Heai be Maoro, A?

IDIA laloa ma haida idia hereaia bona edia goada be bada memero bona kekeni haida oi diba, a?— Oi ura idia oi bamoa, a? Eiava oi ura kara namo bona maino ia ura henia tauna oi bamoa?— Hadibaia Tauna Badana ia gwau: “Taunimanima huanai maino idia karaia taudia be idia namo, badina be Dirava ese do ia gwauraia idia be iena natuna.”​—Mataio 5:9.

To nega haida ma haida ese idia karaia karadia ese ita idia habadua. Unai be momokani, ani?— Unai dainai ita ura davana ita henia. Nega ta Iesu ena hahediba taudia be Iesu ida Ierusalema dekenai idia lao neganai, unai bamona ia vara. Lau ura oi dekenai unai sivarai lau gwauraia.

Nega sisina idia raka daudau murinai, Iesu ese Samaria hanua ta dekenai ena hahediba taudia haida ia siaidia guna laga-ani gabuna ta idia tahua totona. To unuseniai idia noho taudia idia ura lasi idia noho badina Samaria taudia edia tomadiho be idau. Bona tomadiho totona Ierusalema hanua dekenai idia lao taudia idia ura henidia lasi.

Bema oi dekenai unai ia vara, dahaka do oi karaia? Do oi badu, a? Do oi ura davana oi henia, a?— Hahediba taudia Iamesi bona Ioane idia ura unai bamona idia karaia. Iesu dekenai idia gwau: ‘Oi ura lahi guba dekena amo do ai gwauraia, do ia diho, idia ia hadikaia ore totona, a?’ Unai dainai Iesu ese idia ia gwauraia Guba Boiboi Natudia! To Iesu ese idia ia hamaoroa, namo lasi ma haida be unai bamona idia kara henidia.​—Luka 9:​51-​56; Mareko 3:​17.

Momokani, nega haida taunimanima ese ita do idia kara namo henia lasi. Reana natudia haida idia ura lasi idia ida ita gadara. Reana do idia gwau: “Ai ura lasi oi ai bamoa.” Unai bamona kara ta ia vara neganai, iseda hemami ia hadikaia diba, ani? Do ita ura gau ta ita karaia davana ita henia totona. To unai bamona ita karaia be namo, a?

Mani emu Baibel oi abia. Bona Aonega Herevadia karoa 24, siri 29 dekenai oi kehoa. Ia gwau: “Do oi hereva lasi inai bamona: ‘Ia ese lau dekenai ia karaia hegeregerena, be lau ese ia dekenai do lau karaia. Lau ese iena dika davana do lau henia.’ ”

Oi laloa unai hereva ena anina be dahaka?— Ia gwau davana ita henia toho lasi be namo. Namo lasi ma ta ese ita ia kara namo henia lasi dainai ia dekenai unai bamona ita karaia. To bema ta ia ura oi ia heai henia toho be edena bamona? Reana oi ia habadua totona hereva dikadia amo oi ia boiboi henia. Reana oi do ia kirikirilaia bona do ia gwau oi gari. Dahaka oi karaia be namo? Do oi heai henia be maoro, a?—

Baibel ena hereva mani ita itaia lou. Mataio karoa 5, siri 39 dekenai oi kehoa. Iesu ia gwau: “Umui dekenai dika ia karaia tauna ena dika davana umui henia lasi. Bema oiemu vairana idiba kahana be tau ta ese ia botaia [“pataia,” Buka Helağa] neganai, oiemu vairana lauri kahana danu oi henia ia botaia be ia namo.” Oi laloa Iesu ena hereva ena anina be dahaka? Anina be bema ta ese emu vairana kahana ta ia paisia, namona be kahana ma ta oi henia bena do ia paisia danu, a?—

Lasi, Iesu ena hereva ena anina be unai lasi. Ta oi pataia karana be ia oi paisia karana lasi. Ia be ta oi doria karana hegeregerena. Ta ese ita ia pataia diba heai ia hamatamaia totona. Ia ura ita ia habadua. Bona bema ita badu bona ia ita doria, dahaka do ia vara?— Reana heai do ita hamatamaia.

To Iesu ia ura lasi ena murinai idia raka taudia be heai lalonai idia vareai. Unai dainai ia gwau bema ta ese ita ia pataia, namo lasi ia ita pataia. Namo lasi ita badu bona heai lalonai ita vareai. Bema unai ia vara, ita hahedinaraia ita be heai ia hamatamaia tauna bamona.

Bema hekwakwanai ia matamaia, oi laloa dahaka oi karaia be namo?— Oi raka oho be namo. Reana oi ia ura heai henia tauna ese oi do ia doria nega sisina momo. To reana unai murinai unai kara do ia hadokoa. Oi raka oho neganai, unai be manoka karana lasi. Ena anina be oi ura bada kara maorona oi karaia.

To bema heatu ta lalonai oi vareai bona oi kwalimu be edena bamona? Gabeai dahaka do ia vara?— Oi botaia tauna be reana turana haida danu do ia giroa mai diba. Reana au badana eiava kaia amo oi idia haberoa diba. Unai dainai, hari oi itaia diba dahaka dainai Iesu ia ura lasi heai lalonai ita vareai, a?—

Bema ita itaia ma haida idia heai, dahaka ita karaia be namo? Idia heai taudia amo ta do ita durua bona ma ta do ita dadaraia, a?— Baibel ese kara maorona ia gwauraia. Aonega Herevadia karoa 26, siri 17 dekenai oi kehoa. Ia gwau: “Tau haida edia heai lalonai ia vareai noho tauna, be ia raka hanaia tauna ese, sisia ena taiana ia dogoatao noho bamona.”

Bema sisia ena taiana oi dogoatao, dahaka do ia vara? Unai kara ese sisia do ia hahisia bona oi do ia koria, ani? Bema sisia be ia hekwarahi bada ia heau totona, to ena taiana oi dogoatao auka, oi ese sisia ena hisihisi oi habadaia noho. Bema oi rakatania, reana oi do ia koria auka. To unuseniai oi gini bona ena taiana do oi dogoatao hanaihanai, a?—

Oibe, bema ma haida edia heai lalonai ita vareai, unai bamona hekwakwanai ita davaria diba. Reana heai ia hamatamaia tauna eiava edia heai ena badina ita diba lasi. Reana ta idia botaia, to reana gau ta ia henaoa ma ta amo. Bema ia ita durua, ita be henaohenao tauna ita durua noho. Unai be maoro lasi, ani?

Unai dainai, bema oi itaia ma haida idia heai, dahaka oi karaia be namo?— Bema ia be sikuli dekenai, oi heau bona tisa oi hadibaia diba. Bona bema ia be sikuli gabuna amo ia daudau, emu tama sina ta eiava pulisi oi hadibaia diba. Oibe, herevana ma haida idia ura heai neganai, maino ita hahedinaraia be namo.

Iesu ena hahediba taudia korikoridia be idia hekwarahi heai karana idia dadaraia totona. Unai dala amo ita hahedinaraia ita ura bada kara maorona ita karaia. Baibel ia gwau Iesu ena hahediba tauna be “do ia heai lasi, to taunimanima ibounai dekenai do ia bogahisihisi henia.”​—2 Timoteo 2:​24.