Kahirakahira Taravatu Utua Karadia Do Idia Ore!

TARAVATU utua kara ena badina idia tahua taudia be taravatu utua karadia idia koua toho inai dala amo: Kara idauidau amo idia tahua taravatu utua taudia be daidia, bona taravatu utua karana ena badina be dahaka. Tanobada ibounai dekenai, buka momo lalonai, taravatu utua taudia edia kara idia tahua taudia edia gaukara idia torea. Ena be reana ia ese taravatu utua tauna ia davaria diba, to nega momo, taravatu utua taudia ia tahua tauna ena gaukara ia matamaia taravatu utua kara ia vara vadaeni murinai.

Taravatu utua karadia idia momo idia lao dainai, ita itaia diba, taravatu utua tauna tamona tamona idia dogoatao, to ma taunimanima haida be taravatu idia utua matamaia. Unai dainai, taravatu idia utua taudia idia koua sibona be hegeregere lasi taravatu utua karadia idia koua totona. Taunimanima be taravatu utua taudia ai do idia lao dalana, dahaka ese do ia koua?

Taravatu utua karana ita laloa neganai, ita be kara maoro ita laloa danu. Ita diba vadaeni ala-ala, hahine hadikaia, bona ma dagedage karadia haida be taravatu utua karadia. To takisi ena pepa ita torea koikoi be edena bamona? Unai kara danu be taravatu utua karana badina unai be hereva momokani lasi. Taravatu utua karana ita hadokoa momokani totona, namona be kara maoro idia hadikaia karadia iboudiai ita negea.

Bible ena haheitalai toi ita laloa. Idia be taravatu utua karana ena badina idia hahedinaraia sibona lasi, to unai kara koua dalana momokani idia hahedinaraia.

Dirava Gari Henia Karana ese Mama Ia Koua

Mani salamo ia torea tauna, Asaf, ena hereva oi laloa: “Kara dika taudia edia taga lau itaia neganai, hekokoroku taudia lau mama henidia.” (Salamo 73:3) Oibe, taravatu utua tauna ena kohu bada bona ena mauri dalana dainai idia mama neganai, momo be taravatu utua karana idia karaia. Televisen dekenai bona niuspepa dekenai, taravatu utua karadia idia abia isi dainai, taunimanima momo idia laloa unai kara be hegeregere bona idia dadaraia lasi to idia laloa ia be kara dikana momokanina ta lasi.

To, Dirava ese Hereva Lada-isidia ia torea tauna ia veria inai hagoadaia hereva ia torea totona: “Namo lasi oiemu lalona ese kara dika taudia ia mama henidia, to dina ibounai lalonai Iehova oi gari henia.” Taravatu utua karadia edia hekwakwanai idia vara badina be taunimanima edia ura bona edia hegahusi dainai. Unai kara koua dalana namona be Iehova Dirava gari henia karana ita habadaia. “Momokani, unai bamona oi noho neganai, vaira dinadia do idia noho oi dekenai, bona oiemu helaro be do ia doko lasi.”​—Hereva Lada-isidia 23:​17, 18.

Abidadama ese Mataganigani Ia Koua

Lagani 33 C.E. ia matamaia neganai, Iesu be Ieriko hanua dekenai ia lao. Unai be Sakaio ena hanua. Sivarai Namona ia torea tauna ta, Luka, ese ia gwauraia inai bamona: “Takisi gogoa taudia edia biaguna ta, ia danu kohu momo tauna.” Ieriko distrik ena tano be namo herea badina tubutubu gaudia idia tubu namo dainai. Unai dainai, unai be gabu namona taunimanima edia moni idia takisi henia totona. Bona Sakaio ena hereva hegeregerena, iena gaukara be takisi gogoa tauna badana dainai, ia dekenai dala ia kehoa, dagedage dala amo, taunimanima edia moni ia abia totona. To Sakaio be taravatu utua karana ia rakatania.​—Luka 19:​1-8.

Sakaio ia heau bona Iesu idia kamonai henia taunimanima hutuma edia vairanai ia hanai, bona ia be tau kwadogi dainai, fig-mulberry auna dekenai ia daekau, Iesu ia itaia namonamo totona. Iesu ese Sakaio ia itaia bona ia hadibaia ia diho, badina Ieriko dekenai ia noho neganai, ia be iena ruma dekenai do ia mahuta. Gabeai, Sakaio ena hereva ese ia hahedinaraia iena lalohadai ia haidaua: “Egu kohu haida be ogogami taudia dekenai do lau henia. Bona ena kohu lau abia kava tauna be nega 4 do lau henia lou.” Dagedage dala amo moni ia abia koikoi, ia henia lou totona be hekwarahi bada herea. To inai bamona ia gwauhamata neganai, Sakaio ia hahedinaraia Iesu ia abidadama henia. Oibe, iena lalohadai ia haidaua neganai, kara ta amo ia hamomokania, ia ese kerere dalana amo ia abia kohu ia henia lou, bona ma nega toi amo ia habadaia, unai ibounai be nega 4 amo ia henia lou. Unai dainai, Sakaio ese iena kerere karana ia hamaoromaoroa, bona unai sibona lasi, to iena mauri dalana ia haidaua ia hamomokania danu.​—2 Korinto 7:11.

Taunimanima Ita Laloa Bada, Kohu Ita Laloa Bada Lasi

Iesu idia samania neganai, Roma gavamani tauna, Pilato, ia gwau: “Kerere ta lau davaria lasi inai tau dekenai.” (Luka 23:4) Ia be tanobada dekenai iena hesiai gaukara ia karaia neganai, ia be kohu ia abia totona, taravatu ia utua lasi, to Iesu be taunimanima dekenai lalokau karana ia hahedinaraia. “Taunimanima hutuma ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona. Vadaeni ia ese ena diba tahua taudia dekenai ia hamaoroa, ia gwau, ‘Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.’ ” (Mataio 9:​36-38) Momokani, Iesu be taunimanima ia laloa guna, sibona ena ura ia atoa gabeai, bona kohu ia laloa bada lasi. Unai bamona danu ia karaia ia dekenai idia mai taudia dekenai. Hahediba taudia bona hutuma taudia hadibaia hereva bona heduru idia kamonai totona idia mai taudia unai. (Mataio 8:20; 14:​13-16) Unai kara dekenai, Iesu be haheitalai ia karaia ita tohotohoa totona.​—1 Petero 2:21.

Hari inai negai, taunimanima be unai bamona idia karaia diba, a? Taunimanima idia laloa bada diba, to kohu idia laloa bada lasi, a? Io, idia karaia diba. Iehova ena Witness taudia oi laloa. Idia iboudiai be 3,700,000 bamona. Idia be Keriso ena lalona bamona idia laloa bona idia ura edia kara amo unai idia hahedinaraia. Idia be hanaihanai idia gaukara, sibodia edia kudou amo hegahusi dikadia idia kokia totona. Unai hegahusi ese taunimanima momo ia veridia idia ese taravatu idia utua totona. Witness taudia ai idia do lao lasi neganai, Bible idia stadilaia bona Dirava dekenai edia lalokau idia habadaia, bona unai dainai idia haida, guna taravatu idia utua, to edia kudou ia hamarerea bona ia veridia idia be taravatu idia utua dainai idia henaoa gaudia idia henia lou. Ita gwau lasi, idia karaia taunimanima vairanai idia heagilaia totona, to idia ura Iehova Dirava dekenai maino ena turana karaia karana idia karaia, bona unai amo iena hariharibada, Iesu Keriso ena boubou gauna amo ia hedinarai gauna, idia mamia diba.​—1 Korinto 2:16; 6:11; 2 Korinto 5:​18-20.

Edia dekena taudia idia lalokau henidia dainai, unai bamona Keristen taudia be nega idia atoa, ma taunimanima haida idia vadivadi henidia bona idia hadibaia edena bamona edia ruma bese be Dirava ena Basileia henunai Paradaiso idia moalelaia diba. Wiki iboudiai, Iehova ena Witness taudia be hanaihanai edia Kingdom Hall gabudiai hebou idia karaia. Sibona ena kerere ia gwauraia hedinarai henao tauna ta be unai hebou ta ia lao henia. Ia gwau: “Lau hoa bada. Lau laloa do lau moalelaia lasi bona do lau hesiku, to ia be unai bamona lasi. Edia lalokau bona kara namo ia hedinarai momokani. Bona Witness taudia be lauma gaudia idia laloa bada momokani.” Ia hoa bada dainai, idia dekenai ia hebamo noho, bona unai ese ia durua iena kara gunana ia rakatania totona. Herevana oi be guna taravatu oi utua eiava lasi, Dirava ena hesiai taudia ida oi hebamo neganai, oi danu be taunimanima do oi laloa bada, bona kohu do oi laloa maragi.​—Mataio 22:39.

Taravatu Utua Kara​—Idia Koua Vadaeni, A?

Bema taunimanima be taravatu utua kara idia rakatania, anina be idia goevadae, a? Lasi momokani! Iehova ena Witness taudia, taunimanima iboudiai hegeregeredia, be iseda tamana ginigunana, Adam, ena amo kara dika idia abia. (Roma 5:12; 1 Ioane 1:8) To idia be lalo-tamona dekenai Dirava idia hesiai henia, edia haroro bona hadibaia gaukara tanobada hegegemadai ese ia hahedinaraia hegeregerena. Inai ese Isaia ena peroveta hereva ia hamomokania “Dina gabedia ai inai bamona do ia vara: Iehova ena dubu ororona be atai herea ororona dekenai do idia atoa, bona ororo maragidia atai ai do idia abia isi. Bese iboudiai ese do idia lao henia.” (Isaia 2:2) Momokani, taunimanima milion momo be Iehova ena tomadiho hereana dekenai idia lao, iena dala idia diba totona. Oi danu be heduru oi abia diba bema taravatu utua kara idia dadaraia taudia ida oi hebamo neganai.

Iseda Helaro Taravatu Utua Kara Koua Dalana Dekenai

Iseda nega lalonai, taravatu utua kara idia momo ai idia lao dainai, Dirava be kahirakahira kara dika taudia iboudiai, taravatu utua karadia idia gunalaia taudia danu do ia kokidia. “Badina kara dika taudia be do idia ore . . . Nega sisina murinai, kara dika tauna do ia ore; ena gabu do oi tahua, to do oi davaria lasi.” (Salamo 37:​9, 10) Kahirakahira taravatu utua kara do ia ore badina ita be taravatu utua tauna ginigunana, Satana Diabolo, ena guia bona guri dekenai idia negea ena nega kahirakahira dekenai ita noho. (Apokalupo 20:​1-3) Ita moale bada badina ita diba taravatu utua karadia ese idia havaraia gari bona hisihisi be kahirakahira do idia ore!

To, tanobada dekenai do idia toreisi lou mauri taudia milion momo be edena bamona? (Kara 24:15) Bema edia kara gunadia do idia karaia lou, idia do mase lasi neganai hegeregerena, idia be taravatu utua karana do idia havaraia lou, ani? Unai totona do ita gari lasi. Iesu be henao tauna ta dekenai toreisi lou ia gwauhamatalaia, ia gwau: “Momokani, hari dina oi lau hamaoroa, Oi be lau danu Paradaiso dekenai do ita noho.” (Luka 23:​43, NW) Inai ese ia hahedinaraia momokani, toreisi lou taudia be kara do idia haidaua be namo; bema lasi, tanobada matamata be paradaiso ai do ia lao lasi.

Idia be taunimanima iboudiai ida do idia noho hebou lou lasi neganai, taravatu utua idia karaia momo taudia idia hadibaia guna, idia be hekwakwanai idia havaraia lou garina. Unai hegeregerena, Dirava ena Basileia henunai, hadibaia gaukara bada idia karaia guna, taunimanima be taravatu badinaia taudia ai idia lao totona. (Apokalupo 20:​12, 13) Paradaiso dekenai do idia noho taudia be Dirava ena taravatu do idia badinaia; unai dainai, toreisi lou taudia be do idia noho namonamo diba, kohu bona aniani do idia hegeregere. (Isaia 65:​21-23) Hahemaoro maoromaoro lohia taudia do idia noho, bona idia kara dika loulou taudia be edia mauri do idia haboioa. (Isaia 32:1; 65:20) Unai dainai, do ita abia dae diba momokani, taravatu utua karadia do idia ore.

Ena be ita be taravatu utua tanobadana lalonai ita noho, oi be Iehova dekenai oi abidadama henia diba; ia gwauhamata iena abidadama hesiai taudia be Paradaiso lalonai, mauri goevadaena do idia abia. Hari oi abidadama henia be namo; Iehova ena Witness taudia be davana lasi, oiemu ruma dekenai, oi dekenai Bible do idia stadilaia. (Ioane 17:3) Idia oi davaria neganai, idia dekenai oi henanadai be namo, ani? Eiava inai magasin ena rau 2 dekenai idia torea address dekenai revareva oi siaia diba. Oi hekwarahi bada be mai anina, badina kahirakahira taravatu utua karadia do idia ore!

[Picture on page 5]

Sakaio ena abidadama dainai, dagedage dalana amo, taunimanima edia amo ia veria monina ia henia lou

[Picture on page 7]

Hadibaia gaukara badana ese Dirava ena Basileia henunai do idia noho taudia be do ia hadibaia namonamo idia be taravatu idia badinaia totona