KAROA 47

Kekeni Matamata Ia Mauri Lou!

MATAIO 9:18, 23-26 MAREKO 5:22-24, 35-43 LUKA 8:40-42, 49-56

IESU ESE IAIRO ENA NATUNA IA HATOREA ISI LOU

Iairo ia itaia rara halusia gorere ia abia hahinena be Iesu ese ia hanamoa. Ia diba momokani Iesu ese ena natuna ia durua diba, herevana ia laloa ‘ena natuna kekeni be reana ia mase vadaeni.’ (Mataio 9:18) Iesu ese ena natuna ia durua diba, a?

Iesu be ia hanamoa hahinena ida ia do hereva noho lalonai, tatau haida be Iairo ena ruma amo idia mai bona ia idia hamaoroa: “Emu natuna kekeni ia mase vadaeni!” Ma idia gwau: “Hadibaia Tauna oi hahekwarahia lasi.”—Mareko 5:35.

Unai be lalohisihisi sivaraina! Unai tauna, momo ese idia matauraia bada tauna, be hari ia daradoko momokani. Iena natuna tamona sibona be ia mase vadaeni. To Iesu ese unai ia kamonai, bena Iairo dekenai ia giroa bona ia hagoadaia, ia gwau: “Oi gari lasi, oi abidadama sibona.”—Mareko 5:36.

Iairo ena natuna ena mase tauanina badinai idia taitai

Bena Iesu be Iairo ida ena ruma dekenai ia lao. Idia ginidae neganai, regerege bada idia kamonai. Unuseniai idia haboua taudia be idia taitai bona mai lalohisihisi ida edia kemena idia botaia. Iesu be ruma lalonai ia vareai bona idia ia hamaoroa: “Kekeni be ia mase lasi, to ia mahuta noho.” (Mareko 5:39) Taunimanima be unai idia kamonai neganai, Iesu idia kirikirilaia. Idia diba kekeni be ia mase. To, Iesu be Dirava ese ia henia siahu amo do ia hahedinaraia mase taudia be mase amo idia toreisi lou diba, ia mahuta tauna be mahuta amo ia noga hegeregerena.

Vadaeni Iesu ese ibounai be murimuri dekenai ia siaia, to Petero, Iamesi, Ioane, bona mase kekeni ena tama sina sibona idia noho. Iesu bona unai taudia 5 be kekeni ia hekure gabuna dekenai idia lao. Bena kekeni ena imana ia dogoatao, bona ia gwau: “‘Talita kumi,’ ena anina be: ‘Kekeni maragina e, oi lau hamaoroa, “Oi toreisi!”’” (Mareko 5:41) Maoromaoro ia toreisi bona ia raka. Iairo bona ena adavana be unai idia itaia neganai, idia moale bada! Iesu ia ura hamomokania kekeni be ia mauri dainai, ia hamaorodia kekeni dekenai aniani do idia henia.

Guna Iesu ese ia hanamoa taudia ia hamaoroa ia karaia gauna be ma haida dekenai do idia herevalaia lasi, bona hari kekeni ena tama sina dekenai unai ia gwauraia danu. To unai sivarai be “unai gabu ibounai dekenai” idia gwauraia. (Mataio 9:26) Bema oi itaia emu lalokau tauna ta be mase amo ia toreisi lou, mai moale ida ma haida dekenai unai do oi gwauraia, ani? Unai be Iesu ese ia karaia toreisi lou karana iharuana.