Kahana 15

Ma Haida Durudia Dirava Ena Ura Idia Karaia

Dahaka dainai oi dibaia gaudia be ma haida do oi hamaorolaia? (1)

Daika ida sivarai namona oi kikilaia diba? (2)

Oiemu kara dainai ma haida be dahaka do idia karaia diba? (2)

Edena negai kongregesen ida do oi haroro hebou diba? (3)

1. Hari oi be Baibel amo gau namodia momo oi dibaia vadaeni. Namona be unai diba ese oi ia hakaua, Keristani karadia oi goadalaia noho totona. (Efeso 4:​22-24) Mauri hanaihanai oi abia totona unai diba be mai anina bada. (Ioane 17:⁠3) To, ma haida danu ese diba idia abia be namo, unai amo idia danu be mauri do idia abia diba. Keristani taudia momokanidia iboudiai ese ma haida idia haroro henidia be namo. Unai be Dirava ena hahegani.​—⁠Roma 10:10; 1 Korinto 9:16; 1 Timoteo 4:⁠16.

2. Unai kara oi hamatamaia diba dalana be oi dibaia gaudia namodia be oi kahirakahira ai idia noho taudia ida oi kikilaia. Oiemu famili taudia, sikuli bona gaukara turadia, bona ma turadia haida dekenai oi gwauraia. Unai oi karaia lalonai hebogahisi oi hahedinaraia bona oi haheauka. (2 Timoteo 2:​24, 25) Namona be oi laloatao taunimanima be ta ena kara idia laloa momo, iena hereva lasi. Unai dainai oiemu kara namodia ese haida idia veria mai diba, oi hamaorodia herevana idia kamonai totona.​—⁠Mataio 5:16; 1 Petero 3:​1, 2, 16.

3. Nega taina ia lao murinai, reana oi be do oi hegeregere Iehova ena Witness taudia, emu gabu ena kongregesen taudia unai, ida do oi haroro matamaia. Oi goada oi lao noho lalonai unai be kara badana ta. (Mataio 24:14) Bema ta oi durua diba Iehova ena hesiai tauna ta ai ia lao bena mauri hanaihanai ia abia, do oi moale bada herea!​—⁠1 Tesalonika 2:​19, 20.