana ese moni gaukarana ia karaia neganai, lau ese emai aniani lau nadua.”

Gaukara Oi Tahua

Bema oiemu tamana sinana ese unai bamona gaukara oi idia henia lasi, dahaka oi karaia diba? Oi sibomu ese gaukara ta oi tahua. Magasin ta ladana Seventeen ia gwau: “Oiemu sinana oi hamaoroa, oi ura ruma bese ena aniani do oi karaia; oi ura unai aniani do oi hoia, do oi nadua, bona mereki do oi huridia danu.” Bema oi nadunadu diba lasi, gaukara ma ta oi tahua. Mereki oi huridia, foloa oi daroa, o kohu ibounai be ena gabu korikori dekenai oi atoa. Oi naria lasi ela bona emu sinana ese oi ia hagania unai bamona do oi karaia.

Memero bona kekeni momo be holide negadiai o Saturday ai moni gaukarana idia karaia. Bema oi be unai bamona oi karaia, oiemu moni oi naria bona oi gaukaralaia namonamo diba, a? Moni sisina oi henia emu aniani bona mahuta gabuna ena davana karaia totona, a? Bema unai bamona oi karaia, reana oi be moni sisina sibona do oi dogoatao, to oiemu moni oi naria namonamo dalana be emu tamana sinana ese idia itaia neganai, oi do idia koua momo lasi.

Tama Sina Dekenai Tabekau Hanaihanai Lasi

Namona be emu tamana sinana be emu turadia namodia ai idia lao; idia ida umui herevahereva bona idia amo sisiba oi abia be namo. (Ieremia 3⁠:4 itaia.) To namona be idia dekenai oi tabekau hanaihanai lasi, to gau momo dekenai sibomu emu lalona oi tahua dahaka do oi karaia be namo. Oi sibomu emu lalona oi hadaia loulou neganai, unai kara do oi goadalaia.​—⁠Heberu 5⁠:14.

Unai dainai, kerere maragina ta ia vara neganai, emu tamana sinana dekenai oi lao haraga lasi, to oi sibomu be unai kerere hanaia dalana oi lalohadailaia toho guna. Oi “kara haraga” lasi, to Baibel ena sisiba hegeregerena “diba oi tahua” guna. (Isaia 32⁠:⁠4) Baibel ena sisiba oi tahua. Gau ibounai be mai emu manau ida oi lalohadailaia namonamo murinai, emu tamana sinana ida umui herevalaia. Oi gwau lasi, ‘Tamagu bona Sinagu e, dahaka do lau karaia be namo?’ to namona be unai hekwakwanai hanaia dalana, oi lalohadailaia vadaeni dalana, oi gwauraia hedinarai, bena oi noidia edia lalohadai do idia gwauraidia.

Unai bamona oi karaia neganai, oiemu tamana sinana do idia itaia oi be taunimanima badana ta bamona oi karaia. Oiemu kara dainai oi do idia koua momo lasi. Taunimanima badana ta bamona oi do idia kara henia reana.

Inai Henanadai Herevalaia

◻ Dahaka dainai tama sina ese edia natudia naria karana idia laloa momo bona idia ura idia diba idia be edeseniai idia loaloa?

◻ Dahaka dainai oiemu tamana sinana oi kara henidia mai emu hemataurai ida be gau badana?

◻ Bema emu tamana sinana ese emu kara ta idia laloa kerere, dahaka oi karaia diba?

◻ Edena dala amo oiemu tamana sinana edia hahegani oi badinaia diba, to oiemu ura-kwalimu oi negea lasi?

◻ Dahaka oi karaia be namo, bena emu tamana sinana do idia diba oi idia abidadama henia diba?

[Blurb on page 29]

“Nega ibounai lauegu tamana ia ura ia diba edeseniai lau lao bona edena hora ai ruma dekenai do lau giroa lou. . . . Lauegu kara iboudiai idia diba be maoro, a?”

[Picture on page 27]

Oi laloa emu tamana sinana ese oi idia koua momo, a?

[Picture on page 30]

Oiemu tamana sinana ese oi idia laloa kerere neganai, oi manau noho bena oi do idia matauraia