Inai Tanobada Do Ia Ore Eiava?
Hari inai negai taunimanima momo ese tanobada ena dokona idia herevalaia. Idia momo idia laloa niuklia tuarina ese tanobada do ia hadikaia ore. Haida idia laloa taunimanima ese tanobada hamiroa karadia amo do idia hadikaia ore. Ma haida idia laloa bese idauidau be moni dainai do idia inai heheni bada.
Inai tanobada do ia ore diba a? Bema oibe, anina be dahaka? Ta ia ore vadaeni, eiava?
Tanobada ta Ia Ore —Matamatana Ia Vara
Oibe, Noa ena negai tanobada dika rohorohona ia ore. Baibel ia gwau: “Dirava ese unai tanobada gunana ranu dekena amo ia hadikaia ore, abata badana dekena amo.” Ma ia gwau: “Gunaguna, taunimanima momo ese Dirava idia kamonai henia lasi neganai, ia ese . . . abata bada herea ia havaraia, vadaeni ibounai idia mase. Noa, kara maoromaoro ia harorolaia tauna, mai taunimanima 7 sibona idia mauri.”—2 Petero 2:5; 3:6.
Unai tanobada ia ore, anina be “Dirava idia kamonai henia lasi” taudia idia mase ore. To Noa mai ena ruma bese ida be unai Abata Badana amo idia roho mauri, bona tanobada korikorina bona guba hisiudia danu be idia ore lasi.
Unai murinai Noa ena bese ia bada ia lao—tanobada ma ta ia vara unai. Unai tanobada oromana iharuana be ia noho ema bona hari. Idaunega amo ema bona hari, tuari, raskol karadia, bona dagedage karadia momo amo ia honu. Hari tanobada do ia ore eiava?
Hari Tanobada ena Vaira Negana
Baibel ia gwau Noa ena negai tanobada ia ore, bena unai murinai ia gwau: “To harihari idia noho guba bona tanobada be . . . lahi badana ese . . . do ia araia ore.” (2 Petero 3:7) Ma ia gwau: ‘Tanobada [hari ia noho gauna] . . . be kahirakahira do ia ore.’—1 Ioane 2:17.
Baibel ena hereva hegeregerena do idia ore gaudia be tanobada korikorina lasi bona guba hisiudia lasi. Noa ena negai idia ore lasi. (Salamo 104:5) “Guba” anina be gavamani lohiadia, Satana ena siahu henunai, bona “tanobada” anina be taunimanima. Do idia ore, lahi ese do ia hadikadia ore bamona. (Ioane 14:30; 2 Korinto 4:4) Tanobada oromana, hari ia noho gauna, be momokani do ia ore, Abata Badana be do lasi neganai ia noho gauna ia ore bamona. Iesu Keriso ia gwau inai tanobada ena dokona be kahirakahira neganai, “Noa ena nega” ai idia vara gaudia do idia vara lou.—Mataio 24:37-39.
Iesu ese Noa ena nega ia herevalaia neganai, iena aposetolo edia henanadai, “Do oi giroa mai, bona tanobada dokona danu, ena toana be dahaka?” ia haerelaia. (Mataio 24:3) Iesu ena orea taudia idia diba inai tanobada do ia doko. Unai idia garilaia a?
Lasi. Tanobada dokona be kahirakahira neganai do idia vara gaudia be Iesu ese ia hamaorolaidia neganai, ia gwau namona be do idia moale ‘badina be edia hahemauri be ia kahirakahira vadaeni.’ (Luka 21:28) Oibe, Satana bona ena tanobada oromana dikana amo do ia hamauridia, bena tanobada matamatana mai mainona ai do idia noho!—2 Petero 3:13.
To edena negai inai tanobada do ia doko? Iesu ese dahaka ‘toa’ ia gwauraia, do ia “giroa mai, bona tanobada dokona danu” edia toana unai?
‘Toa’
Inai hereva “giroa mai” be Greek gado herevana pa·rou·siʹa amo idia hahanaia. Pa·rou·siʹa ena anina be “noho.” Unai ‘toa’ do idia itaia neganai, do idia diba Keriso be ia lou mai vadaeni bona ia noho. Anina be, guba lalonai ia lohia matamaia vadaeni bona kahirakahira iena inai taudia do ia hamasedia ore.—Apokalupo 12:7-12; Salamo 110:1, 2.
Iesu ese tanobada ai do idia vara gaudia idauidau momo ia gwauraidia, idia be unai ‘toa’ ai do idia lao. Idia iboudiai be “nega dokonai” do idia vara. (2 Timoteo 3:1-5; 2 Petero 3:3, 4) Iesu ese ia gwauraidia gaudia haida mani oi lalodia.
“Bese ta ese do ia toreisi, bese ta do ia tuari henia.” (Mataio 24:7) Lagani 1900 murinai idia vara tuaridia haida be bada herea. Tanobada ibounai tuaridia ruaosi edia dika be bada herea, badina be bese idauidau idia tuari heheni mai edia goada ibounai ida. Bona tuari ese tanobada idia hadikaia noho ema bona hari. Oibe, Iesu ena hereva be hoa dalanai idia momokani!
“Hitolo bada do ia vara.” (Mataio 24:7) Tanobada Ibounai Tuarina Ginigunana murinai hitolo bada herea ia vara. Iharuana murinai danu hitolo bada ia vara. Taunimanima iboudiai ima ima amo malniutrisen gorerena ese tamona tamona ia hadikadia, bona lagani ta ta iboudiai memero kekeni 14 milion ia hamasedia. Momokani, “hitolo bada” ia vara!
“Tano do idia mareremarere.” (Luka 21:11) Tano-laga, lagani 1914 murinai idia vara gaudia, dainai taunimanima hutuma idia mase. Guna be unai bamona lasi. Lagani 1920 ai, China ai, taunimanima 200,000 idia mase; lagani 1923 ai, Japan ai, 99,300 idia mase; lagani 1939 ai, Turkey ai, 32,700 idia mase; lagani 1970 ai, Peru ai, 66,800 idia mase; lagani 1976 ai, China ai, 240,000 bamona (o, ripoti haida idia gwau, 800,000) idia mase.
“Ta ta dekenai do ia hanaia gorerena do idia vara.” (Luka 21:11) Lagani 1918 bona 1919 ai, Spanish flu gorerena ese taunimanima 21 milion bamona ia hamasedia haraga herea. Unai nega amo ema bona hari, kudou gorerena, kensa, AIDS, bona gorere idaudia momo ese taunimanima milion milion idia hamasedia.
“Kara dikadia danu do idia vara gabu idauidau dekenai.” (Mataio 24:12) Lagani 1914 amo ema bona hari, taravatu utua karadia momo idia vara. Gabu momo ai, dina ai taunimanima be dala ai idia raka negadiai idia gari. Hanuaboi ai idia gari dainai, iduara idia lokadia bona idia loaloa lasi.
Baibel ia gwau nega dokona ai ma gau momo do idia vara, bona idia iboudiai be hari inai negai idia vara. Anina be tanobada ena dokona be ia kahirakahira. To, ita moale diba, badina be Baibel ia gwau: ‘Tanobada be kahirakahira do ia ore, to Dirava ena ura ia karaia noho tauna be do ia noho ela bona hanaihanai.’—1 Ioane 2:17.
Unai dainai namona be Dirava ena ura ita diba bona ita karaia. Unai amo inai tanobada ena dokona amo do ita roho mauri bena Dirava ena tanobada matamatana do ita moalelaia ela bona hanaihanai. Baibel ia gwau, unai neganai “mase bona lalohisihisi, bona taitai, bona hisihisi be do idia ore momokani.”—Apokalupo 21:3, 4.
All Bible quotations are from the Taravatu Matamatana published by The Bible Society of Papua New Guinea.
[Picture Credit Line on page 6]
Photo Credits: Airplane: USAF photo. Child: WHO photo by W. Cutting. Earth- quake: Y. Ishiyama, Hokkaido University, Japan.