Hanaihanai Oi Ura Oi Guna, A?

HANAIHANAI ia ura ia guna tauna ta oi diba, a?— Reana laini vairanai ia gini tauna ta ia doria siri bona ena gabu ia abia. Unai oi itaia vadaeni, a?— Hadibaia Tauna Badana ese taunimanima badadia ia itaia danu idia ura idia guna eiava helai gabu namodia idia abia toho. Bona unai kara ia ura henia lasi. Ia vara gauna mani ita itaia.

Baibel ia gwau Farisea tauna ta, ia be ladana bada tomadiho gunalaia tauna, ena ruma dekenai idia karaia ariana ta dekenai Iesu idia boiria. Iesu ia ginidae murinai, vadivadi taudia ia itaia idia vareai bona helai gabu namodia idia abia. Unai dainai idia vadivadi taudia dekenai sivarai ta ia gwauraia. Oi ura oi kamonai, a?—

Iesu ia gwau: ‘Bema tau ta ese oi ia boiria headava aria ta dekenai, gabu namo herea momokani do oi abia hidi lasi.’ Iesu be unai bamona ia hereva ena badina oi diba, a?— Ia gwau reana ladana bada tauna ta idia boiria danu. Unai dainai, laulau dekenai oi itaia bamona, aria ia karaia tauna ia mai bona ia gwau: ‘Oi siri, inai helai gabuna be inai tau ena, bona unuseniai oi lao.’ Unai neganai vadivadi tauna ena hemami be edena bamona?— Do ia hemarai badina henunai gabuna dekenai ia lao helai neganai, vadivadi taudia ma haida ese idia itaia.

Unai amo Iesu ese ia hahedinaraia helai gabu namona abia karana be maoro lasi. Unai dainai ia gwau: ‘Bema oi idia boiria headava ariana ta dekenai, henunai gabuna dekenai do oi helai diho. Vadaeni oi ia boiria tauna do ia mai bona do ia gwau, “Egu turana e, oi be ataiai do oi daekau,” vadaeni idia helai diho taudia ibounai ese oi do idia hanamoa.’​—Luka 14:​1, 7-​11.

Iesu ia gwauraia sivarai ena anina oi lalo-pararalaia, a?— Haheitalai ta amo ita itaia bema unai sivarai oi lalo-pararalaia. Mani oi laloa, oi be taunimanima amo ia honu basi ta dekenai oi guia. Oi heau haraga helai gabuna ta oi abia totona, to buruka tauna ta be helai gabuna lasi dainai ia gini be namo, a?— Bema unai bamona oi karaia, oi laloa Iesu do ia moale, a?—

Reana ta ia gwau ita karaia karana be Iesu ese ia laloa lasi. To unai oi abia dae, a?— Iesu be Farisea tauna ena ruma dekenai idia karaia aria dekenai ia lao neganai, taunimanima ese edia helai gabudia idia abia hidi neganai ia itaia. Oi laloa ia be hari ita karaia karadia ia laloa, a?— Hari Iesu be guba dekenai ia noho dainai, ita ia itaia diba.

Bema ta ia ura ia guna, unai ese hekwakwanai ia havaraia diba. Nega momo hepapahuahu ia vara bona taunimanima idia badu. Nega haida natudia be basi dekenai idia loaloa hebou neganai unai ia vara. Basi ena iduara idia kehoa neganai, natudia be idia guna totona idia heau vareai haraga. Idia ura uindo badinai idia noho helai gabu namodia idia abia. Unai neganai dahaka ia vara?— Oibe, reana ta ta dekenai idia badu diba.

Sibodia idia atoa guna taudia ese hekwakwanai momo idia havaraia diba. Iesu ena aposetolo huanai hekwakwanai ia havaraia danu. Inai buka ena Karoa 6 dekenai ita itaia bamona, idia huanai daika ia bada idia hepapahuahulaia. Iesu be dahaka ia karaia?— Oibe, ia sisiba henidia. To gabeai idia huanai hepapahuahu ma ta ia vara. Ia hamatamaia dalana mani ita itaia.

Aposetolo taudia bona ma haida be Iesu ida, edia nega ginigabena Ierusalema hanuana dekenai idia lao. Iesu be idia dekenai ena Basileia ia herevalaia dainai, Iamesi bona Ioane idia ura ia ida idia lohia. Edia sinana, Salome dekenai unai idia gwauraia danu. (Mataio 27:56; Mareko 15:40) Unai dainai Ierusalema idia lao henia noho lalonai, Salome be Iesu dekenai ia lao, ia vairanai ia igo diho, bona gau ta ia noia.

Iesu ese ia nanadaia: “Dahaka oi ura?” Ia haere ia gwau ia ura ena natuna rua be Iesu ena Basileia lalonai ena badinai idia helai, ta ena idibana kahanai bona ma ta be ena laurina kahanai. Aposetolo taudia 10 be Iamesi bona Ioane edia ura gauna idia kamonai neganai, oi laloa edia hemami be edena bamona?—

Oibe, Iamesi bona Ioane dekenai idia badu. Unai dainai Iesu be ena aposetolo taudia ibounai dekenai sisiba namona ia henia. Ia gwau tanobada lohiadia idia ura siahu bona ladana bada idia abia. Idia ura dagi badana idia abia, unai amo taunimanima ibounai ese do idia kamonai henidia. To Iesu ese ena murinai idia raka taudia ia hamaorodia unai bamona idia karaia lasi be namo. Iesu ia gwau: “Bema ta ia ura be guna tauna, ia be umui emui hesiai tauna do umui halaoa.” Mani unai oi laloa!​—Mataio 20:​20-​28.

Hesiai tauna ena gaukara oi diba, a?— Ia ese ma haida ia hesiai henia, to ia laloa lasi ma haida ese ia do idia hesiai henia. Henunai gabuna ia abia, to gabu namo hereana ia abia lasi. Ladana maragi tauna bamona ia kara, to dagi bada tauna bamona lasi. Bona laloaboio lasi, Iesu ia gwau ia ura guna tauna ese ma haida ia hesiai henia be namo.

Oi laloa unai ena anina ita dekenai be dahaka?— Hesiai tauna be ena biaguna ida do ia hepapahuahu daika be helai gabu namo hereana do ia abia totona, a? Eiava daika do ia aniani guna do ia hepapahuahulaia, a? Dahaka oi laloa?— Iesu ia gwau hesiai tauna be hanaihanai ena biaguna ia laloa guna.​—Luka 17:​7-​10.

Unai dainai ita hekwarahi lasi ita guna totona, to dahaka ita karaia be namo?— Oibe, namona be ita be hesiai taudia bamona. Bona unai ena anina be ma haida ita atoa guna. Anina be ita laloa ma haida ese ita idia hereaia. Ma haida oi atoa guna daladia haida oi laloa diba, a?— Mani emu buka oi kehoa rau 40 bona 41 dekenai bona ma haida oi atoa guna daladia haida oi itaia.

Guna ita herevalaia bamona Hadibaia Tauna Badana be ma haida hesiai henia karana amo ia hahedinaraia idia ia atoa guna. Ena dina ginigabena ai, iena aposetolo taudia edia aena ia huria. Bema ma haida ita hesiai henia karana amo idia ita atoa guna, ita ese Hadibaia Tauna Badana bona ena Tamana, Iehova Dirava do ita hamoalea.