LESENI 22
Edena Dala ai Sivarai Namona Oi Harorolaia Diba?
Baibel ena hereva momokani oi dibaia noho lalonai, reana do oi laloa, ‘Taunimanima ibounai ese inai idia diba be namo!’ Oibe, taunimanima ibounai ese idia dibaia be namo! To, reana do oi gari oi dibaia gaudia be ma haida dekenai oi herevalaia totona. Gari karana oi hanaia dalana bona mai moale ida Baibel ena sivarai namona oi harorolaia karana mani ita herevalaia.
1. Edena dala ai oi dibaia gaudia be oi diba taudia dekenai oi hadibaia diba?
Iesu ena hahediba taudia idia gwau: “Ai itaia bona kamonai gaudia herevalaia karana do ai hadokoa lasi.” (Kara 4:20) Hereva momokani idia laloa bada dainai, idia ura taunimanima momo dekenai idia harorolaia. Oi danu be unai bamona oi laloa, a? Bema oibe, namona be dala oi tahua, mai hemataurai ida emu famili bona turadia dekenai oi dibaia gaudia oi herevalaia totona.—Kolose 4:6 duahia.
Hamatamaia daladia haida
Varavara ta ida oi herevahereva neganai, Baibel ena topik ta oi herevalaia, bona oi gwau: “Hari wiki ai gau namona ta lau dibaia.”
Ia gorere eiava ia lalohekwarahi turana ta ida Baibel ena hagoadaia siri ta oi herevalaia.
Emu gaukara turadia be wiki lalonai oi dekenai idia vara gaudia totona idia henanadai neganai, Baibel stadi eiava kongrigeisen hebouna ai oi dibaia gaudia oi herevalaia.
Emu turadia dekenai jw.org ena websait oi hahedinaraia.
Haida oi invait emu Baibel stadi dekenai idia helai totona, eiava idia dekenai jw.org amo Baibel stadi noia dalana oi hahedinaraia.
2. Dahaka dainai kongrigeisen ida oi haroro be tahua gauna namona?
Iesu ena hahediba taudia be edia diba taudia sibona dekenai sivarai namona idia harorolaia lasi. Iesu ese idia be ‘rua rua ia siaia, siti ibounai dekenai idia lao’ haroro totona. (Luka 10:1) Unai haroro dala namona ese dala ia kehoa taunimanima momo ese sivarai namona idia kamonai totona. Hahediba taudia be haroro gaukara idia karaia hebou dainai idia moale bada. (Luka 10:17) Unai hegeregerena, emu tahua gauna be kongrigeisen ida do oi haroro hebou, a?
DIBA MA HAIDA ABIA
Gari karana oi hanaia dalana bona mai moale ida Baibel ena sivarai namona oi harorolaia karana oi laloa.
3. Iehova be oi ida do ia noho
Haroro gaukara idia ura karaia taudia haida be taunimanima edia lalohadai o kara dainai idia gari.
Oi dibaia gaudia herevalaia totona oi gari, a? Dahaka dainai unai bamona oi haere?
VIDIO itaia, bona henanadai herevalaia.
Edena dala ai Witnes memero kekeni ese gari karana idia hanaia?
Isaia 41:10 duahia, bena inai henanadai herevalaia:
Haroro gaukara karaia totona oi gari neganai, guriguri karana ese edena bamona oi ia durua diba?
Inai oi diba, a?
Iehova ena Witnes taudia momo be guna idia laloa ma haida dekenai sivarai namona do idia harorolaia diba lasi. Hegeregere, Sergey, ia mamia ia be anina lasi bona taunimanima ia hereva henia be auka. To, gabeai Baibel ia stadilaia. Ia gwau: “Ena be lau gari, to taunimanima dekenai lau dibaia gaudia lau herevalaia matamaia. Ma haida dekenai Baibel lau herevalaia neganai, ia auka lasi idia lau haroro henia totona. Bona ma haida dekenai lau abia dae gaudia herevalaia karana ese lau ia hagoadaia bada.”
4. Hemataurai karana hahedinaraia
Ta oi do haroro henia lasi neganai, do oi herevalaia gauna bona emu hereva dalana oi laloa. Timoteo Iharuana 2:24 bona 1 Petero 3:15 duahia, bena inai henanadai herevalaia:
Edena dala ai taunimanima oi hereva henia neganai unai Baibel siridia oi badinaia diba?
Famili bona turadia haida be oi dekenai do idia lalotamona lasi. To dahaka oi karaia be namo? Bona dahaka oi karaia lasi be namo?
Dahaka dainai aonega dalana ai henanadai oi gaukaralaia, to namo lasi emu hereva amo idia oi doria?
5. Sivarai namona harorolaia karana ese moale ia mailaia
Iehova ese Iesu dekenai sivarai namona harorolaia gaukarana ia henia. Iesu ese unai gaukara be edena bamona ia laloa? Ioane 4:34 duahia, bena inai henanadai herevalaia:
Aniani namodia ita ania neganai iseda mauri ia durua bona ita moale. Dahaka dainai Iesu ese Dirava ena ura, hegeregere sivarai namona harorolaia gaukarana, be aniani ania karana ida ia hahegeregerea?
Oi laloa dahaka gaudia ese sivarai namona harorolaia karana dekenai moale ia mailaia?
Heduru dala haida
Wiki ena hebou ai, herevahereva hamatamaia daladia haida oi dibaia.
Bema sikuli dekenai oi ura vareai, emu tisa ida unai umui herevalaia. Stiuden asainmen ese oi do ia durua, unai amo oi hegaegae namonamo oi dibaia gaudia be ma haida dekenai oi herevalaia totona.
Kahana ladana “Haida Idia Gwau” eiava “Reana Ta Do Ia Henanadai” oi gaukaralaia, momo ese idia henia henanadai eiava koua herevadia haerelaia dalana oi praktis totona.
REANA TA DO IA HENANADAI: “Gau ibounai idia namo?”
Edena dala ai unai nega namona oi gaukaralaia diba emu Baibel stadi amo oi dibaia gaudia oi herevalaia totona?
POINT BADANA
Haida dekenai sivarai namona harorolaia karana ese moale ia mailaia, bona ia be auka lasi.
Riviu
Dahaka dainai haida dekenai sivarai namona ita harorolaia?
Edena dala ai mai hemataurai ida unai oi karaia diba?
Oi haroro totona edena bamona emu gari karana oi hanaia diba?
REFERENS ITAIA
Sivarai namona harorolaia totona jw.org ena kontek kadi gaukaralaia daladia foa oi laloa.
Sivarai namona harorolaia totona oi do ia durua karadia foa oi dibaia.
“Taunimanima Haoda Henia Tauna ai Oi Lao Diba, A?” (Gima Kohorona, September 2020)
Oi itaia edena dala ai Baibel ena haheitalai ta ese ita ia durua mai gari lasi ida sivarai namona ita harorolaia totona, herevana ita be matamata taudia.
Oi tahua edena dala ai Iehova idia do dibaia lasi varavara taudia ida Baibel oi herevalaia totona.
“Witnes Lasi Varavara Ena Lalona Veria Dalana” (Gima Kohorona, March 15, 2014)