Karoa 17
Ruma ai Dirava Badinaia Karana Hahedinaraia
1. Edena dala ai Dirava ena Hereva amo idia mai hakaua herevadia badinaia karana ese ruma bese ia durudia?
IEHOVA be headava ia Hamatamaia Tauna, bona ena Hereva lalonai ruma bese taudia hakaua hereva namodia momo idia noho. Taunimanima momo ese unai hakaua herevadia idia badinaia dainai, idia ese ruma bese namodia idia haginia vadaeni. Kara namona ta be, idia noho hebou kava taudia ese unai hadibaia herevadia idia badinaia dainai, edia headava idia rejista. Ma haida be headava murimurinai idia karaia heudahanai karadia idia hadokoa vadaeni. Guna edia adavadia bona natudia idia hereva dika henia bona idia botaia tatau, ese hari hebogahisi bona lalokau idia hahedinaraia.
2. Keristani ruma bese maurina lalonai, dahaka gaudia ita laloa be namo?
2 Keristani ruma bese maurina lalonai gau momo ita laloa, hegeregere iseda lalohadai be dahaka headava do ia noho daudau karana dekenai, dahaka ita karaia ruma bese lalonai iseda maduna ita huaia totona, bona edena bamona ruma bese taudia ita kara henidia. (Efeso 5:33–6:4) Ena be Baibel ese ruma bese maurina totona ia gwauraia herevadia ita diba, to unai sisiba ita badinaia be kara ma ta. Iesu ese Dirava ena taravatu idia utua taudia ia gwauraidia dika, ita ura lasi ita be unai taudia bamona. Mai koikoi ida idia gwau tomadiho idia badinaia sibona be ia hegeregere. (Mataio 15:4-9) Ita ura lasi Dirava badinaia karana be toana sibona ita hahedinaraia, to iseda ruma bese lalonai unai bamona ita karaia lasi. To, ita ura Dirava badinaia momokani karana ita hahedinaraia, badina unai kara amo ta ese “kohu momokani do ia davaria.”—1 Timoteo 5:4; 6:6; 2 Timoteo 3:5.
Headava Do Ia Noho Ela Bona Edena Negai?
3. (a) Dahaka ia vara noho headava momo dekenai, to iseda ura be dahaka? (b) Oiemu Baibel oi gaukaralaia, inai paragraf henunai idia noho henanadai oi haerelaia totona.
3 Hari, headava momo be idia parara. Lagani daudau idia noho hebou headava taudia haida ese edia lalona idia hadaia edia headava do idia hadokoa bona ma ta do idia adavaia. Danu, headava matamata taudia be hua haida sibona murinai edia adavana idia rakatania, nega momo unai ita kamonai. Herevana taunimanima ma haida be dahaka idia karaia, namona be ita ura Iehova ita hamoalea. Vadaeni, namona be henunai idia noho henanadai bona siri ita lalodia bona Dirava ena Hereva ese headava ia noho daudau karana dekenai dahaka ia herevalaia mani ita tahua.
Tau bona hahine idia headava neganai, do idia noho hebou ela bona edena negai? (Mareko 10:6-9; Roma 7:2, 3)
Dirava vairanai, headava hadokoa bona headava lou diba ena badina maorona tamona be dahaka? (Mataio 5:31, 32; 19:3-9)
Bema headava idia hadokoa karadia be Iehova ena Hereva hegeregerena lasi, iena lalohadai be dahaka? (Malaki 2:13-16)
Headava lalonai hekwakwanai hanamoa totona, ta ese ena adavana amo ia parara karana be Baibel ese ia hagoadaia, a? (1 Korinto 7:10-13)
Dahaka badina haida dainai reana headava taudia idia parara be maoro? (Salamo 11:5; Luka 4:8; 1 Timoteo 5:8)
4. Dahaka dainai headava haida idia noho daudau?
4 Headava haida be idia namo bona idia noho daudau. Dahaka dainai? Mai anina bada gauna be, idia headava haraga lasi to idia naria ela bona lo taudia ai idia lao, to danu edia ura gaudia be tamona bona lalohadai idauidau idia herevalaia hebou diba tauna eiava hahinena idia adavaia be gau badana. To, gau badana be inai, namona be oi ura adavaia tauna o hahinena be Iehova ia lalokau henia bona ia abia dae Dirava ena Hereva sibona ese hekwakwanai ia hamaoromaoroa diba. (Salamo 119:97, 104; 2 Timoteo 3:16, 17) Unai bamona tauna be do ia laloa lasi bema hekwakwanai idia vara, headava do ia hadokoa eiava ena adavana do ia rakatania. Iena adavana ena kerere maragidia be ekskius ta bamona do ia gaukaralaia lasi, bona ena maduna ia dadaraia. To, hekwakwanai do ia haheaukalaidia bona hanaia daladia do ia tahua.
5. (a) Headava lalonai ta ese edena bamona Iehova badinaia karana ia hahedinaraia diba? (b) Ena be dagedage idia davaria, to Iehova ena taravatu idia badinaia noho taudia be dahaka namo idia davaria diba?
5 Satani ia gwau hisihisi ita davaria neganai, Iehova do ita rakatania. (Iobu 2:4, 5; Aonega Herevadia 27:11) To, edia adavadia ese idia dagedage henia Iehova ena Witnes taudia, kahirakahira iboudiai, be edia headava gwauhamatana idia makohia lasi. Iehova bona ena taravatu idia do badinaia noho. (Mataio 5:37) Idia haheauka taudia haida idia moale badina be edia adavadia danu ese Iehova ena hesiai gaukara idia karaia matamaia—ena be lagani momo lalodiai dagedage idia davaria! (1 Petero 3:1, 2) Ena be Keristani taudia haida edia adavadia edia kara idia haidaua lasi eiava adavadia ese idia rakatanidia badina Iehova idia hesiai henia, to idia danu idia diba bema ruma bese lalonai Dirava badinaia karana idia hahedinaraia, Iehova ese idia do ia hanamoa.—Salamo 55:22; 145:16.
Ta Ta ese Ena Maduna Ia Huaia
6. Headava ia namo totona, headava taudia ese dahaka idia matauraia be namo?
6 Momokani, tau bona ena adavana edia headava ia namo totona, ma gau haida danu idia karaia be namo. Gau badana be tau bona ena adavana ese Iehova ia atoa kwara dagina idia matauraia be namo. Unai ese ruma bese lalonai maino bona noho namo ia havaraia. Korinto Ginigunana 11:3 ia gwau: “Tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.”
7. Tau ese ruma bese lalonai ena kwara dagina be edena bamona ia gaukaralaia be namo?
7 Unai siri ena hereva ginigunana oi itaia, a? Oibe, tatau ibounai be mai edia Kwarana, Keriso, bona ia do idia kamonai henia be namo. Unai ena anina be tau ese ena kwara dagina ia gaukaralaia dalana amo Iesu ena kara ia hahedinaraia. Keriso be Iehova henunai ia noho, ekalesia ia lalokau henia bada bona ia naria. (1 Timoteo 3:15) Danu, ekalesia dainai “iena mauri ia atoa diho.” Iesu be hekokoroku bona haida ia laloa maragi tauna lasi, ia be “dagedage lasi bona manau tauna.” Iena kwara dagina henunai idia mai taudia ese “laga-ani” idia davaria. Tau ta ese ena ruma bese be unai bamona ia kara henidia neganai, ia hahedinaraia ia sibona be Keriso henunai ia atoa. Unai neganai Keristani hahinena be ena adavana ida do ia gaukara hebou bona ena kwara dagina henunai do ia noho.—Efeso 5:25-33; Mataio 11:28, 29; Aonega Herevadia 31:10, 28.
8. (a) Dahaka dainai ruma bese haida lalonai Keristani dalana badinaia be auka? (b) Bema unai bamona hekwakwanai ita davaria, dahaka ita karaia be namo?
8 To, hekwakwanai do idia vara. Ruma bese taudia be Baibel ena hakaua herevadia idia do badinaia matamaia lasi neganai, reana idia be gwau-edeede karadia dekenai idia manada. Reana ta ese lalokau bona hebogahisi dalanai ma ta ia noia gau ta ia karaia totona to ia kamonai lasi. Ita diba Baibel ia gwau: ‘Heai, badu, dagedage, bona hereva dika, do ita hadokoa.’ (Efeso 4:31) To bema ruma bese taudia haida be dala ma ta idia laloa lasi, to edia hereva oi kamonai totona idia boiboi bona idia badu sibona neganai, dahaka oi karaia be namo? Iesu be ia idia hagaria eiava idia hereva dika henia taudia ia tohotohoa lasi, to iena Tamana dekenai ia tabekau. (1 Petero 2:22, 23) Unai dainai ruma bese lalonai lalohisihisi idia vara neganai, namo lasi tanobada taudia edia kara ita tohotohoa, to Dirava badinaia karana ita hahedinaraia totona ena heduru ita noia.—Aonega Herevadia 3:5-7.
9. Keristani tatau momo be dahaka idia dibaia dainai idia maumau lasi?
9 Nega haida, iseda kara ita haidaua haraga diba lasi, to mai haheauka ida Baibel ena sisiba ita badinaia goadagoada neganai, unai ese namo do ia havaraia. Tatau momo be Keriso ese kongregesen ia kara henia dalana idia laloa bada neganai, idia davaria edia headava ia namo ia lao. Kongregesen lalonai goevadae tauna ta ia noho lasi. To Keriso ese ia lalokau henia, ia dekenai haheitalai namona ia hahedinaraia, bona ia hanamoa totona Baibel amo heduru ia henia. Kongregesen dainai ena mauri ia henia. (1 Petero 2:21) Iena haheitalai ese Keristani tatau momo ia hagoadaia ruma bese kwarana namona ai idia lao bona mai lalokau ida heduru idia henia edia headava maurina idia hanamoa totona. Unai dala ese anina namona ia havaraia, to maumau eiava herevahereva lasi karana ese namo ta do ia havaraia lasi.
10. (a) Edena dala ai tau eiava hahine ta—sibona ia gwauraia Keristani tauna unai—ese ma haida edia mauri ruma bese lalonai ia hadikaia diba? (b) Unai hekwakwanai idia hanamoa totona reana dahaka idia karaia diba?
10 To, bema tau ta ese ena ruma taudia edia hemami ia laloa lasi, eiava dala ia karaia lasi ena ruma bese taudia ese Baibel idia stadilaia hebou eiava gau ma haida idia karaia hebou totona, be edena bamona? Eiava bema hahine ta be ena tau ida ia gaukara hebou lasi bona Dirava ese ia atoa kwara dagina ia badinaia lasi, be edena bamona? Ruma bese haida be mai edia hemataurai ida hekwakwanai idia herevalaia hebou neganai, anina namona ia havaraia. (Genese 21:10-12; Aonega Herevadia 15:22) Ena be ita ura gauna ia vara lasi, to ita ta ta ese ruma bese lalonai noho namo ita havaraia diba, bema Dirava ena lauma helaga ena huahua ita hahedinaraia, bona mai lalokau ida iseda ruma bese taudia ma haida ita laloa. (Galatia 5:22, 23) Namo ia vara totona, namona be ita naria lasi ela bona ma ta ese kara ta ia karaia, to sibona eda maduna ita huaia karana amo ita hahedinaraia ita be Dirava ita badinaia.—Kolose 3:18-21.
Haere Abia Gabuna
11, 12. Iehova ese ita dekenai dahaka ia henia, unai amo ruma bese namona ita haginia diba?
11 Ruma bese maurina hanamoa totona, taunimanima be gabu idauidau dekenai sisiba idia tahua. To, ita diba sisiba hereadaena be Dirava ena Hereva lalonai ia noho, bona ita moale badina Dirava ese ena orea amo ita ia durua unai sisiba ita badinaia totona. Unai heduru amo namo oi abia noho, a?—Salamo 119:129, 130; Mika 4:2.
12 Kongregesen hebou dekenai oi lao sibona lasi, to nega oi atoa ruma bese taudia ida Baibel stadi umui karaia hanaihanai totona, a? Unai bamona idia karaia ruma bese taudia be mai edia lalo-tamona ida idia tomadiho hebou diba. Edia noho dalana hegeregerena Dirava ena Hereva idia badinaia neganai, unai ese edia ruma bese maurina ia hanamoa.—Deuteronomi 11:18-21.
13. (a) Bema ruma bese maurina dekenai ita be mai iseda henanadai, nega momo edeseniai heduru ita abia diba? (b) Namona be ita karaia abia hidi ibounai ese dahaka ia hahedinaraia?
13 Ruma bese maurina dekenai reana oi be mai emu henanadai haida. Hegeregere, rogorogo lasi totona dahaka do umui gaukaralaia? Bogana lalonai natuna hamasea karana be ia maoro, a? Bema natuna ta ese lauma gaudia ia laloa bada lasi, tama sina ese ia idia doria diba ruma bese taudia danu ia tomadiho hebou totona eiava? Iehova ena Witnes taudia ese idia halasia buka momo lalonai unai bamona henanadaia idia haerelaia. Namona be Baibel stadi durua bukadia, indeks buka danu, gaukaralaia dalana oi dibaia, unai amo haere oi davaria diba. Bema indeks bukana ese ia gwauraia gaudia be oi dekenai ia noho lasi, Kingdom Hall ena laiberi oi sekea. Eiava oiemu kompiuta dekenai unai buka oi tahudia diba. Idia lo Keristani tatau bona hahine ida emu henanadai oi herevalaia diba. Namo lasi oi laloa, oiemu henanadai edia haere be oibe eiava lasi amo do idia haerelaia. Nega momo oi ese abia hidi oi karaia, oi sibona eiava oiemu adavana ida do umui karaia hebou. Bena oi karaia abia hidi ese do ia hahedinaraia, taunimanima vairanai sibona lasi to emu ruma ai danu, Dirava oi badinaia.—Roma 14:19; Efeso 5:10.
Riviu Henanadai
• Ta ese ena adavana ia badinaia karana amo edena bamona ia hahedinaraia ia be Iehova ia badinaia noho?
• Ruma bese lalonai hekwakwanai idia vara dainai ita lalo-hekwarahi neganai, dahaka ese ita do ia durua Dirava hamoalea karadia ita karaia totona?
• Ena be ruma bese taudia ma haida ese kerere idia karaia, to dahaka ita karaia diba iseda ruma bese maurina hanamoa totona?
[Picture on page 155]
Tau ena kwara dagina ia gaukaralaia dalana ese Iesu ena kara ia hahedinaraia be namo
[Picture on page 157]
Hanaihanai ruma bese taudia ida Baibel stadi karaia karana ese idia do ia hatamonaia