Oiemu Headava Maurina Ia Namo Totona Oi Hegaegae

1, 2. (a) Iesu ese edena bamona ia hahedinaraia palani karaia karana be mai anina bada? (b) Edena negai palani karaia karana be mai anina bada herea?

RUMA ta haginia totona, namona be haginia taudia idia hegaegae namonamo guna. Ruma ena badina idia do atoa lasi neganai, tano idia hoia bona palani idia karaia. To, gau ma ta be mai anina bada. Iesu ia gwau: “Bema tau ta ia ura kohoro ruma do ia haginia, ia be guna do ia helai diho, bona haginia ena davana do ia laloa, bema ia be ruma do ia karaia haorea diba, o lasi?”—Luka 14:28.

² Ruma haginia dekenai ia momokani herevana be headava namona haginia dekenai ia momokani danu. Momo idia gwau: “Lau ura lau headava.” To taunimanima hida ese headava ena maduna idia laloa guna? Ena be Baibel ese headava ia gwauraia namo, to ia ese headava ena hekwarahi ia herevalaia danu. (Aonega Herevadia 18:22; 1 Korinto 7:28) Unai dainai, headava idia laloa taudia ese headava maurina ena hahenamo bona ena maduna idia diba namonamo be namo.

3. Dahaka dainai Baibel ese headava idia laloa taudia ia durua namonamo diba, bona edena henanadai toi haerelaia totona ita do ia durua?

³ Baibel ese ita ia durua diba. Ena sisiba be headava ia Hamatamaia Tauna, Iehova Dirava, ena lauma amo ia vara. (Efeso 3:14, 15; 2 Timoteo 3:16) Hari inai negai ita badinaia diba bukana gunana ena hakaua herevadia edia heduru amo mani ita tahua (1) Edena bamona ta ia diba headava totona ia hegeregere eiava lasi? (2) Ta ese do ia adavaia tauna dekenai edena bamona gaudia do ia tahua be namo? bona (3) Hetura karana be edena bamona do ia goeva?

HEADAVA TOTONA OI HEGEREGERE, A?

4. Headava ena namo naria totona dahaka be gau badana, bona dahaka dainai?

⁴ Reana ruma ta haginia gaukarana ena davana ia bada, to nega daudau lalonai unai ruma naria gaukarana be mai ena davana danu. Headava danu be unai bamona. Toana be tau bona hahine idia headava be mai ena hekwarahi; to, do idia hanaia laganidia ta ta lalonai edia headava do idia naria dalana idia laloa danu be namo. Edia headava idia naria ena anina be dahaka? Gau badana be mai edia kudouna ibounai ida headava maurina do idia badinaia. Baibel ese headava maurina ia herevalaia, ia gwau: “Tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.” (Genese 2:24) Ta ese ena headava ia hadokoa bena ma ta ia adavaia diba ena badina maorona tamona be Iesu ese Baibel lalonai ia gwauraia—“heudahanai,” ena anina be headava murimurinai idia karaia mahuta hebou karadia. (Mataio 19:9) Bema headava oi laloa noho, namona be unai Baibel taravatudia do oi laloatao. Bema oi hegeregere lasi unai bamona gwauhamata oi karaia, oi hegeregere lasi do oi headava.—Deuteronomi 23:21; Hadibaia Tauna 5:4, 5.

5. Ena be taunimanima haida ese headava badinaia karana ena gwauhamata idia gari henia, to dahaka dainai headava idia laloa taudia ese unai kara idia laloa bada be namo?

⁵ Taunimanima momo be headava badinaia ena gwauhamata dekenai idia gari. Tau matamata ta ia gwau: “Lau diba ai ruaosi be ai parara diba lasi, to emai mauri ibounai do ai noho hebou, unai dainai toana be daiguni ta dekenai lau idia doria lao, idia koua, idia hadiburaia bamona.” To bema oi ese oi adavaia gwauraia tauna o hahinena oi lalokau henia momokani, oi laloa lasi headava badinaia karana be maduna metauna. To, oi laloa unai kara ese dika amo umui do ia gimaia. Tau bona hahine idia gwau headava maurina do idia badinaia dainai, idia ura nega namodia bona nega dikadia lalonai idia noho hebou bona herevana dahaka do ia vara idia ta ta do idia durua heheni. Keristani aposetolo Paulo ia gwau lalokau korikorina be “ia hesiku lasi” bona “metau iboudiai lalonai ia gini goada noho.” (1 Korinto 13:4, 7) Hahine ta ia gwau: “Headava badinaia gwauhamatana dainai egu noho be namo. Ai ta ta dekenai bona taunimanima vairanai ai gwau ai ura do ai noho hebou, bona unai ese ia havaraia hemami namona lau ura henia bada.”—Hadibaia Tauna 4:9-12.

6. Dahaka dainai ta ia matamata momokani neganai ia headava lasi be namo?

⁶ Unai bamona gwauhamata oi hagugurua totona, laloa namonamo karana oi manadalaia be gau badana. Unai dainai, Paulo ese Keristani taudia ia sisiba henia idia headava lasi ela bona ‘matamata negana idia hanaia,’ unai nega lalonai mahuta hebou urana ia goada bona laloa namonamo karana ia hadikaia diba. (1 Korinto 7:36, NW) Memero kekeni idia tubu lalonai, edia mauri ia idau haraga. Idia do matamata momokani negana lalonai idia headava taudia momo idia davaria lagani haida sibona murinai, edia dabu bona ura gaudia idia idau, bona edia adavana danu be unai bamona. Tahua karadia haida ese idia hahedinaraia idia headava memero kekeni edia moale ia ore haraga bona idia ura edia headava idia hadokoa, to idia bada vadaeni lalonai idia headava taudia be idau. Unai dainai oi headava haraga lasi. Lagani haida lalonai oi bada vadaeni to oi do headava lasi be namo, unai amo diba namona oi abia bena gabeai oi be laloa namonamo tauna bona adavana namona ta ai oi lao diba. Danu, oi headava haraga lasi ese oi ia durua, oi sibona emu mauri dalana oi lalo-pararalaia namonamo totona—unai be gau badana, oiemu headava lalonai hetura karana namona do oi havaraia totona.

NAMONA BE OI SIBONA EMU MAURI DALANA OI DIBA GUNA

7. Dahaka dainai headava idia palanilaia taudia ese sibona edia kara idia tahua guna be namo?

⁷ Adavana namona ai do ia lao tauna o hahinena amo oi tahua karadia oi gwauraia haraga diba, a? Momo ese idia gwauraia diba. To, oi sibona emu kara be edena bamona? Oiemu kara haida be dahaka, oi do idia durua oiemu headava ia namo totona? Oi be edena bamona adavana ai do oi lao? Hegeregere, oi kerere neganai, oi gwauraia hedinarai bona sisiba oi abia dae, eiava sisiba oi abia neganai hanaihanai sibona emu maoro oi gwauraia toho, a? Oi moale bona emu lalohadai idia namo, eiava nega momo oi lalohisihisi bona oi maumau hanaihanai, a? (Aonega Herevadia 8:33; 15:15) Namona be oi laloatao, headava ese oiemu kara do ia haidaua lasi. Bema oi do headava lasi neganai oi hekokoroku, oi lalohisihisi haraga, eiava nega momo oiemu lalohadai idia dika, oi headava murinai danu oiemu kara be unai bamona. Ma haida ese ita idia itaia bamona sibona ita itaia be auka, unai dainai tamana o sinana o oi abidadama henia turana ta oi noia diba, ena lalohadai korikorina bona ena sisiba ia gwauraia totona be namo, ani? Bema idia gwau emu kara haida oi haidaua be namo, oi do headava lasi neganai unai kara do oi haidaua be namo.

8-10. Dahaka sisiba Baibel lalonai ese headava totona ia hegaegae tauna o hahine ia durua?

⁸ Baibel ese ita ia hagoadaia Dirava ena lauma helaga ita koua lasi, bena ia ese ita lalonai “lalokau, moale, maino, haheauka, bogahisihisi, kara maoromaoro, abidadama momokani kara, manau, [bona] tauanina ena ura koua karana” ia havaraia. Danu, Baibel ese ita ia hadibaia ‘iseda lalona bona kudouna do ita hamatamataia’ bona ‘mauri matamata do ita atoa, ia dainai iseda toana be Dirava ena toana bamona, ena kara be maoromaoro, helaga bona momokani.’ (Galatia 5:22, 23; Efeso 4:23, 24) Oi do headava lasi neganai unai sisiba oi badinaia karana be banika dekenai moni oi atoa karana bamona—vaira negana ai, oi headava neganai, ia be mai anina bada.

⁹ Hegeregere, bema oi be hahine ta, namona be ‘emu hairai korikorina emu kudouna dekenai’ oi laloa bada, to oiemu tauanina ena toana oi laloa bada lasi. (1 Petero 3:3, 4) Hemataurai bona laloa maoromaoro ese oi do idia durua oi aonega totona, bona aonega ese “hairai” korikorina oi ia henia. (Aonega Herevadia 4:9; 31:10, 30; 1 Timoteo 2:9, 10) Bema oi be tau ta, mai hemataurai ida hahine oi kara namo henia daladia oi dibaia be namo. (1 Timoteo 5:1, 2) Gau idauidau abia hidi bona maduna huaia karadia oi dibaia neganai, namona be manau karadia oi dibaia danu. Kara auka ese headava do ia hadikaia diba.—Aonega Herevadia 29:23; Mika 6:8; Efeso 5:28, 29.

¹⁰ Ena be iseda lalohadai unai gaudia dekenai ita haidaua be auka, to namona be Keristani taudia ibounai ese unai idia karaia. Bona unai ese oi do ia durua, adavana namona ta ai do oi lao.

OI ADAVAIA GWAURAIA TAUNA ENA KARA OI TAHUA

11, 12. Edena dala ai taunimanima rua do idia diba bema idia hegeregere idia gaukara hebou?

¹¹ Oiemu gabu dekenai taunimanima ese sibodia edia adavana idia abia hidi diba, a? Bema oibe, tau o hahine matamata ta oi ura henia neganai, dahaka do oi karaia? Namona be sibona oi nanadaia guna, ‘Momokani lau ese headava lau laloa, a?’ Ta ena hemami oi gadaralaia bena headava lalohadaina ia abia kava be dika momokani. (Aonega Herevadia 13:12) Bena, sibona oi nanadaia, ‘Headava totona egu noho ia hegeregere, a?’ Bema unai henanadai ruaosi edia haere be Oibe, reana oiemu gabu ena kara ta hegeregerena do oi karaia. Tano haida ai, nega sisina ena kara oi itaia murinai, reana ia dekenai oi lao bona oi hamaoroa oi ura ia oi diba namonamo. Bema oi ia ura henia lasi, oi doria lasi ela bona ena hemami ia dika. Namona be oi laloatao, ia danu be mai ena maoro ia ura henia tauna o hahinena ia abia hidi totona. To, bema oi ia ura henia, reana dala umui karaia gau namodia haida umui karaia hebou totona. Unai dala amo do oi itaia unai tau o hahine oi adavaia be aonega karana eiava lasi.a Unai nega lalonai, edena bamona kara oi tahua be namo?

¹² Unai henanadai ena haere abia totona, namona be miusiki karaia gaudia rua, reana piano bona gita, oi laloa. Bema ta ta edia regena idia hanamoa, idia ta ta amo miusiki namona idia havaraia diba. To, unai miusiki karaia gaudia idia gadaralaia hebou be edena bamona? Namona be idia ruaosi edia rege idia hakapua. Oi bona emu turana be unai bamona danu. Reana umui ta ta umui hekwarahi emui kara umui hanamoa totona. To namona be hari oi henanadai: Umui ruaosi umui hakapua be hegeregere, a? Hegeregere, umui gaukara hebou diba, a?

13. Dahaka dainai Dirava ia abidadama henia lasi tauna oi tura henia be aonega lasi karana?

¹³ Gau badana be umui ruaosi umui abidadama henia gaudia bona umui idia hakaua herevadia idia hegeregere. Aposetolo Paulo ia gwau: “Dirava idia abidadama henia lasi taudia danu do umui hakapua tamona lasi.” (2 Korinto 6:14; 1 Korinto 7:39) Bema Dirava ia abidadama henia lasi tauna oi adavaia, emui headava lalonai do umui lalo-tamona lasi. To, bema umui ruaosi ese Iehova Dirava umui badinaia, unai be umui ia hatamonaia gauna goadana. Iehova ia ura do oi moale bona emu adavana ida emui lalo-tamona ia goada. Ia ura varo toi amo idia hatua varona bamona, umui ruaosi bona Ia be lalokau goadana amo umui hakapua tamona.—Hadibaia Tauna 4:12.

14, 15. Dirava idia tomadiho henia hebou karana be headava lalonai lalo-tamona ia havaraia gauna tamona, a? Oi gwauraia hedinarai.

¹⁴ Ena be Dirava umui tomadiho henia hebou be lalo-tamona ia havaraia gauna badana, to unai sibona be hegeregere lasi. Umui gaukara hebou namonamo totona, namona be oi bona emu turana emui tahua gaudia be idia hegeregere. Emui tahua gaudia be dahaka? Hegeregere, natudia abia karana dekenai dahaka umui laloa? Emui mauri lalonai dahaka gaudia umui atoa guna?b (Mataio 6:33) Headava namona lalonai, tau bona hahine be turadia namodia bona ta ta edia hebamo idia moalelaia. (Aonega Herevadia 17:17) Unai ia vara totona, namona be idia ura henia gaudia be idia hegeregere. Bema ura gaudia be idia hegeregere lasi hetura karana namona umui havaraia be auka—bona headava namona umui havaraia be auka momokani. To, bema oiemu turana ese kara ta ia ura henia, hegeregere ia ura ororo dekenai ia loaloa, bona oi be unai kara oi ura henia lasi, anina be umui ruaosi be do umui headava lasi be namo, a? Reana lasi. Reana gau ma haida, mai anina bada gaudia, be umui ruaosi ese umui ura henia. Danu, reana oiemu turana oi hamoalea diba bona ia ese ia moalelaia kara namona be ia danu do oi karaia.—Kara 20:35.

¹⁵ Momokani, do umui gaukara hebou namonamo totona, emui kara idia hegeregere momokani eiava lasi be mai anina bada lasi, to emui kara umui haidaua diba eiava lasi be mai anina bada. Oi henanadai lasi, “Gau ibounai dekenai ai lalo-tamona, a?” To namona be oi henanadai: “Ai lalo-tamona lasi neganai dahaka ia vara? Maino dalana ai, ai herevahereva diba bona ai ta ta ai matauraia, a? Eiava nega momo emai herevahereva be hepapahuahu ai ia lao?” (Efeso 4:29, 31) Bema oi ura do oi headava, sibona ena lalohadai ia gwauraia goada hekokoroku tauna, nega ibounai sibona ena lalohadai ia dogoatao auka, eiava hanaihanai sibona ena ura hagugurua totona dala ia tahua tauna dainai oi naria namonamo.

OI TAHUA NAMONAMO GUNA

16, 17. Ta ese ia adavaia gwauraia tauna o hahine ia laloa neganai, dahaka ia laloa be namo?

¹⁶ Keristani kongregesen lalonai, maduna idia abia taudia ‘edia kara idia tahua guna.’ (1 Timoteo 3:10) Oi danu ese unai hakaua herevana oi badinaia diba. Hegeregere, reana hahine ta be inai bamona do ia henanadai, “Taunimanima vairanai inai tau ena ladana be edena bamona? Ena turana be daidia? Sibona ena ura ia biagua, a? Buruka taudia be edena bamona ia kara henia? Ena ruma bese be edena bamona? Edena bamona ia kara henidia? Moni be edena bamona ia laloa? Ia inuinu kekero, a? Ena hemami ese ena kara ia biagua, reana ia dagedage danu, a? Kongregesen lalonai dahaka maduna ia abia, bona edena bamona ia huaia? Ia lau matauraia momokani diba, a?”—Levitiko 19:32; Aonega Herevadia 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.

¹⁷ Reana tau ta be inai bamona do ia henanadai, “Inai hahine ese ia hahedinaraia Dirava ia lalokau henia bona ia matauraia, a? Ruma ia naria diba, a? Ena ruma bese taudia be ai ruaosi amo dahaka heduru do idia ura idia abia? Ia be aonega, gaukara goada, bona moni negea kava lasi hahinena, a? Dahaka ia herevalaia momo? Ma haida edia namo ia laloa mai momokani ida, eiava ia be ia sibona ia laloa bada, ma haida edia kara ia herevalaia momo hahinena, a? Ia lau abidadama henia diba, a? Kwara dagina henunai ia noho mai ena ura ida, eiava ena lalona ia auka, reana ia gwau-edeede, a?”—Aonega Herevadia 31:10-31; Luka 6:45; Efeso 5:22, 23; 1 Timoteo 5:13; 1 Petero 4:15.

18. Bema ta oi tura henia lalonai kerere maragidia haida oi davaria dahaka oi laloa be namo?

¹⁸ Namona be oi laloaboio lasi, ia be Adamu ena goevadae lasi natuna ta, ia be lalokau sivaraina ta lalonai kara maorodia sibona ia karaia tau eiava hahine bamona lasi. Taunimanima iboudiai be mai edia kerere, bona namona be idia haida ita laloaboio sibona—oiemu bona oiemu turana ena. (Roma 3:23; Iamesi 3:2) Danu, bema manoka gauna ta oi itaia, unai ese dala ia kehoa lauma dalanai oi tubu totona. Hegeregere, reana umui turana karaia lalonai umui hepapahuahu. Mani oi laloa: Ta ta idia lalokau henia bona idia matauraia taudia danu be nega haida idia lalo-tamona lasi. (Mani Genese 30:2; Kara 15:39 itaia.) Reana umui ruaosi be “haheauka” karana umui habadaia be namo, maino dalanai hekwakwanai do umui hamaoromaoroa totona, a? (Aonega Herevadia 25:28) Oiemu turana ese ia hahedinaraia ia ura ena kara ia hanamoa, a? Oi danu, a? Do oi lalohisihisi haraga lasi eiava oi badu haraga lasi totona gau haida oi haidaua be namo, a? (Hadibaia Tauna 7:9) Hekwakwanai hanaia dalana oi dibaia dainai mai momokani ida umui herevahereva dalana oi karaia, bona unai be gau badana bema gabeai umui ruaosi umui headava.—Kolose 3:13.

19. Bema ta oi tura henia lalonai hekwakwanai badadia idia hedinarai, dahaka aonega karana do oi karaia be namo?

¹⁹ To, bema oi itaia ena kara haida dainai oi lalo-hekwarahi momokani be edena bamona? Unai bamona daradara gaudia oi laloa namonamo be namo. Herevana oiemu lalokau ia bada eiava oi ura dikadika oi headava, to kerere badadia oi laloa maragi lasi. (Aonega Herevadia 22:3; Hadibaia Tauna 2:14) Bema ta oi tura henia to ena kara haida oi lalo-hekwarahilaia bada, aonega karana be unai hetura karana oi hadokoa bona badinaia karana ena gwauhamata oi karaia lasi.

EMUI HETURA KARANA IA GOEVA BE NAMO

20. Idia turana karaia taudia be dahaka idia karaia diba ta ese edia kara ia gwauraia dika lasi totona?

²⁰ Edena dala ai emui hetura karana do ia goeva noho? Gau ginigunana be, oi hamomokania oiemu kara be do idia gwauraia dika lasi. Oiemu gabu ai, idia do headava lasi taudia ese ta ta edia imana idia dogoatao, idia kisi henia, eiava idia rosia be maoro, a? Ena be taunimanima ese unai bamona lalokau hahedinaraia karadia idia maumauraia lasi, to headava umui palanilaia momokani vadaeni neganai sibona do umui karaia. Namona be oi naria namonamo emui lalokau hahedinaraia karadia be kara miro eiava sihari kava karadia ai idia lao garina. (Efeso 4:18, 19; mani Solomona ena Ane 1:2; 2:6; 8:5, 9, 10 itaia.) Kudouna be mai ena koikoi bada dainai, aonega karana be umui ruaosi sibona ruma ta ai, daiutu ta ai, motuka ta ai, eiava kara miro totona dala ia kehoa gabuna ma ta ai do umui noho lasi. (Ieremia 17:9) Emui hetura karana ia goeva totona oiemu kara oi naria namonamo ese ia hahedinaraia goevagoeva oiemu tauanina ena ura oi biagua diba bona sibona emu namo oi tahua lasi, to emu turana ena namo oi tahua guna. Gau badana be, emui hetura karana ia goeva ese Iehova Dirava ia hamoalea, badina ia ese ena hesiai taudia ia hagania kara miro bona sihari kava karadia do idia dadaraia.—Galatia 5:19-21.

21. Emui hetura karana ia goeva noho totona dahaka gaudia umui herevalaia mai momokani ida?

²¹ Gau iharuana be, emui hetura karana ia goeva noho ena anina ta be umui herevahereva mai momokani ida. Ta oi tura henia bena headava umui laloa matamaia neganai, gau haida umui herevalaia namonamo be gau badana. Edeseniai do umui noho? Umui ruaosi be moni gaukara do umui karaia, a? Umui ura natudia do umui abia, a? Danu, headava dekenai mai anina gaudia, reana guna idia vara gaudia, umui hahedinaraia be namo. Reana unai bamona gaudia be abitorehai badadia, maduna ma haida, eiava medikol gaudia, hegeregere gorere dikana eiava oiemu tauanina ena manoka ta. HIV (AIDS gorerena ia havaraia vairasi) idia abia taudia momo be gorere mamina idia abia haraga lasi dainai, bema ta ia ura eiava ena lalokau tama sina idia ura guna matabodaga karadia eiava drag be rara varona lalonai atoa karana ia karaia tauna idia noia AIDS gorerena tahua karana do ia karaia, unai be kerere lasi. Bema unai tahua karana ese ia hahedinaraia AIDS ia abia, namona be gorere ia abia tauna ese ena turana ia doria lasi idia turana karaia noho, bema ia ura unai hetura karana ia hadokoa. Momokani, bema ta be guna gorere dikana ia havaraia diba mauri dalana ia badinaia, namona be ia ura ia dekenai AIDS gorerena tahua karana do idia karaia, ta ia do tura henia lasi neganai.

HEADAVA DINANA SIBONA UMUI LALOA LASI

22, 23. (a) Headava dinana totona umui hegaegae neganai, laloa maoromaoro karana be edena bamona umui haboioa diba? (b) Headava matamaia ariana bona headava maurina umui laloa neganai, edena dala ai umui laloa maoromaoro be gau badana?

²² Umui do headava lasi negana ena hua ginigabedia lalonai, headava dinana totona umui hegaegae dainai, reana umui ruaosi do umui bisi bada. Unai lalo-hekwarahi umui hamaragia diba, bema umui laloa maoromaoro. Reana headava aria badana dainai varavara bona taunimanima ma haida do idia moale, to reana ia dainai headava matamata taudia bona edia ruma bese taudia do idia hesiku bona edia moni do ia ore. Kastom haida umui badinaia be hegeregere, to bema kastom iboudiai umui badinaia toho bona headava ariana iboudiai ia hereaia ariana ta umui karaia, unai ese unai aria ena anina namona ia hunia bona reana unai dina do umui moalelaia momokani lasi. Ena be ma haida edia hemami umui laloa be maoro, to headava ariana lalonai idia vara gaudia be headava matamata tauna ena maduna.—Ioane 2:9.

²³ Namona be umui laloaboio lasi, emui headava ariana ena lata be dina tamona sibona, to emui headava maurina ena lata be emui mauri laganidia ibounai. Namona be headava matamaia ariana umui laloa bada herea lasi. To, Iehova Dirava amo heduru umui noia, bona headava maurina totona palani umui karaia. Unai neganai emui headava ia namo totona umui hegaegae namonamo.