Kahana 14

Iehova Ena Witness Taudia Edia Orea Ena Heau Dalana

Iehova ena Witness taudia edia gaukara, hari iseda nega lalonai idia karaia, be edena nega amo idia matamaia? (1)

Iehova ena Witness taudia edia hebou be edena bamona idia karaia? (2)

Idia gaukaralaia gaudia edia davana be edena bamona idia henia? (3)

Kongregesen ta ta ai daika ese ia hakaudia? (4)

Lagani ta ta ai idia abia hebouhebou badadia be dahaka dahaka? (5)

Edia hedikwota bona brens opesi dekenai be dahaka gaukara idia karaia? (6)

1. Iehova ena Witness taudia edia gaukara, hari iseda nega lalonai idia karaia, be lagani 1870 murinai idia matamaia. Matamanai edia ladana idia gwauraia Bible Students. To lagani 1931 ai Baibel amo inai ladana, Iehova ena Witness taudia, idia abia. (Isaia 43:10) Orea maragina amo ia tubu ema bona hari Witness taudia milioni momo idia noho, bona tano 230 mai kahana lalonai idia haroro noho.

2. Iehova ena Witness taudia edia kongregesen momo be wiki ta ta lalonai nega toi idia hebou. Unai hebou oi lao henidia diba. (Heberu 10:​24, 25) Baibel be idia ese idia hahedibalaia gaudia edia badina. Guriguri amo hebou idia kehoa bona koua. Kahirakahira hebou iboudiai dekenai lalona ia hamarerea “lauma anedia” idia abia danu. (Efeso 5:​18, 19) Vareai davana be lasi, bona moni idia gogoa lasi.​—⁠Mataio 10:⁠8.

3. Kongregesen momo edia hebou be Kingdom Hall ai idia abia. Idia momo be ruma idau hereadia lasi, volantia taudia ese idia haginia. Unai Kingdom Hall lalodiai, kaivakuku, korosi ai Iesu idia tauadae laulaudia, eiava unai bamona gaudia do oi itaia lasi. Taunimanima ese sibodia edia ura hegeregerena idia henia monina amo idia gaukaralaia gaudia edia davana idia henia. Bema ta ia ura heduru monina ia henia, kontribusen maua lalonai ia udaia diba.​—⁠2 Korinto 9:⁠7.

4. Kongregesen ta ta ai elda taudia, o gunalaia taudia idia noho. Kongregesen lalonai hadibaia gaukarana idia gunalaia. (1 Timoteo 3:​1-7; 5:17) Hesiai taudia ese idia durudia. (1 Timoteo 3:​8-10, 12, 13) Unai tatau be kongregesen taudia oredia ataiai idia abia isi lasi. (2 Korinto 1:24) Idia be dagi ladana hereadia idia abia lasi. (Mataio 23:​8-10) Edia dabua ena toana be ma haida edia amo ia idau lasi. Bona edia gaukara ena davana idia abia lasi. Elda taudia be edia lalona ena ura dainai lauma dalanai kongregesen durua gaukaradia idia naria. Hekwakwanai negana ai heduru bona hakaua hereva idia henia diba.​—⁠Iamesi 5:​14-​16; 1 Petero 5:​2, 3.

5. Iehova ena Witness taudia be lagani ta ta ai hebouhebou badadia idia karaia danu. Unai nega ai kongregesen momo idia hebou, Baibel ena hakaua herevadia idia abia totona. Hanaihanai unai hebouhebou edia program ena kahana ta be hahediba taudia matamatadia bapatisoa karana.​—⁠Mataio 3:​13-17; 28:​19, 20.

6. Iehova ena Witness taudia tanobada hegegemadai ai edia hedikwota be New York dekenai. Unuseniai Hakaua Oreana ia noho. Unai orea lalonai be lagani momo lalonai elda gaukara idia karaia taudia, bona idia ese tanobada ibounai oreana idia naria. Bona tanobada ibounai lalonai be brens opesi 100 mai kahana idia noho danu. Unai gabu ai, volantia taudia be Baibel idia herevalaia bukadia idia printaia bona idia siaia. Unuseni amo haroro gaukara haheaua dalana dekenai sisiba herevadia idia henia danu. Emu gabu kahirakahira ai ia noho brens opesi oi vadivadi henia totona, nega ta oi abia hidi be namo, ani?