Iobu ese Iehova Ena Ladana Ia Hanamoa
“Lohiabada ena ladana lau hanamoa.”—IOBU 1:21.
1. Daika be Iobu bukana ia torea, bona edena negai ia torea?
MOSE ena mauri lagani be 40, bona Farao ese ia badu henia dainai Aigupito ia heautania, Midiana ai ia noho. (Kara 7:23) Midiana ai, reana Mose be Usu ai ia noho tauna Iobu ena sivarai ia kamonai—Usu be Midiana kahirakahira ia noho hanuana. Lagani momo murinai, Mose bona Israela taudia be taunimanima idia noho lasi gabuna ai idia loaloa bena Usu kahirakahira idia noho neganai, reana Mose be Iobu ena lagani ginigabedia lalonai idia vara gaudia edia sivarai ia kamonai. Iuda taudia edia sivarai ese idia hahedinaraia, Iobu ia mase bena lagani haida murinai, Mose be Baibel bukana Iobu ia torea.
2. Edena dala ai Iobu bukana be Dirava ena hesiai taudia edia abidadama ia hagoadaia?
2 Hari, Iobu bukana ese Dirava ena hesiai taudia edia abidadama ia hagoadaia. Edena dala ai? Unai buka ese ita ia durua, guba ai ia vara hepapahuahu badana ta ita laloa noho totona. Unai hepapahuahu lalonai Satani ia gwau Dirava ese guba bona tanobada ia lohiaia be maoro lasi. Iobu bukana be ita ia durua Dirava ita abidadama henia dalana ita diba sibona lasi, to Iehova ese nega haida Iena hesiai taudia edia hisihisi ia koua lasi ena badina ita lalopararalaia totona. Ma unai buka ese ia hahedinaraia Iehova bona taunimanima edia Inai Tauna badana be Satani Diabolo. Danu, Iobu bukana ese ia hahedinaraia, hahetoho lalonai goevadae lasi taudia be Iehova idia badinaia noho diba, Iobu bamona. Mani unai buka ese ia gwauraia gaudia haida ita itaia.
Satani ese Iobu Ia Tohoa
3. Iobu be edena bamona tauna, bona dahaka dainai Satani ese ia tohoa?
3 Iobu be taga tauna, ladana bada tauna, tamana ta, kara namodia momo ia karaia tauna, sisiba tauna namona, bona ogogami taudia ia durua tauna. To iena kara hereadaena be inai: Dirava ia gari henia. Baibel ia gwau, Iobu “be kerere ta lasi, bona kara maoromaoro tauna. Ia ese Dirava dekenai ia gari, bona kara dika dekena amo ia siri.” Iobu be ena taga o ladana bada dainai hahetoho ia abia lasi, to Dirava ia badinaia dainai Satani Diabolo ese ia tohoa.—Iobu 1:1; 29:7-16; 31:1.
4. Satani ia ura edena kara ia hakoikoia?
4 Iobu bukana ia gwau, nega ta ai guba dekenai, “Dirava ena aneru be Lohiabada ena vairanai idia hedinarai, bona Satani danu ia mai, idia edia huana dekenai.” Bena ia ese Iobu ia gwauraia dika. (Iobu 1:6-11 duahia.) Ena be Satani be Iobu ena kohu ia herevalaia, to ia ura gauna badana be, Iobu ena abidadama Iehova dekenai do ia hakoikoia.
5. Satani ese Iobu be edena bamona ia hadikaia?
5 Satani ia gwau, Iobu be Dirava ia tomadiho henia badina ia ura Dirava be ia dekenai gau namodia ia henia. Ma ia gwau, Iehova be Iobu ia hanamoa bona gimaia dainai, Iobu be Iehova ia abidadama henia. Satani ena hereva dainai, Iehova be dala ia kehoa Satani ese unai abidadama tauna ia tohoa totona. Unai dainai, dina tamona lalonai, Iobu ia kamonai haida be ena animal idia henaoa o hadikaia, haida be ena hesiai taudia idia alaia mase, bona ena natudia ten idia mase. (Iobu 1:13-19) Satani be unai hahetoho idauidau amo Iobu ena abidadama ia hadikaia, a? Baibel ese Iobu ena lalohadai unai gaudia dekenai be inai bamona ia herevalaia: “Lohiabada ese lau dekenai gau momo ia henia, bona hari Lohiabada ese unai gaudia ia abia lao. Lohiabada ena ladana lau hanamoa inai!”—Iobu 1:21.
6. (a) Guba ena hebou ma ta dekenai dahaka ia vara? (b) Satani be daidia edia abidadama ia tohoa danu?
6 Gabeai, guba dekenai hebou ma ta idia karaia. Unai hebou dekenai, Satani be Iobu ia hadikaia lou, ia gwau: “Kopina ena davana be kopina. Tau ta ese iena gau ibounai do ia negea, iena mauri do ia dogoatao totona. To harihari oi ese iena tauanina do oi hadikaia. Bema inai bamona oi karaia neganai, Iobu ese oiemu ladana do ia hadikaia momokani!” Unai hereva dekenai, Satani be taunimanima ma haida danu ia gwauraia dika, a? Oibe, ia gwau, “Tau ta ese iena gau ibounai do ia negea, iena mauri do ia dogoatao totona.” Momokani, Diabolo ia ura bada Iobu bona Iehova idia tomadiho henia taudia ibounai edia abidadama ia hadikaia toho. Gabeai, Dirava ese dala ia kehoa Satani ese Iobu be gorere dikana ta amo ia hahisia totona. (Iobu 2:1-8) Unai sibona lasi, Iobu be hahetoho ma haida ia davaria danu.
Iobu Ena Kara amo Diba Ita Abia
7. Edena dala ai Iobu ena adavana bona vadivadi tatau toi be Iobu idia hametaua?
7 Matamanai, Iobu ena adavana be hisihisi ia mamia danu. Reana edia natudia idia mase, edia taga ia ore, bona ena adavana dekenai ia itaia toto dikadia dainai ia lalohisihisi. Vadaeni, mai taitai ida ia gwau: “Iobu e, oiemu lalona be do ia maoromaoro noho, bona Dirava dekenai oi abidadama henia noho, a? Namona be Dirava ena ladana do oi hadikaia, vadaeni oi mase!” Bena, tatau toi idia ginidae—Elipasa, Biledada, bona Sopara—bona idia ura Iobu idia hagoadaia. To, idia be “hagoadaia taudia dikadia” badina hereva kereredia idia gwauraia. Biledada ia gwau, Iobu ena natudia be kara dikadia haida idia karaia dainai idia mase be maoro. Elipasa ia gwau, Dirava ese Iobu ia panisia badina Iobu be guna kara dikadia haida ia karaia. Ma ia gwau, Dirava be abidadama taudia ia lalodia lasi! (Iobu 2:9, 11; 4:8; 8:4; 16:2; 22:2, 3) Herevana unai tatau ese Iobu idia hahisia, to Iobu be Dirava ia abidadama henia noho. Momokani, nega tamona sibona ia kerere “badina be ia sibona maoromaoro ia gwauraia, to ia ese Dirava be maoromaoro ia gwauraia lasi.” (Iobu 32:2) To hahetoho ibounai lalonai, Iobu be Iehova ia abidadama henia noho.
8. Edena dala ai sisiba idia henia taudia dekenai Elihu be haheitalai namona?
8 Hari, namona be Elihu—Iobu ia vadivadi henia tauna ta—ena sivarai ita itaia. Matamanai, Elihu be Iobu bona ena turadia toi edia hereva ia kamonai namonamo. Ena be idia foa huanai Elihu ena mauri lagani be maragi, to ia be lalohadai namodia ia gwauraia. Elihu be mai hemataurai ida Iobu ia hereva henia. Ia ese Iobu ena kara maoromaoro dainai ia hanamoa. To danu, Iobu be ena kerere ia laloa momo neganai, Elihu ese ia hamaoroa unai bamona ia karaia lasi be namo. Bona Elihu ese Iobu ia hagoadaia, hanaihanai Dirava ia hesiai henia be gau badana. (Iobu 36:1, 11 duahia.) Hari inai negai, sisiba idia henia taudia ese Elihu ena haheitalai namona idia tohotohoa be namo! Elihu be ia manau, ia kamonai namonamo, hanamoa herevadia ia gwauraia, bona lalona hagoadaia sisiba ia henia.—Iobu 32:6; 33:32.
9. Edena dala ai Iehova be Iobu ia durua?
9 Dokonai, Iehova be Iobu ia hereva henia. Baibel ia gwau: “Vadaeni Lohiabada ese Iobu dekenai ia haere, lai guba dekena amo.” Iehova be henanadai amo Iobu ia durua, ena lalohadai kereredia ia hamaoromaoroa totona. Iobu be Iehova ena sisiba ia abia dae bona ia gwau: “Lau be namo lasi momokani, . . . lau be lau hemarai, bona harihari tano kahu, bona lahi kahu danu dekenai, lauegu lalona lau giroa momokani inai.” To, Iehova be Iobu ia hereva henia murinai, ia gwau Ia be Elipasa, Biledada, bona Sopara dekenai ia badu, badina idia be Iobu idia hagoadaia lasi. Iobu ia guriguri, Iehova ese idia toi ia durua totona. Baibel ia gwau: “Iobu ese iena turana toi dainai ia guriguri murinai, Lohiabada ese Iobu dekenai kohu momo ma ia henia lou. Lohiabada ese Iobu ena kohu gunana ia habadaia ela bona nega rua.”—Iobu 38:1; 40:4; 42:6-10.
Iehova Ita Lalokau Henia Bada, A?
10. Dahaka dainai Iehova be Satani ena hepapahuahu herevana ia laloa maragi lasi o ia hamasea haraga lasi?
10 Iehova be gau iboudiai edia Havaraia Tauna bona Lohia Badana. To, dahaka dainai Diabolo ese Iobu dekenai ia gwauraia herevana be Iehova ese ia laloa bada? Dirava ia diba bema Satani ena hereva ia laloa maragi lasi o ia hamasea haraga, unai ese hepapahuahu do ia hamaoromaoroa lasi. Diabolo ia gwau, bema Iobu ena taga idia boio, Iobu be Iehova do ia badinaia lasi. To hahetoho lalonai, Iobu be Iehova ia badinaia. Unai dainai, Satani ia gwau, ta be Iehova do ia rakatania bema hisihisi ia abia. To Iobu be gorere dikana ta dainai hisihisi bada ia abia neganai, Iehova ia abidadama henia noho. Momokani, herevana Iobu be goevadae lasi tauna, to iena abidadama amo ia hamomokania Satani be koikoi tauna. Dirava idia tomadiho henia taudia ma haida be edena bamona?
11. Edena dala ai Iesu be Satani ena hereva ia hakoikoia?
11 Ena be Dirava ena hesiai taudia ta ta be Satani amo dahaka hahetoho idia abia, to edia abidadama karana amo idia hamomokania Satani be koikoi tauna. Tanobada ai Iesu be ia hahedinaraia Satani be koikoi tauna. Iesu be tau goevadaena, eda tama ginigunana Adamu bamona. To Iesu be Iehova ia abidadama henia ela bona ia mase, unai amo ia hahedinaraia Satani ena hereva iboudiai be koikoi.—Apok. 12:10.
12. Iehova ena hesiai taudia edia maduna be dahaka?
12 Satani be Iehova idia tomadiho henia taudia ia tohoa noho. To, ita ta ta iseda maduna be inai: Namona be Iehova ita abidadama henia bona ita hesiai henia, badina Ia ita lalokau henia to ita sibona eda namo ita laloa bada lasi. Unai maduna be edena bamona ita laloa? Iehova ita abidadama henia be hahenamo badana ta. Ita diba Iehova be goada ia henia dainai hahetoho idauidau ita haheaukalaia diba, Iobu dekenai ia karaia bamona. Oibe, Dirava ese ‘ita do ia naria, eda goada ia hanaia dibagani ese ita do ia pidia garina.’—1 Kor. 10:13.
Satani—Dagedage Bona Aposteit Tauna
13. Iobu bukana ese Satani be edena bamona ia herevalaia?
13 Heberu Revarevadia ese idia hahedinaraia, Satani be Iehova ia hadikaia bona taunimanima ia koia. Keristani Greek Revarevadia ese idia hahedinaraia, Satani be Iehova ia hadikaia, bona Baibel bukana Apokalupo ai ita itaia, Iehova be Iena ladana do ia hahelagaia bona Satani do ia haorea vaitani. Iobu bukana lalonai, Satani ena gwau-edeede karadia ma haida ita dibaia. Guba ena hebou ruaosi dekenai Satani be Iehova ia hanamoa, a? Lasi, Satani ena lalohadai be dika rohoroho, bona ia ura kara dikadia sibona ia karaia. Ia be Iobu ia samania, bona Iehova be dala ia kehoa Satani ese Iobu ia tohoa totona neganai, “Satani be Lohiabada ena vairana dekena amo ia raka lao.”—Iobu 1:12; 2:7.
14. Satani be Iobu dekenai dahaka ia karaia?
14 Baibel bukana Iobu ese ia hahedinaraia Satani be taunimanima ia matauraia lasi. Iobu 1:6 ese ia gwauraia hebou negana bona Iobu 2:1 ese ia gwauraia hebou negana edia huanai, Satani ese Iobu ia tohoa ela bona edena negai ia hadokoa be ita diba lasi. To, Iobu be Iehova ia abidadama henia dainai, Iehova be Satani dekenai ia gwau: “Oi ese lauegu lalona oi veria, [Iobu] do lau tohoa bona hadikaia totona, to inai hadikaia be mai badina ta lasi. Inai dika ia abia vadaeni, to Iobu ena lalona be do maoromaoro noho.” To, Satani ia gwau Iobu dekenai ia gwauraia herevadia be kerere, a? Lasi, Satani be Iehova ia hamaoroa hahetoho ma ta amo Iobu do ia tohoa. Unai dainai taga eiava ogogami negadia ai, Diabolo be Iobu ia tohoa. Momokani, Satani be ogogami taudia bona metau idia abia taudia ia hebogahisi henia lasi. Ia be Dirava idia abidadama henia taudia ia badu henia dikadika. (Iobu 2:3-5) To, Iobu ena abidadama karana ese ia hahedinaraia Satani be koikoi tauna.
15. Edena dala ai aposteit taudia be Satani idia tohotohoa?
15 Satani be aposteit tauna ginigunana. Hari inai negai, aposteit taudia momo be Diabolo ena kara idia tohotohoa. Idia ese tadikaka taihu, elda taudia, o Hakaua Oreana idia maumauraia. Aposteit taudia haida be Iehova ena ladana gaukaralaia karana idia inai henia. Idia ura lasi Iehova idia dibaia eiava hesiai henia. Idia be edia tamana Satani bamona, badina idia ura dikadika taunimanima edia abidadama idia hadikaia. (Ioa. 8:44) Unai dainai, Iehova ena hesiai taudia be aposteit taudia ida idia herevahereva lasi o hebou lasi!—2 Ioa. 10, 11.
Iobu ese Iehova Ena Ladana Ia Hanamoa
16. Iobu ese Iehova be edena bamona ia kara henia?
16 Iobu be Iehova ena ladana ia gaukaralaia bona ia hanamoa. Herevana Iobu be ena natudia idia mase ena sivarai ia kamonai, to ia be kerere ta ia karaia lasi bona Dirava dekenai ia badu lasi. Danu, ena be Iobu ia laloa Dirava be ia dekenai hisihisi ia havaraia, to ia ese Iehova ena ladana ia hanamoa. Gabeai, Iobu ia gwau: “Kamonai, Lohiabada do umui gari henia, aonega be unai, bona kara dika do umui rakatania, laloa kehoa be unai.”—Iobu 28:28.
17. Dahaka ese Iobu ia durua Iehova ia abidadama henia totona?
17 Dahaka ese Iobu ia durua Iehova ia abidadama henia totona? Dika idia do vara lasi neganai, Iobu be Iehova tura henia karana ia hagoadaia vadaeni. Herevana Iobu be Satani bona Iehova huanai ia vara hepapahuahu ia diba o lasi, to Iobu be Iehova ia badinaia noho. Iobu ia gwau: “Harihari ia lao bona do lau mase, egu laloa maoromaoro, bona egu kerere lasi, do lau gwauraia noho.” (Iobu 27:5) Iobu be dahaka ia karaia Iehova ia tura henia namonamo totona? Reana ia be Iehova ese Aberahamo, Isako, bona Iakobo ia naridia bona ia gimadia ena sivarai ia kamonai. Bona ia be Dirava ia havaraia gaudia ia itaia, unai amo Iehova ena kara namodia ia lalopararalaia diba.—Iobu 12:7-9, 13, 16 duahia.
18. (a) Edena dala ai Iobu ia hahedinaraia ia be Iehova ia badinaia? (b) Edena dala ai Iobu ena haheitalai namona ita tohotohoa diba?
18 Iobu be ia dibaia gaudia ese ia idia durua, Iehova hamoalea karadia ia karaia totona. Hanaihanai Iehova dekenai boubou gaudia ia henia, badina ia laloa reana ena natudia be Dirava vairanai kerere haida idia karaia o “sedira Lohiabada ena ladana idia hadikaia kava.” (Iobu 1:5) Danu, hahetoho badadia lalonai Iobu be Iehova ia hanamoa. (Iobu 10:12) Iobu ena haheitalai namona ita tohotohoa be namo, ani? Hanaihanai Iehova bona ena ura ita diba namonamo be namo. Hanaihanai Baibel ita stadilaia, hebou ita lao, ita guriguri, bona sivarai namona ita harorolaia be namo. Danu, eda goada ibounai ida Iehova ena ladana be ma haida dekenai ita hadibaia. Iehova be Iobu ena abidadama dainai ia moale. Unai hegeregerena, hari inai negai Dirava be ena hesiai taudia edia abidadama dainai Ia moale. Stadi gabena ai unai do ita herevalaia.
Oi Laloatao, A?
• Dahaka dainai Satani Diabolo ia ura Iobu ia tohoa?
• Iobu be dahaka hahetoho ia davaria, bona edena bamona ia kara?
• Dahaka ese ita do ia durua Iehova ita abidadama henia noho totona?
• Baibel bukana Iobu ese Satani ia kikilaia dalana amo dahaka ita dibaia?
[Picture on page 4]
Iobu bukana ese ita ia durua hepapahuahu badana ta ita laloa noho totona
[Picture on page 6]
Dahaka gaudia ese emu abidadama idia tohoa diba?