Iesu Ita Lalokau Henia Ena Badina

MANI oi laloa oi be ia mutu noho bouti ta lalonai oi noho. Do oi ura ta ese oi ia hamauria, a?— Bema tau ta ese ena mauri ia henia unai ia karaia totona be edena bamona?— Iesu Keriso be unai ia karaia. Karoa 37 dekenai ita dibaia bamona, iena mauri be mauri davana bamona ia henia ita ia hamauria totona.

Oibe, Iesu ese maloa karana amo ita ia hamauria lasi. To dahaka amo ita ia hamauria? Oi laloatao, a?— Adamu amo ita abia kara dika bona mase amo ita ia hamauria. Ena be taunimanima haida ese kara dika momokani idia karaia, to Iesu be idia dainai ia mase danu. Oiemu mauri do oi henia unai bamona taudia hamauria totona, a?—

Baibel ia gwau: “Kara maoromaoro tauna dainai, be daika ese do ia mase? Sedira ta lasi. Sedira tau ta ese tau namona ta dainai do ia mase diba.” To Baibel ia gwau Iesu be “dika taudia totona” ia mase. Dirava idia hesiai henia lasi taudia danu! Baibel ma ia gwau: “Ita be do kara dika noho taudia neganai, Keriso be ita dainai ia mase.”​—Roma 5:​6-8.

Kara dika momokani ia karaia aposetolo tauna ta oi laloa diba, a?— Unai aposetolo tauna ia gwau: “Keriso Iesu be tanobada dekenai ia mai, be kara dika taudia hamauria totona. Bona kara dika tau dikana momokani be lau inai.” Unai ia gwauraia aposetolo tauna be Paulo. Ia gwau guna ia be “mai kavakava” bona kara dika ia karaia.​—1 Timoteo 1:​15; Tito 3:3.

Mani oi laloa, Dirava be ena Natuna ia siaia unai bamona taudia dainai ia mase totona, unai ese ena lalokau bada herea ia hahedinaraia! Mani emu Baibel oi abia bona Ioane karoa 3, siri 16 ita duahia. Ia gwau: “Dirava ese inai tanobada [anina be, tanobada ai idia noho taudia] ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”

Iesu ia hahedinaraia iena Tamana ese ita ia lalokau henia hegeregerena ita ia lalokau henia. Reana oi laloatao inai buka ena Karoa 30 ai, Iesu idia dogoatao hanuaboina ai idia vara gaudia haida ita dibaia. Ia be Hahelaga Tauna Badana Kaiapa ena ruma dekenai idia laohaia, unuseni idia kota henia. Samania koikoi taudia idia abidia vareai bona hereva koikoi idia gwauraia, bona taunimanima ese edia imana amo Iesu idia paisia. Unai neganai Petero ese Iesu ia gorea. Mani ita laloa ita be unuseniai ita noho bona idia vara gaudia ma haida ita itaia diba.

Daba ia rere. Iesu be ia mahuta lasi. Hanuaboi dekenai dala maorona ai idia kota henia lasi dainai, hahelaga taudia ese Sanhedrin, eiava Iuda taudia edia kota badana taudia idia boiria haraga bona kota ma ta idia karaia. Iesu idia samania koikoi lou, idia gwau Dirava ena taravatu ia utua.

Gabeai hahelaga taudia ese Iesu idia kwatua bona Roma ena gavana Pilato dekenai idia siaia. Pilato idia hamaoroa: ‘Iesu ese gavamani ia gwauraia dika. Ita alaia be namo.’ To Pilato ia diba hahelaga taudia idia koikoi. Unai dainai Pilato ese idia ia hamaoroa: ‘Inai tauna dekenai kerere ta lau davaria lasi. Ia do lau ruhaia.’ To hahelaga taudia bona ma haida idia boiboi: ‘Lasi! Ia oi alaia!’

Gabeai, Pilato ese taunimanima ia hamaoroa lou Iesu do ia ruhaia. To hahelaga taudia ese hutuma idia hamaoroa do idia boiboi: ‘Bema ia oi ruhaia, oi be gavamani oi gwauraia dika danu! Ia oi alaia!’ Hutuma ese regerege bada idia karaia matamaia. Pilato ia karaia karana oi diba, a?—

Edia hereva ia abia dae. Matamanai gwaumaoro ia henia Iesu do idia kwadia. Bena tuari taudia dekenai ia henia idia hamasea totona. Ginigini amo idia karaia korona be Iesu ena kwarana dekenai idia atoa bona ia idia hevaseha henia totona ena vairanai idia tui diho. Bena Iesu dekenai au badana ta idia henia do ia huaia bona hanua murimurinai ia noho gabu ta ladana Kwara Koukouna Gabuna dekenai ia idia hakaua lao. Unuseniai Iesu ena aena bona imana be unai au dekenai idia kokoa. Bena Iesu idia taua dae. Iena kopina amo rara ia diho. Ia mamia hisihisina be bada herea.

Iesu be maoromaoro ia mase lasi. To au dekenai ia noho sibona. Hahelaga taudia badadia ese ia idia hevasehalaia. Bona idia raka hanai taudia idia gwau: “Oi be Dirava ena Natuna oi gwau, satauro dekena amo mani oi diho mai!” To Iesu be iena Tamana ese ia siaia do ia karaia gauna ia diba. Ia diba iena mauri goevadaena ia henia be namo, unai amo mauri hanaihanai do ita abia diba. Dokonai, unai adorahi 3 o’klok bamona, Iesu be ena Tamana ia boiboi henia bona ia mase.​—Mataio 26:36–​27:50; Mareko 15:1; Luka 22:39–​23:46; Ioane 18:1–​19:30.

Iesu be Adamu amo ia idau momokani! Adamu be Dirava dekenai lalokau ia hahedinaraia lasi. Dirava ia kamonai henia lasi. Danu Adamu be ita dekenai lalokau ia hahedinaraia lasi. Ia kara dika dainai, ita ibounai be mai kara dika ida ita vara. To Iesu be Dirava bona ita totona lalokau ia hahedinaraia. Hanaihanai Dirava ia kamonai henia. Bona ena mauri ia henia unai amo Adamu ese ita dekenai ia havaraia dika ia kokia diba.

Iesu ese ia karaia kara namo hereana oi laloa bada, a?— Dirava oi guriguri henia neganai, ita dekenai iena Natuna ia henia dainai ia oi tanikiu henia, a?— Aposetolo Paulo be Keriso ese ia dainai ia karaia karana ia laloa bada. Paulo ia gwau Dirava ena Natuna ese “lau ia lalokau henia, bona lau dainai iena mauri ia atoa diho.” (Galatia 2:​20) Iesu be oi bona lau dainai ia mase danu. Iena mauri goevadaena ia henia, unai amo mauri hanaihanai ita abia diba! Oibe, unai badina badana dainai Iesu ita lalokau henia be namo.

Aposetolo Paulo be Korinto dekenai idia noho Keristani taudia ia tore henia, ia gwau: “Keriso ena lalokau ese ai ia biagua noho.” Keriso ena lalokau ese edena bamona ita ia biagua diba? Dahaka oi laloa?— Mani Paulo ena haere ita itaia, ia gwau: “Keriso ese taunimanima ibounai dainai ia mase. . . . Unai dainai . . . ita sibona iseda mauri bona iseda ura do ita laloa lasi, to ita dainai ia mase . . . tauna, ena mauri bona iena ura gaudia do ita laloa bona karaia.”—2 Korinto 5:​14, 15.

Dala haida oi laloa diba, unai amo oi hahedinaraia Keriso hamoalea dalanai oi noho, a?— Dala ta be Iesu ena sivarai be ma haida dekenai oi gwauraia. Eiava inai oi laloa: Reana oi be sibona oi noho, unai dainai oiemu tamana o sinana eiava ma haida be oi karaia gaudia idia itaia diba lasi. Keriso idia hamoalea lasi televisen program eiava Internet ai idia hahedinaraia gaudia do oi itaia, a?— Laloatao, Iesu be hari ia mauri noho bona ita karaia gaudia ibounai ia itaia diba!

Iesu ita lalokau henia ena badina ma ta be ita ura Iehova ita tohotohoa. Iesu ia gwau: “Tamana ese lau ia lalokau henia.” Iesu ia lalokau henia ena badina bona ita danu ese ia ita lalokau henia be namo ena badina oi diba, a?— Badina Iesu be mai ena ura ida ia mase, unai amo Dirava ena ura ia guguru diba. (Ioane 10:17) Unai dainai namona be Baibel ese ia gwauraia gauna ita karaia: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo. Lalokau ena dala dekenai do umui mauri noho, Keriso ese ita ia lalokau henia bamona, bona ia sibona ena mauri ia atoa diho ita dainai.”​—Efeso 5:​1, 2.