Iesu Ia Toreisi Lou

Iesu ia mase murinai, taga tauna Iosepa be Pilato ia noia Iesu ena tauanina be hisihisi auna amo do ia kokia. Bena Iosepa ese Iesu ena tauanina ai bonana namo muramura ia atoa, dabua namona amo ia kumia bona guria gabu matamatana ai ia atoa. Bona nadi badana amo ia koua. Dubu gunalaia taudia ese Pilato idia hamaoroa: ‘Ai gari Iesu ena hahediba taudia haida ese ena tauanina do idia abia bona do idia gwau ia be ia mauri lou vadaeni.’ Unai dainai Pilato ese ia hamaoroa: ‘Guria gabuna umui koua bona gimaia.’

Dina toi murinai, daba ia rere neganai, hahine haida be guria gabuna dekenai idia lao bona idia itaia nadi idia kokia vadaeni. Guria gabuna lalonai, aneru ta ese hahine ia hamaoroa: ‘Umui gari lasi. Iesu ia toreisi lou vadaeni. Umui lao bona ena hahediba taudia umui hamaoroa Galilea ai ia do idia hedavari.’

Maria Magadala be karaharaga ia lao Petero bona Ioane ia tahua. Bona idia ia hamaoroa: ‘Tau ta ese Iesu ena tauanina ia abia!’ Petero bona Ioane be guria gabuna dekenai idia heau lao. Bona idia sekea neganai, Iesu ena tauanina ia noho lasi, bena ruma dekenai idia giroa lou.

Maria be guria gabuna dekenai ia giroa lou neganai, aneru rua ia itaia bona ia gwau: ‘Lau diba lasi egu Lohiabada be edeseni idia abia lao.’ Bena tau ta ia itaia, ia laloa ia be uma gabu naria tauna dainai, ia gwau: ‘Tau badana e, mani lau oi hamaoroa edeseniai ia oi abia lao.’ To unai tauna ia gwau, “Maria e!” bena ia diba unai be Iesu. Maria ia boiboi: “Hadibaia Tauna!” bona ia dogoatao. Iesu ia gwau: ‘Oi lao bona egu tadikaka oi hadibaia oi ese lau oi itaia vadaeni.’ Maoromaoro, Maria ia heau lao hahediba taudia dekenai bona idia ia hamaoroa ia ese Iesu ia itaia.

Unai dina ai, hahediba taudia rua be Ierusalema amo Emausa dekenai idia raka lao noho. Bona dala ai tau ta be idia ia bamoa bona idia ia nanadaia dahaka idia herevalaia noho. Idia gwau: ‘Oi kamonai lasi, a? Dina toi gunanai, dubu gunalaia taudia ese Iesu idia hamasea. Hari hahine haida idia gwau ia be ia mauri!’ Unai tauna ia henanadai: ‘Peroveta taudia umui abia dae, a? Idia gwau Keriso be do ia mase bona do ia toreisi lou.’ Idia dekenai Toretore Helagadia ia herevalaia noho. Emausa dekenai idia ginidae neganai, hahediba taudia ese unai tauna idia noia idia ida ia noho totona. Aniani totona unai tauna ia guriguri murinai, hahediba taudia idia laloparara ia be Iesu. Bena ia boio.

Hahediba taudia rua be idia lao haraga Ierusalema ai, aposetolo taudia idia haboua rumana dekenai bona ia vara gauna idia gwauraia. Idia be ruma lalonai idia noho lalonai, Iesu be idia ibounai vairanai ia hedinarai. Matamanai, aposetolo taudia idia abia dae lasi ia be Iesu. Bena Iesu ia gwau: ‘Egu imana umui itaia; lau umui dogoatao. Toretore Helagadia ia gwau Keriso be mase amo do ia toreisi lou.’