Kahana 9
Namona be Dirava Ena Hesiai Taudia Idia Goeva
Dahaka dainai namona be dala ibounai ai ita goeva? (1)
Lauma dalana ai ita goeva ena anina be dahaka? (2)
Kara ai ita goeva anina be dahaka? (3) Darana ai ita goeva anina be dahaka? (4) Tauanina ai ita goeva anina be dahaka? (5)
Namona be edena bamona miro herevadia ita dadaraia? (6)
1. Iehova Dirava be goeva bona helaga. Ia ura ia idia tomadiho henia taudia idia goeva noho—lauma dalana ai, kara ai, darana ai, bona tauanina ai. (1 Petero 1:16) Ita hekwarahi Dirava ena matana ai ita goeva noho totona. Ita be tanobada mirona ai ita noho. Ita be eda ura kereredia, kara dika karaia uradia, ita tuari henia noho danu. To namona be ita hesiku lasi.
2. Goeva, Lauma Dalana Ai: Bema ita ura Iehova ena hesiai ita lao henia noho, namona be tomadiho koikoi edia hahediba herevadia eiava edia kara ita badinaia noho lasi. Namona be tomadiho koikoi amo ita siri bona dala ta ai ita durua lasi. (2 Korinto 6:14-18; Apokalupo 18:4) Dirava ita dibaia maoromaoro murinai, namona be ita naria namonamo hereva koikoi idia hahedibalaia taudia ese ita idia hakaua kerere garina.—2 Ioane 10, 11.
3. Kara Ia Goeva: Iehova ia ura ia idia tomadiho henia taudia be nega iboudiai Keristani taudia momokanidia bamona do idia kara. (1 Petero 2:12) Ita karaia karadia ibounai ia itaia, hehuni ai ita karaia karadia danu. (Heberu 4:13) Namona be inai tanobada ena sihari kava karadia bona ena kara mirodia ma haida ita dadaraia.—1 Korinto 6:9-11.
4. Darana Ia Goeva: Bema iseda darana be lalohadai goevadia amo ita hahonua, iseda kara danu do idia goeva. (Filipi 4:8) To bema gau mirodia ita laloa hanaihanai, kara dikadia do ita karaia. (Mataio 15:18-20) Namona be iseda darana idia hamiroa diba moale karadia ita dadaraia. Dirava ena hereva stadilaia karana amo iseda lalona be gau namodia amo ita hahonua diba.
5. Tauanina Ia Goeva: Keristani taudia be Dirava ena hereva gwauraia taudia dainai, namona be hanaihanai edia tauanina bona dabua idia goeva. Namona be mei rumana ita gaukaralaia murinai iseda imana ita huria, bona aniani ita do ania lasi o hegaegaelaia lasi neganai iseda imana ita huria be namo. Bema mei rumana be lasi, namona be unai miro gaudia be tano ai oi koua. (Deuteronomi 23:12, 13) Tauanina ia goeva noho karana ese tauanina ena namo ia habadaia. Keristani tauna ena ruma lalona bona murimurina idia namo bona goeva be namo. Namona be unai gabu o hanua ai ena toana ia namo.
6. Hereva Ia Goeva: Namona be Dirava ena hesiai taudia idia hereva momokani hanaihanai. Koikoi taudia be Dirava ena Basileia ai do idia vareai lasi. (Efeso 4:25; Apokalupo 21:8) Keristani taudia be hereva dikadia idia gwauraia lasi. Hevaseha hereva mirodia o sivarai mirodia idia kamonaia lasi eiava gwauraia lasi. Edia hereva ia goeva dainai, edia gaukara gabuna, sikuli gabuna, o noho gabuna ai idia idau.—Efeso 4:29, 31; 5:3.
[Pictures on page 18, 19]
Dala iboudiai dekenai, namona be Dirava ena hesiai taudia idia goeva