Dahaka Dainai Dirava be mai Ena Orea?

1. Dahaka dainai Dirava ese idaunegai Israela taudia ia abia hidi, iena bese ai idia lao totona?

Dirava ese Aberahamo ena bese taudia ia haboua, bese tamona ai ia halaodia, bona taravatu ia henidia. Ia ese unai bese ladana ia hatoa “Israela”​—unai bese sibona ese tomadiho momokani bona Dirava ena Hereva ia gimaia. (Salamo 147:19, 20) Unai bese dainai, tanobada besedia ibounai ese hahenamo idia davaria.​—Genese 22:18 duahia.

Dirava ese Israela taudia ia abia hidi, bona iena witnes taudia eiava hereva hamomokania taudia ai ia halaodia. (Isaia 43:10, NW) Unai bese ena sivarai ese ia hamomokania, Dirava ena taravatu idia badinaia taudia be namo do idia davaria. (Deuteronomi 4:6) Danu, unai bese amo, taunimanima ma haida ese Dirava momokanina idia dibaia diba.​—Isaia 43:12 duahia.

2. Dahaka dainai hari Dirava ia ura Keristani taudia momokanidia idia lalotamona?

Gabeai, Dirava ese Israela besena ia dadaraia, bena unai bese ena gabu ai, Iehova ese Keristani kongrigeisen ia abia hidi. (Mataio 21:43; 23:37, 38) Hari inai negai, Israela taudia lasi, to Keristani taudia momokanidia be Iehova ena hereva hamomokania (o witnes) taudia.​—Kara 15:14, 17 duahia.

Iesu ese ia murinai idia raka taudia ia haboua, unai amo bese ibounai dekenai haroro bona hahediba gaukarana do idia karaia. (Mataio 10:7, 11; 24:14; 28:19, 20) Hari inai nega dokona ai, unai gaukara be ia bada ia lao noho. Inai be nega ginigunana, Iehova ese bese idauidau taudia milioni momo be tomadiho momokanina lalonai ia hatamonaia. (Apokalupo 7:9, 10) Keristani taudia momokanidia idia lalotamona dainai, ta ta idia hagoadaia bona durua diba. Ena be tano idauidau ai idia noho, to edia Keristani heboudia ai program tamona idia badinaia​—unai program lalonai, Baibel amo heduru idia abia.​—Heberu 10:24, 25 duahia.

3. Hari idia noho Iehova ena Witnes oreana be edena bamona ia hamatamaia?

Lagani 1870 lalodiai, Bible student taudia haida ese guna idia boio hereva momokani haida idia davaria matamaia. Idia laloparara Iesu ese Keristani kongrigeisen ia haboua, haroro gaukara idia karaia totona. Unai dainai, tanobada ibounai dekenai Basileia harorolaia gaukarana idia hamatamaia. Lagani 1931 ai, inai ladana, Iehova ena Witnes taudia, idia abia.​—Kara 1:8; 2:1, 4; 5:42 duahia.

4. Iehova ena Witnes taudia ese haroro gaukara be edena bamona idia haheaua?

Aposetolo edia negai, hakaua oreana (governing body) ta ese tano idauidau ai idia noho Keristani kongrigeisen ibounai ia naria. Unai orea lalonai idia noho tatau, lo elda taudia unai, idia abia dae Iesu be kongrigeisen ena Kwarana. (Kara 16:4, 5) Hari inai negai danu, Hakaua Oreana lalonai idia noho lo elda taudia ese tano idauidau ai idia noho Iehova ena Witnes taudia idia naria. Hakaua Oreana ese Iehova ena Witnes taudia edia brens ofesi ibounai ia naria. Unai brens ai idia gaukara taudia ese Baibel stadi bukadia be gado 600 mai kahana ai idia hahanaia, printaia, bona halasia. Danu, Hakaua Oreana ese tano idauidau ai idia noho kongrigeisen 100,000 mai kahana be Baibel amo ia hagoadaia bona hakaua. Unai kongrigeisen ta ta lalonai, lo tatau haida be elda o naria gaukarana idia karaia. Unai elda taudia be mai lalokau ida Dirava ena mamoe oreana idia naria.​—1 Petero 5:2, 3 duahia.

Iehova ena Witnes taudia be mai lalotamona ida, sivarai namona harorolaia bona hahediba taudia halaoa gaukarana idia karaia. Aposetolo taudia bamona, idia be ruma ta ruma ta dekenai idia haroro. (Kara 20:20) Danu, hereva momokani idia ura henia kudou-maoro taudia idia durua, Baibel amo diba idia abia totona. To, Iehova ena Witnes taudia be orea ta sibona lasi, idia be ruma bese badana ta bamona. Edia Tamana be tamona, bona ia be mai ena lalokau. Idia ibounai be tadikaka bona taihu, bona ta ta idia lalokau henia. (2 Tesalonika 1:3) Iehova ena Witnes taudia be mai lalotamona ida Dirava idia hamoalea bona ma haida idia durua dainai, inai tanobada ai, idia be ia moale ruma besena ta bamona.​—Salamo 33:12; Kara 20:35 duahia.