Iehova Ena Ura Idia Karaia

Iesu Idia Hanamoa Mesia Bona King!

NISAN 9, 33 C.E. ai, regerege bada idia karaia taudia hutuma be Ierusalema dekenai idia vareai neganai, Iudea taudia momo idia hoa. Ena be nega momo Pasova vairanai taunimanima hutuma be siti dekenai idia vareai, to inai vadivadi taudia be idau. Idia ida ia mai tauna badana be doniki ena natuna latanai ia guia. Unai tau be Iesu Keriso, ia vairanai taunimanima ese dabua bona niu rigidia idia atoa diho, bona idia boiboi: “Hosana, Davida ena natuna e! Lohiabada ena ladanai ia mai noho tauna ita hanamoa. Ataiai momokani ia noho Dirava dekenai, hosana!” Unai hutuma idia itaia neganai, Ierusalema ai idia noho vadaeni taudia be unai raka taudia idia bamoa.​—Mataio 21:7-9; Ioane 12:12, 13.

Ena be hari ia idia hanamoa, to Iesu ia diba gabeai hetoho do ia davaria. Momokani, dina ima sibona murinai, inai siti tamona lalonai ia do idia hamasea! Oibe, Iesu ia diba Ierusalema be dagedage hanuana, bona unai dainai ia hegaegae, taunimanima ese idia itaia diba dalanai siti dekenai ia vareai neganai.

Peroveta Herevana Gunana Ia Guguru

Lagani 518 B.C.E. ai, Sekaraia ese Iesu be kwalimu dalana ai Ierusalema dekenai do ia vareai ia perovetalaia. Ia gwau: “Umui Ierusalema dekenai noho taudia e, do umui moale, mai boiboi danu do umui moale. Umui itaia, emui King be umui dekenai ia mai noho. Ia be mai ena hamauria kara danu. Ia ese ia dekenai idia tuari henia taudia ia halusia momokani. To ia be mai manau danu, bona doniki dekenai ia guia. Doniki ena natuna ena latanai ia guia lao. . . . Oiemu King ese bese idauidau edia huanai maino do ia karaia, bona ia ese tanobada kahana ibounai taudia do ia gunalaia, kone ta dekena amo ela bona kone ta, bona Euperate Sinavai dekena amo, ela bona tanobada dokona momokani.”​—Sekaraia 9:​9, 10.

Unai dainai Nisan 9 ai Iesu be Ierusalema ai ia vareai ese Baibel ena peroveta herevana ia hagugurua. Unai ia vara kava lasi to idia hegaegaelaia namonamo. Guna, Ierusalema kahirakahira ai, Iesu be ena hahediba taudia rua ia hadibaia, ia gwau: “Iseda vairana dekenai hanua ta ia noho. Umui lao unuseni, doniki ta au ta dekenai idia kwatua, mai ena natuna danu, do umui davaria, vadaeni idia umui ruhaia, umui mailaia iniseni. To bema tau ta do ia nanadaia umui dekenai, do umui gwau, ‘Inai doniki be Lohiabada ia ura.’ Vadaeni do ia siaidia.” (Mataio 21:1-3) To dahaka dainai Iesu ia ura doniki dekenai ia guia bena Ierusalema ai ia vareai, bona taunimanima hutuma edia kara ena anina be dahaka?

King Dagina Ena Hadibaia Hereva

Nega momo matana amo ita itaia gauna ena siahu ese ita kamonai herevana ena siahu ia hanaia. Unai dainai, nega haida Iehova ese ena peroveta taudia ia veria edia kara amo edia peroveta herevana ena siahu idia habadaia. (1 King Taudia 11:29-​32; Ieremia 27:​1-6; Esekiela 4:​1-​17) Unai bamona matana amo idia itaia diba dalanai hereva idia halasia dainai, kudouna auka tauna danu be unai ia laloaboio diba lasi. Unai dala hegeregerena, Iesu be doniki latanai Ierusalema ena siti ai ia vareai neganai ia ese ena kara amo siahu herevana ta ia hahedinaraia. Edena dala ai?

Baibel ia sivarailaia negadiai, dagi bada taudia ese doniki idia gaukaralaia. Hegeregere, Solomona be horoa king ai do ia lao neganai ena tamana ena “doniki” dekenai ia guia.a (1 King Taudia 1:​33-​40) Unai dainai, Iesu be doniki amo Ierusalema dekenai ia vareai ena anina be ia ese king bamona sibona ia hahedinaraia. Taunimanima hutuma edia kara ese unai ia hagoadaia. Unai hutuma, reana idia momo be Galilea taudia, ese edia dabua idia atoa diho Iesu vairanai​—unai kara be guna Iehu idia gwauraia king neganai idia karaia bamona. (2 King Taudia 9:​13) Iesu idia gwauraia “Davida ena natuna” ese Iesu be king ai ia lao ena maoro ia hamomokania. (Luka 1:​31-​33) Bona niu rigidia idia gaukaralaia karana ese ia hahedinaraia idia ura ena king siahuna henunai idia noho.​—Apokalupo 7:​9, 10 itaia.

Unai dainai Nisan 9 ai Ierusalema dekenai idia vareai taunimanima hutuma ese idia hahedinaraia goevagoeva herevana be inai: Iesu be Dirava ese ia abia hidi Mesiana bona King. Momokani, haida be idia moale lasi Iesu be unai dala ai ia hedinarai idia itaia neganai. Farisea taudia idia laloa ia maoro lasi Iesu be king bamona idia hanamoa. Mai badu ida idia gwau: “Hadibaia tauna e, emu diba tahua taudia dekenai oi gwau henia.” Iesu ia haere: “Lau hamaoroa umui dekenai, bema idia be mai regerege lasi, inai nadi do idia boiboi.” (Luka 19:39, 40) Oibe, Iesu ese Dirava ena Basileia ia harorolaia goadagoada. Mai gari lasi ida unai sivarai ia harorolaia, herevana taunimanima ese unai sivarai do idia abia dae eiava lasi.

Unai amo Ita Diba Gaudia

Iesu ia gari lasi momokani, peroveta Sekaraia ia gwauraia guna dalanai Ierusalema dekenai ia vareai totona. Ia diba unai kara ese ena inai taudia edia badu ia habadaia. Guba dekenai ia daekau gwauraia neganai, Iesu ese ia murinai idia raka taudia dekenai hahegani ia henia Dirava ena Basileia ena sivarai namona do idia harorolaia bona ‘bese ibounai be diba tahua taudia do idia halaoa.’ (Mataio 24:14; 28:19, 20) Unai gaukara ita hagugurua totona, ita danu ita gari lasi be namo. Haida be unai sivarai do idia moalelaia lasi. Haida idia kamonai lasi, haida idia dagedage. Gavamani haida ese dala idauidau amo haroro gaukara idia koua eiava idia taravatua vaitani.

To, Iehova ena Witness taudia idia diba Dirava ena Basileia ia haginia vadaeni gauna, ena sivarai namona idia harorolaia be gau badana, herevana taunimanima do idia kamonai eiava idia kamonai lasi. (Esekiela 2:7) Unai hamauria gaukarana idia karaia noho lalonai, Iesu ena hereva ese idia ia hagoadaia, ia gwau: “Lau be hanaihanai umui danu ita noho ela bona tanobada dokona.”​—Mataio 28:20.

[Footnotes]