KAROA 3

“Lauma Helaga amo Idia Honu”

Pentekoste ai lauma helaga ia diho neganai, idia vara gaudia

1. Pentekoste dinana ai idia vara gaudia herevalaia.

IERUSALEMA ena strit dekenai taunimanima be idia moale bada.a Kwalahu be dubu helaga ena boubou patana amo ia daekau lalonai, Levi taudia be Iehova hanamoa anedia idia abia. (Salamo 113 ia lao 118) Bona strit ai vadivadi taudia be momo herea. Gabu daudau amo idia mai, hegeregere Elama, Mesopotamia, Kapadokia, Ponto, Aigupito, bona Roma.b Dahaka dainai idia mai? Pentekoste eiava idia gwauraia “uma ena anina ginigunadia haboua dinana” moalelaia totona. (Num. 28:26) Unai aria be bali gogoa gaukarana ia ore, bona witi gogoa gaukarana ia matamaia neganai idia karaia. Unai be moale bada dinana.

Mapu ese Pentecost 33 C.E. ai sivarai namona idia kamonai taudia edia gabu ia hahedinaraia 1. Gabu: Libia, Aigupito, Etiopia, Bitunia, Ponto, Kapadokia, Iudea, Mesopotamia, Babulonia, Elama, Media, bona Patia. 2. Siti: Roma, Alesandria, Memepisi, Antioka (Suria ena), Ierusalema, bona Babulonia. 3. Davara gabudia: Meditereinien Davarana, Black Davarana, Davara Kakakaka, Caspian Davarana, bona Persia Davarana.

IERUSALEMA—IUDA TOMADIHONA IA NOHO GABUNA

Kara bukana ena karoa ginigunadia lalonai, Ierusalema ai idia vara gaudia ia herevalaia. Unai hanua be Iudea ena ororo ataiai ia noho, bona ia be 55 kilomita Meditereinien Davarana ena ist kahanai ia noho. Lagani 1070 B.C.E. ai, King Davida be tuari lalonai ia kwalimu bona Siona Ororona ai ia gini kohoro badana ia abia, bona unai ororo badinai idia haginia siti be Israela besena ena hanua badana ai ia lao.

Siona Ororona ena badinai be Moraia Ororona ia noho, bona idaunegai Iuda taudia edia sivarai hegeregerena, unuseniai lagani 1,900 gunanai—Kara bukana ese idia gwauraia gaudia idia do vara lasi neganai—Aberahamo ese Isako ia bouboulaia toho. Solomona ese Iehova ena dubu helaga ginigunana be Moraia Ororona ai ia haginia neganai, unai ororo be Israela hanua ena kahana ta ai ia lao. Iuda taudia edia tomadiho karadia bona dina ta ta gaukaradia be unai dubu helaga lalonai bona badinai idia karaia.

Tanobada ena gabu idauidau ai idia noho Iuda taudia be hanaihanai Iehova ena dubu helaga dekenai idia lao, boubou gaudia idia henia, idia tomadiho, bona aria idia karaia totona. Unai bamona idia karaia neganai, Dirava ena hahegani idia badinaia, ia gwau: “Lagani ta lalonai, emui tatau bona memero ibounai be Iehova emui Dirava ese ia abia hidi gabuna ai, nega toi iena vairanai do idia mai.” (Deu. 16:16) Danu, Ierusalema ai, Iuda ena kota badana ia noho. Unai kota be mai ena siahu komiuniti, gavamani bona tomadiho dekenai.

2. Pentekoste 33 C.E. ai, dahaka hoa gaudia idia vara?

² Lagani 33 C.E., daba nain oklok ai ia vara gauna be taunimanima ese lagani momo lalonai do idia laloatao. Karaharaga, “guba amo rege ta ia mai, ia be lai bada ia toa regena bamona.” (Kara 2:2) Bona unai regena ese hahediba taudia 120 idia helai rumana ia hahonua. Gabeai, hoa gauna ma ta ia vara. Lahi hururu, malana ena toana bamona idia itaia hahediba taudia ta ta edia kwarana latanai idia diho. Bena, hahediba taudia be “lauma helaga amo idia honu” bona gado idauidau ai idia hereva matamaia! Hahediba taudia be hebou rumana idia rakatania, bona Ierusalema ena dala ai vadivadi taudia idia davaria neganai, edia gado ai idia haroro henidia bona idia hoa bada! Momokani, “edia gado ai idia hereva” neganai unai taudia idia kamonai.—Kara 2:1-6.

3. (a) Dahaka dainai Pentekoste 33 C.E. ai idia vara gaudia be mai anina bada tomadiho momokani lalonai? (b) Edena dala ai Petero ena hereva be, “Basileia ena ki” gaukaralaia karana ida ia hegeregere?

³ Iehova ena tomadiho momokani lalonai unai sivarai be mai anina bada badina lauma Israela besena—horoa Keristani kongrigeisen unai—ia matamaia dalana ia hahedinaraia. (Gal. 6:16) To gau ma haida idia vara danu. Petero ese unai dina ai hutuma ia hereva henidia neganai, ia ese “Basileia ena ki” toi amo ki ginigunana ia gaukaralaia, unai ki ta ta be orea idauidau ese hahenamo idia abia dalana ia kehoa. (Mat. 16:18, 19) Ki ginigunana ese dala ia kehoa, Iuda bona Iuda tomadihona idia abia dae taudia ese sivarai namona idia abia dae bona Dirava ese ena lauma helaga amo ia horoa totona.c Unai dainai idia be lauma Israela ena kahana ai do idia lao, bona Mesia Basileiana lalonai king bona hahelaga gaukarana ena hahenamo do idia abia. (Apok. 5:9, 10) Gabeai, Samaria bona Idau Bese Taudia danu ese unai hahenamo do idia abia. Hari Keristani taudia be Pentekoste 33 C.E. ai idia vara gaudia amo dahaka idia dibaia?

“Ibounai be Gabu Tamona Dekenai Idia Haboua” (Kara 2:1-4)

4. Hari ia noho Keristani kongrigeisen bona lagani 33 C.E. ai ia noho kongrigeisen be edena dala ai idia hegeregere?

⁴ Keristani kongrigeisen be hahediba taudia 120 amo ia matamaia, “ibounai be gabu tamona dekenai idia haboua”—atai daiutuna ai—bona lauma helaga ese ia horodia. (Kara 2:1) Unai dina ai, kongrigeisen lalonai taunimanima tausen momo be bapatiso idia abia. Unai be orea ia tubu ena matamana, ema bona hari orea be ia do tubu daekau noho! Oibe, hari inai negai, Dirava idia gari henia tatau bona hahine ese “Basileia ena sivarai namona be tanobada ibounai dekenai . . . idia harorolaia” vadaeni, “bese ibounai idia kamonai totona.” Bena dokona do ia ginidae.—Mat. 24:14.

5. Keristani ginigunadia bona hari Keristani taudia ese kongrigeisen bamoa karana amo, dahaka hahenamo idia davaria?

⁵ Danu, Keristani kongrigeisen be goada abia gabuna, horoa taudia bona “mamoe ma haida” totona. (Ioa. 10:16) Paulo ese Keristani kongrigeisen taudia edia heduru heheni karana ia laloa bada dainai, Roma Keristani taudia ia tore henidia neganai, ia gwau: “Lau ura bada umui lau itaia, bona Dirava amo ia mai harihari gauna be umui dekenai lau henia, do umui gini goada totona. Eiava ta ta do ita hagoadaia, umui emui abidadama amo lau umui hagoadaia bona egu abidadama amo umui do lau hagoadaia.”—Roma 1:11, 12.

ROMA—BASILEIA IA NOHO GABUNA

Kara bukana idia torea negana lalonai, Roma be unai negai ia noho basileia badana bona politikol siahu bada ia dogoatao. Britain amo ia lao North Africa bona Atlantic Davarana amo ela bona Persia Davarana ia lohiaia.

Roma ai bese, gado, bona kastom karadia o lalohadai idauidau idia abia dae taudia idia noho. Dala momo be Roma dekenai ia lao dainai, gabu idauidau amo idia mai loaloa taudia bona hoihoi taudia be unai gabu dekenai idia lao. Ostia be Roma kahirakahira ia noho bouti atoa gabuna, unuseni idia lao bouti ese aniani bona dava bada kohudia idia atoa bona Roma dekenai idia siaia lao.

Keristani ginigunadia edia nega lalonai, taunimanima milioni be Roma dekenai idia noho. Unai gabu ena popiuleisen kahana be igui hesiai taudia, hegeregere raskol taudia, tama sina ese idia dadaraia o hoihoilaia natudia, bona Roma taudia ese tuari ai idia abia mauri dibura taudia idia noho. Lagani 63 B.C.E. ai, Roma ena ami jeneral, Pompey, ese Ierusalema ia hadikaia neganai, Roma dekenai idia abia lao igui hesiai taudia huanai Iuda taudia idia noho danu.

Unai hanua ai momo be ogogami taudia, idia momo be bildin badana ta lalonai idia noho, bona Roma ena gavamani amo edia dabu gaudia idia abia. To, edia pavapava be ruma badadia mai hairaidia lalonai idia noho. Danu, taoni ai drama rumadia bona steidiam badadia idia noho, bona hutuma hamoalea totona unuseniai dagedage gadaradia bona kariota heau helulu idia karaia.

6, 7. Hari, Keristani kongrigeisen ese edena dala ai Iesu ena hahegani idia hagugurua?

⁶ Hari Keristani kongrigeisen edia tahua gauna be Keristani taudia ginigunadia edia hegeregerena. Iesu ese ena hahediba taudia dekenai ia henia gaukarana be mai ena hekwarahi, to mai ena moale danu. Iesu ese ia hamaorodia, ia gwau: “Bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui dekenai lau henia hahegani ibounai idia badinaia totona.”—Mat. 28:19, 20.

⁷ Hari inai negai, Iehova ese Keristani kongrigeisen amo unai gaukara ia hagugurua. Momokani, gado idauidau taudia ita haroro henidia be mai ena hekwarahi. To, Iehova ena Witnes taudia ese Baibel buka bona magasin be gado 1,000 mai kahana lalonai idia halasia. Bema hanaihanai Keristani kongrigeisen ida haroro bona hahediba taudia halaoa gaukarana oi karaia goadagoada noho, oi moale. Hari, tanobada ai haida sibona ese Iehova ena ladana harorolaia guguru ena hahenamo idia abia, bona oi be unai taudia huanai oi noho!

8. Dahaka heduru be Keristani kongrigeisen lalonai ita abia?

⁸ Inai nega aukadia lalonai, mai moale ida oi haheauka totona, Iehova Dirava ese tanobada hegegemadai tadikaka oreana ia henia. Paulo ese Heberu Keristani taudia ia tore henidia, ia gwau: “Bona namona be ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia. Iseda hebou karana ita rakatania lasi, haida ese idia karaia bamona, to ita hagoadaia heheni, bona unai kara do ita habadaia noho, badina umui itaia dina be ia kahirakahira noho.” (Heb. 10:24, 25) Keristani kongrigeisen be Iehova ena harihari gauna, unai amo kongrigeisen lalonai haida oi hagoadaia diba bona idia danu ese oi idia hagoadaia diba. Emu Keristani tadikaka taihu kahirakahira oi noho. Keristani heboudia lao karana oi hadokoa lasi!

“Idia Ta Ta Idia Kamonai Hahediba Taudia be Edia Gado ai Idia Hereva” (Kara 2:5-13)

Iesu ena hahediba taudia be strit ai Iuda bona Iuda tomadiho idia abia dae taudia idia haroro henidia. — “Ita kamonai idia be eda gado korikori ai Dirava ena kara badadia idia herevalaia.”—Kara 2:11

9, 10. Haida ese edena dala ai sibodia idia henia gado idau taudia idia durua?

⁹ Pentekoste 33 C.E. ai, Iuda bona Iuda tomadiho idia badinaia taudia huanai ia vara moalena, mani oi laloa. Idia momo be Grik eiava Heberu gado idia herevalaia taudia. To “idia kamonai hahediba taudia be idia edia gado ai idia hereva.” (Kara 2:6) Momokani, edia gado korikorina ai idia kamonai sivarai namona ese edia kudouna ia hamarerea bada. Oibe, hari idia noho Keristani taudia be hoa dalanai gado ma ta idia herevalaia lasi. To idia noho hegaegae Basileia ena sivarai be bese ibounai dekenai idia harorolaia totona. Edena dala ai? Haida be gado matamata idia dibaia, unai amo edia gabu ai ia noho idau gado kongrigeisen idia durua o tano ma ta dekenai idia lao diba. Nega momo kamonai taudia idia hoa, badina idia itaia haida idia hekwarahi edia gado idia dibaia totona.

¹⁰ Christine mani ita laloa, ia bona tadikaka taihu seven be Gujarati gado kosi idia abia. Bona ena gaukara gabuna ai, Gujarati gado ia hereva hahine be ena gado ai ia hanamoa. Unai hahine ia hoa bona ia ura diba dahaka dainai Christine ia hekwarahi unai Gujarati gado aukana ia dibaia totona. Unai dala amo Christine ese unai hahine ia haroro henia. Unai hahine ese Christine ia hamaoroa: “Toana be oi ura mai anina bada gauna ta oi herevalaia.”

11. Edena dala ai ita ese gado idau taudia dekenai Basileia sivarai harorolaia totona ita hegaegae diba?

¹¹ Momokani, ita ibounai ese gado ma ta ita dibaia diba lasi. Herevana dahaka, to ita hegaegae bona Basileia ena sivarai be gado idauna idia herevalaia taudia dekenai ita gwauraia. Edena dala ai? Dala ta be, JW Language^® app amo emu teritori ai momo ese idia herevalaia gado ai hanamoa hereva oi dibaia. Danu, unai gado ena hereva haida oi dibaia, unai amo edia ura oi habadaia. Idia dekenai jw.org oi hadibaia, bona reana unai gado ai idia noho vidio bona pablikeisen haida oi hahedinaraia. Iseda haroro gaukara ai unai bamona tulu ita gaukaralaia neganai, Keristani ginigunadia ese idia abia moalena do ita mamia danu. Badina tano idau taudia “ta ta idia kamonai . . . edia gado ai” sivarai namona idia herevalaia neganai idia hoa bada.

IUDA TAUDIA—MESOPOTAMIA BONA AIGUPITO AI

Buka ta (175 B.C.–A.D. 135-The History of the Jewish People in the Age of Jesus Christ) ia gwau: “[Israela ena] iduhu 10 basileia, bona Iuda basileia amo idia vara taudia be Mesopotamia, Media, bona Babulonia ai idia noho, idia be Asuria bona Babulonia taudia ese unuseniai idia siaia lao.” Esera 2:64 ena hereva bamona, Israela taudia 42,360 sibona be Babulonia idia rakatania bona Ierusalema dekenai idia giroa lou. Unai be lagani 537 B.C.E. ai ia vara. Flavius Josephus ia gwau, Keristani ginigunadia edia negai, Iuda taudia tausen momo be “Babulonia ai idia noho.” Lagani 100 ia lao 500 C.E. murinai, unai taudia ese buka ta ladana, Babulonia Talmud, idia torea.

Hamomokania bukadia idia hahedinaraia, lagani 600 B.C.E. ena matamanai, Iuda taudia haida be Aigupito ai idia noho. Unai nega lalonai, Ieremia ese Aigupito ena gabu idauidau, bona Memepisi ai idia noho taudia dekenai danu, hereva ta ia siaia. (Ier. 44:1, ftn.) Toana be Iuda taudia momo herea be lagani 323-330 B.C.E ai Aigupito dekenai idia lao. Josephus ia gwau, Iuda taudia be Alesandria dekenai idia noho taudia ginigunadia. Gabeai, unai hanua ena kahana badana be idia dekenai idia henia. Keristani ginigunadia edia negai, Iuda toretore tauna, Philo, ia gwau, Iuda taudia milioni momo be Aigupito ena gabu momo ai idia noho, hegeregere “Libia amo ela bona Etiopia dekenai.”

“Petero . . . Ia Gini Tore” (Kara 2:14-37)

12. (a) Pentekoste 33 C.E. ai ia vara hoa gauna be Ioela ese edena bamona ia perovetalaia? (b) Dahaka dainai aposetolo taudia idia diba Ioela ena peroveta herevana be unai negai do ia guguru?

¹² “Petero . . . ia gini tore” gabu idauidau amo idia mai taunimanima hutuma ia hereva henidia totona. (Kara 2:14) Ibounai ia hamaoroa Dirava ese hoa dalanai hahediba taudia dekenai siahu ia henia gado idauidau ai idia hereva totona, unai amo Ioela ena peroveta herevana do ia guguru, ia gwau: “Lau ese egu lauma helaga be taunimanima ibounai latanai do lau bubua.” (Ioe. 2:28) Iesu be guba dekenai ia do lao lasi neganai, ena hahediba taudia ia hamaoroa: “Tamana do lau noia, ia ese umui dekenai heduru ma ta do ia henia.” Iesu ia hahedinaraia, unai durua tauna be “lauma helaga.”—Ioa. 14:16, 17.

13, 14. Edena dala ai Petero ese kamonai taudia edia lalona ia veria, bona edena dala ai ia ita tohotohoa diba?

¹³ Petero ena hereva dokonai, hutuma dekenai hereva metauna ia gwauraia: “Namona be Israela taudia ibounai idia diba momokani, inai Iesu, umui ese au dekenai umui kokoa kau tauna, be Dirava ese Lohiabada bona Keriso ai ia halaoa vadaeni.” (Kara 2:36) Momokani, Iesu be au dekenai idia kokoa kau neganai, Petero ena hereva idia kamonai taudia be idia noho lasi. To idia be unai bese amo dainai, idia danu be mai edia kerere. Petero be mai hemataurai ida Iuda taudia ia hereva henidia, bona edia kudouna ia veria. Ia ura ena kamonai taudia idia helalo-kerehai. To Petero idia kamonai henia taudia be idia badu, a? Lasi momokani! To ena hereva ese “edia kudouna ia gwadaia.” Unai dainai idia henanadai: “Dahaka ai karaia be namo?” Petero be mai hemataurai ida idia ia hereva henia dainai, unai ese idia momo edia kudouna ia hamarerea, bona idia helalo-kerehai.—Kara 2:37.

¹⁴ Petero bamona, iseda hereva ese taunimanima edia kudouna ia hamarerea be namo. Haroro gaukara ai, ena be ruma tauna ese hereva o lalohadai kereredia ia gwauraia, to namo lasi unai ibounai ita hamaoromaoroa. To ita lalotamona gaudia sibona ita herevalaia. Unai ese dala do ia kehoa Dirava ena Hereva amo ita durudia namonamo totona. Nega momo Baibel ena hereva momokani be unai bamona dala namona ai ita herevalaia neganai, kudou-maoro taudia ese iseda hereva do idia abia dae.

KERISTANI TOMADIHONA—PONTO AI

Pentekoste 33 C.E. ai, Petero ena haroro herevana idia kamonai taudia haida be Ponto hanua amo, unai hanua be Asia Minor ena not kahanai ia noho. (Kara 2:9) Toana be idia haida ese sivarai namona be edia hanua dekenai idia abia lao, badina Petero ena revareva ginigunana lalonai ia tore henia taudia be Ponto ena “gabu idauidau” dekenai idia noho abidadama taudia.f (1 Pet. 1:1) Iena revareva amo ia hahedinaraia, unai Keristani taudia be edia abidadama karana dainai, ‘hahetoho idauidau idia lalohisihisilaia.’ (1 Pet. 1:6) Hegeregere, dagedage bona hisihisi idia davaria.

Ponto ai idia noho Keristani taudia be dagedage idia davaria, badina Pliny, Roma provinsi rua—Bitunia bona Ponto—ia lohiaia tauna bona Pavapava Trajan edia revareva ese unai ia hahedinaraia. Lagani 112 C.E. bamona ai, Pliny ese Ponto amo ia torea revarevana ai ia gwau, Keristani tomadihona ese taunimanima ibounai edia mauri ia hadikaia. Haida ese Keristani taudia idia samania, bona Pliny ia ura idia ese edia Keristani ladana idia negea, bema lasi, do ia hamasedia. Bona bema Keristani tauna ta ese Keriso ia gwauraia dika eiava dirava idaudia o Trajan ena kaivakuku ia guriguri henia, ia do idia ruhaia. Pliny ia gwau, “Keristani taudia momokanidia ese unai gaudia idia karaia lasi.”

f Inai hereva, “gabu idauidau” be Grik herevana amo idia hahanaia, bona unai be Palestine ena hanua murimurinai idia noho Iuda taudia ia herevalaia. Unai ese ia hahedinaraia, Keristani tomadiho idia abia dae taudia ginigunadia be Iuda taudia.

“Bapatiso Umui Abia be Namo” (Kara 2:38-47)

15. (a) Petero be dahaka hereva ia gwauraia, bona unai amo dahaka ia vara? (b) Dahaka dainai Pentekoste dinana ai sivarai namona idia kamonai taudia tausen momo be unai dina tamona ai bapatiso idia abia?

¹⁵ Pentekoste 33 C.E. ai, Petero ese Iuda bona Iuda tomadiho idia badinaia taudia dekenai ia gwau: “Umui helalo-kerehai bona . . . bapatiso umui abia be namo.” (Kara 2:38) Unai dainai, taunimanima 3,000 bamona be Ierusalema o kahirakahira ai bapatiso idia abia.d Unai bapatiso be idia laloa namonamo lasi bona idia karaia kava, a? Unai sivarai dainai, Baibel stiuden taudia bona Keristani ruma bese ai idia bada natudia ese bapatiso idia abia kava sibona be maoro, a? Lasi! Laloatao, Pentekoste 33 C.E. ai idia bapatiso Iuda bona Iuda tomadihona idia abia dae taudia be Dirava ena Hereva idia stadilaia namonamo, bona idia be Iehova dekenai gwauhamata idia karaia besena. Danu, mai edia ura ida gabu daudau herea amo unai aria totona idia mai. Idia abia dae momokani, Iesu Keriso ena gaukara be Dirava ena ura ia hagugurua totona, unai dainai idia hegeregere Dirava idia hesiai henia totona—idia bapatiso bona Keriso murinai idia raka.

DAIDIA ESE IUDA TOMADIHONA IDIA ABIA DAE?

Pentekoste 33 C.E. ai, “Iuda taudia, bona Iuda tomadihona idia abia dae taudia” ese Petero ena hereva idia kamonai.—Kara 2:10.

Dina ta ta ai aniani hariharilaia totona idia abia hidi taudia ta be Nikolao ia be ‘Antioka amo bona Iuda tomadihona ia abia dae.’ (Kara 6:3-5) Iuda tomadihona idia abia dae taudia be Iuda lasi taudia. Unai dainai Iuda taudia edia mauri dalana ibounai idia badinaia, badina Israela taudia edia Dirava bona Taravatu idia abia dae, dirava idauidau ibounai idia dadaraia, kopina idia utua (bema idia be tatau), bona Israela besena idia bamoa.

Lagani 537 B.C.E. ai, Iuda taudia be Babulonia ena igui amo idia ruhaia murinai, idia momo edia noho gabudia be Israela tanona amo ia daudau, to Iuda tomadihona idia badinaia noho. Unai dainai, idia badinai idia noho taudia be Iuda tomadihona idia dibaia. Idaunegai toretore taudia hegeregere, Horace bona Seneca idia gwau, tano idauidau ai idia noho taudia ese Iuda taudia bona edia hahediba herevadia idia ura henia dainai, Iuda tomadihona idia abia dae.

16. Edena dala ai Keristani taudia ginigunadia ese sibona edia ura dadaraia karana idia hahedinaraia?

¹⁶ Momokani, Iehova ese unai taudia ia hanamoa. Baibel ia gwau: “Hahediba taudia matamatadia ibounai be idia noho hebou bona edia gau ibounai be ta ta ida idia haria, bona edia tano bona edia kohu ibounai idia hoihoilaia bona moni be ibounai dekenai idia haria, ta ta ena dabu gauna hegeregerena.”e (Kara 2:44, 45) Oibe, Keristani taudia korikoridia idia ura unai bamona haheitalai idia tohotohoa. Sibona iseda ura dadaraia lalokauna idia ura hahedinaraia.

17. Bapatiso ia ura abia tauna be dahaka dala haida ia badinaia guna be namo?

¹⁷ Ta be ia do gwauhamata bona bapatiso lasi neganai, Baibel ese ia gwauraia dala haida ia badinaia guna be namo. Dirava ena Hereva do ia dibaia. (Ioa. 17:3) Namona be ia abidadama bona mai momokani ida ia hahedinaraia ena kara gunadia amo ia helalo-kerehai. (Kara 3:19) Bena ena mauri ia haidaua momokani, bona Dirava ena ura ia badinaia matamaia be namo. (Roma 12:2; Efe. 4:23, 24) Unai murinai, guriguri amo Dirava dekenai ia gwauhamata bena ia bapatiso diba.—Mat. 16:24; 1 Pet. 3:21.

18. Keriso ena bapatiso hahediba taudia dekenai, dahaka hahenamo ia noho?

¹⁸ Iesu Keriso ena hahediba tauna ai oi lao totona, oi gwauhamata bona bapatiso vadaeni, a? Bema oibe, namona be inai hahenamo oi laloa bada. Hahediba taudia ginigunadia be lauma helaga amo idia honu hegeregerena, Iehova ese dala hereadaena ai oi do ia gaukaralaia sivarai namona oi harorolaia guguru bona Iena ura oi karaia totona!

a Inai maua, “Ierusalema—Iuda Tomadihona Ia Noho Gabuna” itaia.

b Inai maua, “Roma—Basileia Ia Noho Gabuna” bona “Iuda Taudia Mesopotamia Bona Aigupito Ai” bona “Keristani Tomadihona Ponto Ai” itaia.

c Inai maua, “Daidia ese Iuda Tomadihona Idia Abia Dae?” itaia.

d Unai hegeregerena August 7, 1993 ai, Iehova ena Witnes taudia edia intanesinol hebouhebou Kiev, Ukraine ai, taunimanima 7,402 be bapatiso idia abia. Unai bapatiso be hora rua bona miniti 15 lalonai idia karaia.

e Unai dala amo, Ierusalema dekenai Dirava tomadiho henia dala matamatadia dibaia totona idia mai vadivadi taudia edia dabu gaudia idia henia. Keristani taudia be sibona edia ura dainai edia gaudia idia haria, to ta ese idia ia doria dainai unai idia karaia lasi.—Kara 5:1-4.