Dahaka Dainai Iesu be Hadibaia Tauna Badana

LAGANI 2,000 bamona gunanai, natuna ta ia vara bena ia tubu daekau bona tau hereadaena ai ia lao. Unai nega dekenai peleini, motuka, televisen, kompiuta bona Internet be lasi.

Unai natuna ena ladana idia atoa Iesu. Iena aonega ese tanobada taudia ibounai edia aonega ia hanaia. Iesu be hadibaia tauna namona ai ia lao danu. Idia auka herevadia be taunimanima ese idia lalo-pararalaia daladia ai ia gwauraia hedinarai.

Iesu be taunimanima ia davaria gabudia ibounai dekenai ia hadibadia. Kone bona bouti dekenai idia ia hadibaia. Ruma lalonai bona ia loaloa neganai idia ia hadibaia. Iesu be motuka lasi, bona basi eiava trein amo ia loaloa lasi. Iesu be gabu ta ta dekenai ia raka lao taunimanima ia hadibaia totona.

Taunimanima ma haida amo gau momo ita dibaia. To Hadibaia Tauna Badana, Iesu, amo mai anina bada gaudia ita dibaia diba. Iesu ena hereva be Baibel lalonai ita davaria. Unai hereva be Baibel amo ita duahia neganai, ia be hegeregere Iesu be ita dekenai ia hereva noho.

Dahaka dainai Iesu be Hadibaia Tauna Badana? Badina ta be tau ta ese Iesu ia hadibaia. Bona ia diba kamonai karana be gau badana. To Iesu be daika ia kamonai henia? Daika ese ia hadibaia?— Iena Tamana ese. Bona Iesu ena Tamana be Dirava.

Iesu be taunimanima ta bamona tanobada dekenai ia do mai lasi neganai, ia be Dirava ida guba dekenai ia noho. Unai dainai, taunimanima iboudiai amo Iesu be idau, badina tau ta lasi be guna guba dekenai ia noho bena tanobada dekenai ia vara. Guba dekenai Iesu be Natuna namona, iena Tamana ia kamonai henia. Unai dainai, Iesu be Dirava amo ia dibaia gaudia be taunimanima dekenai ia hadibaia diba. Oiemu tamana bona sinana oi kamonai henia karana amo, Iesu ena kara oi tohotohoa diba.

Iesu be Hadibaia Tauna Badana ena badina ma ta be, taunimanima ia lalokau henia. Ia ura taunimanima ia durua Dirava idia dibaia totona. Iesu be taunimanima badadia ia lalokau henia, to natudia ia lalokau henia danu. Bona natudia idia ura Iesu ida idia noho, badina idia ia hereva henia bona edia hereva ia kamonai henia.

Dina ta ai, tama sina haida ese edia maragidia be Iesu dekenai idia mailaia. To ena turadia idia laloa Hadibaia Tauna Badana be ia bisi bada dainai, maragidia do ia hereva henia lasi. Unai dainai idia luludia. To Iesu be dahaka ia gwau?— Iesu ia gwau: “Lau ura maragi idia mai lau dekenai, umui lulua lasi.” Oibe, Iesu ia ura maragidia be ia dekenai do idia lao. Unai dainai, ena be Iesu be aonega bada bona ladana bada tauna, to nega ia atoa maragidia ia hadibaia totona.—Mareko 10:​13, 14.

Iesu ese natudia ia hadibaia bona edia hereva ia kamonai henia ena badina oi diba, a? Badina ta be ia ura idia dekenai Dirava, ena guba Tamana, ena kara ia herevalaia, unai amo do ia hamoaledia. Edena dala ai taunimanima oi hamoaledia diba?— Idia dekenai Dirava ena kara, oi dibaia vadaeni gaudia unai, oi herevalaia.

Nega ta, Iesu be natu maragina ta ia gaukaralaia, Iena turadia dekenai mai anina bada gauna ta ia hadibaia totona. Natuna ia abia bona ena hahediba taudia edia huanai ia haginia. Bena Iesu ia gwau unai tatau badadia ese edia laloa dalana idia haidaua bona unai natuna maragina bamona idia lao be namo.

Iesu ena hereva ena anina be dahaka? Tau badana, eiava ia bada sisina natuna be edena dala ai natu maragina ta bamona ia kara be namo, a?— Natu maragina be tau badana bamona lasi, ia be gau momo ia diba lasi bona ia ura gau matamatadia ia dibaia. Unai dainai Iesu ia gwau namona be ena hahediba taudia be natu maragidia bamona do idia manau. Oibe, taunimanima ma haida amo gau momo ita dibaia diba. Bona namona be ita ibounai ita lalo-parara, Iesu ena hadibaia herevadia be mai anina bada, iseda lasi.—Mataio 18:1-5.

Iesu be Hadibaia Tauna Badana ena badina ma ta be, ia diba edena dala ai taunimanima edia lalona do ia veria. Auka lasi dalana ai gau idauidau ia herevalaia. Taunimanima ese Dirava ena kara idia lalo-pararalaia totona, ia ese manu, flaoaflaoa bona dina ibounai idia vara gaudia ia herevalaia.

Dina ta Iesu be ororo ataiai ia noho neganai, taunimanima momo be ia dekenai idia mai. Iesu ia helai diho bona idia ia haroro henia, inai laulau dekenai oi itaia bamona. Unai haroro herevana idia gwauraia Ororo Harorona. Ia gwau: ‘Ataiai manudia mani umui itaia. Uhe idia hadoa lasi. Ruma dekenai aniani idia haboua lasi. To guba dekenai ia noho Diravana ese idia ia ubua. Umui ese manu umui hereaia, ani?’

Iesu ma ia gwau: ‘Tano ena herahera edia tubu dalana mani umui itaia. Idia gaukara lasi. Mani umui itadia idia be mai hairai! Ena be Solomona be mai ena kohu momo, to iena dabua be herahera ta ena hairai hegeregerena lasi. Unai dainai, bema Dirava ese idia tubu flaoaflaoa ia naria, oi do ia naria lasi, a?’—Mataio 6:25-33.

Iesu ia hadibaia herevana oi lalo-pararalaia, a?— Ia ura lasi aniani eiava dabua totona do ita laloa momo. Dirava ia diba unai gaudia ibounai ita abia be namo. Iesu ia gwau lasi, aniani bona dabua abia totona do ita gaukara lasi. To ia gwau namona be Dirava ita atoa guna. Bema unai bamona ita karaia, Dirava ese aniani bona dabua do ia henia. Unai oi abia dae, a?—

Iesu ena haroro ia hadokoa neganai, taunimanima be dahaka idia laloa?— Baibel ia gwau iena hadibaia hereva dekenai idia hoa bada. Idia ura bada ena hereva idia kamonai. Ia herevalaia gaudia ese taunimanima idia durua kara namodia idia karaia totona.—Mataio 7:28.

Unai dainai Iesu amo diba ita abia be namo. Oi diba edena bamona unai ita karaia diba, a?— Iena hereva ibounai be buka ta dekenai idia torea. Oi diba unai be edena buka, a?— Ia be Buka Helaga. Unai ena anina be Baibel dekenai ita duahia gaudia ita badinaia, unai amo Iesu ena hereva ita kamonai henia diba. Oibe, Baibel lalonai sivarai ta ia noho, unai sivarai amo Dirava ese ita ia hamaoroa Iesu do ita kamonai henia totona. Mani ita itaia dahaka ia vara.

Dina ta Iesu be ena turadia toi ida ororo badana ta dekenai idia daekau. Edia ladadia be Iamesi, Ioane bona Petero. Gabeai unai tatau toi edia kara do ita dibaia, badina idia toi be Iesu ena tura namodia. To unai mai anina bada negana ai, Iesu ena vairana ia diaridiari matamaia. Bona ena dabua danu be ia diari momokani, inai laulau dekenai oi itaia bamona.

Unai murinai, Iesu bona ena turadia ese gado ta guba amo idia kamonai. Ia gwau: “Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.” (Mataio 17:1-5) Oi diba daika ena gadona idia kamonai, a?— Unai be Dirava ena gadona! Oibe, Dirava ese idia ia hamaoroa ena Natuna do idia kamonai henia.

Hari ita be edena bamona? Dirava ena hereva do ita badinaia bona ena Natuna, Hadibaia Tauna Badana, do ita kamonai henia, a?— Gau badana be ita ibounai ese unai ita karaia. Unai ita karaia diba dalana oi laloatao, a?—

Oibe, Baibel lalonai Dirava ena Natuna ena mauri sivaraina ita duahia neganai, ia ita kamonai henia unai. Hadibaia Tauna Badana ese gau namodia momo ita dekenai ia hadibaia. Baibel lalonai idia torea gaudia oi dibaia karana do oi moalelaia. Bona bema emu turadia dekenai oi dibaia gau namodia oi herevalaia, unai ese oi dekenai moale do ia mailaia danu.