Iseda Turadia ese Dirava Idia Lalokau Henia be Namo

TURADIA be ita ura hereva henia bona bamoa taudia. To hebamo namodia ita abia be gau badana. Oi laloa ita abia diba turana namona be daika?— Oibe, Iehova Dirava.

Ita be Dirava ena turana ai ita lao diba, a?— Baibel ia gwau, gunaguna ia noho tauna Aberahamo, be “Dirava ena turana.” (Iamesi 2:​23) Dirava ena turana ai ia lao ena badina oi diba, a?— Baibel ia gwau Aberahamo ese Dirava ia kamonai henia. Ia kamonai henia ena be Dirava ia ura Aberahamo ese ia karaia gauna be ia auka. Unai dainai Iehova ena turana ai ita lao totona, namona be ia hamoalea gaudia ita karaia, Aberahamo bona hanaihanai Hadibaia Tauna Badana ese idia karaia bamona.​—Genese 22:​1-​14; Ioane 8:​28, 29; Heberu 11:​8, 17-​19.

Iesu ese iena aposetolo taudia ia hamaoroa: “Lauegu taravatu do umui badinaia, unai dekena amo lauegu turana do umui lao.” (Ioane 15:14) Iesu ese taunimanima dekenai ia hadibaia gaudia ibounai be Iehova dekena amo idia mai dainai, Iesu ena hereva anina be, iena turadia be Dirava ena ura idia karaia taudia. Oibe, iena turadia ibounai ese Dirava idia lalokau henia.

Hadibaia Tauna Badana ena tura korikoridia haida be iena aposetolo taudia, edia laulau be inai buka ena rau 75 dekenai oi itaia diba. Ia danu idia laolao bona ia idia durua haroro gaukara idia karaia. Iesu be nega momo unai tatau ida ia noho. Idia aniani hebou. Dirava idia herevalaia hebou. Bona gau ma haida idia karaia hebou. To Iesu ena turadia be momo. Idia ida ia noho bona nega namodia idia moalelaia hebou.

Iesu be nega momo Ierusalema murimuri ai ia noho hanua maragina Betania dekenai idia noho ruma bese ta ida ia noho. Idia oi laloatao, a?— Idia be Maria, Mareta bona edia tadikaka Lasaro. Iesu ese Lasaro ia gwauraia iena turana. (Ioane 11:​1, 5, 11) Unai ruma bese taudia ese Iehova idia lalokau henia bona hesiai henia dainai, Iesu ese ia lalokau henidia bona edia hebamo ia moalelaia.

To Iesu be Dirava idia tomadiho henia lasi taudia ia hebogahisi henidia danu. Edia ruma dekenai ia lao danu bona idia ida ia aniani hebou. Unai dainai haida idia gwau Iesu be “takisi gogoa taudia bona kara dika taudia edia turana.” (Mataio 11:19) Momokani Iesu be unai taudia edia noho dalana ia ura henia dainai, edia ruma dekenai ia lao lasi. To idia ia vadivadi henia unai amo idia dekenai Iehova ia herevalaia diba. Ia durudia toho edia kara dikadia do idia rakatania bona Dirava do idia hesiai henia totona.

Dina ta Ieriko hanua dekenai unai ia vara. Iesu be Ierusalema ia lao henia noho lalonai, taunimanima hutuma idia hebou bona idia huanai be tau ta ladana Sakaio ia noho. Ia ura Iesu ia itaia. To Sakaio be tau kwadogina bona ia vairanai taunimanima momo idia gini dainai, Iesu ia itaia diba lasi. Unai dainai ia heau lao guna bona au ta dekenai ia daekau unai amo Iesu ia hanaia neganai do ia itaia namonamo.

Iesu be unai au kahirakahira ia ginidae neganai, ena matana ia negea daekau bona ia gwau: ‘Oi diho haraga, badina hari dina oiemu ruma dekenai do lau mai.’ To  Sakaio  be  kara  dika momo ia karaia taga tauna. Dahaka dainai Iesu ia ura unai tauna ena ruma dekenai ia lao?—

Iesu be unai tau ena noho dalana ia ura henia lasi. To unuseniai ia lao Sakaio dekenai Dirava ia herevalaia totona. Ia diba Sakaio ia hekwarahi ia ia itaia totona. Unai dainai ia diba reana Sakaio do ia kamonai. Unai be nega namona ia dekenai Dirava ia ura taunimanima ese idia noholaia mauri dalana ia herevalaia totona.

Unai dainai, dahaka ia vara?— Sakaio be Iesu ena hadibaia herevadia ia ura henia. Ia sori bada badina taunimanima ia koidia, bona ia gwauhamata ia abia kava monina do ia haloua. Bena Iesu ena murinai ia raka tauna ai ia lao. Unai murinai Iesu be Sakaio ena turana ai ia lao.​—Luka 19:​1-​10.

Bema Hadibaia Tauna Badana amo diba ita abia, idau taudia do ita vadivadi henia, a?— Oibe. To edia noho dalana ita ura henia dainai edia ruma dekenai do ita lao lasi. Bona idia ida gau kereredia do ita karaia lasi. Idia do ita vadivadi henia unai amo idia dekenai Dirava ita herevalaia diba.

To iseda tura korikoridia be hanaihanai ita ura bamoa taudia. Tura namodia ai idia lao totona, namona be Dirava ese idia ia ura henia. Reana haida be Iehova idia diba lasi. To bema idia ura ia idia dibaia, ita durudia diba. Bona Iehova idia lalokau henia ia ita lalokau henia hegeregerena neganai, vadaeni idia be iseda tura korikoridia ai idia lao diba.

Dala ma ta ia noho, ia amo oi itaia diba bema ta be tura namona ai ia lao diba. Ia karaia gaudia oi itaia. Taunimanima ma haida be hebogahisi lasi dalanai ia kara henidia bona gabeai unai ia kirikirilaia, a? Unai be maoro lasi, ani?— Nega momo kerere lalonai ia vareai, a? Ita ura lasi ia ida kerere lalonai ita vareai, ani?— Eiava mai ena ura ida kara dikadia ia karaia bena taunimanima be ia ese ia karaia karana idia itaia lasi neganai, ia laloa ia be aonega momokani, a? Ena be taunimanima ese idia itaia lasi, to Dirava ese ia karaia gauna ia itaia, ani?​— Oi laloa unai bamona idia karaia taudia be iseda tura namodia ai ita halaodia be namo, a?—

Mani emu Baibel oi abia. Bona iseda turadia ese iseda kara idia haidaua diba dalana be 1 Korinto karoa 15, siri 33 dekenai mani ita itaia. Oi davaria vadaeni, a?— Ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” Anina be bema kara dika taudia ita bamodia, reana kara dika taudia ai ita lao diba. Bona danu tura namodia ese ita idia durua kara namodia ita hahedinaraia totona.

Laloaboio lasi, iseda mauri lalonai ita laloa bada Tauna badana be Iehova. Ita ura lasi iseda hetura karana ia ida ita hadikaia, ani?— Unai dainai Dirava idia lalokau henia taudia sibona ita tura henidia be namo.