Hedibagani Ita Dadaraia be Gau Badana

NEGA ta, ta ese oi ia hamaoroa kara kererena ta oi karaia totona, a?— Oi ia doria oi karaia totona, a? Eiava oi ia hamaoroa unai be moale karana bona ia kerere lasi, a?— Ta be ita dekenai unai ia karaia neganai, ia ura ita ia dibagania.

Ita idia dibagania neganai, dahaka ita karaia be namo? Edia hereva ita abia dae bona kara kererena ita karaia, a?— Unai ese Iehova Dirava do ia hamoalea lasi. To oi diba daika do oi hamoalea?— Oibe, Satani Diabolo do oi hamoalea.

Satani be Dirava ena inai henia tauna, bona Satani be iseda inai henia tauna. Ia ita itaia diba lasi badina ia be lauma tauna. To ita ia itaia diba. Nega ta Diabolo be Iesu, Hadibaia Tauna Badana, ida ia herevahereva, bona ia dibagania toho. Iesu ia karaia karana mani ita itaia. Bena ita idia dibagania neganai, do ita diba dahaka do ita karaia.

Iesu be hanaihanai ia ura Dirava ena ura ia karaia. Ioridane Sinavai dekenai bapatiso ia abia neganai, unai ia hahedinaraia. Iesu ia bapatiso murinai Satani ese ia dibagania toho. Baibel ia gwau Iesu dekenai “guba be ia kehoa.” (Mataio 3:​16) Anina be Iesu be guna Dirava ida guba ai ia noho negana ia laloa lou matamaia.

Iesu ia bapatiso murinai, taunimanima idia noho lasi gabuna ta dekenai ia lao, ia laloa lou gaudia ia lalohadailaia totona. Dina 40 bona hanuaboi 40 idia hanaia. Unai nega ibounai lalonai Iesu be gau ta ia ania lasi, unai dainai ia hitolo bada. Unai nega ai, Satani ese Iesu ia dibagania toho.

Diabolo ia gwau: “Bema oi be Dirava ena Natuna neganai, inai nadi dekenai oi oda henia, vadaeni aniani gaudia dekenai do oi halaoa.” Unai paraoa haida edia mamina be do ia namo herea! To Iesu ese nadi be paraoa dekenai ia halaoa diba, a?— Oibe, ia karaia diba. Dahaka dainai? Badina Iesu, Dirava ena Natuna, be mai ena siahu bada.

Bema Diabolo ese oi ia noia nadi be paraoa ai oi halaoa totona, do oi karaia, a?— Iesu be ia hitolo. Unai dainai nega tamona sibona ia karaia be kerere lasi, a?— Iesu ia diba unai dala dekenai ena siahu ia gaukaralaia be kerere. Iehova be ia dekenai unai siahu ia henia taunimanima ia veria lao Dirava dekenai, to ia sibona totona do ia gaukaralaia lasi.

Unai dainai, Iesu be Satani dekenai Baibel ai ia noho herevana ia gwauraia, ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” Iesu ia diba Iehova hamoalea karana ese aniani ia hereaia.

To Diabolo ese ia dibagania toho lou. Ia ese Iesu ia hakaua lao Ierusalema dekenai bona dubu helaga ena ataiai ia haginia. Bena Satani ia gwau: ‘Bema oi be Dirava ena Natuna, inai gabu dekena amo oi roho diho, badina be Buka Helaga ia gwau, Dirava ena aneru ese oi do idia naria bona dika ta do oi davaria lasi.’

Dahaka dainai Satani be unai bamona ia hereva?— Badina ia ura Iesu ia dibagania kavakava karana ta ia karaia totona. To Iesu be Satani ena hereva ia kamonai henia lasi. Satani ia hamaoroa: “Buka Helaga dekenai ia torea, ia gwau, ‘Lohiabada oiemu Dirava dekenai do oi dibagania lasi.’ ” Iesu ia diba iena mauri ia haboioa diba karana ia karaia be Iehova tohoa karana, bona unai be kerere.

To, Satani be ia hesiku lasi. Gabeai, ororo badana ta ena atai dekenai Iesu ia hakaua lao. Unuseniai tanobada ena basileia eiava gavamani ibounai bona edia hairai ia hahedinaraia. Bena Satani be Iesu ia hamaoroa: “Bema oiemu kwarana oi atoa diho, bona bema lau dekenai oi tomadiho, vadaeni inai ibounai be oi dekenai do lau henia.”

Satani ia henia gauna mani oi laloa. Taunimanima edia basileia eiava gavamani ibounai be momokani Satani ena, a?— Oibe, Iesu ese hereva ta ia gwauraia lasi unai ia hakoikoia totona. To ia hereva diba bema ia diba unai basileia eiava gavamani ibounai be Satani ena lasi. Oibe Satani be tanobada ena bese ibounai edia lohia. Baibel ese Satani ia gwauraia “inai tanobada ena lohia.”​—Ioane 12:31.

Bema Diabolo ia gwauhamata gau ta do ia henia bema ia oi tomadiho henia, dahaka do oi karaia?— Iesu ia diba Diabolo tomadiho henia karana be kerere, herevana dahaka ahuna do Ia abia. Unai dainai Iesu ia gwau: ‘Satani e, idau gabu dekenai oi lao, badina Baibel ia gwau, Iehova oiemu Dirava do oi tomadiho henia, ia sibona ena hesiai do oi karaia.’​—Mataio 4:​1-​10; Luka 4:​1-​13.

Nega haida hedibagani ita davaria danu. Idia haida oi diba, a?— Haheitalai ta be inai. Reana emu sinana ese keke namo hereana ta ia gabua. Bona oi ia hamaoroa do oi ania lasi, to oi naria ela bona aniani negana. To oi be oi hitolo bada dainai, reana oi ura bada oi ania. Oiemu sinana do oi kamonai henia, a?— Satani ia ura emu sinana oi kamonai henia lasi.

Iesu oi laloatao. Ia hitolo bada danu. To ia diba Dirava hamoalea karana ese aniani ia hereaia. Emu sinana ena hereva oi badinaia neganai, Iesu ena kara oi tohotohoa unai.

Reana natudia ma haida ese oi do idia noia mariuana oi ania totona. Reana oi idia hamaoroa unai ese emu hemami do ia hanamoa momokani. To unai mariuana be drag. Oi ia hagorerea bona ia hamasea diba danu. Eiava ma ta be oi dekenai kuku, ia lalonai be mai ena drag danu ia henia, bona oi ia doria oi ania totona. Dahaka do oi karaia?—

Iesu oi laloatao. Satani ese Iesu ia hamaoroa toho dubu helaga amo do ia roho diho, unai amo ena mauri do ia haboioa diba. To Iesu ese unai ia karaia lasi. Bema ta ese oi ia doria emu mauri oi haboioa diba gauna ta oi karaia totona, do oi karaia, a?— Iesu be Satani ia kamonai henia lasi. Bema ta ese oi ia doria kara kererena oi karaia totona, namona be oi kamonai henia lasi danu.

Nega ta reana ta ese oi do ia noia kaivakuku ta oi tomadiho henia totona, Baibel ia gwau do ita karaia lasi gauna unai. (Esodo 20:​4, 5) Reana ia be sikuli hebou ta ena kahana ta. Reana oi idia hamaoroa sikuli dekenai do oi lao lasi bema unai oi karaia lasi. Dahaka do oi karaia?—

Kara maorona oi karaia be auka lasi bema ibounai ese idia karaia. Ma haida ese ita idia doria kara kererena ita karaia totona neganai, kara maorona karaia dalana do ia auka. Reana do idia gwau idia karaia karadia be idia dika momokani lasi. To henanadai badana be inai, Dirava ena lalohadai unai kara dekenai be dahaka? Ia be gau ibounai ia diba.

Unai dainai herevana taunimanima ma haida be dahaka idia gwau, to namona be Dirava ia gwau idia kerere gaudia ita karaia lasi. Unai dala amo nega ibounai Dirava do ita hamoalea, bona Diabolo do ita hamoalea lasi.