Hadibaia Tauna Badana ese Ma Haida Ia Hesiai Henia

TA BE oi totona gau namona ta ia karaia neganai, do oi moale, ani?— Danu, ta be taunimanima ma haida totona gau namona ta ia karaia neganai, do idia moale. Ita ibounai be unai ita mamia. Hadibaia Tauna Badana be unai ia diba dainai, hanaihanai taunimanima totona gau idauidau ia karaia. Ia gwau: ‘Lau mai lasi taunimanima ese lauegu hesiai gaukara do idia karaia totona, to lau be taunimanima edia hesiai gaukara karaia totona lau mai.’—Mataio 20:28.

Unai dainai bema ita ura Hadibaia Tauna Badana ita tohotohoa, dahaka ita karaia be namo?— Namona be ma haida ita hesiai henia. Namona be idia totona gau namodia ita karaia. Momokani, taunimanima momo be unai bamona idia karaia lasi. To idia ura hanaihanai ma haida ese edia hesiai gaukara idia karaia. Nega ta Iesu murinai idia raka taudia danu be unai bamona idia laloa. Idia ta ta idia ura ma ta idia hereaia eiava ma ta amo idia bada.

Dina ta Iesu be iena hahediba taudia ida ia laolao. Kaperanauma hanua, Galilea Gohuna kahirakahira ia noho hanuana, dekenai idia ginidae murinai idia ibounai be ruma ta lalonai idia vareai. Unuseniai Iesu ese idia ia nanadaia: “Dala dekenai dahaka umui herevahereva?” Gau ta idia gwauraia lasi badina idia be dala dekenai daika ia bada idia hepapahuahulaia.—Mareko 9:33, 34.

Iesu ia diba ia maoro lasi iena hahediba taudia idia laloa idia ta be bada. Unai dainai, inai buka ena karoa ginigunana dekenai ita itaia bamona, ia ese natu maragina ta be edia huanai ia haginia bona idia ia hamaoroa inai natu maragina bamona idia manau be namo. To unai kara amo gau ta idia dibaia lasi. Unai dainai ena mase be kahirakahira neganai, Iesu be idia dekenai do idia laloaboio diba lasi gauna ta ia hadibaia. Dahaka ia karaia?—

Idia ibounai idia aniani noho lalonai, Iesu be teibolo amo ia toreisi bona ena dabua badana ia kokia. Tauele ta ia abia, bona ena gabana dekenai ia kwatua. Bena disi ta ia abia bona ranu ia seia. Reana ena murinai idia raka taudia idia laloa ia be dahaka do ia karaia. Idia itaia noho lalonai, Iesu be idia ta ta ibounai dekenai ia lao, ia igo diho bona edia aena ia huria. Bena tauele amo edia aena ia dahua. Mani unai oi laloa! Bema oi be unuseniai oi noho, dahaka do oi karaia? Oiemu hemami be edena bamona?—

Ena murinai idia raka taudia idia laloa Hadibaia Tauna Badana be unai bamona idia ia hesiai henia be maoro lasi. Unai kara dainai idia hemarai. Momokani, Petero ia ura lasi Iesu be ia dekenai unai manau karana ia hahedinaraia. To Iesu ia gwau unai ia karaia be mai anina bada.

Hari, ita ta ta eda aena ita huria lasi. To Iesu be tanobada dekenai ia noho neganai, unai ia karaia. Oi diba dahaka dainai unai ia karaia?— Iesu bona ena murinai idia raka taudia idia noho tanona dekenai, taunimanima be sendolo idia karaia. Unai dainai dala dekenai idia raka neganai, edia aena be kahu amo ia honu. Ruma dekenai ia vadivadi tauna ena aena amo kahu huria oho karana be manau karana.

To unai negai, Iesu ena hahediba taudia ta ia ura lasi ma haida edia aena ia huria. Unai dainai Iesu ese ia karaia. Unai ia karaia dainai, Iesu be ena murinai idia raka taudia dekenai mai anina bada gauna ta ia hadibaia. Unai gauna idia dibaia be namo. Bona hari ita ese unai gauna ita dibaia danu be gau badana.

Unai gauna oi diba, a?— Iesu be ena dabua badana ia karaia bona teibolo dekenai ia helai lou murinai, ia gwau: “Umui dekenai lau karaia gauna ena anina be umui diba, a? Umui gwauraia lau be hadibaia tauna bona Lohiabada. Unai be umui hereva maoro, badina tauna be lau inai. Unai dainai, lau inai umui emui Lohiabada bona hadibaia tauna, to emui aena lau huria, umui danu ta ta emui aena do umui huria be namo.”—Ioane 13:2-14.

Unai siri dekenai Hadibaia Tauna Badana ese ia hahedinaraia ia ura iena murinai idia raka taudia ese ma haida idia hesiai henia. Ia ura lasi idia be sibodia idia laloa. Ia ura lasi idia laloa idia be bada dainai hanaihanai ma haida ese idia hesiai henidia be namo. Ia ura idia be mai edia ura ida ma haida idia hesiai henia.

Unai be haheitalai namo hereana, ani?— Oi ura Hadibaia Tauna Badana oi tohotohoa bona ma haida oi hesiai henia, a?— Ita ibounai be ma haida totona gau idauidau ita karaia diba. Unai ese idia do ia hamoalea. To mai anina bada gauna be, unai ese Iesu bona ena Tamana do ia hamoalea.

Ma haida ita hesiai henia be auka lasi. Bema oi itaia namonamo, do oi itaia ma haida totona gau momo oi karaia diba. Mani oi laloa: Oiemu sinana durua totona gau ta oi karaia diba, a? Oi bona oiemu ruma bese totona gau momo ia karaia. Ia oi durua diba, a?— Ia oi nanadaia be namo, ani?

Reana emu ruma bese taudia idia do aniani lasi neganai, teibolo oi hegaegaelaia diba. Eiava reana emu ruma bese idia aniani ore murinai teibolo amo mereki mirodia oi kokia. Natudia haida be dina ibounai ruma amo momoru idia kokia. Herevana dahaka oi karaia, oi be ma haida oi hesiai henia noho, Iesu ia karaia bamona.

Oi be mai emu tadina bona taihuna maragidia oi hesiai henidia diba, a? Laloaboio lasi, Iesu, Hadibaia Tauna Badana, ese ena murinai idia raka taudia ia hesiai henidia. Emu tadina bona taihuna maragidia hesiai henia karana amo oi be Iesu ena haheitalai oi tohotohoa. Idia totona dahaka oi karaia diba?— Idia gadara murinai, reana idia oi durua diba edia gadara gaudia be gabu maorona dekenai idia atoa totona. Eiava reana idia oi durua edia dabua idia karaia totona. Eiava reana oi durudia diba edia bedi idia hanamoa totona. Idia totona oi karaia diba gauna ma ta oi laloa diba, a?— Oi karaia karana dainai oi do idia lalokau henia, Iesu ena murinai idia raka taudia ese ia idia lalokau henia bamona.

Sikuli ai ma haida oi hesiai henia diba. Reana idia be oiemu sikuli turadia eiava oiemu tisa. Bema ta ese ena buka ia hamorudia, ia oi durua ena buka oi abidia totona be kara namona. Reana emu tisa totona blakbod oi hagoevaia eiava ma gau ta oi karaia diba. Eiava ma ta totona iduara oi kehoa bona dogoatao be kara namona.

Nega haida, taunimanima ita hesiai henia to idia ese ita do idia hanamoa lasi. Oi laloa unai ese ita ia koua kara namodia ita karaia totona, a?— Lasi! Iesu ia karaia kara namodia dainai taunimanima momo ese idia tanikiu henia lasi. To unai ese Iesu ia koua lasi kara namodia ia karaia totona.

Unai dainai ma haida hesiai henia karana ita hadokoa lasi. Namona be Hadibaia Tauna Badana, Iesu ita laloa bona hanaihanai ena haheitalai ita tohotohoa.