Iesu ese Ita Ia Gimaia Diba

IESU ia bada bona Iehova ese ia gimaia dalana ia dibaia neganai, oi laloa Iehova dekenai ia guriguri bona ia tanikiu henia, a?— Dahaka oi laloa, Iesu ia kamonai Maria bona Iosepa ese Aigupito dekenai ia idia abia lao karana amo idia hamauria neganai, idia dekenai dahaka ia gwau?—

Oibe, hari Iesu be beibi lasi. Guna bamona ia be tanobada dekenai ia noho lasi. To hari taunimanima haida idia laloa Iesu be boromakau edia aniani mauana lalonai ia hekure noho beibi ta sibona.— Unai be momokani, Krismas negadiai gabu momo dekenai Iesu ia beibi negana ena laulau idia hahedinaraia.

Ena be Iesu be hari tanobada dekenai ia noho lasi, to oi abia dae ia mauri noho, a?— Oibe, ia be mase amo ia toreisi lou bona hari ia be guba dekenai ia noho siahu bada King. Oi laloa ia idia hesiai henia taudia gimaia totona dahaka ia karaia diba?— Hegeregere, Iesu be tanobada dekenai ia noho neganai, ia idia lalokau henia taudia ia gimaia dalana ia hahedinaraia. Dina ta ia be ena hahediba taudia danu bouti ta dekenai idia lao neganai, unai ia karaia dalana mani ita itaia.

Ia be adorahi momokani bona Iesu be dina ibounai Galilea Gohuna dekenai ia hadibaia, unai gohu badana ena lata be kilomita 20 bona ena lababa be kilomita 12 bamona. Vadaeni ena hahediba taudia ia hamaorodia: “Gohu unai kahana dekenai do ita hanaia.” Unai dainai bouti idia guia bona idia lao. Iesu be ia hesiku bada, unai dainai bouti ena murina kahana dekenai ia lao bona pilo ta latanai ia hekure. Daudau lasi ia mahuta boio.

Hahediba taudia be idia mahuta lasi to bouti idia haheaua. Nega sisina lalonai idia heau namonamo, to gabeai lai bada herea ia toa. Ia toa badabada bona hurehure idia bada idia lao. Hurehure be bouti lalonai ia vareai matamaia bona bouti be ranu amo ia honu.

Hahediba taudia idia gari bada herea idia laloa do idia mutu. To Iesu ia gari lasi. Ia be bouti ena murina kahana dekenai ia do mahuta noho. Gabeai, hahediba taudia ese ia idia hanogaia bona idia gwau: ‘Hadibaia Tauna e, Hadibaia Tauna e, ai oi hamauria; inai lai gubana lalonai do ai mase inai.’ Vadaeni, Iesu ia toreisi bona lai bona hurehure ia hereva henia. Ia gwau: “Umui doko, umui maino noho.”

Maoromaoro lai bona hurehure idia doko. Hahediba taudia be idia hoa bada. Guna unai bamona kara ta idia itaia lasi. Idia sibona ta ta idia hereva henia, idia gwau: “Inai tau be daika? Ia ese lai bona hurehure dekenai ia hereva henia, vadaeni iena hereva idia kamonai!”​—Luka 8:​22-​25; Mareko 4:​35-​41.

Oi diba Iesu be daika, a?— Oi diba ena siahu bada be edeseni amo ia abia, a?— Iesu be ena hahediba taudia danu ia noho neganai, idia gari lasi be namo, badina ia be idia bamona lasi. Taunimanima idia karaia diba lasi gau namodia ia karaia diba. Nega ma ta ai, lai guba badana ia vara neganai ia karaia karana ta mani lau gwauraia.

Dina ta ai, adorahi kahanai, Iesu ese ena hahediba taudia ia hamaorodia bouti ta dekenai do idia guia bona davara ena kahana ma ta dekenai do idia hanaia lao guna. Bena Iesu sibona be ororo dekenai ia daekau lao. Unai gabu ai regerege be lasi, unuseniai ena Tamana Iehova Dirava ia guriguri henia diba.

Hahediba taudia be bouti idia guia bona davara idia hanaia noho lalonai, lai ia toa matamaia. Ia toa badabada. Gabu be ia dibura vadaeni. Bouti ena palai idia kokia bona idia bara matamaia. To idia hekwarahi bada badina lai bada herea be edia vairana kahana amo ia mai. Bouti be hurehure badadia ese idia doria lao doria mai bona ranu be bouti lalonai ia vareai. Idia hekwarahi bada kone dekenai idia lao totona, to idia hegeregere lasi.

Iesu be sibona ororo dekenai ia do noho. Nega daudau unuseniai ia noho. To hari ia itaia diba ena hahediba taudia be unai hurehure badadia lalonai dika do idia davaria. Unai dainai ororo amo ia diho bona kone dekenai ia lao. Iesu ia ura ena hahediba taudia ia durua, unai dainai hurehure bona lai gubana lalonai idia dekenai ia raka lao matamaia!

Bema ranu latanai oi raka toho, dahaka do ia vara?— Ranu lalonai do oi diho bona reana do oi maloa. To Iesu be idau. Iena siahu be bada herea. Iesu be bouti ia lao henia totona nega daudau ia raka. Unai dainai kahirakahira daba ia rere neganai, hahediba taudia ese Iesu idia itaia ranu latanai ia raka mai. To idia itaia gauna idia abia dae lasi. Idia gari bada herea dainai idia boiboi. Bena Iesu be idia dekenai ia hereva: “Umui goada abia, inai be lau, umui gari lasi.”

Iesu be bouti dekenai ia guia neganai, lai gubana ia doko. Unai negai danu, hahediba taudia idia hoa bada herea. Iesu vairanai idia goru diho bona idia gwau: “Momokani, oi be Dirava ena Natuna.”​—Mataio 14:​22-​33; Ioane 6:​16-21.

Bema unai neganai ita noho bona Iesu ia karaia hoa karadia ita itaia, do ita moale bada herea, ani?— Iesu ese unai hoa karadia ia karaia ena badina oi diba, a?— Unai gaudia ia karaia badina ena hahediba taudia ia lalokau henia bona ia ura durudia. To unai gaudia ia karaia karana amo ia hahedinaraia ena siahu be bada bona vaira negai Dirava ena Basileia ena Lohia Tauna ai ia lao neganai, unai siahu do ia gaukaralaia danu.

Hari Satani ia hekwarahi Iesu ena murinai idia raka taudia ia koua bena Dirava ena Basileia be ma haida dekenai do idia herevalaia lasi, to Iesu ese ena siahu ia gaukaralaia idia ia gimaia totona. To Iesu be ena siahu ia gaukaralaia lasi ena hahediba taudia ia gimaia bena do idia gorere lasi eiava idia gorere neganai, ia hanamodia totona. Ena aposetolo taudia ibounai be gabeai idia mase danu. Ioane ena kakana Iamesi idia hamasea bona Ioane be dibura ruma dekenai idia atoa.​—Kara 12:2; Apokalupo 1:9.

Hari danu be unai bamona. Herevana taunimanima ese Iehova idia hesiai henia eiava lasi, to idia ibounai idia gorere bona mase diba. To kahirakahira, Iesu be Dirava ena Basileia ena King ai ia lao neganai, gau ibounai do idia idau. Tau ta be do ia gari lasi, badina Iesu ese ena siahu do ia gaukaralaia ia idia kamonai henia taudia ia hanamoa totona.​—Isaia 9:​6, 7.