Edia Tanobada Ibounai Oreana Bona Edia Gaukara

TANO 230 mai kahana lalonai idia karaia haroro gaukarana be dala haida amo idia hakaua. Hakaua sisiba ibounai be Brooklyn, New York dekenai ia noho hedikwota ai ia gaukara Hakaua Oreana amo idia mai. Lagani ta ta iboudiai Hakaua Oreana ese tanobada hegegemadai gabu idauidau dekenai tatau haida ia siaia, unai gabu dekenai idia noho brens opesi taudia ida idia herevahereva totona. Brens opesi idauidau dekenai, Brens Komiti taudia edia namba be 3 ia lao 7 huanai bona idia ese idia naria tanodia lalonai gaukara idia hakaua. Brens haida dekenai printa gaukara idia karaia, idia haida be mai edia sipidi bada printa masinidia. Brens ta ta iboudiai ese idia naria tano eiava gabu be distrik idauidau ai idia hapararaia, bona distrik iboudiai be sekit idauidau ai idia hapararaia. Sekit ta ta iboudiai lalonai idia noho kongregesen be 20 bamona. Distrik naria tauna ese iena distrik lalonai idia noho sekit ia vadivadi henidia. Lagani iboudiai sekit ta ta be mai edia hebouhebou rua. Sekit naria tauna ia noho danu, bona lagani iboudiai ia ese nega rua iena sekit lalonai idia noho kongregesen ta ta ia vadivadi henia, Witnes taudia ia durudia edia kongregesen ena teritori dekenai haroro gaukara idia hegaegaelaia bona karaia totona.

Oiemu gabu dekenai ia noho kongregesen bona ia gaukaralaia Kingdom Hall be emu gabu ai sivarai namona harorolaia gaukarana ena gabu badana. Kongregesen ta ta ese idia naria gabu be teritori maragidia ai idia haria. Unai teritori be Witnes taudia dekenai idia henia, bona idia hekwarahi bada, unai teritori lalonai idia noho ruma ta ta idia noholaia taudia idia vadivadi henia bona hereva henia totona. Kongregesen ta ta iboudiai ai Witnes taudia edia namba be haida amo ia lao 200 bamona, bona elda taudia ese gaukara idauidau idia naria. Iehova ena Witnes taudia edia orea lalonai, sivarai namona idia harorolaia taudia ta ta be mai anina bada. Witnes taudia, herevana idia be hedikwota, brens opesi, eiava kongregesen lalonai idia gaukara taudia, idia ta ta ese taunimanima dekenai Dirava ena Basileia idia harorolaia.

Unai gaukara ena ripoti iboudiai be hedikwota dekenai idia lao, bona lagani iboudiai Yearbook idia karaia bona halasia. Danu, lagani ta ta ai, January 1 Gima Kohorona lalonai lista ta idia halasia. Unai gaudia rua lalonai idia halasia lagani ta ta edia ripoti ese Iehova bona Keriso Iesu ia lohiaia Basileia harorolaia totona idia karaia gaukara ena kahana idauidau idia hahedinaraia. Vanegai laganidia lalonai, Witnes taudia bona kamonai taudia 14,000,000 bamona be Iesu ena mase ena Memorial hebouna dekenai idia lao. Lagani iboudiai, Iehova ena Witnes taudia ese hora 1,000,000,000 bamona idia gaukaralaia sivarai namona idia harorolaia totona, bona taunimanima 300,000 mai kahana ese bapatiso idia abia. Idia hariharilaia buka bona magasin edia namba be milioni handred momo.