Hebogahisi Karana amo Ita Dibaia Gauna

TA LALO-DIKA henia kava karana ena anina oi diba, a?— Ena anina be ta oi ura henia lasi badina iena toana be idau, eiava gado idauna ai ia hereva. Danu, ena anina be ma ta be inai, ta oi do diba namonamo lasi dainai, ia oi badu henia eiava lalohadai dikana oi abia.

Oi laloa bema ta ena kara oi diba namonamo lasi, eiava oi amo ia idau dainai oi ura henia lasi be maoro, a?— Lasi, ta lalo-dika henia kava karana be maoro lasi bona hebogahisi karana lasi danu. Namo lasi ta be idau tauna dainai hebogahisi karana ita hahedinaraia lasi.

Mani inai oi laloa. Oiemu kopina kala amo ia idau eiava gado ma ta ia herevalaia tauna ta oi diba, a?— Reana edia toana ia idau taudia oi diba badina bero eiava gorere ese edia toana ia haidaua. Oi amo idia idau taudia be hebogahisi bona lalokau dalanai oi kara henidia, a?—

Bema Hadibaia Tauna Badana, Iesu Keriso, ita kamonai henia, taunimanima ibounai dekenai hebogahisi do ita hahedinaraia. Herevana ta be edena tano amo eiava ena kopina ena kala be edena bamona, unai ita laloa lasi. Namona be ia dekenai hebogahisi ita hahedinaraia. Ena be taunimanima ibounai ese unai idia abia dae lasi, to Iesu be unai ia hadibaia. Mani unai ita herevalaia.

Ma haida ia lalo-dika henia kava Iuda tauna ta be Iesu dekenai ia lao bona ia henanadai, ‘Lau be dahaka do lau karaia mauri hanaihanai abia totona?’ Reana unai tauna ia ura Iesu ena lalona ia veria bena do ia gwau, iseda bese eiava tano taudia sibona dekenai hebogahisi ita hahedinaraia be namo. Unai dainai unai henanadai ia haerelaia lasi, to unai tauna ia nanadaia: ‘Dirava ena Taravatu be dahaka ia gwau ita karaia be namo?’

Unai tauna ia gwau: ‘Iehova oiemu Dirava do oi lalokau henia mai emu kudouna ibounai. Bona oiemu badibadinai tauna oi lalokau henia be namo, oi sibona oi lalokau henia hegeregerena.’ Iesu ia gwau: ‘Oiemu haere be ia maoro. Unai bamona oi karaia noho, bona mauri hanaihanai do oi abia.’

To, unai tauna ia ura lasi ia amo idia idau taudia dekenai hebogahisi eiava lalokau ia hahedinaraia. Unai dainai ekskius ta ia tahua. Iesu ia nanadaia: “Lauegu badibadinai tauna be daika?” Reana ia ura Iesu ia gwau: “Emu badibadinai taudia be emu turadia” eiava, “Oiemu toana tamona taudia.” Unai henanadai haerelaia totona, Iesu ese Iuda tauna bona Samaria tauna ta ena sivarai ia gwauraia. Unai sivarai be inai bamona.

Tau ta be Ierusalema hanua amo Ieriko dekenai ia lao henia dalana dekenai ia raka diho lao. Ia be Iuda tauna. Ia raka lao noho lalonai, henaohenao taudia ese idia dogoatao. Idia botaia bona ena moni bona dabua idia abia. Henaohenao taudia ese idia botaia dikadika ela bona kahirakahira ia mase bena dala badinai idia rakatania.

Nega sisina murinai, hahelaga tauna ta be unai dala dekenai ia raka lao. Bero badana ia abia tauna ia itaia. Bema unai be oi dahaka do oi karaia?— Hahelaga tauna be dala kahana dekenai ia raka hanaia sibona. Gau ta ia karaia lasi unai tauna ia durua totona.

Bena tomadiho ia laloa bada tauna ta be unai dala dekenai ia raka lao. Ia be Ierusalema dekenai ia noho dubu ai ia gaukara Levi tauna. Unai tauna do ia durua, a?— Lasi. Hahelaga tauna ese ia karaia karana hegeregerena ia karaia.

Dokonai, Samaria tauna ta ia mai. Dala ena kona dekenai ia mai noho tauna oi itaia diba, a?— Iuda tauna ia itaia ia hekure mai bero badadia ida. Samaria bona Iuda taudia momo be ta ta idia ura henia lasi momokani. (Ioane 4:9) Unai dainai unai Samaria tauna ese inai tauna do ia rakatania bona do ia durua lasi, a? Sibona dekenai do ia gwau: ‘Dahaka dainai inai Iuda tauna do lau durua? Bema dika lau davaria lau do ia durua, a’?

Samaria tauna ese dala badinai ia hekure tauna ia itaia, bona ia hebogahisi henia. Ia ura lasi unuseniai do ia rakatania bena do ia mase. Unai dainai ena doniki amo ia diho, unai tauna dekenai ia lao, bona dehoro bona uaina amo iena bero ia huria. Unai ese bero do ia hanamoa. Gabeai ena bero be dabua ta amo ia kumia.

Samaria tauna ese metairametaira bero ia davaria tauna ia abia isi bona ena doniki latanai ia atoa. Bena metairametaira dala dekenai idia diho ela bona laolao taudia edia ruma ta, eiava hotel maragina ta dekenai idia ginidae. Unuseniai Samaria tauna ese gabu ta ia abia unai tauna ia noho totona, bona ia naria namo herea.

Vadaeni Iesu ese ia hereva henia tauna ia nanadaia: ‘Dahaka oi laloa, idia toiosi amo daika be badibadinai tauna namona?’ Emu haere be dahaka? Oi laloa ia be hahelaga tauna, Levi tauna eiava Samaria tauna?—

Unai tauna ia gwau: ‘Bero ia davaria tauna ia durua tauna be badibadinai tauna namona.’ Iesu ia gwau: ‘Oi hereva maoro. Oi lao, oi danu unai bamona do oi karaia.’​—Luka 10:​25-​37.

Unai be sivarai namo hereana, ani? Unai sivarai ese ia hahedinaraia goevagoeva iseda badibadinai taudia be daidia. Idia be iseda tura namodia sibona lasi. Bona idia be iseda kopina ena kala hegeregerena, eiava iseda gado idia herevalaia taudia sibona lasi. Iesu be ita ia hadibaia, herevana taunimanima be edena gabu amo, edia toana be edena bamona, eiava idia be gado idau taudia, namona be idia dekenai hebogahisi ita hahedinaraia.

Unai be Iehova Dirava ena kara. Ia be ma haida ia lalo-dika henia lasi. Iesu ia gwau, ‘emui Tamana guba dekenai ia noho ese kara dika taudia bona kara namo taudia edia latanai dina ena diari ia henia noho. Medu danu kara namo taudia bona kara dika taudia edia latanai ia siaia diho.’ Unai dainai, namona be Dirava bamona taunimanima ibounai dekenai hebogahisi ita hahedinaraia.—Mataio 5:​44-​48.

Unai dainai bema ta oi itaia bero ia davaria, dahaka do oi karaia?— Bema unai tauna be tano ma ta amo, eiava ena kopina kala be oi amo ia idau, be edena bamona? Ia be emu badibadinai tauna, bona ia oi durua be namo. Bema oi laloa oi maragi dainai ia oi durua diba lasi, vadaeni tau badana ta oi nanadaia diba heduru ia henia totona. Eiava pulisi eiava tisa ta oi noia diba. Unai amo hebogahisi oi hahedinaraia, Samaria tauna ia karaia bamona.

Hadibaia Tauna Badana ia ura hebogahisi ita hahedinaraia. Ia ura ma haida do ita durudia, herevana idia be daika. Unai dainai hebogahisi ia hahedinaraia Samaria tauna ena sivarai ia gwauraia.