Taunimanima Idia Gorere Ena Badina

IA GORERE tauna ta oi diba, a?— Reana nega haida oi gorere. Reana udu kurukuru oi abia, eiava emu bogana ia hisihisi. Ma haida be idia gorere bada. Idia gini totona ta ese ia durudia be namo. Taunimanima be idia buruka momokani neganai, unai ia vara.

Taunimanima ibounai be nega ta ta ai idia gorere. Taunimanima idia gorere, buruka bona mase ena badina oi diba, a?— Dina ta ia raka diba lasi tauna ta be Iesu dekenai idia mailaia, bona Iesu ese taunimanima idia gorere bona mase ena badina ia hahedinaraia. Mani oi dekenai unai sivarai lau gwauraia.

Iesu be Galilea Gohuna kahirakahira ia noho hanua ta ena ruma ta dekenai ia noho. Taunimanima momo herea idia mai ia idia itaia totona. Unai dainai, haida be ruma lalonai idia vareai diba lasi. Ta be iduara kahirakahira ia lao diba lasi danu. To, taunimanima momo idia mai noho! Taunimanima haida ese ia raka diba lasi tauna ta idia mailaia. Tatau 4 ese mahuta patana ta latanai unai tauna idia huaia.

Unai gorere tauna be Iesu dekenai idia mailaia ena badina oi diba, a?— Idia diba momokani Iesu ese unai tauna do ia durua bona ena gorere do ia hanamoa. Oi diba edena dala ai unai raka diba lasi tauna be Iesu dekenai idia laohaia, ena be unai ruma be taunimanima amo ia honu?—

Unai idia karaia dalana be inai laulau ese ia hahedinaraia. Idia karaia kara ginigunana be, unai tauna be unai ruma ena guhi dekenai idia abia daekau. Bena, guhi dekenai matu badana ta idia karaia. Dokonai, unai gorere tauna mai ena mahuta patana danu be unai matu dekena amo idia hadihoa. Idia be mai edia abidadama goadana!

Ruma lalonai idia noho taudia ese ia raka diba lasi tauna mai ena mahuta patana ida idia itaia neganai, idia hoa bada. Unai tatau ese idia karaia karana dainai Iesu ia badu, a?— Lasi! Ia moale badina ia itaia idia be mai edia abidadama. Ia raka diba lasi tauna dekenai ia gwau: “Oiemu kara dika be lau gwauatao vadaeni.”

Taunimanima ma haida idia laloa Iesu be unai bamona ia hereva be maoro lasi. Idia laloa ia ese kara dika ia gwauatao diba lasi. Unai lalohadai hamaoromaoroa totona, Iesu be unai tauna dekenai ia gwau: “Oi toreisi, oiemu geda oi abia isi, bona oi lao ruma dekenai.”

Iesu be unai bamona ia hereva neganai, unai tauna ena gorere ia namo! Ia raka diba. Unai hoa karana idia itaia taudia idia hoa bada. Edia mauri ibounai lalonai unai bamona hoa karana ta idia itaia lasi! Iehova idia hanamoa badina Hadibaia Tauna Badana, taunimanima edia gorere ia hanamoa diba tauna be idia dekenai ia henia dainai.—Mareko 2:​1-​12.

Unai hoa karana amo dahaka ita dibaia?— Ita dibaia gauna be inai, Iesu be mai ena siahu kara dika ia gwauatao bona gorere taudia ia hanamoa totona. To mai anina bada gauna ma ta ita dibaia danu. Ita dibaia gauna be, kara dika dainai taunimanima idia gorere.

Nega ta ta ai ita ibounai ita gorere dainai, anina be ita ibounai be kara dika taudia, a?— Oibe, Baibel ia gwau ita ibounai be mai kara dika ida ita vara. Kara dika ida ita vara ena anina oi diba, a?— Anina be ita vara neganai ita be goevadae lasi. Nega haida kerere ita karaia, ena be ita ura lasi. Ita ibounai ese kara dika ita abia dalana oi diba, a?—

Mai kara dika ida ita vara ena badina be tau ginigunana Adamu ese Dirava ia kamonai henia lasi. Dirava ena taravatu ia makohia neganai, ia kara dika. Bona ita ibounai be Adamu amo kara dika ita abia. Ia amo kara dika ita abia dalana oi diba, a? Oi lalo-pararalaia diba dalanai mani lau gwauraia.

Reana ta oi durua tini ta dekenai beredi umui gabua totona. Bema tini dekenai maka ta ia noho, beredi dekenai dahaka do ia vara? Oi diba, a?— Unai tini dekenai oi karaia beredi ibounai dekenai unai maka tamona do ia hedinarai, ani?—

Adamu be unai tini bamona, bona ita be unai beredi bamona. Dirava ena taravatu ia makohia neganai, goevadae lasi maurina ia abia. Inai be hegeregere ia be maka dikana ta ia abia. Unai dainai natudia ia havaraia neganai, idia be edena bamona?— Iena natudia ibounai ese goevadae lasi maurina idia abia danu.

Natudia momo be idia vara neganai edia tauanina be ia namo. Idia be mai edia aena eiava imana. To goevadae lasi maurina idia abia dainai idia gorere bona gabeai idia mase.

Oibe, ma haida be nega momo idia gorere. Dahaka dainai? Badina be mai kara dika momo ida idia vara, a?— Lasi, ibounai idia vara neganai edia kara dika ena bada be hegeregere. Ita ibounai be ita vara negana amo ita goevadae lasi. Unai dainai, gabeai ita ibounai ita gorere diba. Dirava ena taravatu ibounai idia badinaia bona kara dika badana ta idia karaia lasi taudia idia gorere diba danu.

To, dahaka dainai haida be idia gorere momo?— Ena badina be momo. Reana idia dekenai aniani be bada lasi. Eiava aniani maorona idia ania lasi. Reana keke bona loli momo idia ania. Badina ma ta be reana hanuaboi ai idia mahuta haraga lasi. Eiava medu neganai keru dabua namona idia karaia lasi. Ena be taunimanima haida ese edia tauanina idia naria namonamo, to edia tauanina ia goada lasi dainai, gorere ia tuari henia diba lasi.

Oi laloa nega ta do ia mai, bena unai neganai do ita gorere lasi, a? Kara dika amo do ita goeva, a?— Iesu be unai raka diba lasi tauna totona dahaka ia karaia?— Iesu ese ena dika ia gwauatao bona ia hanamoa. Unai dala amo, Iesu ese ia hahedinaraia nega ta, ia ese idia hekwarahi kara namo idia karaia taudia ibounai totona unai bamona do ia karaia.

Bema ita hahedinaraia ita ura lasi kara dika ita karaia bona ita inai henia, Iesu ese ita do ia hanamoa. Nega vairai, hari ita abia goevadae lasi maurina do ia haorea. Dirava ena Basileia dekenai King ai ia lao neganai unai do ia karaia. Ita ibounai iseda kara dika be nega tamona ai do ia haorea lasi. To metairametaira unai do ia karaia. Bena iseda kara dika ibounai ia kokia haorea murinai, do ita gorere lou lasi. Ita ibounai ese gorere lasi mauri goevadaena do ita abia. Unai be hahenamo namo hereana!