Kahana 5
Harihari Gauna Namona—Ura-Kwalimu
1, 2. Dirava ese ita ia henia gauna namo hereana be dahaka?
DIRAVA ese hisihisi ia koua lasi ena badina bona do ia haorea dalana do ita lalo-pararalaia totona, namona be ita ia karaia dalana do ita laloa namonamo. Iseda tauanidia bona kwara haradia sibodia lasi, to iseda lalodia danu ia karadia.
2 Unai hegeregerena, Dirava ese ura-kwalimu na ita ia henia. Oibe, iseda raka dalana ita abia hidi diba. Inai ura-kwalimu be harihari gauna namona iena amo.
Iseda Kara Korikori
3-5. Dahaka dainai ura-kwalimu ita laloa bada?
3 Dirava ese taunimanima edia ura-kwalimu ia laloa dainai ia ese hisihisi ia koua lasi. Mani inai oi laloa: Oi ura oi be mai emu ura-kwalimu ida do oi kara bona do oi hereva, bona emu aniani bona emu dabua bona emu gaukara bona emu noho gabuna do oi abidia hidi, a? Eiava oi ura ta ese emu hereva iboudiai bona emu kara iboudiai do ia biagudia, a?
4 Taunimanima ta lasi ia ura ma ta ese ena mauri do ia biagua vaitani. Badina be, Baibel ena hereva hegeregerena, Dirava ese ita taunimanima ia karaia, ‘iena toana bona iena laulau hegeregerena,’ bona Dirava be mai ena ura-kwalimu. (Genese 1:26; Deuteronomi 7:6) Taunimanima ia havaradia neganai, ia ese ura-kwalimu ia henidia, harihari gauna namo hereana ta bamona. Unai dainai ita ura lasi lohia dikadia ese iseda ura-kwalimu do idia kokia.
5 Ura-kwalimu ura henia karana be ia vara kava lasi, badina be Dirava be ura-kwalimu Diravana. Baibel ia gwau: “[Iehova] ena Lauma ia noho gabudia dekenai ura kwalimu danu ia noho.” (2 Korinto 3:17) Ia ese ura-kwalimu ita ia henia, eda kara korikori bamona. Eda lalodia edia gaukara dalana ia diba dainai, ia diba ura-kwalimu do ita moalelaia bada.
6. Iehova ese iseda kwarana harana edena bamona ia karaia, mai eda ura-kwalimu ida do ita gaukaralaia totona?
6 Dirava ese danu diba ita ia henia, gau idauidau do ita lalodia, do ita lalohadailaidia, bona maoro bona kerere edia idau do ita diba totona. (Heberu 5:14) Ura-kwalimu ita abia, badina be iseda raka dalana ita abia hidi mai eda lalo-parara ida. Ita be masini hegeregeredia lasi, bona ita be animal hegeregeredia lasi. To Dirava ese iseda kwarana harana ena oromana ia henia, iseda ura-kwalimu ida do ita gaukaralaia totona.
Matamana Namo Hereana
7, 8. Dirava ese Adam bona Eva edena bamona ia hanamodia?
7 Dirava ese iseda tubudia roboadia, Adam bona Eva, be ura-kwalimu sibona ia henidia lasi, to gau momo ia henidia, unai gau dainai edia lalodia do idia hegeregere. Paradaiso ai ia hanohodia. Aniani gaudia momo ia henidia. Edia daradia bona edia tauanidia idia goevadae, unai dainai do idia buruka lasi, do idia gorere lasi bona do idia mase lasi—do idia mauri hanaihanai diba. Natudia goevadaedia do idia havaradia diba, idia danu be mai edia moale ida do idia mauri hanaihanai diba. Edia bese do ia bada ia lao lalonai, tanobada ibounai be paradaiso ai do idia halaoa.—Genese 1:26-30; 2:15.
8 Baibel ia gwau Dirava ese ia henidia gaudia iboudiai ia itadia “bona momokani idia be namo herea.” (Genese 1:31) Baibel be ma ia gwau Dirava “ena gaukara be goevadae.” (Deuteronomi 32:4) Oibe, Dirava ese taunimanima na matamana namo hereana ia henidia. Unai amo ia hahedinaraia ia lalodia mai ena lalokau bada ida!
Ura-Kwalimu mai Hetoana
9, 10. Dahaka dainai ura-kwalimu ia biagua maoromaoro be namo?
9 To, Dirava ia laloa ura-kwalimu ia henidia dainai sibodia edia ura karadia iboudiai do idia karaia diba, a? Mani oi laloa: Siti lalonai bema trafik taravatudia be lasi neganai draiva iboudiai ta ta sibona ena ura sibona ena ura hegeregeredia motuka idia taridia kava diba, kerere momo do idia vara bona motuka momo do idia bampa, ani?
10 Dirava ese taunimanima ia henidia ura-kwalimuna be unai bamona. Edia ura-kwalimu be taravatu amo ia biagua be namo, heiriheiri do ia vara garina. Baibel ia gwau: “Umui be ura kwalimu taudia, to inai ura kwalimu do umui gaukaralaia kerere lasi.” (1 Petero 2:16) Dirava ia ura taunimanima edia ura-kwalimu be taravatu amo do ia biagua, iboudiai ese namo do idia davaria totona.
Daika ena Taravatu?
11. Daika ena taravatu do ita badinadia be namo?
11 Daika ena taravatu do ita badinadia be namo? Petero Ginigunana 2:16 be ma ia gwau: “Dirava ena hesiai taudia mai guia danu do umui noho.” Unai ese ita ia hametaua lasi, to anina be, Dirava ena taravatu henunai do ita noho neganai moale bada do ita davaria. (Mataio 22:35-40) Iena taravatu ese ita idia hakaua namonamo, taunimanima edia taravatu idia hereadia. “Lau inai Iehova, emu Dirava; oi be sibomu do oi hanamoa dalana be oi lau hadibalaia, emu raka dalana namona dekenai oi lau hakaua.”—Isaia 48:17.
12. Dirava ena taravatu henudiai, dahaka ita abia hidi diba mai eda ura-kwalimu ida?
12 Dirava ena taravatu henudiai iseda ura-kwalimu ita gaukaralaia diba. Unai dainai taunimanima be idauidau, bona bese idauidau edia aniani, edia dabua, edia miusik, edia mavaru bona edia ruma be idauidau. Momokani, ita ura unai gau be sibona eda ura hegeregeredia do ita abidia hidi; ita ura lasi taunimanima ta ese do ia gwauraidia hidi ita eda.
13. Edena taravatu ita badinadia be namo, dika do ita davaria garina?
13 Dirava ese ita ia karaia, iena taravatu, tanobada ia biagulaia taravatudia danu, badinadia karana ai namo do ita davaria totona. Unai hegeregerena, bema greviti taravatuna ita laloa lasi dainai atai gabuna amo ita roho diho, do ita bero eiava do ita mase. Bema iseda tauanidia naridia taravatudia ita utudia, bema ita aniani lasi bona ita inuinu lasi bona ita hahodi lasi, do ita mase.
14. Dahaka dainai ita diba Dirava ese taunimanima ia karadia lasi, sibodia edia dala ai do idia raka totona?
14 Unai hegeregerena, Dirava ese ita ia karaia, iena kara maoromaoro taravatudia danu do ita badinadia, dika do ita davaria garina. (Mataio 4:4) Taunimanima ia karadia lasi, iena ura do idia dadaraia bena do idia kwalimu. Peroveta tauna Ieremia ia gwau: “Taunimanima ena raka be ia sibona ese ia gwauraia hidi diba lasi. Iehova e, . . . egu matana oi hakania.” (Ieremia 10:23, 24) Anina be, Dirava ese taunimanima ia karadia, iena lohia siahuna henunai do idia noho, sibodia edia henunai lasi.
15. Dirava ena taravatu ese Adam bona Eva do idia hametaudia a?
15 Bema iseda tubudia roboadia ruaosi ese Dirava ena taravatu idia badinadia noho, unai kara ese do ia hametaudia lasi, to unai dala amo idia bona edia bese ibounai ese namo do idia davaria. Dirava ena taravatu maguna lalonai do idia noho namonamo. Bema unai bamona, hari ita taunimanima iboudiai be moale paradaisona lalonai ita noho, mai eda lalokau bona mai eda lalo-tamona ida! Kara dika, hisihisi bona mase be lasi.
[Picture on page 11]
Matamanai Dirava ese taunimanima ia karadia neganai, idia goevadae
[Picture on page 12]
Bema trafik taravatudia be lasi, do oi ura motuka be siti lalonai do oi taria a?