Mase amo Ita Noga Diba!

BEMA ita mase, Dirava do ia ura ita ia hamauria lou, a?— Kara namo tauna Iobu ia diba momokani Dirava ia ura. Unai dainai Iobu ia laloa ia mase gwauraia neganai, Dirava dekenai ia gwau: “Oi ese lau dekenai do oi boiboi, vadaeni oi dekenai do lau haere.” Iobu ia gwau Iehova Dirava do ia ura dikadika ia do ia hamauria lou.​—Iobu 14:​14, 15; NW.

Iesu be ena Tamana, Iehova Dirava hegeregerena. Iesu ia ura ita ia durua. Lepera tauna ta be ia dekenai ia gwau, “bema oi ura, mani oi hanamoa lau,” unai neganai Iesu ia haere: “Lau ura.” Bona unai lepera tauna ena gorere ia hanamoa.​—Mareko 1:​40-​42.

Iesu be ena Tamana amo natudia lalokau henia karana ia dibaia. Idaunegai, Iehova ese nega rua ai ena hesiai taudia ia gaukaralaia natudia maragidia idia hamauria lou totona. Elia ese Iehova ia noia ia dekenai kara namo ia hahedinaraia hahinena ta ena natuna ia hatorea isi lou totona. Bona Iehova ese ia karaia. Iehova ese ena hesiai tauna Elisaia ia gaukaralaia mero maragina ta ia hatorea isi lou totona.​—1 King Taudia 17:​17-​24; 2 King Taudia 4:​32-​37.

Ita diba Iehova ese ita ia lalokau henia bada dainai ita moale, ani?— Ita mauri negana sibona lalonai ita ia laloa lasi. Ita mase neganai ita do ia laloatao danu. Iesu ia gwau ena Tamana ese ia lalokau henia mase taudia be hegeregere idia mauri noho! (Luka 20:38) Baibel ia gwau, ‘mase o mauri, o harihari idia noho gaudia, o gabeai do idia vara gaudia, ta ese Dirava ena lalokau dekena amo ita do ia kokia diba lasi.’​—Roma 8:​38, 39.

Iesu be tanobada dekenai ia noho neganai, ia hahedinaraia Iehova ese natudia maragidia ia laloa bada. Do oi laloatao Iesu be nega ia atoa natudia dekenai Dirava ia herevalaia totona. To Dirava ese Iesu dekenai siahu ia henia natudia maragidia be mase amo ia hatorea isi lou totona, unai oi diba, a?— Iesu ese Iairo ena mauri lagani 12 kekenina ia hatorea isi lou negana mani ita herevalaia.

Iairo be ena adavana bona ena natuna kekeni tamona ida Galilea Gohuna kahirakahira idia noho. Dina ta unai kekeni maragina ia gorere bada bona Iairo ia diba do ia mase. Iairo be Iesu ia laloa matamaia, ia kamonai Iesu ese taunimanima ia hanamoa diba. Unai dainai Iairo ia lao Iesu ia tahua totona. Iairo ese Iesu ia davaria Galilea Gohuna ena kone dekenai taunimanima hutuma ia hadibaia.

Iairo be taunimanima edia huana dekenai ia raka lao bona Iesu ena aena badinai ia goru diho. Iesu dekenai ia gwau: ‘Egu natuna kekeni maragi be ia gorere bada. Mani oi mai bona ia oi durua. Oi lau noia mani oi mai.’ Maoromaoro Iesu be Iairo ida ia lao. Hadibaia Tauna Badana itaia totona idia mai hutuma danu ese ia idia bamoa. To idia raka sisina daudau murinai, tatau haida be Iairo ena ruma amo idia mai bona ia idia hamaoroa: “Oiemu natuna ia mase vadaeni. Badina dahaka hadibaia tauna dekenai oi noinoi noho?”

Iesu be unai tatau edia hereva ia kamonai. Ia diba Iairo ia lalohisihisi bada ena natuna tamona ia haboioa dainai. Unai dainai ia hamaoroa: ‘Oi gari lasi. Dirava oi abidadama henia sibona, bona oiemu natuna do ia namo.’ Idia raka lao ela bona Iairo ena ruma dekenai idia ginidae. Unuseniai ruma bese taudia edia turadia haida idia taitai noho. Idia lalohisihisi badina edia turana maragina ia mase. To Iesu ese ia hamaorodia: ‘Umui taitai lasi. Kekeni maragi be ia mase lasi, to ia mahuta noho.’

Iesu be unai bamona ia hereva neganai, taunimanima idia kiri matamaia, badina idia diba kekeni maragi ia mase momokani. Vadaeni, dahaka dainai oi laloa Iesu ia gwau kekeni be ia mahuta noho?— Oi laloa ia ura taunimanima dekenai dahaka ia hadibaia?— Ia ura idia diba mase be mahuta boio karana bamona. Ia ura idia ia hadibaia Dirava ena siahu amo, ia ese mase tauna ia hatorea isi lou diba, tau ta be mahuta amo ita hanogaia diba hegeregerena.

Iesu ese iboudiai ia hamaorodia ruma murimurinai do idia lao, to iena aposetolo taudia Petero, Iamesi, Ioane bona kekeni ena tamana bona sinana sibona be ruma lalonai idia noho. Bena kekeni ia hekure daiutuna lalonai ia vareai. Kekeni ena imana ia abia isi bona ia gwau: ‘Kekeni maragi e, oi toreisi.’ Bona maoromaoro ia toreisi bona ia raka matamaia! Ena tamana bona sinana idia moale bada herea.​—Mareko 5:​21-​24, 35-​43; Luka 8:​40-​42, 49-​56.

Mani unai oi laloa. Iesu ese unai kekeni maragina ia hamauria lou diba dainai, ma haida dekenai unai bamona ia karaia diba, a?— Oi laloa do ia karaia momokani, a?— Oibe, do ia karaia. Iesu ia gwau: “Nega ta do ia mai, mase guria gabu dekenai idia noho taudia ibounai ese [lauegu] gadona do idia kamonai. Vadaeni guria gabu dekena amo do idia toreisi.”​—Ioane 5:​28, 29.

Oi laloa Iesu ia ura taunimanima ia hatorea isi lou, a?— Baibel lalonai ia noho haheitalai ma ta ese unai henanadai ia haerelaia. Naina hanua kahirakahira ai ia vara gauna ese Iesu ena hemami mase dainai idia lalohisihisi taudia dekenai ia hahedinaraia.

Hahine ta be hutuma ida Naina hanuana idia rakatania ena natuna guria totona idia lao. Guna ena adavana ia mase bona hari ena natuna tamona sibona ia mase. Ia lalohisihisi bada herea! Ena natuna mero ena tauanina be hanua murimurinai idia huaia lao neganai, taunimanima momo idia lao danu. Hahine be ia taitai, bona taunimanima be gau ta idia karaia diba lasi ia idia hagoadaia totona.

Unai dina dekenai, Iesu bona ena hahediba taudia be Naina hanua idia lao henia noho. Hanua ena geiti kahirakahira, hahine ena natuna guria totona idia lao hutuma idia hedavari henia. Iesu be ia taitai noho hahinena ia itaia neganai, ia hebogahisi henia. Iena lalohisihisi bada ese Iesu ena kudouna ia hamarerea. Ia ura ia durua.

Unai dainai mai ena hebogahisi bona hahine ia kamonai totona mai goada ida ia gwau: “Oi tai lasi.” Iena hereva bona kara dainai taunimanima be mai edia ura bada ida ia idia itaia. Iesu be mase tauanina dekenai ia lao neganai, reana ibounai be do ia karaia gauna idia laloa. Iesu ia gwau: “Uhau tauna e, lau hereva henia oi dekenai, oi toreisi.” Maoromaoro ia helai tore! Bona ia hereva matamaia.​—Luka 7:​11-​17.

Unai hahine ena hemami mani oi laloa! Emu lalokau tauna ta be mase amo ia toreisi lou bona ia oi itaia neganai, emu hemami be edena bamona?— Unai ese ia hahedinaraia Iesu be momokani taunimanima ia lalokau henia bona ia ura idia ia durua, ani?— Mani oi laloa, idia mase vadaeni taudia be Dirava ena tanobada matamatana lalonai ita hedavari henia lou, be moale gauna momokani!​—2 Petero 3:​13; Apokalupo 21:​3, 4.

Unai negai do idia toreisi lou taudia be guna ita diba taudia, natudia danu. Mase amo idia toreisi lou neganai, idia do ita diba, Iairo be ena kekeni ia diba bamona, Iesu ese ia hatorea isi lou neganai. Idia haida be lagani handred eiava tausen momo idia mase taudia. Ena be idaunegai idia noho, to Dirava ese idia do ia laloaboio lasi.

Ita diba Iehova Dirava bona ena Natuna Iesu ese ita idia lalokau henia bada dainai ita moale, ani?— Idia ura ita mauri, lagani haida sibona lalonai lasi, to hanaihanai!