Dirava Ena Basileia Ena Anina Bona Ita Ura Henia Dalana

IESU be iena murinai idia raka taudia dekenai ia hadibaia gurigurina oi diba, a?— Bema oi diba lasi, Baibel amo Mataio 6:​9-​13 ita duahia hebou diba. Momo ese unai guriguri idia gwauraia Lohiabada Ena Guriguri, ia lalonai inai hereva idia noho: “Oiemu Basileia do ia mai.” Dirava ena Basileia oi diba, a?—

Basileia be gavamani ta. Gavamani ma haida idia noho bona idia haida idia gunalaia taudia idia gwauraia presiden. To Dirava ia gwauhamatalaia gavamanina idia gwauraia Basileia bona ena lohia tauna idia gwauraia King.

Oi laloa Iehova Dirava ese daika ia abia hidi Ena gavamani ena King ai ia lao totona?— Iena Natuna, Iesu Keriso. Dahaka dainai Iesu be taunimanima ese idia abia hidi lohia taudia ia hereaia?— Badina Iesu ese iena Tamana, Iehova ia lalokau henia momokani. Unai dainai hanaihanai ia kara maoromaoro.

Iesu be Betelehema dekenai ia do vara lasi neganai, Baibel ese ena vara ia gwauraia bona ia gwau ia be Dirava ia abia hidi Lohia Tauna ai do ia lao. Isaia 9:​6, 7, King James Version dekenai ia gwau: “Badina be ita totona natuna ta ia vara, ita dekenai natuna mero ta ia henia: bona gavamani be iena pagana dekenai do ia noho: bona iena ladana do idia gwauraia . . . Maino ena Lohia. Iena gavamani be do ia bada daekau bona maino be do ia doko lasi.”

Iesu be Dirava ena Basileia ena Lohia Tauna. Danu, ia be King Badana, Iehova ena Natuna. To Iehova ese Iesu be Iena gavamani, tanobada be lagani 1000 lalonai do ia lohiaia gauna, ena King ai ia halaoa danu. (Apokalupo 20:6) Iesu ia bapatiso murinai “ia haroro hamatamaia, ia gwau, ‘Emui lalona umui giroa, badina Guba Basileia be kahirakahira ia mai vadaeni.’ ”​—Mataio 4:​17.

Oi laloa dahaka dainai Iesu ia gwau Basileia be ia mai kahirakahira vadaeni?— Badina King, gabeai guba dekenai do ia lohia tauna, be idia huanai ia noho! Unai dainai Iesu ese taunimanima ia hamaoroa: “Dirava ena Basileia be umui bogaraginai ia noho.” (Luka 17:​21, NW ) Oi ura Iehova ena King be oi kahirakahira ia noho unai amo oi daua toho diba, a?—

Iesu be tanobada dekenai ia mai dahaka mai anina bada gaukarana ia karaia totona?— Iesu ese unai henanadai ia haerelaia, ia gwau: “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.” (Luka 4:​43) Iesu ia diba ia sibona ese unai haroro gaukara ibounai ia karaia diba lasi. Unai dainai, oi laloa dahaka ia karaia?—

Iesu be taunimanima haida ia abia lao bona idia dekenai haroro dalana ia hadibaia. Ia hadibaia taudia ginigunadia be ia abia hidi iena aposetolo taudia 12 ai idia lao totona. (Mataio 10:​5, 7) To Iesu be iena aposetolo taudia sibona ia hadibaia unai gaukara idia karaia totona, a? Lasi, Baibel ia gwau Iesu ese ma haida dekenai haroro gaukara ia hadibaia danu. Gabeai ena hahediba taudia 70 be rua rua amo ia siaia lao. Bona taunimanima dekenai dahaka idia hadibaia?— Iesu ia gwau: “Do umui hadibaia idia dekenai, do umui gwau, ‘Dirava ena Basileia be umui dekenai kahirakahira ia ginidae.’ ” (Luka 10:9) Unai dala amo taunimanima ese Dirava ena gavamani idia dibaia.

Idaunegai Israela dekenai, king matamatadia be taunimanima ese idia itaia totona, doniki ta dekenai idia guia bona hanua lalonai idia vareai. Iesu ena nega ginigabena Ierusalema ia vadivadi henia neganai, unai bamona ia karaia. Unai ese ia hahedinaraia Iesu be Dirava ena Basileia ena Lohia Tauna ai do ia lao. Taunimanima idia ura ia be edia King ai ia lao, a?—

Iesu be doniki latanai ia lao neganai, hutuma be ia vairanai edia dabua be dala dekenai idia atoa. Ma haida ese au ena rigina idia utua bona dala dekenai idia atoa. Unai amo idia hahedinaraia idia ura Iesu be edia King ai ia lao. Idia boiboi: “Lohiabada ena ladana dekenai ia mai King ita hanamoa inai!” To taunimanima ibounai idia moale lasi. Oibe, tomadiho gunalaia taudia haida be Iesu dekenai idia gwau, ‘Emu hahediba taudia oi hamaoroa do idia hereva lasi.’​—Luka 19:​28-​40.

Dina 5 murinai Iesu idia dogoatao bona King ena ruma dekenai idia laohaia, unuseniai gavana Pontio Pilato ena vairanai ia gini. Iesu ena inai taudia idia gwau Iesu be sibona ia gwau ia be king ta bona unai dala amo Roma gavamanina ia dadaraia. Unai hereva dainai Pilato ese Iesu ia nanadaia. Iesu be Pilato dekenai ia hahedinaraia ia ura lasi gavamani ena siahu ia abia. Pilato ia hamaoroa: “Lauegu Basileia be inai tanobada gauna lasi.”​—Ioane 18:36.

Bena Pilato ia raka-lasi bona taunimanima ia hamaoroa Iesu dekenai kerere ta ia davaria lasi. To hari taunimanima idia ura lasi Iesu be edia King ai ia lao. Idia ura lasi Pilato ese ia do ia ruhaia. (Ioane 18:​37-​40) Pilato be Iesu ida ia hereva lou murinai, ia diba momokani Iesu be kerere ta ia karaia lasi. Unai dainai Pilato ese Iesu ma ia hakaua raka-lasi, ia gwau: “Umui itaia, umui emui King be inai.” To taunimanima idia boiboi: “Oi abia siri! Oi abia siri! Oi hasatauroa!”

Pilato ia henanadai: “Umui emui King do lau hasatauroa, a?” Hahelaga taudia badadia idia haere: “Ai be mai emai king ta lasi, Kaisara sibona.” Madi, unai be dika momokani! Unai kara dika hahelaga taudia ese taunimanima edia lalona idia veria Iesu idia dadaraia totona!​—Ioane 19:​1-​16.

Hari inai nega be Iesu ena nega hegeregerena. Taunimanima momo idia ura lasi Iesu be edia King ai idia halaoa. Reana idia gwau Dirava idia abidadama henia, to idia ura lasi Dirava eiava Keriso ese idia ia hamaoroa dahaka do idia karaia. Edia tanobada gavamanidia idia ura henia.

Ita be edena bamona? Dirava ena Basileia bona do ia karaia gau namodia ita dibaia neganai, iseda lalohadai Dirava dekenai be edena bamona?— Ia ita lalokau henia, ani?— Edena dala ai Dirava dekenai ita hahedinaraia diba ia ita lalokau henia bona ita ura ena Basileia ese ita ia lohiaia?—

Iesu ena haheitalai badinaia karana amo iseda hemami Dirava dekenai ita hahedinaraia diba. Bona Iesu be ena lalokau Iehova dekenai ia hahedinaraia totona, dahaka ia karaia?— Iesu ia gwau: “Iena ura be nega ibounai lau karaia.” (Ioane 8:​29) Oibe, Iesu be tanobada dekenai ia mai ‘Dirava ena ura ia karaia’ bona ‘iena gaukara ia karaia haorea momokani totona.’ (Heberu 10:7; Ioane 4:​34) Iesu be iena haroro gaukara ia do hamatamaia lasi neganai, ia karaia gauna mani oi laloa.

Iesu be Ioridane Sinavaina ai Ioane Bapatiso dekenai ia lao. Ioane ese Iesu be ranu henunai ia hadihoa bona ia abia isi lou. Ioane ese Iesu ia bapatisoa ena badina oi diba, a?—

Iesu ese Ioane ia noia unai ia karaia totona. To edena bamona ita diba Dirava ia ura Iesu be bapatiso ia abia?— Unai ita diba badina Iesu be ranu amo ia daekau neganai, Dirava ena gadona be guba amo ia kamonai, ia gwau: “Oi be lauegu Natuna. Lau lalokau henia oi. Lau moale bada oi dekenai.” Dirava ese ena lauma helaga be pune manu bamona Iesu dekenai ia siaia diho. Unai dainai Iesu ia bapatiso neganai, ia hahedinaraia ia ura ena mauri ibounai lalonai Iehova ia hesiai henia.​—Mareko 1:​9-​11.

Oi be oi do maragi. To gabeai dahaka do oi karaia?— Iesu bamona bapatiso do oi abia, a?— Namona be ia oi tohotohoa, badina Baibel ia gwau “iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Petero 2:​21) Bapatiso oi abia neganai, oi hahedinaraia oi ura momokani Dirava ena Basileia henunai oi noho. To bapatiso sibona be hegeregere lasi.

Namona be Iesu ia hadibaia gaudia ibounai ita kamonai henia. Iesu ia gwau namona be ita be “tanobada ena lasi.” Bema tanobada gaudia ita karaia, ita be ia ita kamonai henia noho, a? Iesu bona ena aposetolo taudia ese unai gaudia idia dadaraia. (Ioane 17:14) To dahaka idia karaia?— Ma haida dekenai Dirava ena Basileia idia herevalaia. Edia mauri dekenai unai be gaukara badana. Unai ita karaia diba danu, a?— Oibe, do ita karaia diba bema mai momokani ida Dirava ena Basileia ia mai totona ita guriguri.