Basileia Sivaraina Namba 35

Taunimanima Ibounai be Do Idia Lalokau Heheni, A?

Dekena Tauna Lalokau Henia Karana Ia Keru

TAUNIMANIMA milioni momo idia dara doko bona idia lalohisihisi, idia diba lasi daika ese do ia durudia. Gaukara amo ia ritaea bisinesi hahinena ta ia gwau: ‘Hanuaboi ta ai stori tamona dekenai ai noho vabu ta be egu iduara dekenai ia pidipidi bona ia gwau sibona ia noho dainai ia laloa momo. Mai egu hemataurai ida maoromaoro lau hamaoroa lau bisi. Sori hereva ia gwauraia, lau ia hereva henia dainai, bena ia lao.’

Madi, unai hanuaboi ai, unai vabu be sibona ia hamasea. Gabeai, unai bisinesi hahinena ia gwau “mai anina bada sisibana” ta ia dibaia.

Dekena tauna lalokau henia lasi karana ese nega momo dika ia havaraia. Guna Yugoslavia ena kahana gabudia Bosnia bona Herzegovina lalonai, bese idaudia idia hepapahuahu neganai, taunimanima milioni ta ia hanaia be edia ruma idia heautania bona tausen momo idia alaia mase. Daika ese? Ena hanua amo idia lulua kekenina ta ia gwau: “Emai dekena taudia ese. Idia ai diba.”

Rwanda dekenai taunimanima handred tausen momo idia hamasea, bona nega momo edia dekena taudia ese idia karaia. The New York Times ia gwau: “Hutu bona Tutsi idia [noho] hebou, idia headava heheni, daika be Hutu bona daika be Tutsi idia laloa lasi eiava idia diba lasi.” “Bena gau ta ia idau haraga,” bona “ala-ala ia hamatamaia.”

Unai hegeregerena, Jew taudia bona Arab taudia be Israel dekenai nega daudau idia noho hebou, to idia momo idia inai heheni. Ireland dekenai Katolik taudia bona Protestan taudia momo danu be unai bamona, bona tano ma haida dekenai unai bamona taudia edia namba ia bada ia lao. Hari inai nega lalonai lalokau ia ore, nega gunadia ma ta be inai bamona lasi.

Dahaka Dainai Dekena Tauna Lalokau Henia Karana Ia Keru?

Ita ia Havaraia Tauna ese haere ia henia. Iena Hereva, Baibel, ese hari ita noho negana ia gwauraia “nega ena dokona.” Inai nega lalonai, Baibel ena peroveta herevana ia gwau, taunimanima be “lalokau do idia diba lasi.” Iesu Keriso ese inai “metau dikadia momo” negana, o Baibel ese ma ia gwauraia “tanobada dokona,” ia herevalaia neganai, ia peroveta ia gwau, “taunimanima momo edia lalokau be do ia keru.”​—2 Timoteo 3:​1-5; Mataio 24:​3, 12.

Unai dainai, hari inai negai lalokau ia ore ese ia hahedinaraia danu ita be inai tanobada ena dina gabediai ita noho. Oibe, ena anina ma ta be inai tanobada ena Dirava diba lasi taudia do idia kokia bona kara maoromaoro tanobada matamatana be lalokau amo do idia lohiaia.​—Mataio 24:​3-14; 2 Petero 2:5; 3:​7, 13.

To badina korikorina ta dainai ita abia dae diba unai bamona kara do ia vara​—bona taunimanima ibounai be lalokau heheni karana do idia diba bona maino ai do idia noho hebou, a?

Dekena Tauna Lalokau Henia​—Ia Vara Momokani

Aposetolo edia nega lalonai loea tauna ta ese Iesu ia nanadaia: “Lauegu [dekena] tauna be daika?” Ia laloa Iesu do ia gwau, ‘Oiemu Iuda tadikaka.’ To Iesu ese Samaria tauna ta, iena dekena tauna ia laloa tauna, ena sivarai amo ia hahedinaraia idau bese taudia danu be iseda dekena taudia.​—Luka 10:​29-​37; Ioane 4:​7-9.

Iesu ese ia hahedinaraia Dirava lalokau henia karana, bona kara iharuana, dekena tauna lalokau henia karana, ese iseda mauri idia biagua be namo. (Mataio 22:​34-​40) To taunimanima edia orea ta ese edia dekena taudia idia lalokau henia momokani, a? Keristani taudia ginigunadia be unai bamona idia karaia! Taunimanima idia diba idia ese ma haida idia lalokau henia.​—Ioane 13:​34, 35.

Hari inai nega be edena bamona? Ta ese Keriso ena lalokau bamona ia hahedinaraia noho, a? Encyclopedia Canadiana ia gwau: “Iehova ena Witness taudia edia gaukara be Iesu bona ena hahediba taudia ese idia karaia Keristani gaukara ginigunana ia hamatamaia lou bona haginia lou . . . Idia ibounai be tadikaka.”

Unai ena anina be dahaka? Anina be Iehova ena Witness taudia be edia dekena taudia inai henia ena badina ta​—toana, bese, eiava mauri dalana​—idia laloa lasi momokani. Idau tauna do idia alaia lasi, badina be idia ese laulau dalanai edia kaia idia botaia bena tano geia gaudia ai idia halaoa bona edia io be rigi utua gaudia ai idia halaoa. (Isaia 2:4) Taunimanima idia diba Witness taudia be dala idia karaia, edia dekena taudia idia durua totona.​—Galatia 6:​10.

Unai dainai California ena Sacramento Union niuspepa ia gwau: “Momokani bema tanobada taudia ibounai be Iehova Witness taudia edia hahediba hereva hegeregerena idia noho, rara bubua karana bona ta inai henia karana do idia ore, bona lalokau be king bamona do ia lohia.” Toretore tauna ta Hungary ena Ring magasin dekenai ia gwau: “Gau ibounai lau laloa murinai egu lalohadai be, bema Iehova ena Witness taudia sibona be tanobada dekenai idia noho, tuari do idia ore vaitani, bona pulisi taudia edia gaukara be motuka edia heau do idia naria bona paspot do idia henia sibona.”

To momokani, taunimanima ibounai do idia lalokau heheni totona, tanobada hegegemadai be dala bada hereana ai do ia idau be namo. Edena bamona do ia idau diba? (Mani emu kara rau dokona itaia.)

Taunimanima Ibounai Do Idia Lalokau Heheni Negana

Iesu Keriso ese taunimanima ia hadibadia gurigurina ese ia hahedinaraia kahirakahira gau idauna bona badana ta do ia vara. Iesu ese ororo dekenai ia gwauraia haroro herevana lalonai, ita ia hadibaia inai bamona do ita guriguri: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”​—Mataio 6:10.

Dirava ena Basileia be dahaka? Ia be gavamani korikorina, guba amo do ia lohia gauna. Unai dainai, idia gwauraia “guba Basileia.” Iesu, “Maino ena Lohia,” be ena Tamana ese ia abia hidi Basileia ena lohia ai ia lao totona.​—Mataio 10:7; Isaia 9:​6, 7; Salamo 72:​1-8.

Dirava ena Basileia ia mai neganai, inai tanobada, ma ta inai henia karana amo ia honu tanobadana, dekenai dahaka do ia vara? “Unai basileia” ese inai tanobada ena kara gageva gavamanidia ibounai do ia “hamakohia, bona haorea momokani.” (Daniela 2:​44) Baibel ia gwau: ‘Tanobada be kahirakahira do ia ore. To Dirava ena ura ia karaia noho tauna be do ia noho ela bona hanaihanai.’​—1 Ioane 2:17.

Baibel ese Dirava ena tanobada matamatana ia herevalaia, ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:​9-11, 29; Aonega Herevadia 2:​21, 22) Unai be nega namo hereana! “Mase bona lalohisihisi, bona taitai, bona hisihisi be do idia ore momokani.” (Apokalupo 21:4) Mase taudia be do idia mauri lou, bona tanobada ibounai be paradaiso korikorina ai do ia lao.​—Isaia 11:​6-9; 35:​1, 2; Luka 23:43; Kara 24:15.

Dirava ena tanobada matamatana ai do ita noho totona, namona be ita lalokau heheni, Dirava ese ita ia hadibaia hegeregerena. (1 Tesalonika 4:9) Baibel stiuden ta Asia kahana amo, ia gwau: “Lau be Baibel ese ia gwauhamatalaia negana lau naria noho mai egu ura ida, unai neganai taunimanima ibounai be lalokau heheni karana do idia dibaia vadaeni.” Ita abidadama diba, Dirava ese ena gwauhamata do ia hagugurua! Ia gwau: “Lau hereva vadaeni, bona lauegu hereva gauna be do ia vara.”​—Isaia 46:11.

To Dirava ena Basileia henunai unai hahenamo do oi moalelaidia totona, Baibel ena diba do oi abia be namo, kudou-maoro taudia milioni momo tanobada hegegemadai idia karaia noho bamona. (Ioane 17:3) Mai ena rau 32 buklet ladana Dirava Ia Ura Dahaka Ita Karaia? ese oi do ia durua. Kopi ta do oi abia diba bema rau gunana dekenai unai fom oi hahonua bena oi siaia mai oi kahirakahira ia noho adres ta dekenai.

□ Lau ura buklet ladana Dirava Ia Ura Dahaka Ita Karaia? do lau abia. Lau ese ena davana hegeregerena 40 toea stamp lau udaia bona siaia lao inai.

□ Mani lau umui tore henia davana lasi Baibel stadi lau abia totona.

[Picture Credit Line on page 2]

Sniper and funeral in Bosnia: Reuters/Corbis-Bettmann