Idia Itaia Gaudia Gaukaralaia Namonamo

DAHAKA dainai emu hadibaia gaukara lalonai idia itaia gaudia oi gaukaralaia be namo? Badina unai amo emu hadibaia gaukara ese namo bada ia havaraia. Iehova Dirava bona Iesu Keriso ese ita itaia gaudia idia gaukaralaia, bona idia amo diba ita abia. Emu hereva lalonai idia itaia gaudia oi gaukaralaia neganai, diba be edia taiana bona matana amo idia abia. Unai dainai kamonai taudia idia kamonai bona emu hereva idia laloatao. Edena dala ai sivarai namona oi harorolaia neganai idia itaia gaudia oi gaukaralaia diba? Edena dala ai oi diba oi gaukaralaia namonamo?

Hadibaia Taudia Badadia ese Idia Itaia Gaudia Idia Gaukaralaia Daladia. Iehova ese mai anina bada gaudia hadibaia totona idia itaia bona idia laloatao diba gaudia ia gaukaralaia. Hanuaboi ta ai, Aberahamo be murimuri ai ia hakaua lao bona ia gwau: “Guba oi itaia, hisiu oi duahia diba o lasi? Oiemu tubuna edia momo be dohore unai bamona.” (Gen. 15:5) Ena be Aberahamo ese unai gwauhamata hagugurua dalana ia laloa diba lasi, to ia laloa bada bona Iehova ia abidadama henia. Nega ma ta ai, Iehova ese uro karaia tauna ena ruma dekenai Ieremia ia siaia, bona gaukara rumana dekenai ia itaia tauna be raro ia gaukaralaia. Unai amo ia hadibaia namonamo Havaraia Tauna be mai ena siahu taunimanima biagua totona! (Ier. 18:​1-6) Bona Iehova ese Iona dekenai au maragina ta amo hebogahisi karana ia hadibaia be Iona ese ia laloaboio diba lasi, ani? (Iona 4:​6-11) Danu, Iehova ese ena peroveta taudia ia hamaoroa peroveta herevadia edia haheitalai idia karaia bona unai lalonai gau idauidau idia gaukaralaia. (1 Kin. 11:​29-32; Ier. 27:​1-8; Ese. 4:​1-17) Palai dubu bona dubu badana ena kahana idauidau be laulau gaudia, ita idia durua guba gaudia ita lalo-pararalaia totona. (Heb. 9:​9, 23, 24) Dirava ese matahanai momo amo mai anina bada hadibaia herevadia ia hahedinaraia danu.​—Ese. 1:​4-28; 8:​2-18; Kara 10:​9-16; 16:​9, 10; Apok. 1:1.

Edena dala ai Iesu ese taunimanima idia itaia gaudia ia gaukaralaia? Farisea taudia bona Heroda ena orea taudia ese Iesu ena hereva amo ia idia tarapua toho neganai, Iesu ese moni ta ia noia bona moni dekenai Kaisara ena laulau ia hahedinaraia. Bena ia gwau Kaisara ena gaudia be Kaisara dekenai ita henia bona Dirava ena gaudia be Dirava dekenai ita henia be namo. (Mat. 22:​19-21) Iesu be iseda kohu ibounai amo Iehova ita hanamoa karana ia hadibaia totona, dubu lalonai ia noho ogogami vabu ta ia hahedinaraia, ia henia kontribusen​—moni maragimaragi rua​—be iena moni ibounai. (Luka 21:​1-4) Nega ma ta ai, natuna maragina ta ia hahedinaraia, ia be manau bona dagi tahua lasi karadia ena haheitalai namona. (Mat. 18:​2-6) Danu, ia ese manau ena anina ia hahedinaraia totona iena hahediba taudia edia aena ia huria.​—Ioa. 13:14.

Idia Itaia Gaudia Gaukaralaia Daladia. Ita be Iehova bamona lasi, matahanai amo taunimanima ita hadibaia diba lasi. To, lalona veria laulau momo be Iehova ena Witnes taudia edia buka lalodiai idia noho. Unai oi gaukaralaia, kamonai taudia ese Dirava ena Hereva ia gwauhamatalaia Paradaisona ena toana idia itaia totona. Reana Baibel stadi lalonai, umui stadilaia gauna dekenai mai anina laulau ta be stiuden tauna dekenai oi hahedinaraia bona oi noia ia itaia gauna ia herevalaia. Iehova ese peroveta tauna Amosa dekenai matahanai haida ia henia neganai, ia nanadaia: “Amosa e, dahaka oi itaia?” (Amo. 7:​7, 8; 8:​1, 2) Hadibaia gaukara durua totona idia atoa laulau be taunimanima dekenai oi hahedinaraia neganai, unai bamona henanadai oi gwauraia diba danu.

Bema lagani edia namba duahia dalana be pepa dekenai oi torea eiava kara badadia idia vara laganidia be laini ta ai oi torea, unai ese taunimanima ia durua Daniela 4:16 ia gwauraia “lagani 7” bona Daniela 9:24 ia gwauraia “lagani 490” edia anina idia lalo-pararalaia totona. Unai bamona gaudia be iseda buka momo lalonai idia hedinarai.

Emui ruma bese ena Baibel stadi lalonai, palai dubu, Ierusalema ena dubu, bona Esekiela ese matahanai lalonai ia itaia dubu umui herevalaia neganai bema laulau umui gaukaralaia, unai gaudia do umui lalo-pararalaia namonamo. Unai gaudia be Insight on the Scriptures, New World Translation of the Holy Scriptures​​—With References ena dokona kahana ai, bona Gima Kohorona idauidau dekenai umui davaria diba.

Emu ruma bese ida Baibel oi duahia neganai, mapu umui gaukaralaidia namonamo. Aberahamo ena laolao Uru amo ia lao Harana bena Betele dekenai ia lao umui itaia. Israela besena ese Aigupito ia rakatania bona Gwauhamata Tanona dekenai ia lao dalana umui tahua. Israela iduhu ta ta ese idia abia gabuna umui itaia. Solomona ese ia lohiaia gabuna ena bada umui itaia. Iesebele ia gwau Elia do ia hamasea neganai, Elia be Ieserele amo ela bona Bere Sieba ena unai kahana ai ia noho tano gagaena dekenai ia heau mauri ena dala umui itaia. (1 Kin. 18:46–19:4) Iesu ia haroro taoni bona hanua edia gabu umui tahua. Kara bukana ese ia hahedinaraia hegeregerena Paulo ena laolao dalana umui itaia.

Baibel stiuden dekenai kongregesen ena heau dalana oi herevalaia neganai, idia itaia gaudia ese do idia durua. Reana stiuden tauna dekenai program ta oi hahedinaraia bona sekit bona distrik hebouhebou dekenai ita herevalaia gaudia oi gwauraia hedinarai. Momo be Kingdom Hall eiava Iehova ena Witnes taudia edia brens opesi idia vadivadi bona edia kahana idauidau idia itaia neganai idia hoa bada. Unai be dala namona, iseda gaukara bona ena badina dekenai idia laloa kerere gaudia hamaoromaoroa totona. Kingdom Hall ena kahana idauidau oi hahedinaraia neganai, edena bamona tomadiho gabudia ma haida amo ia idau oi herevalaia. Oi hahedinaraia, diba abia totona Kingdom Hall be gabu namona. Iseda haroro gaukara idia durua gaudia oi hahedinaraia​—buka abia gabuna, teritori edia mapu, bona kontribusen mauadia (mereki ita siaia loaloa lasi).

Bema Hakaua Oreana ena hakaua henunai idia karaia vidio idia noho, idia oi gaukaralaia Baibel abidadama henia karana habadaia totona, stiuden taudia ese Iehova ena Witnes taudia edia gaukara idia diba totona, bona itaia taudia hagoadaia Baibel ena hakaua herevadia idia badinaia totona.

Hutuma Vairanai, Idia Itaia Gaudia Oi Gaukaralaia Dalana. Bema idia itaia gaudia oi hegaegaelaia bona hahedinaraia namonamo, idia amo hutuma oi hadibaia namonamo diba. Hesiai tauna mai ena kamonai bona kara maoromaoro oreana ese unai bamona gaudia idauidau ia karaia.

Nega momo Gima Kohorona ena stadi herevadia lalonai laulau idia noho bona hakaua tauna ese lalohadai badadia hahedinaraia totona idia ia gaukaralaia diba. Kongregesen Buka Stadi dekenai ita gaukaralaia bukadia be unai bamona danu.

Pablik tok edia autlain haida dekenai, lalohadai haida hahedinaraia totona toana be idia itaia gaudia oi gaukaralaia be namo. To, nega momo namo bada oi havaraia dalana be Baibel oi gaukaralaia, badina kamonai taudia momo be mai edia Baibel. Bema nega haida, hereva badana ta eiava haida hahedinaraia totona laulau ta eiava lista kwadogina ta oi gaukaralaia be mai badina, namona be oi itaia guna, unai gauna be hebou gabuna ena dokona kahana amo idia itaia (eiava duahia) diba danu. Unai bamona gaudia reana oi gaukaralaia momo lasi.

Iseda hereva bona hadibaia lalonai idia itaia gaudia ita gaukaralaia be taunimanima ita hamoalea totona ita karaia lasi. Idia itaia gauna namona oi gaukaralaia neganai, namona be mai anina bada lalohadaidia ia hahedinaraia. Unai bamona heduru gaudia be namo bema oi gwauraia herevana idia hahedinaraia goevagoeva, unai amo lalo-parara idia habadaia, eiava oi gwauraia herevana idia hamomokania. Dala maorona ai idia itaia gauna namona ta oi gaukaralaia neganai, unai gauna bona oi hadibaia herevana be lagani momo lalonai do idia laloatao.

Gau ta ita dibaia lalonai ita kamonai bona itaia gaudia be mai anina bada. Hadibaia Taudia badadia ese unai gaudia idia gaukaralaia daladia oi laloatao, bona ma haida oi hadibaia toho lalonai idia oi tohotohoa.