Mero Matamata Iesu

Iosepa bona Maria be Nasareta ai edia natudia memero bona kekeni ida idia noho, Iesu danu. Iosepa be kapenta gaukara ia karaia famili ia naria totona, bona Iehova bona iena Taravatu ia hadibaia danu. Famili be hanaihanai tomadiho totona sinagoga dekenai idia lao bona lagani ta ta ai Pasova totona Ierusalema dekenai idia lao.

Iesu ena mauri lagani be 12 neganai, lagani ta ta idia karaia bamona iena famili ida Ierusalema dekenai idia lao. Hutuma idia mai Pasova moalelaia totona. Unai murinai, Iosepa bona Maria be edia ruma dekenai idia giroa lou lalonai, idia laloa Iesu be grup huanai ia noho. To edia varavara huanai Iesu idia tahua neganai, ia idia davaria lasi.

Ierusalema dekenai idia giroa lou, bona dina toi lalonai, edia natuna mero idia tahua. Bena, dubu helaga dekenai idia lao. Iesu be hahediba taudia huanai ia helai, edia hereva ia kamonai namonamo bona henanadai namodia ia henia danu. Hahediba taudia be Iesu dekenai idia hoa bada dainai, henanadai idia henia. Bona iena haere dekenai idia hoa. Idia itaia ia be Iehova ena Taravatu ia lalopararalaia.

Iosepa bona Maria be ia totona idia lalohekwarahi bada. Maria ia gwau: ‘Egu natuna e, gabu ibounai dekenai oi ai tahua! Edeseni oi lao?’ Iesu ia gwau: ‘Umui laloparara lasi lau be egu Tamana ena ruma dekenai lau noho be namo, a?’

Iesu be ena tama sina ida Nasareta dekenai idia giroa lou. Iosepa ese Iesu dekenai kapenta gaukara ia hadibaia. Oi laloa Iesu be ia matamata neganai ia be edena bamona tauna? Ia tubu daekau lalonai Dirava bona taunimanima ese ia idia ura henia bada.