Iesu be Nega Ibounai Ia Kamonai

Nega ibounai emu tama sina oi kamonai henidia, a?​— Nega haida ia auka. Oi diba Iesu be Iehova bona iena tama sina ia kamonai henidia, a?​— Iesu ena haheitalai ese oi do ia durua emu tama sina oi kamonai henidia totona, ena be nega haida do ia auka. Mani ena sivarai ita itaia.

Iesu be tanobada ia do mai lasi neganai, ia be ena Tamana, Iehova, ida guba ai ia noho. To, tanobada ai Iesu be mai ena tama sina danu. Edia ladadia be Iosepa bona Maria. Iesu ena tama sina ai idia lao dalana oi diba, a?​—

Iehova be hoa karana ta ia karaia, unai amo Iesu be Maria ena bogana lalonai ia tubu, beibi haida be edia sinadia edia bogana lalonai idia tubu bamona. Hua 9 murinai, Iesu be tanobada ai ia vara. Unai dala amo Maria bona ena adavana, Iosepa, be tanobada ai Iesu ena tama sina ai idia lao.

Iesu ena mauri lagani be 12 neganai, ia karaia gauna ta ese ia hahedinaraia iena guba Tamana, Iehova, ia lalokau henia bada. Iesu bona ena famili be gabu daudau idia raka lao Ierusalema dekenai Pasova aria totona. To, edia hanua dekenai idia giroa lou noho lalonai, Iosepa bona Maria be Iesu idia itaia lasi. Oi diba ia be edeseniai, a?​—

Iosepa bona Maria be Ierusalema dekenai idia giroa lou haraga bona gabu ibounai dekenai Iesu idia tahua. Idia lalohekwarahi bada badina idia davaria lasi. To, dina toi murinai, dubu helaga lalonai idia davaria! Dahaka dainai Iesu be unuseniai idia davaria?​— Badina unuseniai iena Tamana, Iehova ia dibaia diba. Iehova ia lalokau henia bona ia ura Ia hamoalea dalana ia dibaia. Ena be Iesu be tau badana vadaeni, to hanaihanai Iehova ia kamonai henia. Danu, ena be unai ia karaia totona be auka bona hisihisi do ia davaria, to ia ese Iehova ia kamonai henia noho. Iesu be Iosepa bona Maria ia kamonai henia danu, a?​— Oibe, Baibel ia gwau idia ia kamonai henia.

Iesu ena sivarai amo dahaka oi diba?​— Ena be ia auka, to emu tama sina oi kamonai henia be namo. Unai bamona do oi karaia, a?​—