Ita Gaukara be Namo Ena Badina

EDENA oi ura henia bada, gaukara eiava gadara?— Momokani, ita gadara be kerere lasi. Baibel ia gwau Ierusalema be “memero bona kekeni ese do idia hahonua, ariara edia lalonai do idia gadara.”​—Sekaraia 8:5.

Hadibaia Tauna Badana ese natudia ia itaia idia gadara neganai, ia moale. Tanobada dekenai ia do mai lasi neganai, ia gwau: “Lau be Dirava ena badibadinai lau noho, gaukara karaia [“namonamo,” NW] tauna bamona . . . bona lau be iena vairana dekenai, lau moale noho nega ibounai.” Iesu be Iehova ida guba dekenai ia gaukara. Bona unuseniai ia noho neganai, ia gwau: “Tanobada, mai ena noho taudia ibounai dekenai lau moale noho.” Oibe, guna ita dibaia bamona, Hadibaia Tauna Badana ese taunimanima ibounai ia laloa bada, matamata taudia danu.​—Aonega Herevadia 8:​30, 31.

Iesu ia maragi neganai, oi laloa ia gadara, a?— Reana ia gadara. To guba ai ia be “gaukara karaia namonamo tauna” dainai, tanobada ai ia gaukara danu, a?— Oibe, Iesu idia gwauraia “kamuta tauna ena natuna.” To ia idia gwauraia “kamuta tauna” danu. Unai ese dahaka ia hahedinaraia?— Iosepa, Iesu ena ubua tamana ese reana ia hadibaia. Unai dainai Iesu be kamuta tauna ta ai ia lao danu.​—Mataio 13:55; Mareko 6:3.

Iesu be edena bamona kamuta tauna?— Guba ai ia be gaukara karaia namonamo tauna dainai, tanobada ai ia be kamuta gaukara ia karaia namonamo tauna ai ia lao, ani?— Unai nega ai kamuta gaukara be mai ena hekwarahi bada. Reana Iesu ia lao au ta ia utua diho, bena ia utua maragimaragi, ruma dekenai ia huaia lao bona unai au amo teibolo, helai gaudia bona ma gau haida ia karaia.

Oi laloa unai gaukara dainai Iesu ia moale, a?— Bema taunimanima ese do idia gaukaralaia teibolo, sea bona gau namodia ma haida oi karaia diba, do oi moale, ani?— Baibel ia gwau ta be ‘ena gaukara do ia moalelaia’ be namo. Gaukara amo oi abia moalena be gadara amo oi abia diba lasi.​—Hadibaia Tauna 3:22.

Momokani, gaukara ese iseda lalona bona tauanina ia hagoadaia. Natudia momo be idia helai bona TV idia itaia eiava vidio gadara idia gadaralaia sibona. Edia tauanina ia bada bona idia manoka bona idia moale momokani lasi. Bona ma haida idia hamoalea lasi danu. Ita moale totona dahaka ita karaia be namo?—

Inai buka ena Karoa 17 amo ita dibaia gauna be, henia karana bona ma haida durua totona ita karaia gaudia ese moale ia havaraia. (Kara 20:35) Baibel ese Iehova ia gwauraia “moale Diravana.” (1 Timoteo 1:​11, NW ) Bona, Aonega Herevadia dekenai ita duahia bamona, Iesu be Dirava ‘ena vairana dekenai, ia moale noho nega ibounai.’ Dahaka dainai Iesu ia moale?— Badina ta ia henia, ia gwau: “Egu Tamana be ia gaukara noho ia mai bona hari, lau danu lau gaukara noho.”​—Ioane 5:​17.

Iesu be tanobada dekenai ia noho neganai, iena mauri ibounai lalonai kamuta gaukara ia karaia lasi. Iehova Dirava ia ura tanobada ai gaukara idauna ta ia karaia. Unai gaukara oi diba, a?— Iesu ia gwau: “Lau be Dirava ena Basileia ena Sivarai Namona . . . do lau harorolaia, Dirava ese lau ia siaia ena badina be unai.” (Luka 4:43) Nega haida Iesu be taunimanima ia haroro henia neganai, ena hereva idia abia dae bona ia hadibaia gaudia be ma haida dekenai idia hadibaia, inai laulau dekenai oi itaia Samaria hahinena ese ia karaia bamona.​—Ioane 4:​7-​15, 27-​30.

Iesu ese unai gaukara be edena bamona ia laloa? Oi laloa ia ura unai gaukara ia karaia, a?— Iesu ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:​34) Oi ura henia bada aniani oi itaia neganai oi ura henia bada, ani?— Iesu dekenai, Dirava ese ia dekenai ia henia gaukarana be ia ura henia bada anianina bamona.

Dirava ese ita ia karaia unai amo gaukara dibaia karana ese ita do ia hamoalea. Ia gwau Iena harihari gauna taunimanima dekenai be ‘edia hekwarahi dekenai idia abia gaudia do idia moalelaia’ be namo. Unai dainai bema oi do matamata neganai gaukara oi dibaia, emu mauri ibounai do oi moalelaia.​—Hadibaia Tauna 5:​19.

To unai ese ia hahedinaraia lasi natuna maragina ese tau badana ena gaukara ia karaia diba, to ia hahedinaraia ita ibounai be gaukara haida ita karaia diba. Reana emu tama sina be moni idia abia totona dina ta ta idia gaukara, unai amo emu ruma bese be mai edia aniani bona noho rumana. Bona inai oi diba be namo, ruma ia namo bona goeva noho totona ruma badinai gaukara haida oi karaia be namo.

Dahaka gaukara oi karaia diba ruma bese taudia ibounai oi durua totona?— Teibolo oi hegaegaelaia, mereki oi huria, momoru oi negea, emu daiutu oi hagoevaia bona emu gadara gaudia oi atoa namonamo diba. Reana unai gaudia haida oi karaia noho. Unai be heduru bada ruma bese taudia dekenai.

Unai bamona gaukara ese ita ia durua dalana mani ita laloa. Oi gadara murinai gadara gaudia oi atoa siri. Dahaka dainai unai be mai anina bada?— Unai dala amo ruma ena toana do ia namo bona ta ese bero do ia davaria lasi danu. Bema emu gadara gaudia oi atoa namonamo lasi, reana dina ta emu sinana be gau metauna ia huaia bona emu gadara gauna ia moia diba. Reana do ia moru bona bero do ia davaria. Danu, hospital dekenai ia lao diba. Unai be ia namo lasi, ani?— Unai dainai oi gadara murinai emu gadara gaudia oi atoa siri neganai, unai ese ibounai ia durua.

Natudia ese idia karaia gaukara ma ta ia noho danu. Hegeregere, sikuli gaukara. Sikuli dekenai duahiduahi karana oi dibaia. Natudia haida ese duahiduahi karana idia moalelaia, to ma haida idia gwau ia auka. Ena be matamanai ia auka, to bema duahiduahi namonamo karana oi dibaia do oi moale. Duahiduahi karana oi diba neganai, gau namodia momo oi dibaia diba. Dirava ena buka, Baibel do oi duahia diba danu. Unai dainai bema emu sikuli gaukara oi karaia namonamo, unai be heduru gauna namona, ani?—

Taunimanima haida idia ura lasi idia gaukara. Reana unai bamona ia karaia tauna ta oi diba. To Dirava ese ita ia karaia ita gaukara totona, unai dainai gaukara moalelaia dalana ita dibaia be namo. Hadibaia Tauna Badana ese ena gaukara ia moalelaia bada, ani?— Unai gaukara be ia ura henia bada anianina ta bamona. Bona edena gaukara ia herevalaia?— Ma haida dekenai Iehova Dirava bona mauri hanaihanai idia abia dalana ia herevalaia.

Inai gaudia ese ita do idia durua gaukara ita moalelaia totona. Oi sibona oi nanadaia, ‘Dahaka dainai inai gaukara lau karaia be namo?’ Bema oi diba gau ta be mai anina bada, do oi ura bada oi karaia. Bona herevana gaukara be ia bada eiava ia maragi, oi karaia namonamo. Bema unai bamona oi karaia, emu imana ena gaukara dainai do oi moale, iseda Hadibaia Tauna Badana ia karaia bamona.