Gau Ibounai Ia Karaia Tauna

GAU namona ta lau diba. Oi ura kamonai, a?— Emu imana oi itaia. Emu ima kwakikwakina oi koua. Gau ta oi abia isi. Oiemu imana be gau momo ia karaia diba bona ia karaia namonamo. Oi diba daika ese iseda imana ia karaia?—

Oibe, iseda uduna, udu baubau bona matana ia karaia Tauna ese ia karaia. Ia be Dirava, Hadibaia Tauna Badana ena Tamana ese ia karaia. Dirava ese ita dekenai matana ia henia dainai ita moale, ani?— Matana amo gau momo ita itaia diba. Flaoaflaoa ita itaia diba. Rei bona guba edia kala ita itaia diba. Idia aniani noho manu maragidia ita itaia diba, inai laulau dekenai oi itaia bamona. Oibe, unai bamona gaudia ita itaia diba dainai ita moale, ani?—

To unai gaudia be daika ese ia karaia? Taunimanima ese idia karaia, a? Lasi. Taunimanima ese ruma idia karaia diba. To ia tubu rei idia karaia diba lasi. Taunimanima ese manu maragina, flaoaflaoa, eiava mauri gaudia ma haida idia karaia diba lasi. Unai oi diba, a?—

Dirava ese unai gaudia ibounai ia karaia. Dirava ese guba bona tanobada ia karaia. Taunimanima ia karaia danu. Ia ese tau bona hahine ginigunadia ia karaia. Iesu, Hadibaia Tauna Badana ese unai ia hadibaia.—Mataio 19:4-6.

Iesu be edena bamona ia diba Dirava ese tau bona hahine ia karaia? Dirava ese unai ia karaia neganai, Iesu ese ia itaia, a?— Oibe, ia itaia. Dirava ese tau bona hahine ia karaia neganai, Iesu be Dirava ida ia noho. Iesu be Dirava ese ia karaia tauna ginigunana. Ia be aneru ta bona iena Tamana ida guba dekenai ia noho.

Baibel ese ita ia hadibaia, Dirava ia gwau: “Taunimanima ita karaia.” (Genese 1:26) Dirava ese ia hereva henia tauna oi diba, a?— Iena Natuna ia hereva henia. Ia be gabeai tanobada dekenai ia mai bona iena ladana idia gwauraia Iesu.

Unai be hoa gauna, ani? Mani unai oi laloa! Iesu ita kamonai henia neganai, ita be Dirava ese guba bona tanobada ia karaia neganai, ia ida ia noho tauna ese ia hadibaia unai. Iesu be guba dekenai iena Tamana ida ia gaukara, unai amo gau momo ia dibaia. Unai dainai ia be Hadibaia Tauna Badana!

Dirava be iena Natuna ia do karaia lasi neganai, oi laloa ia sibona ia noho dainai ia lalohisihisi, a?— Bema ia lalohisihisi lasi, dahaka dainai mauri gaudia ma haida ia karaia?— Unai bamona ia karaia badina ia be lalokau Diravana. Ia ura ma haida ese mauri do idia moalelaia. Namona be Iehova ita tanikiu henia badina ita dekenai mauri ia henia.

Dirava ese ia karaia gaudia ibounai ese iena lalokau idia hahedinaraia. Dirava ese dina ia karaia. Dina ese ita dekenai diari ia henia bona ita ia hasiahua. Bema dina be lasi, gau ibounai do idia keru bona tanobada dekenai mauri gauna ta do ia noho lasi. Dirava ese dina ia karaia dainai oi moale, a?—

Dirava ese medu ia siaia danu. Nega haida reana medu oi ura henia lasi badina medu ia diho neganai, murimuri dekenai oi gadara diba lasi. To medu ese flaoaflaoa ia durua idia tubu totona. Unai dainai flaoaflaoa hairaina ita itaia neganai, daika ita tanikiu henia be namo?— Dirava. Bona huahua bona uma aniani mai edia mamina namona ita ania neganai, daika ita tanikiu henia be namo?— Namona be Dirava ita tanikiu henia badina iena dina bona medu ese unai gaudia idia hatubua.

Bema ta ese oi ia nanadaia, ‘Dirava ese taunimanima bona animal ia karaia danu, a?’ Dahaka do oi gwau?— Inai bamona oi hereva be maoro: “Oibe, Dirava ese taunimanima bona animal ia karaia.” To bema ta ia abia dae lasi Dirava ese taunimanima ia karaia? Eiava bema ia gwau taunimanima be animal amo idia vara? Baibel ese unai ia hadibaia lasi. To ia gwau Dirava ese mauri gaudia ibounai ia havaraia.—Genese 1:26-31.

To reana ta be oi do ia hamaoroa ia be Dirava ia abidadama henia lasi. Unai neganai dahaka do oi gwau?— Ia dekenai ruma ta do oi poinia. Bona ia oi nanadaia: “Unai ruma be daika ese ia karaia?” Taunimanima ibounai idia diba ta ese unai ruma ia karaia. Unai ruma be sibona ia karaia lasi, ani?—Heberu 3:4.

Unai murinai, flaoaflaoa idia tubu gabuna ta dekenai ia oi hakaua lao bona ia dekenai flaoaflaoa ta oi hahedinaraia. Ia oi nanadaia: “Daika ese inai ia karaia?” Taunimanima ta ese ia karaia lasi. Bona ruma be sibona ia karaia lasi hegeregerena, inai flaoaflaoa be sibona ia karaia lasi danu. Tau ta ese ia karaia. Dirava ese.

Ia oi hamaoroa do ia gini bona manu ena ane do ia kamonai. Bena oi nanadaia: “Daika ese manu idauidau ia karaia bona idia dekenai ane ia hadibaia?” Dirava ese. Dirava ese guba, tanobada bona idia mauri gaudia ibounai ia karaia! Ia be mauri henia Tauna.

To, reana ta do ia gwau ia itaia diba gaudia sibona ia abia dae. Reana do ia gwau: ‘Bema lau itaia diba lasi, lau abia dae lasi.’ Unai dainai taunimanima haida idia gwau Dirava idia abidadama henia lasi badina ia idia itaia diba lasi.

Momokani, Dirava ita itaia diba lasi. Baibel ia gwau: ‘Tau ta ese Dirava ena vairana ia itaia diba lasi.’ Tanobada dekenai ia noho tau, hahine, eiava natuna ta lasi ese Dirava ia itaia diba. Unai dainai namo lasi ta ese Dirava ena laulau eiava kaivakuku ta ia karaia toho. Dirava ese ita ia hamaoroa iena laulau ta do ita karaia lasi. Unai dainai, unai bamona gaudia be iseda ruma lalonai idia noho lasi be namo, ani?—Esodo 20:4, 5; 33:20; Ioane 1:​18.

To bema Dirava oi itaia diba lasi, edena bamona oi diba Dirava ia noho? Mani inai oi laloa. Lai oi itaia diba, a?— Lasi. Taunimanima ese lai idia itaia diba lasi. To lai ese ia karaia gaudia oi itaia diba. Lai be au rigidia ia odaia bena au raurau idia marere neganai, unai oi itaia. Unai amo oi diba lai be momokani ia noho.

Dirava ese ia karaia gaudia oi itaia diba danu. Flaoaflaoa eiava manu ta oi itaia neganai, Dirava ese ia karaia gauna ta oi itaia unai. Unai amo oi abia dae Dirava ia noho.

Reana ta ese oi do ia nanadaia, ‘Daika ese dina bona tanobada ia karaia?’ Baibel ia gwau: “Dirava ese guba bona tanobada ia karaia.” (Genese 1:1) Oibe Dirava ese unai gau namodia ibounai ia karaia! Unai ibounai dainai oiemu hemami be edena bamona?—

Ita mauri noho dainai ita moale, ani? Manu edia ane namodia ita kamonai diba. Flaoaflaoa bona Dirava ese ia karaia gaudia ma haida ita itaia diba. Bona Dirava ese ita dekenai ia henia aniani ita ania diba.

Unai gaudia ibounai dainai Dirava ita tanikiu henia be namo. Gau badana be, ita dekenai mauri ia henia dainai ia ita tanikiu henia be namo. Bema mai momokani ida Dirava ita tanikiu henia, gau ta do ita karaia. Unai be dahaka?— Dirava do ita kamonai henia bona ena hereva Baibel dekenai do ita badinaia. Unai amo ita hahedinaraia gau ibounai ia karaia Tauna ita lalokau henia.