Kahana 1
Dirava ese Ita Ia Laloa Eiava?
1, 2. Taunimanima ese Dirava edena bamona idia henanadailaia, bona dahaka dainai?
REANA nega ta oi henanadai, oi gwau: ‘Ita ia laloa Diravana bema ia noho, dahaka dainai ia ese iseda hisihisi momo ia koua lasi?’ Ita ibounai be hisihisi ita ania vadaeni eiava hisi-ani tauna ta ita diba.
2 Momokani, nega daudau lalonai taunimanima ese hisihisi idia ania, tuari, dagedage, raskol karadia, kara gagevadia, ogogami, gorere, bona edia lalokau taudia edia mase dainai. Hanaia laganidia 90 lalodiai taunimanima 100 milion be tuari dainai idia mase. Taunimanima milion milion idia haberodia eiava edia ruma bona edia kohu idia hadikadia ore. Gau dika rohorohodia momo be hari inai negai idia vara, unai dainai taunimanima momo herea idia lalohisihisi bada bona edia daradia idia doko.
3, 4. Dirava ese hisihisi ia koua lasi dainai, momo ese edena bamona idia laloa?
3 Idia haida idia laloa bema Dirava ia noho, ia ese ita ia laloa lasi. Eiava idia laloa Dirava be lasi. Tanobada Ibounai Tuarina Ginigunana lalonai tau ta ena turadia bona ena bese taudia idia aladia mase; ia henanadai, ia gwau: “Unai nega dikana lalonai Dirava be edeseniai?” Tanobada Ibounai Tuarina Iharuana lalonai Nazi taudia ese taunimanima milion momo idia aladia mase; unai ala-ala amo ia roho mauri tauna ta ia gwau: ‘Egu lalona ena mamina be mase muramurana ena mamina bamona.’
4 Unai hegeregerena, taunimanima momo idia diba lasi dahaka dainai Dirava namona ese gau dikadia ia koudia lasi. Idia gwau reana ita ia laloa lasi eiava ia noho lasi. Bona idia momo idia laloa hisi-ani do ia doko lasi.
Unless otherwise indicated, quotations from the Hebrew Scriptures have been translated from the New World Translation of the Holy Scriptures, and quotations from the Greek Scriptures are from the Taravatu Matamatana published by the Bible Society of Papua New Guinea.
[Picture on page 2, 3]
Hisihisi lasi tanobadana be ia kahirakahira a?