Iehova Ena Ura Idia Badinaia

Petero be Pentekoste ai Ia Haroro

IA BE siahu matamaia negana ena daba namona lagani 33 C.E ai. Gabu be moale bada amo ia honu! Idia loaloa Iuda taudia bona Iuda tomadiho idia abia dae taudia hutuma ese Ierusalema ena dala idia hahonua. Idia be gabu idauidau amo idia mai, hegeregere Elama, Mesopotamia, Kapadokia, Aigupito, bona Roma amo. Edia dabua toana idauidau idia itaia bona edia gado idauidau idia kamonai idia moalelaia! Haida be kahirakahira kilomita 2,000 idia mai, unai dina namona idia moalelaia totona. Edena dina? Pentekoste​—Iuda taudia edia moale ariana, bali gogoa gaukarana ena dokona ia makaia totona.​—Levitiko 23:15-​21.

Dubu ena boubou patana dekenai idia gabua boubou gaudia amo kwalahu bada ia daekau, bona Levi taudia ese Hallel anena idia abia (Salamo 113 ia lao 118). Dabai 9 okaloka ia abia gwauraia neganai, hoa gauna ia vara. Guba amo regena ta ia diho mai, “lai bada ena regena hegeregere.” Ia ese Iesu Keriso ena hahediba taudia 120 idia hebou rumana ia hahonua. Baibel ia gwau: “Bona lahi ena malana hegeregere idia hedinarai. Inai malana be idia makohia kahana ta ta, bona unai taudia ta ta edia kwarana latanai idia diho mai. Vadaeni unai abidadama taudia ibounai be Lauma Helaga dekenai idia honu, bona gado idauidau dekenai idia hereva, Lauma Helaga ese idia dekenai ia henia hegeregere.”—Kara 2:1-4.

Idia Ta Ta ese Edia Gado Korikori Idia Kamonai

Daudau lasi murinai, hahediba taudia momo be ruma amo idia mai. Hoa gauna inai, idia ese taunimanima hutuma edia gado ta ta ai idia hereva diba! Mani edia hoa oi laloa, Parasa amo ia mai vadivadi tauna bona Aigupito tauna idia kamonai Galilea taudia be edia gado ai idia hereva neganai. Unai kara dainai, taunimanima idia hoa bada. Idia nanadaia: “Inai kara ena anina be dahaka?” Haida ese hahediba taudia idia kirikirilaia, idia gwau: “Idia be uaina matamata idia inua momo.”—Kara 2:12, 13.

Murinai aposetolo Petero ia gini toreisi bona taunimanima hutuma ia hereva henia. Ia hahedinaraia unai hoa dalanai idia abia gado idauidau ena harihari gauna ese Dirava ena gwauhamata peroveta tauna Ioela amo ia hagugurua, ia gwau: “Lauegu laumana dohore lau bubua diho, taunimanima ibounai dekenai.” (Kara 2:14-21; Ioela 2:​28-​32) Momokani, Dirava ese Iesu ena hahediba taudia latanai ena lauma helaga ia bubua diho unai. Unai ese ia hamomokania Iesu be mase amo ia toreisi lou vadaeni bona guba dekenai Dirava ena idiba kahanai ia helai noho. Petero ia gwau: “Unai dainai, Israela bese taudia ibounai idia diba momokani be namo, inai Iesu, satauro dekenai umui hamasea tauna, be Dirava ese Lohiabada bona Keriso ia halaoa vadaeni.”—Kara 2:22-36.

Kamonai taudia be dahaka idia laloa? Unai sivarai ia gwau: “Idia gari momo, idia ese Petero bona aposetolo taudia dekenai idia nanadaia, idia gwau, ‘Aiemai varavara taudia e, dahaka do ai karaia?’ ” Petero ia haere: “Umui ibounai ese emui lalona umui giroa bona bapatiso umui abia.” Taunimanima 3,000 bamona be unai idia karaia! Unai murinai, “nega ibounai idia haboua noho, aposetolo edia hadibaia herevadia idia kamonai totona.”—Kara 2:37-42.

Unai dina badana ai, hereva ia henia amo, Petero ese “guba Basileia ena ki” ginigunana ia gaukaralaia, Iesu ese guna ia gwauhamatalaia gauna unai. (Mataio 16:19) Unai ki ese taunimanima edia grup idauidau dekenai hahenamo bada idia kehoa. Unai ki ginigunana ese dala ia kehoa Iuda taudia be lauma amo ia horoa Keristani taudia ai idia lao totona. Murinai, ki iharuana bona ihatoina ese unai hahenamo be Samaria taudia bona Idau Bese taudia dekenai idia kehoa.​—Kara 8:​14-​17; 10:44-​48.

Ita Dibaia Gaudia

Ena be unai Iuda taudia bona Iuda tomadiho idia abia dae taudia ibounai be Dirava ena Natuna ena mase ena maduna idia huaia hebou, to Petero ese mai ena hemataurai ida ia hereva henidia, bona “varavara taudia” ia gwauraidia. (Kara 2:29) Ia ura edia lalona ia veria idia helalo-kerehai totona, ia ura lasi ia kota henidia. Unai dainai dala namona ai ia hereva henidia. Ia ese hereva ia gwauraia bona Baibel ena siri amo ia hamomokania.

Hari inai negai, sivarai namona idia harorolaia taudia ese Petero ena haheitalai idia tohotohoa be namo. Namona be idia ese kamonai taudia ida idia laloa tamona gauna idia tahua bena idia danu Baibel amo idia herevalaia. Baibel ena hereva momokani be lalona veria dalanai idia harorolaia neganai, kudou-maoro taudia ese do idia abia dae.​—Kara 13:48.

Pentekoste dinana ai, Petero ena goada bona gari lasi karana be pura 7 bamona gunanai, Iesu ia gorea negana amo ia idau momokani. Unai negai, Petero ese taunimanima ia gari henia dikadika. (Mataio 26:69-​75) To Iesu ese Petero dainai ia guriguri vadaeni. (Luka 22:31, 32) Reana toreisi lou murinai Iesu be Petero dekenai ia hedinarai ese unai aposetolo tauna ia hagoadaia. (1 Korinto 15:5) Unai dainai, Petero ena abidadama ia manoka lasi. Nega sisina murinai, mai gari lasi ida ia haroro noho. Vadaeni, Pentekoste dekenai sibona ia haroro lasi to iena mauri ibounai lalonai.

To, edena bamona bema ita be Petero bamona ita kerere? Namona be helalo-kerehai ena toana ita hahedinaraia, gwauatao totona ita guriguri, bona dala ita karaia lauma dalanai heduru ita abia totona. (Iamesi 5:​14-​16) Unai murinai gaukara ita goadalaia diba badina ita diba momokani iseda hebogahisi guba Tamana, Iehova, ese iseda gaukara helagana ia abia dae.​—Esodo 34:6.