Dirava ese Ena Natuna Ia Laloatao

IESU ena turana Lasaro ia mase neganai ia tai. Iesu be hisihisi ia ania bona ia mase neganai, oi laloa Iehova ia lalohisihisi, a?— Baibel ia gwau idia vara gaudia ese Dirava ena lalona idia ‘hahisia’ bona “habadua” diba.​—Salamo 78:​40, 41; Ioane 11:35.

Iehova ese ena lalokau Natuna ena mase ia itaia neganai, ia mamia hisihisina oi laloa diba, a?— Iesu ia diba Dirava ese ia do ia laloaboio lasi. Unai dainai ia mase gwauraia neganai, ia gwauraia hereva dokona be inai: “Egu Tamana e, egu [mauri] be oiemu imana dekenai lau atoa inai.”​—Luka 23:46.

Iesu ia diba do ia toreisi lou, ia diba Dirava ese “mase taudia edia gabu” dekenai ia do ia rakatania lasi. Iesu ia toreisi lou murinai, aposetolo Paulo be Iesu totona Baibel lalonai ia noho herevana ia torea lou, ia gwau: “Dirava ese do ia rakatania lasi mase taudia edia gabu dekenai, bona iena tauanina ese bodaga do ia abia lasi.” (Kara 2:​31; Salamo 16:10) Lasi, Iesu ena tauanina be guria gabuna dekenai nega daudau ia noho lasi dainai, ia bodaga lasi.

Iesu be tanobada dekenai ia noho neganai, iena hahediba taudia ia hamaoroa nega daudau lalonai do ia mase lasi. Idia dekenai ia gwauraia hedinarai ia “do idia alaia mase. To dina toi murinai ma do ia toreisi lou.” (Luka 9:​22) Unai dainai, Iesu ia toreisi lou neganai, hahediba taudia idia hoa lasi be namo. To idia hoa, a?— Mani ita itaia.

Friday 3 o’klok adorahi ai, Hadibaia Tauna Badana be au ta dekenai ia mase. Sanhedrin ena kohu momo tauna ta, Iosepa, be hehuni dalanai Iesu ia abidadama henia danu. Iesu ena mase sivaraina ia kamonai neganai, Roma ena gavana Pilato dekenai ia lao. Ia nanadaia bema Iesu ena tauanina be au amo ia abia diho diba ia guria totona. Gabeai, Iosepa ese Iesu ena tauanina be uma ta dekenai ia abia lao bona unuseniai ia noho guria gabu dekenai ia atoa.

Ena tauanina be guria gabuna dekenai idia atoa murinai, nadi badana ta amo guria gabuna idia koua. Hari be Sunday, dina ihatoina. Dina be ia do daekau lasi dainai, gabu be ia dibura. Tuari taudia ese guria gabuna idia gimaia. Hahelaga taudia badadia ese idia siaia unai bamona idia karaia totona. Ena badina oi diba, a?—

Hahelaga taudia danu idia kamonai Iesu ia gwau do ia toreisi lou. Unai dainai gima taudia idia siaia gabu idia naria totona, badina idia laloa Iesu ena hahediba taudia ese ena mase tauanina do idia henaoa bena do idia gwau ia toreisi lou vadaeni. Daudau lasi, tano ia mareremarere matamaia. Dibura dekenai diari ta ia hedinarai. Ia be Iehova ena aneru ta! Tuari taudia idia gari bada dainai idia marere lasi. Aneru be guria gabuna dekenai ia lao bona nadi ia kokia. Guria gabuna lalonai tauanina ia noho lasi!

Oibe, unai be aposetolo Petero ese gabeai ia gwauraia hereva bamona: “Inai Iesu be Dirava ese ia hatorea isi vadaeni.” (Kara 2:​32) Dirava ese Iesu ia hatorea isi lou bona guna guba ai ia noho neganai ia abia tauanina ia henia lou. Ia be lauma tauanina dekenai ia toreisi lou, aneru edia bamona. (1 Petero 3:​18) Unai dainai bema taunimanima idia ura Iesu idia itaia, taunimanima edia tauanina ia atoa be namo. Unai bamona ia karaia, a?— Mani ita itaia.

Hari dina ia daekau noho. Tuari taudia be idia lao vadaeni. Maria Magadala bona hahine ma haida, idia be Iesu ena hahediba taudia, be guria gabuna dekenai idia lao noho. Idia sibona dekenai idia hereva noho: ‘Ita totona daika ese inai nadi metauna do ia kokia?’ (Mareko 16:3) To guria gabuna dekenai idia ginidae neganai, nadi be ta ese ia kokia vadaeni. Bona guria gabuna dekenai Iesu ena mase tauanina ia noho lasi! Maoromaoro, Maria Magadala ia heau lao Iesu ena aposetolo taudia ma haida ia davaria totona.

Hahine ma haida be guria gabuna dekenai idia noho. Idia laloa: ‘Iesu ena tauanina be edeseni idia abia lao?’ Vadaeni, tatau rua mai edia dabua diaridiari idia hedinarai. Idia be aneru! Hahine dekenai idia gwau: ‘Dahaka dainai iniseniai Iesu umui tahua? Ia be ia toreisi lou vadaeni. Umui lao haraga bona iena hahediba taudia umui hamaoroa.’ Unai hahine be idia heau lao haraga! Dala huanai tau ta idia hedavari henia. Unai tauna oi diba, a?—

Unai tauna be Iesu, taunimanima edia tauanina ai ia hedinarai! Hahine dekenai ia gwau: ‘Umui lao, lauegu hahediba taudia do umui hamaoroa.’ Hahine be idia moale bada. Hahediba taudia idia davaria neganai idia dekenai idia gwau: ‘Iesu be ia mauri lou vadaeni! Ia ai itaia!’ Maria ese Petero bona Ioane ia hamaoroa vadaeni Iesu ena tauanina be guria gabuna ai ia noho lasi. Hari idia lao idia itaia totona, inai laulau dekenai oi itaia bamona. Iesu ena kumia dabua idia itaia, to idia daradara bada. Idia ura idia abia dae Iesu be ia toreisi lou vadaeni, to idia abia dae be auka.

Gabeai unai Sunday ai, Iesu be Emausa ia lao henia dalana ai idia raka hahediba taudia rua dekenai ia hedinarai. Iesu be idia danu ia raka bona ia herevahereva, to idia diba lasi unai be ia, badina hari ena toana be guna ena toana amo ia idau. Ela bona idia ida ia aniani bona guriguri ia gwauraia neganai, ena toana idia itaia. Hahediba taudia idia moale bada dainai, kilomita momo Ierusalema dekenai idia giroa lou haraga! Daudau lasi murinai Iesu be Petero dekenai ia hedinarai, unai amo ia hahedinaraia Ia be ia toreisi lou vadaeni.

Gabeai unai Sunday adorahi ai, hahediba taudia momo be daiutu ta lalonai idia hebou. Iduara be idia lokaia. Vadaeni, Iesu be idia ida daiutu lalonai ia noho! Vadaeni hari idia diba momokani Hadibaia Tauna Badana be ia toreisi lou vadaeni. Edia moale mani oi laloa!​—Mataio 28:​1-​15; Luka 24:​1-​49; Ioane 19:38–​20:21.

Dina 40 lalonai Iesu be toana idauidau ai iena hahediba taudia dekenai ia hedinarai, ia ura ia hahedinaraia ia be ia toreisi lou vadaeni. Bena tanobada ia rakatania bona iena Tamana guba dekenai ia giroa lou. (Kara 1:​9-​11) Daudau lasi, hahediba taudia ese taunimanima ibounai idia hamaoroa matamaia Dirava ese Iesu ia hatorea isi lou vadaeni. Ena be hahelaga taudia ese idia dadabaia bona haida idia hamasea, to idia haroro noho. Idia diba bema idia mase, Dirava ese idia do ia laloatao iena Natuna ia laloatao hegeregerena.

Iesu murinai idia raka taudia ginigunadia be hari idia noho taudia amo idia idau momokani! Hari idia noho taudia be Iesu ena toreisi lou negana ai, Ista rabiti bona idia penia Ista gatoi sibona idia laloa. To Baibel be Ista rabiti bona gatoi ia herevalaia lasi. To Dirava hesiai henia karana ia herevalaia.

Iesu ena hahediba taudia bamona, namona be taunimanima ita hamaoroa Dirava ese ena Natuna ia hatorea isi lou neganai, kara hereadaena ia karaia. Namona be ita gari lasi, herevana taunimanima idia gwau ita do idia alaia. Bema ita mase, Iehova ese ita do ia laloatao bona hatorea isi lou diba, Iesu dekenai ia karaia bamona.

Ita diba Dirava ese ia idia hesiai henia taudia ia laloatao bona mase amo do ia hatorea isi lou dainai ita moale, ani?— Unai gaudia ita dibaia dainai, ita ura Dirava hamoalea dalana ita diba. Oi laloa unai bamona ita karaia diba, a?— Mani karoa gabena dekenai unai ita herevalaia.