“Oiemu Hadibaia Hereva ese Lau Idia Hamoalea Noho”

“Buka Helaga dekenai idia torea hereva be ita dekenai hadibaia totona idia torea.”​​—⁠ROMA 15:​4.

1. Iehova ese edena dala ai ita dekenai hadibaia herevadia ia gwauraia, bona dahaka dainai ita kamonai loulou be namo?

IEHOVA ese iena taunimanima dekenai hadibaia herevadia ia henia dainai, idia be inai nega dikana ena hekwakwanai idia haheaukalaia diba. Unai hadibaia herevadia be iseda Baibel duahiduahi amo, bona Keristani heboudia dekenai tadikaka edia tok bona haere amo ita abia. Unai negadiai, ita duahia eiava kamonai herevadia momo be hereva matamata lasi, idia be guna ita kamonaia vadaeni gaudia. To, nega momo ita laloaboio dainai, Iehova ena ura, taravatu bona hadibaia herevadia ita kamonai loulou be namo. Namona be Dirava ena hadibaia herevadia ita laloa bada. Idia ese ita idia hagoadaia, unai amo Iehova ita hesiai henia ena badina maorodia ita laloa noho totona. Unai hegeregerena, salamo torea tauna ese Iehova dekenai inai ane ia abia: “Oiemu hadibaia hereva ese lau idia hamoalea noho.”​—⁠Salamo 119:⁠24.

2, 3. (a) Dahaka dainai Iehova ese idaunegai idia noho taudia edia sivarai be Baibel lalonai ia torea bona hari ita duahia diba? (b) Baibel lalonai edena sivarai toi do ita herevalaia?

² Ena be Dirava ena Hereva be lagani momo gunanai idia torea, to ia be mai ena siahu bada. (Heberu 4:12) Taunimanima korikoridia edia sivarai ia gwauraia. Ena be Baibel ena nega ai idia noho taudia edia kastom bona lalohadai be idau, to hari ita davaria hekwakwanai be idia ese idia davaria danu. Baibel lalonai sivarai haida ese idia hahedinaraia, ena be haida be dika bada idia davaria to idia ese Iehova idia lalokau bona abidadama henia noho, edia sivarai ese ita idia durua bada. Sivarai haida be Dirava ese ia inai henia karadia idia karaia taudia edia sivarai. Iehova ese haheitalai namodia bona dikadia edia sivarai be Baibel lalonai ia torea, ita ia hadibaia totona. Aposetolo Paulo ia torea hegeregerena: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.”​—⁠Roma 15:⁠4.

³ Namona be Baibel ese ia gwauraia sivarai toi do ita herevalaia: Davida bona Saulo, Anania bona Sapira, bona Iosepa bona Potifara ena hahine edia sivarai. Unai sivarai toi amo mai anina bada gaudia haida do ita dibaia.

Dirava Ena Dala Ia Matauraia

4, 5. (a) Davida bona King Saulo huanai dahaka ia vara? (b) Saulo ena mama karana dainai, Davida be dahaka ia karaia?

⁴ King Saulo ena abidadama Iehova dekenai ia manoka dainai, ia hegeregere lasi Iehova ena taunimanima ia lohiaia totona. Unai dainai, Dirava ese ia dadaraia bona peroveta tauna Samuela ia hamaoroa, Davida do ia horoa Israela besena ia lohiaia totona. Davida ia hahedinaraia ia be tuari tauna namona bona taunimanima ese idia hanamoa neganai, Saulo be Davida ia mama henia matamaia. Nega momo Saulo ia ura Davida ia hamasea. To, Iehova ese Davida ia gimaia dainai, Saulo ese ia hamasea lasi.​—⁠1 Samuela 18:​6-12, 25; 19:​10, 11.

⁵ Lagani momo lalonai, Davida be Saulo amo ia komu loaloa. Dala ia noho Davida ese Saulo ia alaia totona neganai, iena tuari taudia ese Davida idia hamaoroa Iehova ese Saulo be iena imana lalonai ia atoa unai, bona namona be ia alaia mase. To, Davida ia ura lasi. Davida be Iehova ia matauraia bona Saulo ena dagi​—⁠Dirava ese ia horoa king dagina​—⁠ia matauraia dainai, ia ura lasi Saulo ia alaia. Iehova ese Saulo ia abia hidi Israela ena king ai ia lao totona, ani? Vadaeni, Iehova sibona ese ena nega korikorina ai Saulo do ia kokia. Davida ia laloa ia be maoro lasi unai ia karaia totona. Unai hekwakwanai ia vara lalonai, Davida be ia hekwarahi bada Saulo ena lalona ia hamanaua totona. Gabeai, Davida ia gwau: “Lau diba Lohiabada sibona ese Saulo do ia alaia, iena nega sibona dekenai, o tuari dekenai. Lohiabada ese egu dala ia koua, lau ese Lohiabada ia abia hidi king totona tauna lau hadikaia diba lasi momokani.”​—⁠1 Samuela 24:​3-15; 26:​7-20.

6. Dahaka dainai Davida bona Saulo edia sivarai be mai anina bada ita dekenai?

⁶ Unai sivarai ese mai anina bada gauna ta ia hadibaia ita dekenai. Nega haida hekwakwanai idia vara neganai, oi daradara bona oi laloa, dahaka dainai unai hekwakwanai be Keristani kongrigeisen lalonai idia vara? Reana kongrigeisen lalonai ta ena kara be ia maoro lasi. Ena be kara dika badana ia karaia lasi, to ena kara dainai oi lalohekwarahi. Dahaka do oi karaia? Unai Keristani tadikaka oi laloa bona Iehova oi matauraia dainai, oi ura maino havaraia totona, manau dalanai unai tadikaka oi hereva henia iena kara ia hamaoromaoroa totona. To, edena bamona bema iena kara ia haidaua lasi? Oi karaia diba gaudia ibounai oi karaia murinai, namona be unai hekwakwanai be Iehova ena imana dekenai oi atoa. Davida be unai bamona ia karaia.

7. Ma haida ese ita idia dagedage henia neganai, edena dala ai Davida ita tohotohoa diba?

⁷ Eiava, oiemu noho bona tomadiho dalana be idau dainai, haida ese oi idia dagedage henia. Reana, hari unai hekwakwanai oi hamaoromaoroa totona gau ta oi karaia diba lasi. Oi haheauka totona be auka, to Saulo ese Davida ia kara gageva henia neganai, Davida ia karaia karana ese ita ia durua bada. Davida ese ia torea salamo siridia ese idia hahedinaraia, ia be Iehova ia guriguri henia Saulo ena imana amo do ia hamauria sibona lasi, to idia hahedinaraia Davida be Iehova ia matauraia bona Dirava ena ladana hanamoa karana ia laloa bada. (Salamo 18:​1-6, 25-27, 30-32, 48-50; 57:​1-11) Davida ese Iehova ia badinaia noho, ena be Saulo be lagani momo lalonai Davida ia kara dika henia. Ita danu, herevana dahaka hekwakwanai ita davaria eiava haida be dahaka idia karaia ita dekenai, namona be Iehova bona iena orea ita badinaia noho. Namona be ita laloaboio lasi, Iehova be iseda hekwakwanai ia diba.​—⁠Salamo 86:⁠2.

8. Mozambique tadikaka be Iehova badinaia karana dekenai hahetoho idia davaria neganai, dahaka idia karaia?

⁸ Mozambique tadikaka be vanegai dagedage idia davaria neganai, Iehova idia badinaia goadagoada. Lagani 1984 ai, dagedage oreana ta ese hanaihanai hanua taudia edia kohu idia henaoa, edia ruma idia gabua bona taunimanima idia alaia mase. Toana be Keristani taudia momokanidia be dala lasi sibodia idia gimaia totona. Unai dagedage taudia ese hanua taudia ibounai idia doria edia orea lalonai idia vareai, eiava ena gaukara haida idia durua totona. Iehova ena Witnes taudia idia diba unai be edia Keristani gini siri karana danu ia hegeregere lasi. Idia vareai lasi dainai, unai dagedage taudia idia badu bada herea. Unai dika lalonai, Witnes taudia 30 bamona idia alaia mase, to mase ese Dirava ena taunimanima edia gini goada karana ia hadikaia lasi.a Davida hegeregerena, unai kara gageva idia haheaukalaia bona dokonai idia kwalimu.

Hadibaia Herevana Ta

9, 10. (a) Edena dala ai Baibel lalonai, Anania bona Sapira edia sivarai ese ita idia durua diba? (b) Edena dala ai Anania bona Sapira edia kara be kerere?

⁹ Baibel ese ia gwauraia taudia haida edia kara ese ita idia durua, edena kara do ita dadaraia be namo. Oibe, Baibel ese kara dika idia karaia bona davana dikana idia davaria taudia momo edia sivarai ia gwauraia. Unai taudia haida be Dirava ena hesiai taudia. (1 Korinto 10:11) Unai bamona sivarai ta be Anania bona Sapira edia sivarai.

¹⁰ Pentekoste 33 C.E. murinai, kamonai matamata taudia haida idia ura Ierusalema dekenai idia noho, aposetolo taudia idia bamoa totona. To, aniani dekenai idia dabu dainai tadikaka haida ese edia kohu idia hoihoilaia idia durua totona. (Kara 2:​41-45) Anania bona Sapira ese tano ta idia hoihoilaia bona moni kahana sibona be aposetolo taudia dekenai idia henia, to idia gwau unai be tano ena davana ibounai. Momokani, Anania bona Sapira be mai edia maoro moni badana o maragina idia henia totona, to lalohadai kererena idia abia bona kara koikoi idia karaia. Idia ura aposetolo bona kongrigeisen taudia vairanai idia heagi bona toana be idia ese moni ibounai idia henia. To, aposetolo Petero be lauma helaga ena siahu amo edia koikoi karana ia hahedinaraia bona Iehova ese idia ia hamasea.​—⁠Kara 5:​1-10.

11, 12. (a) Koikoi lasi karana dekenai, Baibel ena sisiba haida be dahaka? (b) Ita koikoi lasi dainai, dahaka hahenamo ita davaria?

¹¹ Bema ita koikoi badina ita ura haida ese ita idia lalonamo henia, namona be Anania bona Sapira edia sivarai ita laloatao. Ita ese taunimanima ita koia diba, to Iehova ita koia diba lasi. (Heberu 4:13) Baibel be hanaihanai ita ia sisiba henia ta ta dekenai kara maoromaoro ita hahedinaraia totona, badina kara dika ibounai be lasi tanobadana ai, koikoi taudia do idia noho lasi. (Aonega Herevadia 14:2; Apokalupo 21:8; 22:15) Unai ia vara badina be koikoi karadia ibounai edia tamana be Satani Diabolo.​—⁠Ioane 8:⁠44.

¹² Iseda mauri lalonai koikoi karadia ita dadaraia neganai, hahenamo momo do ita davaria. Iseda lalomamina do ia goeva bona ma haida ese ita do idia abidadama henia. Nega momo, Keristani taudia be kara momokani idia hahedinaraia dainai, moni gaukara idia abia, eiava edia moni gaukara idia haboioa lasi. To, mai anina bada gauna be kara momokani ita hahedinaraia dainai, ita be Siahu Ibounai Diravana ena turana ai ita lao.​—⁠Salamo 15:​1, 2.

Matabodaga Karadia Dadaraia

13. Iosepa be dahaka hekwakwanai ia davaria bona dahaka ia karaia?

¹³ Iosepa, Iakobo ena natuna mero ena mauri lagani be 17 neganai, igui hesiai tauna bamona idia hoihoilaia. Gabeai, Iosepa be Aigupito tauna, Potifara ena ruma dekenai ia gaukara, bena unuseniai Potifara ena hahine ese ia hegahusi henia. Iosepa be hairai mero matamatana dainai, Potifara ena adavana ia ura ia sihari henia bona dina ta ta ai ena lalona ia veria, ia gwau: “Oi mai, gabu tamona dekenai ita mahuta.” Unai tano dekenai Iosepa ia diba tauna ta ia noho lasi bona iena ruma bese taudia be gabu daudau ai idia noho. Unai dainai, bema ia be unai hahine ida ia heudahanai, ta do ia diba lasi. To, Potifara ena hahine ese Iosepa ia rosia neganai, Iosepa be ia heau oho.​—⁠Genese 37:​2, 18-28; 39:​1-12.

14, 15. (a) Dahaka dainai Iosepa ena sivarai be mai anina ita dekenai? (b) Dahaka dainai Keristani hahine ta ese Dirava ena hadibaia herevadia ia badinaia dainai ia moale?

¹⁴ Iosepa be Keristani ruma bese lalonai ia bada, unai dainai ia diba headava lasi taudia idia sihari kava be kerere. Ia gwau: “Dirava ena vairana dekenai inai bamona do lau kara dika be edena bamona?” Unai henanadai amo ia hahedinaraia ia be Dirava ena taravatu​—⁠adavana tamona adavaia taravatuna unai​—⁠ia diba. (Genese 2:24) Hari inai negai, Dirava ena taunimanima be Iosepa ena kara amo heduru idia abia diba. Gabu haida dekenai, taunimanima be matabodaga karadia ena taravatu idia laloa maragi, unai dainai, unai kara idia dadaraia matamata taudia be edia turadia ese idia kirikirilaidia. Headava taudia momo be heudahanai karadia idia karaia. Unai dainai, hari inai negai, Iosepa ena sivarai be mai anina bada gauna ia hadibaia. Dirava ena taravatu be inai: heudahanai bona sihari kava be kara dikadia. (Heberu 13:⁠4) Matabodaga karadia dekenai idia moru taudia momo idia gwau, badina momo dainai unai kara ita dadaraia be gau badana. Matabodaga karadia amo idia davaria dika haida be inai: lalomamina ia dika, hemarai, mama, rogorogo kava, bona gorere dikadia. Baibel ese ita ia hadibaia hegeregerena, “heudahanai karadia ia karaia tauna ese sibona ena tauanina ia hadikaia noho.”​—⁠1 Korinto 5:​9-12; 6:18; Aonega Herevadia 6:​23-29, 32.

¹⁵ Jennyb be Iehova ena Witnes kekeni ta, bona badina namona dainai, Iehova ena hadibaia hereva ia lalodia bada. Gaukara gabuna dekenai, hairai merona ta ese Jenny dekenai kara namodia ia hahedinaraia. Ena be Jenny ese unai mero ena kara namodia ia haloua lasi, to unai mero ese unai kara namodia ia karaia loulou. Jenny ia gwau: “Kara maoromaoro lau karaia totona be auka, badina bema mero ta ese kekeni ta ia ura henia, unai ese kekeni ena lalona ia veria diba.” To, Jenny ia laloparara, unai mero be hahine momo ia sihari henidia bona ia be Jenny ia koia sibona. Jenny ia mamia ena haheauka karana ia manoka ia lao neganai, Iehova ena heduru ia noia ia gini goada noho totona. Jenny ia gwau, Baibel bona Keristani bukadia ia stadilaia karana amo ia abia dibana ese ia idia durua ia gini goada totona. Unai heduru herevana ta be Iosepa bona Potifara ena hahine edia sivarai. Jenny ia gwau: “Nega ibounai lau laloatao lau be Iehova lau lalokau henia bada, unai neganai lau diba matabodaga karana ta do lau karaia lasi bona Iehova do lau kara dika henia lasi.”

Dirava Ena Hadibaia Hereva Badinaia!

16. Edena dala ai Baibel ese ia gwauraia taudia edia sivarai ita laloa dobu karana amo namo ita davaria diba?

¹⁶ Baibel lalonai idia torea sivarai haida edia badina ita lalopararalaia neganai, Iehova ena kara maoromaoro taravatudia do ita moalelaia. Dirava ena Hereva lalonai taunimanima handred momo edia sivarai idia noho. Ita dekenai dahaka idia hadibaia? Oi ura daika ena kara oi tohotohoa, bona daika ena kara oi dadaraia? Dirava ena hadibaia dalana idia laloa bada taudia ibounai ese aonega idia tahua be namo, bona Baibel ena sivarai idauidau amo idia dibaia gaudia idia laloa bada danu be namo. Nega momo inai magasin ese taunimanima korikoridia edia sivarai ia halasia, idia amo gau momo ita dibaia diba. Namona be nega ita atoa unai sivarai ita duahia totona.

17. Emu hemami be edena bamona Iehova ena hadibaia herevadia dekenai, bona dahaka dainai unai bamona oi hereva?

¹⁷ Ita moale bada, badina Iehova ena ura karaia totona idia hekwarahi taudia be Ia ese ia lalokau henidia bada! Baibel lalonai edia sivarai idia hedinarai taudia be goevadae lasi taudia, ita bamona. To, edia sivarai ese ita idia durua bada. Bema, Dirava ena hadibaia herevadia ita badinaia, kerere badadia do ita dadaraia, bona kara maoromaoro ena dala dekenai idia raka taudia edia haheitalai namodia ita tohotohoa diba. Bema unai bamona ita karaia, salamo torea tauna hegeregerena ane do ita abia diba, ia gwau: “Dirava ena hadibaia hereva idia kamonai henia momokani taudia, bona mai edia kudouna ibounai Lohiabada idia tahua taudia, be do idia moale noho. Oiemu hadibaia hereva lau kamonai henia noho, badina mai egu kudouna ibounai idia lau lalokau henia bada noho.”​—⁠Salamo 119:​2, 167.

[Footnotes]

Edena Bamona Do Oi Haere?

• Davida ese Saulo ia kara henia dalana amo, dahaka ita dibaia?

• Anania bona Sapira edia sivarai ese ita dekenai dahaka ia hadibaia?

• Dahaka dainai Iosepa ena sivarai be mai anina bada hari inai nega ai?

[Picture on page 10]

Dahaka dainai Davida ia ura lasi Saulo idia alaia?

[Picture on page 11]

Anania bona Sapira edia sivarai amo dahaka ita dibaia?

[Picture on page 12]

Dahaka ese Iosepa ia durua Potifara ena hahine ena hegahusi karadia ia dadaraia totona?