Diabolo ese Iesu Ia Tohoa

Iesu ia bapatiso murinai, lauma helaga ese taunimanima lasi gabuna ai ia hakaua lao. Dina 40 ia aniani lasi bona ia hitolo bada. Bena Diabolo ia mai Iesu ia tohoa totona bona ia gwau: ‘Bema oi be Dirava ena Natuna, inai nadi oi hamaoroa paraoa ai do idia lao.’ To Iesu ia haere: ‘Toretore Helagadia ia gwau aniani sibona amo oi mauri lasi. To Iehova ena hereva ibounai oi kamonai be namo.’

Gabeai, Diabolo ese Iesu ia tohoa, ia gwau: ‘Bema oi be Dirava ena Natuna, dubu helaga ena ataiai amo oi roho diho. Toretore Helagadia ia gwau Dirava ese aneru do ia siaia oi idia dogoatao totona.’ To Iesu ia haere: ‘Toretore Helagadia ia gwau namo lasi Iehova oi tohoa.’

Bena, Satani ese Iesu dekenai tanobada basileia edia kohu bona hairai ibounai ia hahedinaraia, bona ia gwau: ‘Lau ese basileia ibounai bona edia hairai be oi do lau henia, bema nega tamona sibona lau oi tomadiho henia.’ To Iesu ia haere: ‘Satani, oi siri! Toretore Helagadia ia gwau Iehova sibona oi tomadiho henia be namo.’

Bena Diabolo ese ia rakatania, bona aneru idia mai bona aniani idia henia Iesu ia ania totona. Unai nega amo, Iesu ese Basileia ena sivarai namona ia harorolaia. Tanobada dekenai unai gaukara karaia totona ia mai. Taunimanima ese Iesu ena hereva idia ura henia, bona ia lao gabudia ibounai dekenai ia murinai idia lao.