Aramagedono Ia Mai Kahirakahira Ita Dibaia Dalana

OI DIBA toa be dahaka, ani?— Karoa 46 ai, Dirava ia gwauhamata abata amo tanobada do ia hadikaia lou lasi ena sivarai ita duahia. Danu, aposetolo taudia be Iesu ena giroa mai bona tanobada dokona ena toana idia diba totona idia henanadai.​—Mataio 24:3.

Iesu be guba dekenai do ia noho dainai, taunimanima ese idia itaia diba toa ta ia hahedinaraia be namo, unai amo do idia diba ia lohia matamaia vadaeni. Unai dainai Iesu be tanobada ai do idia vara gaudia be iena hahediba taudia dekenai ia gwauraia. Unai gaudia idia vara neganai, anina be ia giroa mai bona guba ai ia lohia matamaia vadaeni, King ta bamona.

Iesu be ena hahediba taudia dekenai gima noho karana ena anina bada ia hahedinaraia totona, idia ia hamaoroa: “Fig auna bona au ibounai do umui itaia. Edia rauna matamata idia tubu daekau umui itaia, vadaeni umui diba lahara ia kahirakahira vadaeni.” Gau haida amo oi itaia diba siahu negana ia kahirakahira. Bona Iesu ia gwauraia gaudia idia vara oi itaia neganai, oi diba Aramagedono ia kahirakahira.​—Luka 21:​29, 30.

Iesu ia gwauraia toa idauidau edia laulau be inai rau bona murina rau dekenai oi itaia diba, idia hahedinaraia Dirava ena Basileia be ia kahirakahira. Unai ibounai idia vara neganai, Dirava ena Basileia mai ena Lohia Tauna, Keriso, ese inai gavamani ibounai do idia hamakohia ore, Karoa 46 dekenai ita duahia bamona.

Unai dainai rau 245 bona 246 dekenai idia noho laulau oi itaia namonamo bona do ita herevalaia. Unai laulau dekenai oi itaia gaudia be Mataio 24:​6-​14 bona Luka 21:​9-​11 dekenai oi duahia diba. Danu, laulau badinai idia noho namba maragidia oi itaia. Unai laulau ia herevalaia paragraf ena matamanai unai namba tamona ia noho. Mani ita itaia bema Iesu ese ia gwauraia toa idauidau be hari idia guguru.

(1) Iesu ia gwau: “Umui be tuari ena regena, bona tuari ena sivarai do umui kamonai . . . bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia.” Tuari ena sivarai oi kamonai, a?— Lagani 1914 amo ela bona lagani 1918 Tanobada Tuarina Ginigunana idia tuarilaia, bena lagani 1939 amo ela bona lagani 1945 be Tanobada Tuarina Iharuana. Gunaguna tanobada ibounai lalonai tuari idia karaia lasi! Hari tanobada ibounai dekenai tuari ia vara. Dina ibounai televisen, reidio, bona niuspepa dekenai tuari ena sivarai ita kamonai eiava duahia.

(2) Danu, Iesu ia gwau: “Gabu idauidau dekenai hitolo bada do ia vara.” Reana oi diba vadaeni, taunimanima haida dekenai aniani be hegeregere lasi. Dina ta ta ai taunimanima tausen momo idia mase badina aniani be hegeregere lasi.

(3) Iesu ma ia gwau: “Gabu ibounai dekenai . . . ta ta dekenai do ia hanaia gorerena do idia vara.” Ta ta dekenai ia hanaia gorere oi diba, a?— Unai gorere haida ese taunimanima momo ia hamasedia. Hanaia gorere badana ta ena ladana be Spanish flu, lagani tamona bamona lalonai taunimanima 20 milioni ia hamasea. Hari inai nega lalonai taunimanima momo reana unai namba ia hanaia be AIDS gorere dainai idia mase. Bona lagani ta ta ai kensa, kudou gorerena bona ma gorere haida ese taunimanima tausen momo idia hamasea.

(4) Iesu ese toa ma ta ia gwauraia: “Gabu idauidau dekenai . . . tano danu do ia mareremarere.” Tano mareremarere dainai idia vara gaudia oi diba, a?— Tano mareremarere ese ruma momo ia hamorudia bona taunimanima ia hamasedia danu. Lagani 1914 amo ema bona hari, lagani ta ta ai tano mareremarere momo idia vara. Tano mareremarere ena sivarai oi kamonai, a?—

(5) Iesu ia gwau ena toa ma ta be ‘kara dikadia do idia bada daekau.’ Unai dainai henaohenao bona dagedage karadia be bada herea. Gabu ibounai taunimanima idia gari badina henaohenao tauna ta be edia ruma ia makohia garina. Gunaguna tanobada ena kahana ibounai dekenai taravatu utua karadia bona dagedage karadia be bada lasi, hari bamona.

(6) Iesu ese mai anina bada toa ta ia gwauraia: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Bema unai “sivarai namona” oi abia dae, vadaeni ma haida dekenai unai oi herevalaia be namo. Unai dala amo unai toa ena guguru dalana oi durua diba.

Reana taunimanima haida idia gwau Iesu ese ia gwauraia toa be hanaihanai idia vara. To gunaguna tanobada ena kahana momo dekenai unai bamona gau ibounai be nega tamona idia vara lasi. Unai dainai unai toa idauidau idia vara ena badina oi lalo-pararalaia, a?— Anina be unai gaudia ibounai idia vara ita itaia neganai, ita diba kahirakahira inai tanobada dikana ena gabu be Dirava ena tanobada matamatana ese do ia abia.

Iesu ese unai toa ia gwauraia neganai, keru negana ia gwauraia danu. Ia gwau: “Do umui guriguri, keru neganai . . . do umui heau lasi.” (Mataio 24:20) Oi laloa ena hereva ena anina be dahaka?—

Keru negana ai, medu bona aisi dainai ia auka laolao totona, to bema unai bamona nega ai tau ta be dika ia davaria lasi totona ia heau, dahaka ia vara diba?— Reana do ia hekwarahi bada. Bema tau ta be gau ma haida dekenai ia bisi bada dainai ena laolao ia hamatamaia lasi bona unai bamona nega ai ia mase, madi, unai be lalohisihisi gauna.—

Iesu ia gwau do idia naria lasi ela bona keru negana bena idia heau, ena hereva ena anina oi lalo-pararalaia, a?— Ita diba Aramagedono be ia kahirakahira dainai, namo lasi ita naria, to Dirava hesiai henia karana amo do ita hamomokania Ia ita lalokau henia. Bema gabeai Ia ita hesiai henia totona ita naria, reana do ita leiti garina. Unai dainai ita be Abata bada negana ai idia noho taudia bamona, idia ese Noa ia gwauraia hadibaia herevana idia kamonai, to lagatoi lalonai idia vareai lasi.

Aramagedono ia ore murinai do ia vara gauna mani ita herevalaia. Ita, hari inai negai Dirava ita lalokau henia bona tomadiho henia taudia totona Dirava ese ia hegaegaelaia gauna do ita dibaia.