Ita Koikoi Lasi Ena Badina

BEMA kekeni ta ese ena sinana ia hamaoroa: “Oibe, sikuli ia ore murinai, maoromaoro ruma dekenai do lau giroa mai.” To ia noho bona ena turadia ida ia gadara bona gabeai ena sinana ia hamaoroa: “Egu tisa ena hereva dainai sikuli murinai lau noho.” Unai bamona ia hereva be maoro, a?—

Eiava reana mero ta ese ena tamana ia hamaoroa: “Lasi, ruma lalonai bolo lau kikia lasi.” To bema unai ia karaia be edena bamona? Ia gwau unai ia karaia lasi be maoro, a?—

Hadibaia Tauna Badana be ita dekenai kara maorona ia hahedinaraia. Ia gwau: ‘Oiemu hereva do oi gwauraia, ‘Oibe’ sibona, o ‘Lasi’ sibona. Badina gabeai oi gwauraia herevadia be Satani amo idia mai.’ (Mataio 5:37) Iesu ena hereva ena anina be dahaka?— Iena hereva ena anina be, namona be ita herevalaia gaudia be iseda kara amo ita hahedinaraia.

Baibel dekenai sivarai ta ia noho, unai sivarai ese ia hahedinaraia hereva momokani ita gwauraia be mai anina bada. Unai be taunimanima rua edia sivarai, idia gwau idia be Iesu ena hahediba taudia. Ia vara gauna mani ita itaia.

Iesu ia mase bena hua rua idia do ore lasi murinai, taunimanima momo be gabu daudau amo Ierusalema dekenai idia lao, Iuda taudia edia mai anina bada aria ladana Pentekoste totona. Aposetolo Petero be taunimanima dekenai Iehova ese mase amo ia hatorea isi lou tauna, Iesu ena sivarai namona ia gwauraia. Inai be Ierusalema dekenai idia mai taudia momo edia nega ginigunana Iesu idia dibaia totona. Idia ura diba ma haida idia abia. Unai dainai, dahaka idia karaia?

Unuseniai nega sisina daudau idia noho. To nega sisina murinai, haida edia moni ia ore bona aniani idia hoia totona heduru idia abia be namo. Ierusalema ai idia noho hahediba taudia idia ura unai vadivadi taudia idia durua. Unai dainai, momo ese edia kohu idia hoihoilaia bona moni be Iesu ena aposetolo taudia dekenai idia henia. Bena aposetolo taudia ese unai moni be idia dabu taudia dekenai idia henia.

Ierusalema ai ia noho Keristani kongrigeisen taudia Anania bona ena adavana, Sapira, ese edia tano idia hoihoilaia. Ta ese idia ia doria lasi. Unai be sibodia edia abia hidi. To Iesu ena hahediba taudia matamatadia idia lalokau henia dainai unai idia karaia lasi. Momokani, Anania bona Sapira idia ura taunimanima idia laloa edia kara be namo herea. Unai dainai idia gwau moni ibounai idia henia ma haida idia durua totona. To momokani moni ena kahana ta sibona do idia henia. Unai kara dekenai dahaka oi laloa?—

Anania be aposetolo taudia itaia totona ia mai. Idia dekenai moni ia henia. Oibe, Dirava ia diba ia ese moni ibounai ia henia lasi. Unai dainai, Dirava ese aposetolo Petero ia hadibaia Anania be hereva momokani ia gwauraia lasi.

Bena Petero ia gwau: ‘Anania e, dahaka dainai Satani ese oi ia veria unai bamona oi karaia totona? Unai tano be oiemu. Do oi hoihoilaia lasi. Bona danu unai tano oi hoihoilaia murinai, oi abia moni dekenai oi ura karaia gauna be oi sibona ese do oi abia hidi. To dahaka dainai oi gwau moni ibounai oi henia, to ena kahana be oi dogoatao? Oi karaia karana amo ai sibona oi koia lasi, to Dirava oi koia danu.’

Unai kara ese dika bada ia havaraia diba. Anania be ia koikoi! Ia gwau ia karaia gauna be ia karaia lasi. Baibel ese gabeai ia vara gauna ia gwauraia. Ia gwau: ‘Anania be Petero ena hereva ia kamonai neganai, ia moru diho, bona ia mase momokani.’ Dirava ese Anania ia hamasea! Gabeai, iena tauanina idia huaia lao bona idia guria.

Hora toi murinai, Sapira ia vareai. Iena adavana dekenai ia vara gauna ia diba lasi. Unai dainai Petero ese ia nanadaia: ‘Umui ruaosi ese tano umui hoia davana ibounai be ai dekenai umui henia inai, a?’

Sapira ia haere ia gwau: ‘Oibe, tano be inai davana sibona dekenai ai hoihoilaia.’ To ia koikoi! Tano ena moni kahana be sibodia totona idia dogoatao. Unai dainai Dirava ese Sapira ia hamasea danu.—Kara 5:​1-​11.

Anania bona Sapira dekenai ia vara gauna amo dahaka ita dibaia?— Ita ia hadibaia Dirava be koikoi taudia ia ura henia lasi. Ia ura nega ibounai hereva momokani ita gwauraia. To taunimanima momo idia gwau koikoi herevadia ita gwauraia be kerere lasi. Oi laloa unai taudia edia hereva be momokani, a?— Ita mamia gorere, hisihisi bona mase be koikoi herevana ta dainai idia vara. Unai oi diba, a?—

Laloaboio lasi, Diabolo ese hahine ginigunana, Heva ia koia. Ia gwau bema Dirava ia kamonai henia lasi bona Dirava ese ia taravatua huahuana ia ania do ia mase lasi. Heva ese Diabolo ena hereva ia abia dae bona unai huahua ia ania. Bena Adamu ena lalona ia veria unai huahua ia ania totona. Hari idia be kara dika taudia bona edia natudia ibounai be mai kara dika ida idia vara. Bona Adamu ena natudia ibounai be kara dika taudia dainai, hisihisi idia mamia bona idia mase. Unai hekwakwanai ibounai be edena bamona idia hamatamaia?— Koikoi hereva ta amo ia hamatamaia.

Unai dainai Iesu ia gwau Diabolo “be koikoi tauna, bona ia be koikoi ibounai edia tamana”! Ia be hereva koikoi ia gwauraia tauna ginigunana. Ta ia koikoi neganai, ia be Diabolo ese guna ia karaia karana ia karaia. Namona be unai ita laloa bema nega ta ita ura hereva koikoina ita gwauraia.—Ioane 8:​44.

Edena negai oi koikoi diba?— Kara kererena ta oi karaia neganai, a?— Ena be mai emu ura ida gau ta oi makohia lasi, to bema unai gauna dainai oi idia nanadaia, do oi gwau emu tadikaka eiava taihuna ese ia karaia, a? Eiava do oi gwau unai gauna ia vara dalana oi diba lasi, a?—

Bema oi idia hamaoroa emu sikuli gaukara oi karaia totona, to kahana ta sibona oi karaia be edena bamona? Do oi gwau ibounai oi haorea vadaeni, ena be kahana ta sibona oi karaia, a?— Namona be Anania bona Sapira ita laloa. Idia be hereva momokani idia gwauraia lasi. Bona Dirava ese idia ia hamasea karana amo ia hahedinaraia unai kara be dika momokani.

Unai dainai herevana dahaka ita karaia, bema ita koikoi unai ese hekwakwanai do ia habadaia sibona, bona hereva momokani ena kahana sibona ita gwauraia be namo lasi danu. Baibel ia gwau: “Hereva momokani do umui gwauraia.” Ma ia gwau: “Umui ta ta dekenai do umui koikoi lasi.” Iehova be hanaihanai hereva momokani ia gwauraia, bona ia ura unai bamona ita karaia danu.—Efeso 4:​25; Kolose 3:9.