Iesu be Ranu Latanai Ia Raka

Iesu ese gorere taudia ia hanamoa bona mase taudia ia hatorea isi lou sibona lasi, to lai bona medu ia biagua danu. Iesu be ororo ai ia guriguri murinai, ia itaia Galilea Gohuna ai lai gubana ia toa. Iena aposetolo taudia be bouti lalonai, bona lai ia toa dainai idia hekwarahi idia kaloa totona. Iesu be ororo amo ia diho mai bona ranu latanai idia dekenai ia raka lao. Aposetolo taudia idia itaia ta be ranu latanai ia raka noho neganai, idia gari matamaia. To Iesu ese ia hamaoroa: ‘Inai be lau. Umui gari lasi.’

Petero ia gwau: ‘Lohiabada e, bema inai be oi, mani lau oi hamaoroa oi dekenai lau mai totona.’ Iesu ia gwau: ‘Oi mai.’ Lai gubana ia toa noho lalonai, Petero be bouti amo ia diho bona ranu latanai Iesu dekenai ia raka lao. To Petero ia lao kahirakahira neganai, lai gubana ia itaia bona ia gari matamaia. Bona ia mamia ia mutu noho. Ia boiboi: ‘Lohiabada e, lau oi hamauria!’ Iesu ese ena imana ia dogoatao, bona ia gwau: ‘Dahaka dainai oi daradara? Emu abidadama be edeseni?’

Iesu bona Petero be bouti lalonai idia guia, bona maoromaoro lai gubana ia doko. Aposetolo taudia edia hemami mani oi laloa. Idia gwau: “Momokani, oi be Dirava ena Natuna.”

Iesu ese unai nega sibona ai weda ia biagua lasi. Nega ma ta ai, Iesu bona ena aposetolo taudia be Galilea Gohuna ena kahana ma ta ai idia lao neganai, Iesu be bouti lalonai ia mahuta. Unai nega ai lai gubana ia toa matamaia. Hurehure ese bouti ia botaia, bona bouti be ranu amo ia honu. Aposetolo taudia ese Iesu idia hanogaia bona idia boiboi: ‘Hadibaia Tauna e, ita be kahirakahira do ita mase! Ai oi hamauria!’ Iesu ia toreisi bona gohu dekenai ia gwau: “Regerege lasi!” Maoromaoro lai ia doko bona gohu ia manada lou. Iesu ese aposetolo taudia ia nanadaia: ‘Emui abidadama be edeseni?’ Ta ta dekenai idia gwau: “Lai bona gohu ese ia idia kamonai henia danu.” Aposetolo taudia idia laloparara bema Iesu idia trast henia momokani, gau ta dainai do idia gari lasi.