Kahana 8
Dirava ese Ena Palani Ia Hagugurua Gwauraia
1, 2. Dirava ese hisihisi haorea dalana edena bamona ia lailaia vadaeni?
NEGA daudau lalonai gwau-edeede taudia bona laumadia edia lohia dalana ese taunimanima ia hadikadia. To Dirava ese iseda hisihisi ia laloaboio lasi. Unai nega daudau lalonai dala ia karaia noho, taunimanima be kara dika bona hisihisi amo do ia ruhadia totona.
2 Dirava ena lalohadai be gavamani ta do ia haginia, tanobada na paradaiso ai do ia halaoa gauna. Gwau-edeede be Eden lalonai ia vara neganai, unai palani ia gwauraia hedinarai matamaia. (Genese 3:15) Gabeai, Dirava ena gwaukau tauna badana, Iesu, ese unai gavamani ia harorolaia momo. Ia gwau taunimanima edia helaro namona tamona be unai.—Daniel 2:44; Mataio 6:9, 10; 12:21.
3. Tanobada do ia lohiaia gavamanima be Iesu ese edena bamona ia gwauraia, bona badina be dahaka?
3 Iesu ese unai Dirava ena gavamani ia gwauraia “Guba Basileia,” badina be guba amo do ia lohia. (Mataio 4:17) Ia ese danu ia gwauraia “Dirava ena Basileia,” badina be Dirava ese do ia haginia. (Luka 17:20) Nega daudau lalonai Dirava ese ena toretore taudia ia hasiahudia bena peroveta herevadia idia toredia, unai gavamani taudia bona ena gaukara idia perovetalaidia.
Tanobada ena Pavapava Matamatana
4, 5. Dirava ese edena bamona ia hahedinaraia ia ese Iesu na Pavapava ai ia halaoa gwauraia?
4 Lagani 2,000 bamona idia lao vadaeni, Iesu ese peroveta herevadia momo ia hamomokanidia. Unai amo ia hamomokania ia be Dirava ena abia hidi tauna, unai guba gavamanina amo taunimanima do ia lohiadia tauna. Ia mase murinai, Dirava ese lauma ai ia hatorea isi lou, bona doko diba lasi maurina bona siahu bada ia henia, guba lalonai. Momo ese ena toreisi lou herevana idia hamomokania.—Kara 4:10; 9:1-9; Roma 1:1-4; 1 Korinto 15:3-8.
5 Bena Iesu be “Dirava ena idiba kahanai ia helai diho.” (Heberu 10:12) Unuseniai ia naria ela bona Dirava ese ia hasiahua, ena Guba Basileiana lalonai ia lohia totona. Unai ese Salamo 110:1 ena hereva ia hamomokania; unuseniai Dirava ese ia hereva henia, ia gwau: “Lauegu idibana kahanai oi helai, ela bona emu inai taudia be emu aena atoa gauna ai do lau halaodia.”
6. Iesu be edena bamona ia hahedinaraia ia be hegeregere Dirava ena Basileia ena Pavapava ai do ia lao?
6 Tanobada ai ia noho neganai, Iesu ia hahedinaraia ia be hegeregere unai dagi do ia abia. Ena be idia dagedage henia, to Dirava ia badinaia noho. Unai amo, Satana ena hereva, taunimanima be hetoho lalonai Dirava do idia badinaia lasi herevana, be ia ese ia hakoikoia. Iesu, tau goevadaena, “Adam dokona,” ese ia hahedinaraia Dirava ese taunimanima ia karadia kerere lasi.—1 Korinto 15:22, 45; Mataio 4:1-11.
7, 8. Tanobada ai ia noho neganai Iesu be dahaka kara namodia ia karaia, bona unai amo dahaka ia hahedinaraia?
7 Edena lohia ena kara ena anina be Iesu ena hegeregerena? Dirava ena lauma helaga ese ia hasiahua dainai, Iesu ese gorere taudia, aena dika taudia, matakepulu taudia, taia kudima taudia bona mu taudia ia hanamodia. Mase taudia ia hatoredia isi lou danu! Unai amo ia hahedinaraia ia ese taunimanima iboudiai edena bamona do ia durudia, ena Basileia siahuna do ia abia neganai.—Mataio 15:30, 31; Luka 7:11-16.
8 Iesu ese kara namodia momo herea ia karaia dainai, ena hahediba tauna Ioane ia gwau: “Kara momo herea danu Iesu ese ma ia karaia. Ibounai bema idia torea, lau laloa tanobada ibounai be do ia hegeregere lasi unai buka ibounai haboua totona.”—Ioane 21:25.a
9. Dahaka dainai lalo-momokani taudia be Iesu dekenai idia lao?
9 Iesu be mai ena hebogahisi, bona taunimanima ia lalokau henidia bada. Ogogami taudia ia durudia, to taga taudia bona dagi bada taudia ia dadaraidia lasi. Lalo-momokani taudia ese ena hereva idia abia dae, inai bamona ia hereva henidia neganai: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani.” (Mataio 11:28-30) Dirava garina idia gari taudia hutuma be ia dekenai idia hebou bona ena lohia negana idia naria.—Ioane 12:19.
Ia ida Do Idia Lohia Taudia
10, 11. Daidia be Iesu ida tanobada do idia lohiaia hebou?
10 Dirava ena guba Basileiana lalonai, haida be Iesu ida do idia pavapava hebou. Iesu ida tanobada do idia lohiaia, badina be ia ese ena bamodia ia gwauhamata henidia, idia be ia ida taunimanima do idia lohiadia hebou.—Ioane 14:2, 3; Apokalupo 5:10; 20:6.
11 Anina be, taunimanima haida do idia toreisi lou bena Iesu ida do idia noho hebou guba dekenai. Edia orea be Dirava ena Basileia, taunimanima do ia hanamodia hanaihanai gauna. (2 Korinto 4:14; Apokalupo 14:1-3) Nega daudau lalonai, Iehova ese edia gavamani ena badina ia atoa; gauna unai, taunimanima do ia hanamodia ela bona hanaihanai.
Taunimanima Sibodia Edia Gavamani Do Idia Ore
12, 13. Dirava ena Basileia be hari ia hegaegae, dahaka do ia karaia totona?
12 Baibel ena peroveta herevadia ese idia hahedinaraia, lagani 1914 lalonai Dirava ese ena Basileia ia haginia bona Keriso be ena pavapava ai ia halaoa, bona unai Basileia ia hegaegae, Satana ena orea ibounai do ia haorea totona. Ia hegaegae, “[Keriso ena] inai taudia bogaragidiai do [ia] kwalimu” totona.—Salamo 110:2.
13 Daniel 2:44 ena peroveta herevana be inai: “Unai pavapava [hari inai negai idia noho taudia] edia negai guba Diravana ese basileia ta do ia haginia, nega ta ai do idia hadikaia ore diba lasi gauna. Bena ena lohia siahuna do ia hanai lasi bese idauna ta dekenai [taunimanima ese do idia abia lasi]. Unai basileia iboudiai be [Dirava ena Basileia ese] do ia hamakohidia maragimaragi bona do ia haoredia, bena ia sibona do ia gini ela bona hanaihanai.”
14. Taunimanima edia gavamani do idia ore dainai, dahaka hahenamo do idia vara?
14 Dirava ena lohia siahuna henunai idia noho lasi gavamanidia iboudiai be Dirava ena Basileia ese do ia haoredia, bena ia sibona ese tanobada ibounai do ia lohiaia. Basileia be guba gauna, unai dainai taunimanima ese do idia hakererea diba lasi. Lohia siahuna be Dirava dekenai do ia noho, matamana neganai hegeregerena. Dirava ena gavamani ese tanobada ibounai do ia biagua dainai, tomadiho koikoidia o aonega koikoi herevadia o politik herevadia amo taunimanima do idia koidia lasi. Unai gau do idia vara diba lasi.—Mataio 7:15-23; Apokalupo, karoa 17 ela bona 19.
[Footnotes]
a Iesu sivaraina ibounai duahia totona, buka ta ladana Tau Hereadaena oi duahia; hari buka be Watchtower Bible and Tract Society of New York, Inc. ese ia halasia, lagani 1991 lalonai.
[Picture on page 18]
Tanobada ai ia karaia karadia amo Iesu ese ia hahedinaraia nega matamatana lalonai gorere bona mase do ia haoredia
[Picture on page 19]
Dirava ena guba Basileiana ese Iena lohia siahuna henunai idia noho lasi gavamanidia iboudiai do ia haoredia