Dirava Hamoalea Dalana

DIRAVA hamoalea totona dahaka ita karaia diba? Ia dekenai gau ta ita henia diba, a?— Iehova ia gwau: “Uda dekenai noho mauri gaudia ibounai be lauegu.” Ma ia gwau: “Siliva bona golo ibounai be lauegu.” (Salamo 24:1; 50:10; Hagai 2:8) To, Dirava dekenai gau ta ita henia diba. Unai be dahaka?—

Iehova be ita dekenai maoro ia henia ita sibona ese abia hidi ita karaia diba ia do ita hesiai henia eiava lasi. Ita ia doria lasi iena ura ita karaia totona. Dirava ese ita ia karaia unai amo ita sibona ese ita abia hidi bema ia do ita hesiai henia eiava lasi ena badina mani ita laloa.

Reana oi diba robot be dahaka. Ia be masini ta, ia idia karaia dalana dainai ia be ena karaia tauna ena ura sibona do ia karaia. Unai dainai, robot ia ura karaia gauna be ia sibona ia abia hidi diba lasi. Iehova ese ita ibounai be robot bamona ia karaia diba. Unai amo iena ura sibona ita karaia diba. To Dirava be unai bamona ia karaia lasi. Ena badina oi diba, a?— Gadara gaudia haida be robot bamona. Baten ta oi moia neganai, karaia tauna ese unai gadara gauna ia palanilaia hegeregerena do ia gaukara. Unai bamona gadara gauna ta oi itaia vadaeni, a?— Nega momo taunimanima idia hesiku gau tamona sibona ia karaia gadara gauna ida idia gadara. Dirava ia ura lasi iena hereva ita badinaia kava, robot be ena karaia tauna ia badinaia bamona. Iehova ia ura ia ita hesiai henia badina ia ita lalokau henia bona ita ura ia ita kamonai henia.

Sibona eda ura dainai eda guba Tamana ita kamonai henia neganai, oi laloa ena hemami be edena bamona?— Emu kara dainai emu tama sina edia hemami be edena bamona?— Baibel ia gwau aonega natuna ese “iena tamana ia hamoalea” to kavakava natuna ese “iena sinana ena lalona ia hisihisi henia.” (Aonega Herevadia 10:1) Emu tama sina edia ura gauna ta oi karaia neganai, idia moale, ani?— To idia oi kamonai henia lasi neganai, edia hemami be edena bamona?—

Mani iseda guba Tamana, Iehova ita laloa. Ia ita hamoalea dalana be ita dekenai ia hadibaia. Mani emu Baibel oi abia bona Aonega Herevadia 27:11 dekenai oi kehoa. Unuseniai Dirava be ita dekenai ia hereva noho, ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” Ma ta gwauraia dika ena anina oi diba, a?— Reana ta ese oi ia gwauraia dika totona oi do ia kirikirilaia bona do ia gwau oi herevalaia gauna do oi karaia diba lasi. Edena dala ai Satani ese Iehova ia gwauraia dika?— Mani ita itaia.

Laloatao, inai buka ena Karoa 8 dekenai ita dibaia gauna be Satani ia ura Ladana Bada ia abia bona ia ura ibounai ese ia do idia kamonai henia. Satani ia gwau taunimanima ese Iehova idia tomadiho henia badina Iehova be idia dekenai mauri hanaihanai do ia henia. Satani ese Adamu bona Heva ia koia bena Iehova idia kamonai henia lasi murinai, ia be Dirava ida ia hepapahuahu. Dirava ia hamaoroa: ‘Taunimanima be oi amo idia abia gaudia dainai, oi idia hesiai henia. Bema dala be lau dekenai oi kehoa, iboudiai be oi amo lau veridia oho diba.’

Momokani, unai hereva be Baibel lalonai ia noho lasi. To bema Iobu ena sivarai ita duahia, ia hedinarai goevagoeva Satani ese Dirava dekenai unai bamona hereva ia gwauraia. Iobu ese Dirava ia kamonai henia eiava lasi be mai anina bada Satani bona Iehova dekenai. Mani Iobu karoa 1 bona 2 dekenai iseda Baibel ita kehoa bona ia vara gauna ita itaia.

Iobu karoa 1 ese ia hahedinaraia aneru be Iehova itaia totona idia mai neganai, Satani be idia huanai ia noho danu. Unai dainai Iehova ese Satani ia nanadaia: “Oi be dahaka oi karaia noho?” Satani ia haere ia gwau ia be tanobada dekenai ia raka loaloa. Unai dainai Iehova ese ia nanadaia: ‘Iobu oi itaia vadaeni, a? Ia ese lau ia hesiai henia bona kara dika ta ia karaia lasi.’​—Iobu 1:​6-8.

Maoromaoro Satani ese ekskius idauidau ia gwauraia. ‘Iobu ese oi ia tomadiho henia badina dika ta ia davaria lasi. Bema ia amo emu henari karana oi kokia bona oi hanamoa lasi, ia ese oiemu ladana do ia hadikaia momokani!’ Unai dainai Iehova ia gwau: ‘Vadaeni, oi ura ia dekenai oi karaia gauna oi karaia diba, to Iobu oi hadikaia lasi.’​—Iobu 1:​9-​12.

Satani be dahaka ia karaia?— Ia dainai taunimanima ese Iobu ena boromakau bona doniki idia henaoa bona naria taudia idia hamasea. Bena kevaru ese mamoe bona edia naria taudia ia hamasedia. Gabeai, taunimanima idia mai bona kamelo idia henaoa bona naria taudia idia hamasea. Dokonai, Satani ese lai bada ia siaia bona Iobu ena natudia 10 idia noho rumana ia hamorua bona idia ibounai idia mase. Ena be unai ibounai idia vara, Iobu ese Iehova ia hesiai henia noho.​—Iobu 1:​13-​22.

Iehova ese Satani ia itaia lou neganai, Satani ia hamaoroa Iobu ese ena abidadama karana ia do negea lasi. Satani ese ekskius ma haida ia gwauraia, ia gwau: ‘Bema Iobu ena tauanina lau hadikaia, ia ese oiemu ladana do ia hadikaia momokani.’ Unai dainai Iehova ese Satani ia koua lasi Iobu ena tauanina ia hahisia totona, to ia hadibaia Iobu do ia hamasea lasi.

Satani ese Iobu ena tauanina ibounai dekenai toto ia havaraia. Unai toto edia bonana be dika momokani dainai tau ta be Iobu kahirakahira ia lao lasi. Iobu ena adavana danu ese Iobu ia hamaoroa: “Dirava ena ladana do oi hadikaia, vadaeni oi mase!” Iobu ena tura koikoidia ese ia idia vadivadi henia bona ena lalo-metau idia habadaia sibona idia gwau, reana ia ese kara dikadia ia karaia dainai unai hisihisi ibounai ia davaria. Herevana Satani ese Iobu dekenai unai hisihisi bona hekwakwanai ibounai ia havaraia, to Iobu be mai kamonai ida Iehova ia hesiai henia noho.​—Iobu 2:​1-​13; 7:5; 19:​13-​20.

Iobu ena kamonai karana dainai oi laloa Iehova ena hemami be edena bamona?— Iobu ena kara ese Iehova ia hamoalea badina Satani Ia hamaoroa diba: ‘Iobu oi itaia! Iena ura dainai lau ia hesiai henia.’ Oi ura Iobu ena kara oi tohotohoa, unai amo Iehova ese Satani dekenai do ia hamomokania diba ia be koikoi tauna, a?— Momokani, Satani ia gwau taunimanima ibounai be Iehova hesiai henia karana amo ia veria oho diba, unai hereva ita hakoikoia be hahenamo ta. Iesu dekenai unai be hahenamo ta.

Hadibaia Tauna Badana ese dala ia kehoa lasi Satani ese ia veria kara kererena ta ia karaia totona. Iena kara namona dainai iena Tamana ena moale mani oi laloa! Iehova be Satani dekenai Iesu ia gwauraia diba: ‘Egu Natuna oi itaia! Lau ia kamonai henia momokani badina lau ia lalokau henia!’ Iesu ese ena Tamana ena kudouna ia hamoalea dainai, ena moale mani oi laloa. Unai moale dainai, au ta dekenai ia mase karana ia haheaukalaia.—Heberu 12:2.

Oi ura oi be iseda Hadibaia Tauna Badana bamona bona Iehova oi hamoalea, a?— Vadaeni, Iehova ia ura oi karaia gaudia oi dibaia noho bona unai gaudia karaia karana amo ia oi hamoalea!