Lalokau Diravana amo Ia Mai Revarevana Ta

MANI lau oi hamaoroa, edena buka be oi ura henia bada?— Natudia haida be animal ia herevalaia bukana do idia abia hidi. Ma haida be laulau momo bukana do idia abia hidi. Unai bamona buka idauidau duahia karana ese moale ia havaraia.

To ita dekenai Dirava ena hereva momokani idia hadibaia bukadia ese unai ibounai ia hereaia. Unai buka iboudiai amo idia ta be hereadae. Oi diba unai be edena buka, a?— Baibel.

Dahaka dainai Baibel be mai anina bada?— Badina ia be Dirava amo ia mai. Ita dekenai Dirava bona ia ese ita totona do ia karaia gau namodia ia hadibaia. Bona Dirava ita hamoalea totona do ita karaia gaudia ia hahedinaraia. Ia be hegeregere revareva ta Dirava amo.

Dirava be guba dekenai Baibel ibounai ia torea diba bona gabeai taunimanima dekenai ia henia. To unai bamona ia karaia lasi. Ena be Baibel lalonai idia noho lalohadai be Dirava amo, to ia ese iena tanobada hesiai taudia ia gaukaralaia Baibel idia torea totona.

Dirava ese unai be edena bamona ia karaia?— Unai oi lalo-pararalaia totona, mani inai oi laloa. Ta ena gadona be reidio dekenai ita kamonai neganai, unai gadona be reana daudau gabunai ia noho tauna ta amo ia mai. Televisen ita itaia neganai, tanobada ena tano haida dekenai idia noho taudia edia laulau ita itaia danu bona idia herevalaia gaudia ita kamonai diba.

Taunimanima be edia roketi amo hua dekenai idia daekau bona unuseni amo tanobada dekenai hereva idia siaia diba. Unai oi diba, a?— Bema taunimanima be unai idia karaia diba, Dirava be guba amo hereva ia siaia diba, a?— Oibe, unai bamona ia karaia diba! Idaunegai, taunimanima ese reidio eiava televisen idia do karaia lasi neganai, unai ia karaia.

Mose be Dirava ena gadona ia kamonai tauna. Dirava ia itaia lasi, to ena gadona ia kamonai diba. Unai ia vara neganai, taunimanima milioni momo be unuseniai idia noho. Momokani, unai dina dekenai Dirava ena siahu dainai ororo ia mareremarere bona kevaru bona guba ia boiboi danu. Taunimanima idia diba Dirava ia hereva, to idia gari bada. Unai dainai Mose idia hamaoroa: “Dirava be do ia hereva lasi ai dekenai, do ai mase garina.” Gabeai, Mose ese Dirava ia gwauraia gaudia ia torea. Bona Mose ia torea gaudia be Baibel lalonai idia noho.—Esodo 20:​18-21.

Mose ese Baibel ena buka ginigunadia 5 ia torea. To ia sibona ese Baibel ia torea lasi. Dirava ese tatau 40 ia gaukaralaia Baibel ena kahana ta ta idia torea totona. Unai tatau be idaunegai momokani idia noho bona lagani momo herea murinai Baibel idia torea haorea. Oibe, lagani 1,600 murinai Baibel idia torea haorea! To hoa gauna be inai, ena be unai tatau haida be ta ta idia diba lasi, to idia torea gaudia ibounai ese idia ta ta edia hereva ia durua heheni.

Dirava ese Baibel idia torea totona ia gaukaralaia tatau haida be ladana bada taudia. Ena be Mose be mamoe naria tauna, to ia be Israela ena hakaua tauna ai ia lao. Solomona be king ta bona tanobada ibounai dekenai ia be aonega bona kohu bada tauna. To toretore taudia ma haida be ladana bada taudia lasi. Amosa be fig audia ia naria tauna.

Bona danu, Baibel torea tauna ta be doketa. Iena ladana oi diba, a?— Iena ladana be Luka. Toretore tauna ta be takisi gogoa tauna. Iena ladana be Mataio. Ma ta be loea, ia be Iuda tomadiho ena taravatu ia diba momo tauna. Ia sibona be Baibel ena buka momo ia torea. Iena ladana oi diba, a?— Iena ladana be Paulo. Bona Iesu ena hahediba taudia Petero bona Ioane danu ese Baibel idia torea, idia be haoda taudia.

Baibel idia torea taudia momo be nega vairai Dirava ese do ia karaia gaudia idia torea. Ena be unai gaudia idia do vara lasi, to edena bamona idia diba?— Dirava ese unai tatau dekenai do idia torea herevadia ia henia. Ia hamaorodia dahaka do ia vara.

Iesu, Hadibaia Tauna Badana, be tanobada dekenai ia noho neganai, Baibel ena kahana badana be idia torea vadaeni. Laloaboio lasi, Hadibaia Tauna Badana be guna guba dekenai ia noho. Dirava ia karaia gauna ia diba vadaeni. Ia abia dae Baibel be Dirava amo, a?— Oibe, ia abia dae.

Iesu be taunimanima dekenai Dirava ena kara ia herevalaia neganai, Baibel amo unai ia duahia. Nega haida ia diba vadaeni siridia be ia gwauraia sibona. Iesu ese Dirava amo hereva ma haida ia mailaia danu. Iesu ia gwau: “Ia dekena amo lau abia herevadia be taunimanima dekenai lau hamaoroa.” (Ioane 8:26) Iesu be guna Dirava ida ia noho dainai, Dirava amo gau momo ia kamonai vadaeni. Bona Iesu ia herevalaia gaudia be edeseniai ita duahia diba?— Baibel lalonai. Unai ibounai idia torea ita ese ita duahia totona.

Oibe, Dirava ese taunimanima ia gaukaralaia Baibel idia torea totona neganai, nega ibounai idia herevalaia gadona dekenai idia torea. Unai dainai Baibel ena buka momo be Heberu gado, haida be Aramia gado bona momo be Greek gado ai idia torea. Hari taunimanima momo be unai gado idia duahia diba lasi dainai, Baibel be gado ma haida dekenai idia hahanaia. Hari, Baibel kahadia be gado 2,260 bona ma haida dekenai ita duahia diba. Mani unai oi laloa! Baibel be Dirava amo ia mai revarevana ta taunimanima ibounai dekenai. To herevana nega hida Baibel idia torea hanai, to ena sivarai be Dirava amo.

Baibel ese ia herevalaia gaudia be mai anina bada ita dekenai. Ia be idaunegai idia torea. To hari idia vara gaudia ia herevalaia. Bona nega vairai Dirava ese do ia karaia gaudia ia herevalaia danu. Ia herevalaia gaudia dainai ita moale! Ita dekenai helaro namona ia henia.

Danu, Baibel ese ita ia hadibaia Dirava ena ura hegeregerena ita noho. Ita ia hadibaia dahaka be maoro bona dahaka be kerere. Oi bona lau be unai ita diba be namo. Ia ese kara dika idia karaia taudia edia sivarai bona idia dekenai ia vara gaudia be ita dekenai ia hadibaia, unai amo idia karaia kerere do ita karaia lasi. Ita dekenai kara maoromaoro idia karaia taudia bona idia abia hahenamo namodia ia hadibaia danu. Unai ibounai idia torea iseda namo totona.

To Baibel amo namo bada ita abia totona, namona be henanadai ta ena haere ita diba. Henanadai be inai: Daika ese ita dekenai Baibel ia henia? Emu haere be dahaka?— Oibe, Baibel ibounai be Dirava amo. Edena bamona ita hahedinaraia diba ita aonega momokani?— Dirava ita kamonai henia bona ia gwauraia gaudia ita badinaia karana amo.

Unai dainai namona be nega ita atoa Baibel ita duahia totona. Ita lalokau henia bada tauna amo revareva ta ita abia neganai, do ita duahia loulou. Ita dekenai ia be mai anina bada. Baibel be unai bamona ita laloa be namo, badina ia be ita ia lalokau henia bada Tauna amo ia mai. Ia be lalokau Diravana amo ia mai revarevana ta.