Karoa 5
Bible be Dirava ena amo la Mai Eiava?
DIRAVA ese ita ia hadibaia vadaeni dahaka ia karaia vadaeni bona dahaka do ia karaia, a? Ena natudia ia lalokau henidia tauna ese gau momo ia hadibaia idia dekenai. Bona ita diba vadaeni, iseda Tamana Iehova ese ita ia lalokau henia.
2 Taunimanima be tanobada ena gabu idauidau dekenai idia noho, nega idauidau lalodiai. Iehova ese iboudiai ia hadibaia dalana namona be inai: Haida ia hagaukaradia buka ta torea totona, bena dala ia karaia iboudiai idia abia totona. To, edena bamona ita hamomokania diba Bible be unai bamona buka?
MA BUKA TA BE BIBLE DANU IA HEGEREGERE LASI
3 Bema Bible be momokani Dirava ena amo ia mai, ma buka iboudiai ia hanaidia be namo. Bona, momokani, dala idauidau ai ia hanaidia. Gunaguna momokani idia torea; Dirava ena Hereva taunimanima iboudiai dekenai be vanegai sibona idia torea be hegeregere lasi, ani? Lagani 3,500 idau negai, Heberu gado ai idia torea matamaia. Bena, lagani 1,300 bamona murinai, gado idau-idau ai idia hanaia matamaia. Hari inai nega lalonai taunimanima momo be Bible idia duahia diba, sibodia edia gado dekenai.
4 Danu, Bible momo herea idia karaia vadaeni, ena momo ese ma buka iboudiai edia momo ia hanaia momokani. Reana buka idauna ta idia heagilaia, thousand haida idia karaia dainai, to lagani iboudiai Bible million momo idia karaia. Bona idau nega amo ema bona hari, Bible billion momo idia karaia vadaeni! Bible be gabu iboudiai lalodiai oi davaria diba. Dirava ena amo ia mai bukana be unai bamona be maoro, ani?
5 Hoa gauna be inai: Ena be badu taudia ese idia haorea toho, to momo herea idia karaia bona gabu idauidau dekenai idia siaia. To Diabolo ena hesiai taudia ese Dirava ena amo ia mai bukana idia badu henia be hoa gauna lasi, ani? Gunaguna Bible momo be lahi dekenai idia gabua, bona Bible idia duahia taudia momo idia hamasedia.
6 Dirava ena amo ia mai bukana ese mai anina bada gaudia ia herevalaia be maoro ani? Bible ese inai henanadai badadia ia haerelaia: ‘Ita mauri noho ena badina be dahaka?’ ‘Vaira negana lalonai dahaka do ia vara?’ Bona ia gwau ia lalonai idia torea herevadia be Iehova Dirava ena amo idia mai. Bible torea tauna ta ia gwau: “Iehova ena lauma be egu uduna amo ia hereva, iena hereva be egu malana dekenai.” (2 Samuel 23:2) Ma ta ia gwau: “Bible ena hereva ibounai be Dirava ena amo idia mai.” (2 Timoteo 3:16) Bible ia gwau ia be Dirava ena Hereva, unai dainai ita tahua namonamo be namo, ani?
BIBLE IDIA TOREA DALANA
7 To reana oi henanadai, ‘Bema taunimanima ese Bible idia torea, Dirava ena amo edena bamona ia mai?’ Momokani, tatau 40 bamona ese Bible idia torea. Dirava sibona ese ena lauma helaga amo Taravatu Gwauta nadi rua dekenai ia torea, to Bible orena be unai tatau ese idia torea. (Esodo 31:18) To idia torea gauna be Dirava ena Hereva. Bible ia gwau: “Tatau haida ese Dirava ena hereva idia gwauraia, lauma helaga ese idia ia hakaua hegeregerena.” (2 Petro 1:21) Oibe, guba bona tanobada bona mauri gaudia iboudiai havaraia totona ena lauma helaga be guna ia gaukaralaia hegeregerena, Dirava ese ia gaukaralaia, Bible torea gaukarana hakaua totona.
8 Anina be Iehova Dirava sibona ese Bible ia havaraia. Taunimanima ia hagaukaradia idia torea totona, bisinesi tauna ese ena seketere ia hagaukaraia hegeregerena. Seketere ese revareva ia torea, to ia lalonai bisinesi tauna ena lalohadai ia torea. Unai dainai unai revareva be iena revareva, seketere ena lasi. Unai hegeregerena, Bible be Dirava ena Buka, idia torea taudia edia lasi.
9 Dirava ese taunimanima edia lalona ia havaraia dainai, diba be idia torelaia totona edia lalona dekenai ia atoa vareai be auka lasi ia dekenai. Unai hegeregerena, tau ta be sibona ena ruma lalonai ia helai neganai gabu daudau amo ia mai herevana be reidio amo ia kamonai diba. Dirava ese ia karaia dalana amo unai hereva be gabu daudauna amo ia mai diba. Unai dainai ita abiadae diba, ena be Iehova be gabu daudauna, guba dekenai ia noho, to tatau haida ia hakaudia diba, ia ura taunimanima dekenai ia hadibaia herevadia idia torea totona.
10 Unai dala amo Buka hereadaena idia torea. Bible lalonai buka maragidia 66 idia noho. Bible ena ladana be Greek hereva ta, biblia, amo ia mai, ena anina be “buka maragidia.” Inai buka be lagani 1,600 lalodiai idia torea, lagani 1513 B.C.E. amo ela bona lagani 98 C.E. To Dirava sibona ese unai buka iboudiai ia havaraia dainai idia hamomokani heheni. Iboudiai edia anina tamona be inai: Iehova Dirava ese ena basileia amo kara maoromaoro negana do ia havaraia lou. Buka ginigunana, Genese, ese paradaiso be Dirava gwau-edeede henia karana dainai ia boio sivaraina ia gwauraia, bona buka ginigabena, Apokalupo, ese ia hahedinaraia Dirava ena basileia ese tanobada na paradaiso ai do ia halaoa lou. —Genese 3:19, 23; Apokalupo 12:10; 21:3, 4.
11 Bible ena kahana ginigunana (Taravatu Gunana) lalonai, buka maragidia 39 idia noho, guna Heberu gado ai idia torea, kahana maragina sibona be Aramaic gado ai. Bible ena kahana iharuana (Taravatu Matamatana) lalonai buka maragidia 27 idia noho, guna Greek gado ai idia torea, aposetolo edia nega lalonai. Heberu gado ai idia torea bukadia (Taravatu Gunana) edia hereva mo-mo be Greek gado ai idia torea bukadia (Taravatu Matamatana) lalodiai idia torea hanai o edia anina idia torea, unai dainai ita diba Taravatu Matamatana ese Taravatu Gunana ia hamomokania.
BIBLE IDIA HARIHARILAIA DALANA
12 Bema idau negai idia torea revareva sibodia idia noho, taunimanima momo herea ese Bible idia duahia diba lasi, ani? Unai dainai Iehova ese dala ia karaia, Heberu Revarevadia ginigunadia idia torea hanai toto-na. (Deuteronomi 17:18) “Torea tauna” Esera ena gaukara unai. (Esera 7:6) Danu, Greek Revarevadia be ma buka daha momo dekenai idia torea hanai.
13 Ena be idau negai idia torea bukadia haida idia do noho, to bema Heberu gado o Greek gado oi diba lasi, oi duahia diba lasi. Bible oi duahia totona, namona be ta ese ena hereva be oi diba gadona ta dekenai ia hanaia. Inai gado hanaia gaukarana dainai taunimanima momo be Dirava ena Hereva idia duahia diba. Hegeregere, gunaguna lagani 300 bamona idia do noho ela bona Iesu be tanobada dekenai ia vara, bese idauidau taudia momo be Greek gado idia diba. Unai dainai Heberu Revarevadia be Greek gado dekenai idia hanaia bona unai buka ena ladana idia hatoa “Septuagint.”
14 Gabeai, taunimanima momo be Latin gado dekenai idia hereva, unai dainai Bible be Latin gado dekenai idia hanaia. To nega daudau murinai taunimanima momo be Latin gado dekenai idia hereva diba lasi, to sibodia edia gado idauidau ai idia hereva. Nega daudau lalonai Catholic dubu orea gunalaia taudia ese gado hanaia taudia idia koudia, Bible be unai gado idauidau dekenai do idia hanaia lasi totona. Bible idia abia taudia be lahi dekenai idia gabua. Unai bamona idia karaia, badina be Bible ese edia hahediba herevadia koikoidia bona edia kara dikadia ia hahedinaraia dainai. To, nega daudau murinai unai tomadiho gunalaia taudia idia lusi, badina be Bible be gado idauidau momo dekenai idia hanaia bona momo herea idia hariharilaia. Hari inai negai, Bible ibounai eiava ena kahana sibona be gado 1,700 bona ma haida dekenai idia torea vadaeni!
15 To nega daudau lalonai Bible be gado haida dekenai idia hanaia loulou. Badina be dahaka? Nega tamona idia hanaia be hegeregere a? Lasi, badina be nega daudau lalonai gado ta ia idau. Unai dainai, bema Bible gunadia be Bible matamatadia danu oi hahegeregeredia, do oi davaria gado be idau. Ena be unai Bible edia hereva edia anina be tamona, to idau negai idia karaia gaudia duahia be auka sisina. Unai dainai Bible matamatadia ita moalelaia, badina be idia amo Dirava ena Hereva ena anina ita abia haraga diba.
BIBLE IDIA HAIDAUA EIAVA LASI?
16 To edena bamona ita diba momokani iseda Bible hari inai negai be Bible torea taudia ese Dirava ena amo idia abia herevana hegeregerena? Nega daudau herea lalonai Bible idia torea hanai loulou dainai hereva haida idia torea kerere a? Oibe, to unai kerere idia davaria vadaeni, bona Bible matamatadia lalodiai idia hamaoromaorodia vadaeni. Hari inai nega lalonai ita duahia herevana be Dirava ese idia torea taudia dekenai ia hadibaia herevana hegeregerena. Unai be edena bamona ita hamomokania diba?
17 Lagani 1947 amo ema bona lagani 1955, Heberu gado buka haida ladana Mase Davara Bukadia idia davaria. Unai buka be idau negai idia torea, lagani 100 o 200 bamona idia do noho ela bona Iesu ia vara neganai. Haida be Bible bukadia, bona ta be Isaia ena buka amo idia torea hanai gauna, idia davaria vadaeni. Unai buka ruaosi idia hahegeregeredia neganai, idia davaria idia be hegeregere! Anina be, ena be lagani 1,000 bona ma haida lalodiai idia torea hanai loulou, to ena hereva idia haidaua lasi!
18 Unai bamona Heberu gado buka gunadia 1,700 bamona idia noho. Idia hahegeregeredia neganai, torea taudia edia kerere maragidia idia davaria diba bona idia hamaoromaoroa diba. Danu, Greek Revarevadia gunadia momo herea idia noho, idia haida be nega sisina sibona Iesu bona ena aposetolo edia nega murinai idia torea. Unai dainai, Sir Frederic Kenyon ia hereva bamona: “Daradara havaraia gauna ginigabena idia kokia vadaeni; hari ita diba goevagoeva Bible lalonai ita duahia herevana be idau negai idia torea herevana hegeregerena.”—The Bible and Archaeology, rau 288, 289.
19 To haida ese Dirava ena Hereva idia haidaua toho vadaeni. Haheitalai ta be 1 Ioane 5:7. Nao gado Bible gunana ta lalonai unai siri ia gwau: “Badina be guba dekenai hahedinaraia taudia be toi, Tamana, Hereva, bona Lauma Helaga; bona inai toiosi be tamona.” To unai hereva be gunaguna momokani idia torea Bible lalodiai idia hedinarai lasi. Toi Tamona herevana ia hamomokania toho tauna ta ese ia atoa kau. Hari idia lalo-parara unai hereva be Dirava ena Hereva, Bible, ena hereva korikorina ta lasi, unai dainai unai kerere idia. hamaoromaoroa bona unai hereva be Bible matamatadia lalodiai ia hedinarai lasi.
20 Vadaeni, bema tau ta ia gwau Bible lalonai ia noho herevana be idau negai idia torea herevana hegeregerena lasi, ena hereva ia hamomokania diba lasi. Dirava ese Bible ia naria dainai, ena be idia torea hanai taudia be nega haida idia torea hanai kerere eiava haida ese iena hereva latadiai ma hereva haida idia atoa kau toho, to idia haidaua diba lasi. Bible lalonai Dirava ia gwauhamata iena Hereva do ia naria namonamo ema bona hari.—Salamo 12:6; Daniel 12:4; 1 Petro 1:24, 25; Apokalupo 22:18, 19.
BIBLE ENA HEREVA BE MOMOKANI A?
21 Iesu Keriso ese Dirava ia guriguri henia, ia gwau: “Oi emu hereva be hereva momokani.” (Ioane 17:17, HM) Unai hegeregerena, idau negai taudia edia sivarai idia tahua taudia idia hoa Bible idia duahia neganai, badina be ena hereva be maoromaoro momokani. Bible ese ia gwauraia ladadia bona gaudia ita hamomokania diba. Haheitalai haida be inai:
22 Inai laulau bona revareva mani oi itaia, inai dubu, ena haba dekenai idia torea, Karnak ai, Egypt dekenai. Farao Sisaka ena sivarai idia hahedinaraia, lagani 3,000 bamona idia lao vadaeni ia ese Iuda ena basileia ia halusia. Bible danu ese unai sivarai ia gwauraia.—1 Hanua Pavapavadia 14:25, 26.
23 Moab Nadina danu mani oi itaia. Hari ia be museum ta lalonai France dekenai ia noho. Ena revareva ese Moab ena pavapava Mesa ena sivarai ia gwauraia, ia ese Israel ia dagedage henia. Inai sivarai danu be Bible lalonai idia torea.—2 Hanua Pavapavadia 1:1; 3:4-27.
24 Rau gabena ena idiba kahanai Siloam ena ranu gurina bona nadi matuna ta idia hedinarai, Ierusalem lalonai. Inai nadi matuna idia geia, ranu be hanua lalonai ia aru vareai totona. Bible ena hereva ia hamomokania, badina be Bible ia gwau lagani 2,500 idau negai King Hesekia ese ia karaia, idia tuari henia taudia ese Ierusalem ena ranu idia koua garina.—2 Hanua Pavapavadia 20:20; 2 Sisiga 32:2-4, 30.
25 Idiba kahanai ia noho nadina, ladana Nabonido ena Sivarai, be British Museum dekenai ia noho. Idau negai hanuana Babulono ena moru sivaraina ia gwauraia, Bible ese ia gwauraia hegeregerena. (Daniel 5:30, 31) Gau tamona, Bible ia gwau Belesasara be unai negai Babulono dekenai ia pavapava, to inai Nabonido ena Sivarai ese Belesasara ia gwauraia lasi. Danu, buka gunadia momo idia gwau Nabonido be Babulono ena pavapava ginigabena. Unai dainai, Bible idia hakoikoia taudia idia gwau Belesasara ia noho lasi bona Bible be kerere. To vanegai ma revareva gunadia idia davaria, idia hahedinaraia Belesasara be Nabonido ena natuna bona ia be ena tamana danu idia lohia hebou! Oibe, gau momo herea ese Bible idia hamomokania.
26 Idau negai taudia edia sivarai Bible lalonai idia torea be momokani. To unai sibona lasi; ena hereva iboudiai be momokani. Haheitalai rua be inai: Idau negai idia noho taudia idia laloa tanobada be gau ta latanai o tau bada hereana ta ena pagana latanai ia noho. To Bible ia hereva momokani, ia gwau Dirava ese “tanobada ia atoa, gau ta latanai lasi.” (Iobu 26:7) Bona ena be gunaguna taunimanima momo idia laloa tanobada be palakapalaka, to Bible ia gwau Dirava be “tanobada kuborona ataiai ia noho.”—Isaia 40:22.
27 To gau hereadaena ta ese ia hamomokania Bible be Dirava ena amo ia mai; gauna inai: vaira nega lalonai do idia vara gaudia ia gwauraia maoromaoro guna. Taunimanima edia buka ta be unai bamona ia karaia diba lasi. Ia lalonai be peroveta herevadia maoromaorodia momo idia noho. Unai hereva haida ese Dirava ena Natuna idia gwauraia guna, idia gwau tanobada dekenai do ia mai. Lagani momo herea idia do noho ema bona ia vara neganai, Taravatu Gunana ia gwau Betelehem dekenai do ia vara, rami-hebou kekenina ta amo do ia vara, kerere taudia danu do idia duahia hebou, ena turiana ta do idia hamakohia lasi, ena dabua be laki gadara amo do idia haria, bona ma gau momo herea danu.—Mika 5:2; Mataio 2:3-9; Isaia 7:14; Mataio 1:22, 23; Sekaria 11:12, 13; Mataio 27:3-5; Isaia 53:12; Luka 22:37, 52; 23:32, 33; Salamo 34:20; Ioane 19:36; Salamo 22:18; Mataio 27:35.
28 Inai buka ena karoa ginigunana lalonai ai hereva bamona, Bible ese danu ia gwau nega daudau lasi murinai inai nega gunana do ia ore bena nega matamatana do ia vara. (Mataio 24:3-14; 2 Petro 3:7, 13) Unai peroveta herevadia ita abidadama henia diba a? Bema tau ta be hereva momokani oi dekenai ia gwauraia nega 100, gau matamatana ta be oi dekenai ia hadibaia neganai, ena hereva dekenai do oi daradara a? Lasi, ani? Unai hegeregerena, Dirava ena gwauhamata ta, Bible lalonai idia torea, ita daradaralaia be badina lasi. Ena Hereva ita abiadae diba! (Tito 1:2) Bema Bible oi stadilaia noho, do oi diba goevagoeva ia be Dirava ena amo ia mai.
[Study Questions]
1. Dahaka dainai Dirava ese ena kara ita dekenai ia hadibaia be hoa gauna lasi?
2. Iehova ese sibona ena sivarai ita dekenai ia hadibaia dalana namona be dahaka? (b) Dahaka henanadai ia vara?
3. Edena dala ai Bible ese ma buka iboudiai ia hanaia?
4. Bible ena momo ese ma buka haida edia momo ia hanaia a?
5. Edena dala ai Bible idia haorea toho?
6. (a) Bible ese edena henanadai badadia ia haerelaia? (b) Bible torea taudia idia gwau daika ese idia ia hadibaia?
7. (a) Daika ese Bible ia torea? (b) Vadaeni, dahaka dainai Bible be Dirava ena Hereva ita gwauraia be maoro?
8, 9. Dirava ese Bible ia havaraia dalana be dahaka kara ese ia haheitalaia?
10. (a) Bible lalonai buka hida idia noho, bona lagani hida lalodiai idia torea? (b) Bible ena hereva badana be dahaka?
11. (a) Bible be edena gado dekenai idia torea? (b) Bible ena kahana rua be dahaka dahaka, to dahaka ese ia hahedinaraia edia hereva be hegeregere?
12. Dahaka dainai Iehova ese dala ia karaia Bible ena hereva idia torea hanai totona?
13. (a) Taunimanima momo ese Bible idia duahia diba totona, dahaka ia vara be namo? (b) Bible be idau gado dekenai idia hanaia negana ginigunana be edena negai?
14. (a) Dahaka dainai dubu orea gunalaia taudia haida ese Bible be idau gado dekenai hanaia karana idia koua toho? (b) Unai koua karana dekenai idia kwalimu a?
15. Bible matamatadia, iseda gado dekenai idia hanaia gaudia, edia namo be dahaka?
16. Dahaka dainai taunimanima haida idia laloa Bible be idau negai idia torea revarevadia amo ia idau?
17. Dahaka ese ia hamomokania Bible ia idau lasi?
18. (a) Idia torea hanai taudia edia kerere be edena bamona idia hamaoromaoroa? (b) Taravatu Matamatana ena hereva idia torea hanai maoro eiava?
19. (a) Edena siri lalonai ma hereva haida be Bible ena hereva dekenai idia atoa kau toho? (b) Dahaka dainai ita diba 1 Ioane 5:7 ena hereva haida, Bible haida lalodiai idia torea hegeregerena, be Bible ena hereva korikori lasi
20. Dahaka dainai ita diba goevagoeva Bible ia idau lasi?
21. Iesu ese Dirava ena Hereva edena bamona ia laloa?
22-25. Dahaka haheitalai ese idia hahedinaraia Bible lalonai idia torea sivaraidia be momokani?
26. Dahaka ese ia hahedinaraia Bible ena hereva ma haida be maoro?
27. (a) Dahaka ese ia hahedinaraia goevagoeva Bible be Dirava ena amo ia mai? (b) Taravatu Gunana ese Dirava ena Natuna edena bamona ia perovetalaia momokani?
28. (a) Ena be Bible ena peroveta herevadia haida edia anina be ia do vara lasi, to dahaka dainai ita abiadae diba do idia vara? (b) Bema Bible oi stadilaia noho, dahaka do oi diba goevagoeva?
[Picture on page 49]
Dirava ese tatau haida ia hagaukaradia Bible torea totona, bisinesi tauna ese ena seketere ia hagaukaraia bamona
[Picture on page 50]
Dubu orea gunalaia taudia haida ese edia orea taudia idia koudia, Bible do idia duahia lasi. Bible idia abia taudia be lahi dekenai idia gabua.
[Picture on page 52, 53]
Isaia ena buka, Mase Davara Bukadia amo
[Pictures on page 54, 55]
Dubu ta ena haba, Karnak ai, Egypt dekenai
Moab Nadina
Nabonido ena Sivarai
Hesekia ena nadi matuna vareai gabuna bona Siloam ena ranu gurina.