Kahana 12
Mauri Bona Rara Matauraia
Mauri bona (1) bogana lalonai natuna hamasea karana be edena bamona do ita laloa? (1)
Keristani taudia be edena bamona idia hahedinaraia mauri naria daladia idia laloa bada? (2)
Animal ita alaia be kerere, a? (3)
Dahaka kara haida ese mauri matauraia lasi toana idia hahedinaraia? (4)
Dirava ena taravatu rara dekenai be dahaka? (5)
Anina be rara henia hanai karana danu be taravatu, a? (6)
1. Iehova be mauri ena Badina. Mauri gaudia iboudiai edia mauri be Dirava ena amo idia abia. (Salamo 36:9) Dirava ena matana ai mauri be helaga. Iehova ese ia do vara lasi natuna ta, sinana ena bogana lalonai ia do noho, ia laloa bada danu. Dirava ena matana ai, unai nega lalonai ia tubu noho beibina hamasea karana be maoro lasi.—Esodo 21:22, 23, NW; Salamo 127:3.
2. Keristani taudia korikoridia be mauri naria daladia idia laloa bada. Edia motuka bona ruma idia naria namonamo, bero o mase do idia vara garina. (Deuteronomi 22:8) Dirava ena hesiai taudia be moale davaria totona dika idia davaria diba dalana ai edia mauri idia gaukaralaia kerere lasi. Unai dainai mai dagedage ida ma haida haberoa gadaradia dekenai idia vareai lasi. Moale karadia haida, dagedage totona idia hagoadadia karadia, idia dadaraia.—Salamo 11:5, NW; Ioane 13:35.
3. Havaraia Tauna ena matana ai animal edia mauri danu be helaga. Keristani tauna be animal ia alaia diba, aniani bona dabua abia totona, eiava ia alaia diba badina gorere bona dika ia henia garina. (Genese 3:21; 9:3; Esodo 21:28) To animal hahisia eiava spot dalanai o moale totona animal alaia kava be maoro lasi.—Aonega Herevadia 12:10.
4. Keristani taudia be kuku, buatau, bona drag ania kava karana amo moale idia tahua lasi. Unai kara be maoro lasi, badina (1) edia hesiai taudia ai ita idia halaoa bamona, (2) iseda tauanina idia hadikaia, bona (3) idia be miro gaudia. (Roma 6:19; 12:1; 2 Korinto 7:1) Haida ese unai kara, idia manadalaia karadia unai, idia negea be auka. To Iehova hamoalea totona, namona be ita negedia momokani.
5. Dirava ena matana ai rara danu be helaga. Dirava ia gwau soul, eiava mauri, be rara lalonai. Unai dainai rara ita ania be kerere. Bona ena rara idia bubua namonamo lasi animal ena hidio ita ania be kerere danu. Bema animal ta be ena aiona idia gigia eiava tarapu lalonai ia mase, namona be ita ania lasi. Bema io amo idia gwadaia o ipidi amo idia pidia, namona be ena rara idia hadihoa haraga, unai amo do ita ania diba.—Genese 9:3, 4; Levitiko 17:13, 14; Kara 15:28, 29.
6. Rara henia hanai karana ita abia dae be kerere, a? Namona be oi laloatao, Iehova ia ura rara ita dadaraia. Unai anina be ma haida edia rara eiava ita sibona eda rara, idia haboua gauna, be dala ta ai eda tauanina ai do ita abia vareai lasi. (Kara 21:25) Unai dainai Keristani taudia momokanidia be rara henia hanai karana idia abia dae lasi. Idia ese medikol hedurudia ma haida, hegeregere rara lasi muramuradia, idia abia hanai diba. Idia ura idia mauri, to Dirava ena taravatu utua karana amo edia mauri do idia dogoatao toho lasi.—Mataio 16:25.
[Pictures on page 25]
Dirava ita hamoalea totona, namona be rara henia hanai karana, miro karadia, bona mase havaraia diba karadia ita dadaraia