Karoa 102

Keriso be mai Kwalimuna ida Ierusalem Lalonai Ia Vareai

DABAI, Sunday, Nisan 9 ai, Iesu bona ena hahediba taudia ese Betania idia rakatania, Ierusalem ena dala ai, Olive Ororona dekenai idia raka lao. Olive Ororona dekenai ia noho hanuana, Betefage, ia kahirakahira neganai, Iesu ese ena hahediba taudia rua ia hamaorodia, ia gwau:

“Iseda vairana dekenai hanua ta ia noho. Umui lao unuseni, doniki ta au ta dekenai idia kwatua, mai ena natuna danu, do umui davaria, vadaeni idia umui ruhaia, umui mailaia iniseni. To bema tau ta do ia nanadaia umui dekenai, do umui gwau, ‘Inai doniki be Lohiabada ia ura.’ Vadaeni do ia siaidia.”

Ena be Iesu ese unai hereva ia gwauraia neganai hahediba taudia idia diba lasi Baibel ena peroveta herevana ta ia hamomokania, to gabeai unai idia lalo-pararalaia. Peroveta tauna Sekaria ia gwau, Dirava ese ia gwauhamatalaia Pavapavana be ‘doniki ai do ia gui, doniki natuna latanai do ia gui kau,’ Ierusalem ai do ia raka vareai. Gunaguna, unai hegeregerena King Solomon be doniki natuna ai ia gui kau, ia lao hahelaga tauna ese do ia horoa totona neganai.

Hahediba taudia be Betefage ai idia vareai bona doniki natuna mai sinana danu idia abidia neganai, unuseniai idia gini taudia idia gwau: “Badina dahaka doniki natuna umui ruhaia?” Hahediba taudia ese idia hamaorodia Lohiabada totona idia abidia, unai dainai idia koudia lasi, bena Iesu dekenai idia hakaudia lao. Hahediba taudia ese edia dabua doniki ena doruna ai bona ena natuna ena doruna ai idia atodia, bena Iesu be doniki natuna ai ia gui kau.

Iesu be Ierusalem dekenai ia lao neganai, taunimanima momo ese edia dabua dala dekenai idia atodia, bona ma haida ese au rigidia idia utudia, dala dekenai idia atodia. Idia boiboi, idia gwau: “Iseda king, Lohiabada ena ladanai ia mai noho, ita hanamoa! Maino guba dekenai do ia bada, bona hanamoa Ataiai Momokani Diravana dekenai!”

Unai hereva dainai, Farisea taudia haida hutuma bogaragidiai idia noho be idia badu; Iesu idia hamaoroa, idia gwau: “Hadibaia tauna e, emu diba tahua taudia dekenai oi gwau henia.” To Iesu ese ia haere henidia, ia gwau: “Lau hamaoroa umui dekenai, bema idia be mai regerege lasi, inai nadi do idia boiboi.”

Iesu ia raka kahira, Ierusalem ia itaia, bena ia tai, ia gwau: “Madi, hari dina bema oiemu maino do oi davaria dalana oi diba be oi namo, to emu matana dekena amo ia hunia vadaeni.” Ierusalem taudia be mai edia ura ida idia kara dika dainai, edia dika davana do idia abia, Iesu ia peroveta hegeregerena. Ia gwau:

“Negana do ia ginidae, oi dekenai idia badu henia taudia [Tuari Biaguna Tito ena Roma tuari taudia] ese tano do idia gaukaralaia, tuari ena magu do idia karaia, oi do idia koua hagegea, do oi raka murimuri dekenai be dala lasi. Vadaeni tano dekenai oi do idia negea diho, oiemu natuna danu oiemu magu lalonai be do idia mase ore, bona nadi ta nadi ta latanai do idia noho lasi.” Lagani 37 murinai, lagani 70 C.E. ai, unai dika ia vara.

Pura haida idia lao vadaeni, Iesu ese Lasaro ia hatorea isi lou neganai, unai hutuma taudia momo ese idia itaia. Unai hoa karana be ma haida idia hamaorolaidia noho. Unai dainai, Iesu be Ierusalem ai ia vareai neganai, hanua ai idia noho taudia iboudiai idia herevahereva momo, idia gwau: “Inai be daika?” Hutuma idia gwau: “Inai be Iesu, peroveta tauna, Nasareta Galilea dekena amo ia mai.” Farisea taudia ese unai idia itaia neganai idia diba idia kwalimu lasi, unai dainai mai edia lalohisihisi ida idia hereva heheni, idia gwau: “Tanobada ibounai be iena murina dekenai idia raka vadaeni.”

Ierusalem dekenai ia lao neganai, vaia ena kara Iesu be dubu dekenai ia lao hadibaia totona. Matakepulu taudia bona aena dika taudia be ia dekenai idia mai, bona ia hamauridia! Hahelaga taudia badadia bona taravatu hadibaia taudia ese Iesu ena hoa karadia idia itadia bona memero edia hereva idia kamonai, dubu lalonai idia boiboi, idia gwau, “Hosana, Davida ena natuna ita hanamoa!” Unai dainai idia badu, bona Iesu idia nanadaia, idia gwau: “Inai maragidia edia hereva oi kamonai, a?”

Iesu ia gwau: “Oibe. Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’ ”

Iesu ese ia hadibadia noho bona dubu lalonai gau iboudiai ia itadia. Nega sisina murinai, dina ia diho gwauraia dainai, ia mai ena hahediba taudia 12 ida be Betania dekenai idia lou lao. Sunday hanuaboi ai unuseniai ia mahuta, reana ena turana Lasaro ena ruma ai. Mataio 21:​1-11, 14-17; Mareko 11:​1-11; Luka 19:​29-44; Ioane 12:​12-19; Sekaria 9:9.

▪ Edena negai bona edena bamona Iesu be Pavapava hegeregerena Ierusalem ai ia vareai?

▪ Dahaka dainai hutuma ese Iesu idia hanamoa be gau badana?

▪ Iesu ese Ierusalem ia itaia neganai, ena lalona ena mamina be edena bamona, bona edena peroveta herevana ia gwauraia?

▪ Iesu be dubu dekenai ia lao neganai dahaka ia vara?